Month: November 2019

Боловсрол, соёл, шинжлэх ухаан, спортын сайд Ё.Баатарбилэг Бүгд Найрамдах Казахстан Улсаас Монгол Улсад онц бөгөөд бүрэн эрхт элчин сайд Жалгас Адилбаевыг хүлээн авч уулзлаа.

Хоёр улсын боловсролын салбарын хамтын ажиллагаа урт хугацааны түүхтэй бөгөөд сүүлийн жилүүдэд улам өргөжин бэхжиж, тухайлбал боловсролын баримт бичиг, эрдмийн зэрэг цолыг харилцан хүлээн зөвшөөрөх тухай хэлэлцээр байгуулагдаж, Засгийн газрын тэтгэлгээр суралцах оюутны тоог таваас 25 болгон нэмэгдүүлсэн зэргийг талууд онцлон тэмдэглэв.

Цаашид боловсролын салбарт, түүний дотор сургуулийн өмнөх боловсролын болон хөгжлийн бэрхшээлтэй хүүхэдтэй ажилладаг багш нарыг бэлтгэх сургалтын хөтөлбөр, төлөвлөгөө, эрх зүйн орчныг боловсронгуй болгох, тэднийг урт, богино хугацаагаар сурган бэлтгэх чиглэлд хамтран ажиллах хүсэлтэй байгаагаа илэрхийллээ.

Мөн түүх, археологийн хамтарсан судалгаа, шинжилгээ хийх, эрдэмтдийн бүтээлийг харилцан хэвлэх, урлаг, спортын хамтарсан бэлтгэл сургуулилт хийх, туршлага солилцох зэрэг хамтран ажиллах боломжуудын талаар санал солилцов.

Нийслэлийн Баянзүрх дүүргийн 23 дугаар хороонд гал гарсны улмаас байшин, гражинд байсан машин шатсан хэрэг өнгөрсөн шөнө 04.42 цагт гарчээ.

Тодруулбал, тус дүүргийн Онцгой байдлын хэлтсийн Гал түймэр унтраах, аврах ангийн алба хаагчид 04.50 цагт очиж, 10х5 метрийн хэмжээтэй байшингийн дээврийн хэсэг, 5х4 метрийн хэмжээтэй гражийн дээврийн хэсэг болон Приус-20 загварын суудлын автомашин тус тус шатаж байсныг 40 минут ажиллаж унтраасан байна.

Хүйтний улиралд нэмэгдэх хандлагатай байгаа амьсгалын замын халдварт өвчнөөс гэр ахуйн нөхцөлд хэрхэн урьдчилан сэргийлэх аргуудыг энэхүү зөвлөмжөөс сонирхоорой.

Гэр орондоо чийгтэй цэвэрлэгээ тогтмол хийх, цэвэр агаар оруулахаас гадна гарын ариун цэврийн дэглэмийг сайтар сахиж, илчлэг сайтай хоол хүнс, витаминаар баялаг аарц, чацарганын шүүс хэрэглэж заншсанаар үр хүүхдээ амьсгалын замын халдварт өвчнөөс урьдчилан сэргийлж, эрүүл өсч бойжих нөхцөл бололцоог нь хангаж буй хэрэг юм.

Боловсрол, соёл, шинжлэх ухаан, спортын яамнаас соёл, урлагийн байгууллагын удирдах ажилтнуудад зориулан жил бүр зохион байгуулдаг “Соёл, урлагийн байгууллагын тогтвортой хөгжил-удирдахуйн шинэлэг хандлага” дөрөв дэх удаагийн сургалтыг 2019 оны 11 дүгээр сарын 11-12-ны өдөр зохион байгууллаа.

Сургалтын нээлтэд Боловсрол, соёл, шинжлэх ухаан, спортын дэд сайд Г.Ганбаяр, Төрийн захиргаа, удирдлагын газрын дарга О.Хуягцогт, Соёл, урлагийн бодлогын газрын дарга Б.Сэргэлэн нар оролцож Төрөөс соёлын талаар баримталж буй бодлого, соёл, урлагийн салбарын 2019 оны төсвийн орлого, зарцуулалт, Төрийн албаны тухай хуулийн хэрэгжилтийн талаар мэдээлэл өгөв.

Сургалтад МУИС, ШУТИС, СУИС, Отгонтэнгэр их сургуулийн эрдэмтэн багш, Азийн сан, “Соёл, урлаг, хэвлэл мэдээллийн төслийн менежмент, зөвлөгөө” НҮТББ болон ХБНГУлсын Соёл, урлаг хэвлэл мэдээлэл, эдийн засгийн хүрээлэнгийн сургагч багш нар оролцож “Соёл, урлагийн байгууллагын тогтвортой хөгжлийг менежментийн тогтолцоогоор дэмжих нь”, “Оюуны өмчийн салбар дахь гэрээ, эрх зүйн зохицуулалт”, “Баримт бичиг боловсруулах арга зүй, баримт бичгийн стандарт”,”Удирдах ажилтны манлайлал, ёс зүй”, “Хүний нөөцийн орчин үеийн хандлага”, “Хандлага, харилцааны ур чадвар” чиглэлээр шинэ мэдлэгийг төрийн өмчийн соёл, урлагийн байгууллагын 40 гаруй удирдах ажилтан, менежерт олголоо.

