Month: November 2019

Улаанбаатар-Инчон чиглэлд Кореан Эйр компанийн онгоцоор зорчиж явахдаа онгоцны үйлчлэгч бүсгүйн өгзгөнд хүрсэн хэрэгт буруутгагдан, шалгагдаж байсан Монгол улсын Үндсэн хуулийн цэцийн даргыг долоон сая вонн буюу 6008 ам.доллараар торгон, эх орон руугаа буцахыг нь зөвшөөрсөн гэж http://www.ajudaily.com/ мэдээллээ.

52 настай Доржийн Одбаярыг хүнд хэрэг үйлдээгүй тул шүүх хурал хийлгүйгээр хэргийг хялбаршуулсан журмаар шийдсэн, тэрбээр онгоцонд “согтуу байсан, юу хийснээ санахгүй байна” хэмээн мэдүүлсэн байна.

Одбаяр болон Монголын өөр нэг албан тушаалтныг 10 дугаар сарын 31-ний өдөр Инчоны нисэх буудал дээр цагдаагийнханд хүлээлгэн өгсөн юм. Дараа нь тэднийг сулласан ч Одбаяр Өмнөд Солонгост эргэн ирж мэдүүлэг өгсөн гэж эх сурвалж дамжуулжээ.

Өмнөд Солонгост нислэгийн аюулгүй байдалтай холбоотой хууль журмыг ихээхэн чангатгасан бөгөөд онгоцны үйлчлэгчдийн эсрэг үйлдэл гаргавал үйлчлэгчид хүч хэрэглэхийг зөвшөөрсөн байдаг. Мөн бэлгийн дарамттай холбоотой гэмт хэрэгт 10 жил хорих ял эсвэл 15 сая хүртэлх воноор торгох журмыг MeToo хөдөлгөөн өрнөснөөс хойш батласан хэмээн эх сурвалж мэдээлсэн байна.

Тээврийн цагдаагийн албанаас хийсэн шалгалтаар өнгөрсөн шөнө түүхий нүүрс хадгалж хэрэглэсэн 2, зөөж тээвэрлэсэн 1 зөрчил илэрчээ.

Түүхий нүүрс ачсан тээврийн хэрэгслийг түр саатуулсан байна.

Илэрсэн зөрчлүүдийг дурдвал:

1. Чингэлтэй дүүргийн 18 дугаар хороо, иргэн С нь түүхий нүүрс хэрэглэж, амбаарт нь 100 кг түүхий нүүрс байсан
2. Сүхбаатар дүүргийн 14 дүгээр хорооны нутаг дэвсгэрт үйл ажиллагаа явуулдаг автобус баазын харуулын постод 25 кг түүхий нүүрс хэрэглэж байсан
3. Хан-Уул дүүргийн 14 дүгээр хороо, Зуун модны замд Hyundai Porter маркийн автомашины жолооч О нь 75 кг сайжруулсан түлш тээвэрлэж явсныг тус тус илрүүлжээ.

Цаг агаар хүйтэрч байгаа боловч иргэдийг агаарын чанарыг сайжруулах бүс рүү түүхий нүүрс нэвтрүүлэхгүй, сайжруулсан шахмал түлшийг бүсээс гаргахгүй байхыг ТЦА-наас анхааруулж байна.

Нийслэлийн хэмжээнд арваннэгдүгээр сарын 11-ний байдлаар амбулаторийн 83.240 үзлэг хийгдсэнээс томуу, томуу төст өвчтэй 3527 тохиолдол оношлогджээ. Энэ нь нийт үзлэгийн 4.2 хувийг эзэлж байгаа нь өнгөрсөн 7 хоногийн дундаж түвшнээс 0.2 хувь, өнгөрсөн оны мөн үеэс 0.5 хувиар тус, тус нэмэгдсэн үзүүлэлттэй байна.

Нийт өвчлөгсдийн 41.6 хувийг 0-1 нас, 26.7 хувийг 2-4, 15.4 хувийг 5-9 насны хүүхдүүд эзэлж байгаа юм. Хүүхдийн түргэн тусламжийн 1048 дуудлага ирснээс 39.6 хувь нь томуу, томуу төст өвчний тусламж, үйлчилгээг авчээ.

Нийслэлийн харьяа эмнэлгүүдийн хувьд, шинээр хэвтсэн өвчтөний 122 буюу 47.5 хувийг нь томуу, томуу төст өвчтэй өвчтөнүүд эзэлж байна.