Нийслэл, дүүргийн хэмжээнд Эрүүгийн хуулийн тусгай ангид заасан мансууруулах эм, сэтгэцэд нөлөөт бодистой холбоотой гэмт хэрэг үйлдэж, шүүхээс хорих ял оногдуулахгүйгээр тэнсэх албадлагын арга хэмжээ авагдсан 60 гаруй хүнийг Нийслэлийн прокурорын газраас гэнэтийн байдлаар шалгаж шинжилгээнд хамруулахад 26 хүн дээрх бодисыг хэрэглэсэн болох нь Шүүх шинжилгээний үндэсний хүрээлэнгийн шинжээчийн дүгнэлтээр тогтоогджээ.

Иймд тус газраас шинжилгээний дүнг үндэслэн мансууруулах эм, сэтгэцэд нөлөөт бодис хэрэглэсэн хүмүүсийн шүүхийн шийдвэрийг хүчингүй болгуулж, Эрүүгийн хуульд заасан хорих ялаар солиулах ажлыг эхлүүлээд байна.

Цаашид дээрх арга хэмжээг нийслэл, дүүргийн хэмжээнд тогтмол зохион байгуулж, Прокурорын байгууллагаас 2019 онд дэвшүүлсэн зорилтыг хэрэгжүүлэх, мансууруулах бодистой холбоотой гэмт хэрэг, зөрчилтэй тэмцэхэд хууль сахиулах байгууллагуудын үйл ажиллагааг уялдуулан зохион байгуулж ажиллахад Нийслэлийн прокурорын газраас онцгой анхаарч байна.

ОБЕГ-ын дэд дарга, хурандаа Ц.Ганзориг Австрали улсын Куинсланд мужийн гамшиг, ослын үед үүрэг гүйцэтгэдэг “Royal Flying Doctor Service” буюу “Нисдэг эмч нарын алба”, “Гамшгийн удирдлагын төв” болон “Хүмүүнлэгийн тусламжийн агуулах”-ын үйл ажиллагаатай танилцаж, холбогдох албан тушаалтнуудтай хоёр талын уулзалт хийлээ.

“Нисдэг эмч нарын алба”-ны Куинсланд муж дахь салбар нь гамшиг, осол тэр дундаа авто ослын улмаас хүндээр бэртэж гэмтсэн алслагдсан болон хөдөө орон нутгийн иргэдэд эмнэлгийн анхны тусламжийг үзүүлж, дараагийн шатны эмнэлэгт шуурхай хүргэх үйл ажиллагаа эрхэлдэг төрийн байгууллага юм.

Тус мужийн алба нь өдөрт 30, сард 1000 орчим дуудлага хүлээн авч, иргэдэд эмнэлгийн яаралтай тусламж болон зөөвөрлөх үйлчилгээг үнэ төлбөргүй үзүүлдэг байна. Мөн яаралтай тусламж болон өвчтөнг тээвэрлэхээс гадна өөрсдийн бэлтгэл бэлэн байдал, ур чадвараа байнга дээшлүүлэх зорилгоор танхимын болон дадлага сургалтыг байнга зохион байгуулдаг. Анх 1917 онд үндэс сууриа тавьснаас хойш өнөөг хүртэл өдөрт 1000 орчим дуудлагад 6 мужийн алба хүрч ажиллаж байгааг энэ үеэр онцоллоо.

Харин Куинсланд мужийн Гал, онцгой байдлын алба нь мужийн Гамшгийн удирдлагын төвийн өдөр тутмын үйл ажиллагааг удирдан ажилладаг. Тус төв нь нийт орон нутгийн галын 36000 сайн дурынхан, мужийн Онцгой байдлын албаны 6000 сайн дурынхан, 2200 мэргэжлийн гал сөнөөгч, 2000 туслах гал сөнөөгчтэйгээр байгалийн болон техникийн гаралтай гамшиг, ослын үед үйл ажиллагаа явуулдаг байна. Одоогийн байдлаар тус төв Куинсланд мужид гараад байгаа ойн түймрийг унтраах үйл ажиллагааг 24 цагийн турш тасралтгүй хийж байна.

Түүнчлэн Хүмүүнлэгийн тусламжийн агуулах нь Австрали Улсын Гадаад хэрэг, худалдааны яамны харьяа ба гамшигт нэрвэгдсэн улс орнуудад тус агуулахаас хүмүүнлэгийн тусламжийг хүргэх ажиллагааг шуурхай зохион байгуулдаг. Одоогийн байдлаар тус агуулахад 2000 өрхийн 10 мянган хүнд хүргэх хүмүүнлэгийн тусламжийн бараа бүтээгдэхүүн бэлэн хадгалагдаж байгаа аж. Тус агуулахын нийт талбайн гуравны нэг хэсгийг олон улсын бусад байгууллагын бараа, бүтээгдэхүүнийг хадгалахад ашигладаг байна.