Амьсгалын замын цочмог халдвар болон томуу, томуу төст өвчний үед эцэг эхчүүд бага насны хүүхдэдээ тавих анхаарал халамжаа сайжруулж, илчлэг сайтай хоол ундаар дархлааг нь дэмжих, дулаан хувцаслах, олон нийтийн газраар дагуулж явахгүй байх, амны хаалт тогтмол зүүлгэх хэвших, өвчилсөн тохиолдолд дур мэдэн эмчлэхгүй байх, ариун цэврийн дэглэм сайтар сахиж, шаардлагатай тохиолдолд эмнэлгийн байгууллагад хандахыг Нийслэлийн Эрүүл мэндийн газраас зөвлөж байна

Онцгой байдлын байгууллагаас төв, орон нутгийн анги, байгууллагын хэмжээнд ой, хээрийн түймрээс урьдчилан сэргийлэх ажлыг эрчимжүүлэн, Улсын Онцгой комиссын 2019 оны 02 дугаар сарын 20-ны өдрийн “Ой, хээрийн гал түймрээс урьдчилан сэргийлэх, тэмцэх зарим арга хэмжээний тухай” 01 дүгээр албан даалгаврын хэрэгжилтийг ханган ажиллалаа.

Мөн Монгол Улсын Ерөнхийлөгчийн Тамгын газар, Үндэсний аюулгүй байдлын зөвлөл, “Гал түймрийн гамшгийн хохирлыг бууруулахад бүх нийтийн оролцоо” сэдэвт хэлэлцүүлгийг зохион байгуулж, хэлэлцүүлгээс гарсан дүгнэлт, саналыг нэгтгэн 11 заалт бүхий зөвлөмжийг гарган хэрэгжүүлэн ажилласан юм.

Монгол Улсын Засгийн газар, Бүгд Найрамдах Польш улсын Засгийн газар хоорондын нөхцөлт зээлийн хүрээнд Гал түймэртэй тэмцэх тоног төхөөрөмжийг шинэчлэх 3 сая еврогийн өртөг бүхий 3 төрлийн 14 автомашин болон 3 нэр төрлийн 42 багаж хэрэгслийг худалдан авч, Онцгой байдлын ерөнхий газар, Нийслэлийн Онцгой байдлын газар, Архангай, Баянхонгор, Баян-Өлгий, Дархан-Уул, Дорнод, Өмнөговь, Сүхбаатар, Төв, Хөвсгөл аймгийн Онцгой байдлын газруудад хүлээлгэн өглөө.

Мөн Азийн хөгжлийн банкны хөрөнгө оруулалтаар “Зуд болон ой, хээрийн түймэртэй тэмцэх олон нийтийн чадавхыг бэхжүүлэх /Grant 9178-Mon/ төсөл”-н хүрээнд БНХАУ-ыд үйлдвэрлэсэн нийт 262 ширхэг ой, хээрийн түймэр унтраах зориулалттай үлээгч аппаратыг Дорнод, Сүхбаатар, Хөвсгөл, Говь-Алтай аймгуудын Онцгой байдлын газарт хүлээлгэн өгсөн бол 54 сая төгрөгийн өртөг бүхий бага оврын автомашинд зориулсан “Чиргүүлтэй усны сав”-ыг Дорнод, Сүхбаатар, Хөвсгөл, Говь-Алтай аймгийн 12 сумын мэргэжлийн ангиудад нийлүүллээ.

Төв, орон нутгийн Онцгой байдлын байгууллагууд 21 аймгийн 334 сум, нийслэлийн 9 дүүргийн 551 Гамшгаас хамгаалах алба, мэргэжлийн ангийн 352 гамшгаас хамгаалах төлөвлөгөөг Монгол Улсын Шадар сайдын 120 дугаар тушаалын дагуу шинэчлэн шаардлагатай тодотгол хийж, 23,495 ажилтан, алба хаагч, 2759 автомашин, техник, тоног төхөөрөмж, 19098 багаж, хэрэгслийг шалгаж бэлэн байдлыг хангаад байна.

Он гарсаар 11 дүгээр сарын 11-ний өдрийн байдлаар Улаанбаатар хот, Хэнтий, Дорнод, Сэлэнгэ, Хөвсгөл, Булган, Төв, Увс, Завхан, Дорноговь, Дундговь, Дархан-Уул, Баян-Өлгий, Сүхбаатар зэрэг 14 аймгийн 66 суманд 121 удаагийн ой, хээрийн түймэр гарч 50306,8 га ой, 261491,9 га хээрийн талбай түймэрт өртөж 13 байшин, 4 гэр шатсан байна.

Түймрийн улмаас урьдчилсан байдлаар байгаль экологид 23.7 тэр бум төгрөг, түймрийг унтраахад 449.6 сая төгрөгийн зардал гарч, нийт 24.2 тэрбум төгрөгийн хохирол учирчээ.

Хуучирч, хэрэглэхгүй байгаа автомашины эд ангийг дахин боловсруулах талаар ЗТХЯ-наас зохион байгуулсан уулзалтаар хөндлөө.

ЗТХ-ийн сайд Б.Энх-Амгалан өнгөрсөн 7-р сард манай улсад айлчилсан Япон улсын Газар, дэд бүтэц, тээвэр, аялал жуулчлалын дэд сайд Ясухиро Шинохаратай уулзах үеэр Монголд гибрид хөдөлгүүртэй автомашины тоо ихээр нэмэгдсэн тул ашиглалтаас хасагдсан батерейг дахин боловсруулах, устгах шаардлага байгаа талаар санал тавьж уулзаж байсан юм. Уулзалтын хүрээнд манай талаас ашиглалтаас хасагдсан автомашин, түүний хар тугалга, никел метал, никел устөрөгчийн, литийн ионы зэрэг аккумлятор дахин боловсруулах үйлдвэрийг Японы техникийн туслалцааны хүрээнд Монголд байгуулах саналыг тавьсан билээ.

Дээрх саналын хариуд Ясухиро Шинохара сайд холбогдох байгууллага, албан тушаалтанд саналыг хүргүүлж, анхааран ажиллахаа мэдэгдээд “Приус” автомашинаас гардаг хаягдал батерейг Монголд дахин боловсруулах үйлдвэр барих бус харин “Тоёота” компани Монгол Улсад хор хохирол учруулахгүй байх үүднээс хаягдал батерейг Япон улс руу буцаан татах саналтай байгааг дуулгасан.

ЗТХЯ-нд өчигдөр болсон “Ашиглалтаас хасагдсан автотээврийн хэрэгслийг дахин боловсруулах, үйлдвэрлэл үйлчилгээг хөгжүүлэх нь” олон улсын уулзалт чухам дээрх сэдвийг хөндлөө. Уулзалтаар Монгол Улсад ашиглалтаас хасагдсан авто тээврийн хэрэгслийг цуглуулах, задлах, ангилах, сэргээн ашиглах, дахин боловсруулах, устгах чиглэлээр сүүлийн үеийн дэвшилтэт технологийг ашиглан, үйл ажиллагаа явуулах, эрх зүйн орчныг бий болгох талаар хэлэлцлээ.

ЗТХЯ энэ талаар бодлогын хэмжээнд анхаарч, эрхзүйн орчныг бүрдүүлэхээр энэ 11-р сарын 17-ныг хүртэл “Тээврийн хэрэгслийн хог хаягдлыг цэвэрлэх, цуглуулах, ангилах, тээвэрлэх, дахин боловсруулах, сэргээн ашиглах, устгах, булшлах журам”-д санал авч байна.

Уулзалтад ЗТХЯ, БОАЖЯ, АТҮТ, ТЦА, НҮБ-ын Аж үйлдвэрийн хөгжлийн байгууллага, БНСУ-ын “Койка” олон улсын байгууллага, “Монгол авто ресаикл парк” ХХК зэрэг төрийн болон олон улсын байгууллагуудын төлөөлөл, мэргэжилтнүүд оролцлоо.

БНХАУ-ын Ханжоу хотноо анх удаагаа зохион байгуулагдсан олон улсын эрэн хайх, аврах багийн “Цэнхэр дөл” галын спортын тэмцээнд Онцгой байдлын байгууллагын баг тамирчид амжилттай оролцоод ирлээ.

Энэ сарын 05-11-ний өдрүүд зохион байгуулагдсан тус тэмцээнд НОБГ-ын тэргүүн дэд дарга, дэд хурандаа Н.Нямхорлоогоор ахлуулсан 10 алба хаагч оролцсон юм. Тэмцээнд 15 орны 200 орчим алба хаагчид оролцож, 9 төрлөөр өрсөлдөж, аваргуудаа шалгаруулсан байна.

Монгол Улсаа төлөөлөн оролцсон Онцгой байдлын байгууллагын алба хаагчид амьсгалын бие даасан төхөөрөмж үүрч 5000 метрийн зайн гүйлт, саадтай 100 метрийн гүйлт, 8 метрийн гүнд багаар шумбалт хийж автомашинаас нэрвэгдэгч гаргах багийн шумбалт, завь жолоодож арал дээр үлдсэн 2 нэрвэгдэгчийг татан гаргах, нурангид дарагдсан нэрвэгдэгчийг аврах гэсэн төрлүүдэд амжилттай оролцсон юм.

Мөн тэмцээний үеэр зохион байгуулагдсан 15 орны алба хаагчидтай туршлага солилцох хамтарсан үзүүлэх сургуулийн нурангиас аврах ажиллагааны багт ажиллаж, хаалтын ажиллагааны нэгдсэн үзүүлэх тоглолтод амжилттай оролцлоо.

Түүнчлэн алба хаагчид Ханжоу хотын Шаошио дүүргийн Аврах, гал унтраах ангийн үйл ажиллагаа болон аврах багаж хэрэгсэл автомашин техник хэрэгсэлтэй танилцаж, туршлага судалсан.