Өнгөрөгч 7 дугаар сард Хөшигийн хөндийн шинэ нисэх буудлын нээлтэд оролцохоор Япон Улсын Газар, дэд бүтэц, тээвэр, аялал жуулчлалын дэд сайд Ясухиро Шинохара Монгол Улсад хүрэлцэн ирсэн билээ. Энэ үеэр УИХ, Засгийн газрын гишүүн, Зам, тээврийн хөгжлийн сайд Б.Энх-Амгалан, дэд сайд Ясухиро Шинохараг хүлээн авч уулзаж, хоёр орны зам, тээврийн салбарын хамтын ажиллагааны талаар санал солилцсон юм.

Уулзалтын үеэр Зам, тээврийн хөгжлийн сайд Б.Энх-Амгалан Монголд гибрид хөдөлгүүртэй автомашины тоо ихээр нэмэгдсэн тул ашиглалтаас хасагдсан батерейг дахин боловсруулах, устгах шаардлага бийг дурдаад ашиглалтаас хасагдсан автомашин, түүний хар тугалганы, никел металлын, никель устөрөгчийн, литийн ионы зэрэг аккумлятор дахин боловсруулах үйлдвэрийг Япон Улсын техникийн туслалцааны хүрээнд Монголд байгуулах саналыг тавьсан билээ.

Тэгвэл дээрх асуудал тодорхой үр дүнгээ өгч “Ашиглалтаас хасагдсан автотээврийн хэрэгслийг дахин боловсруулах, үйлдвэрлэл үйлчилгээг хөгжүүлэх нь” сэдэвт олон улсын форум манай улсад зохион байгуулагдлаа.

Зам, тээврийн хөгжлийн яам, Байгаль орчин, аялал жуулчлалын яам, Авто тээврийн үндэсний төв, Тээврийн цагдаагийн алба, НҮБ-ын Аж үйлдвэрийн хөгжлийн байгууллага, БНСУ-ын Койка олон улсын байгууллага, “Монгол авто ресаикл парк” ХХК зэрэг төрийн болон олон улсын байгууллагууд хамтран Монгол Улсад ашиглалтаас хасагдсан авто тээврийн хэрэгслийг цуглуулах, задлах, ангилах, сэргээн ашиглах, дахин боловсруулах, устгах чиглэлээр сүүлийн үеийн дэвшилтэт технологийг ашиглан, үйл ажиллагаа явуулах, эрх зүйн орчныг бий болгох зорилгоор энэхүү форумыг зохион байгуулав.

Зам, тээврийн хөгжлийн яам дээрх асуудлыг бодлогын хэмжээнд анхаарч, эрхзүйн орчныг бүрдүүлэхээр энэ сарын 17-ны өдрийг хүртэл “Тээврийн хэрэгслийн хог хаягдлыг цэвэрлэх, цуглуулах, ангилах, тээвэрлэх, дахин боловсруулах, сэргээн ашиглах, устгах, булшлах журам”-д санал авч байгаа аж.

Сэргээгдэх эрчим хүч үйлдвэрлэгчдийн холбоо, Хил хамгаалах ерөнхий газар, “Мобиком корпораци” ХХК хооронд байгуулсан “Монгол Улсын хилийн бүс нутгийн цахилгаан хангамжийг сайжруулахад хамтран ажиллах санамж бичиг”-ийн хүрээнд Хилийн 0294 дүгээр салбар 10 дугаар сарын 25-нд сэргээгдэх эрчим хүчинд холбогдож, цахилгааны эх үүсгэвэртэй болсон билээ. Тус ажлыг Сэргээгдэх эрчим хүч үйлдвэрлэгчдийн холбоо, “Мобиком корпораци” ХХК, Сопоко ХХК, “Монхорус интернейшнл” ХХК-тай хамтран 45 сая төгрөгийн буцалтгүй тусламжаар Хилчдийн нийгмийн баталгааг хангах зорилтын хүрээнд хийгдэж, нээлтийн үйл ажиллагааг 11 дүгээр сарын 10-ны өдөр заставын байрлалд зохион байгууллаа.

Арга хэмжээнд ангийн захирагч, хурандаа Ж.Жамсрандорж, “Мобиком корпораци” ХХК-ийн Техник төлөвлөлтийн албаны ахлах инженер, эрчим хүчний менежер Х.Хаш-Эрдэнэ, Сэргээгдэх эрчим хүч үйлдвэрлэгчдийн холбооны ерөнхий нарийн бичгийн дарга Э.Мягмардорж, ХХТХГ-д, орон нутгийн иргэд оролцлоо.