Month: November 2019

БНХАУ-ын Засгийн газраас Монгол Улсын Засгийн газарт олгох 350 сая юанийн буцалтгүй тусламжийн хөрөнгөөр Нийслэлийн Сүхбаатар дүүргийн есдүгээр хорооны нутаг дэвсгэрт “Ногоон нуур 1008 айлын орон сууц” төсөл хэрэгжиж байна.

Төсөл хэрэгжүүлэх хэлэлцээрийг Барилга, хот байгуулалтын яам, БНХАУ-ын тал үзэглэж, санхүүжилтийн асуудал шийдвэрлэгдэн, ерөнхий төлөвлөгөө батлагдаад байгаа юм.

Барилга, хот байгуулалтын сайдын 2019 оны 11 сарын 11-ний өдрийн шуурхай хурлаар төсөл хэрэгжүүлэх нэгжийн зохицуулагч Л.Ганбаатар “Ногоон нуур 1008 айл орон сууц”-ны төслийн явцын талаар мэдээлэл хийв.

Төслийн хүрээнд Монголын талын хариуцсан газар чөлөөлөх, зураг төслийг бэлэн болгох, шаардлагатай дэд бүтцийг бүрэн гүйцэтгэх зэрэг төслийн барилгажих талбайг бэлтгэх ажлуудыг ирэх оны 2020 оны 4-р сараас өмнө бэлэн болгохоор БХБЯ-ны харьяа Төсөл хэрэгжүүлэх нэгж ажиллаж байгааг танилцуулав.

Энэхүү төслийн захиалагч нь Монгол Улсын Засгийн газар, Барилга хот байгуулалтын яам бөгөөд харьяа Төсөл хэрэгжүүлэх нэгжээр дамжуулан хяналт тавин ажиллах юм.

2019 оны 10-р сарын 23-25-ны өдрүүдэд БХБЯ-ны Төсөл хэрэгжүүлэх нэгж, зураг төслийн ажлыг гүйцэтгэгч компанийн төлөөлөл бүхий ажлын хэсэг БНХАУ-ын Бугат хотод зорчиж “Ногоон нуур 1008 айл орон сууц” барилгын төслийн ажлын зураг болон төсвийг хятад хэл дээр бэлтгэж хүлээлгэн өгсөн байна.

Ингэснээр төслийн эрх зүйн баримт бичгүүд албажих, барилга угсралтын ажлын ерөнхий гүйцэтгэгчийг шалгаруулах ажил хүлээгдэж байгаа бөгөөд одоогоор төслийн бэлтгэл ажил 60 гаруй хувьтай явж байна.

Төсөл хэрэгжүүлэх байршилд 2012-2013 онд газар чөлөөлөлт хийгдсэн бөгөөд Нийслэлийн засаг даргын 2018 оны 07 дугаар сарын 06-ны өдрийн А/617 дугаар захирамжаар 3.8 га газар эзэмших эрхийг хуучин нэрээр Нийслэлийн гэр хорооллын дэд бүтцийн газарт шилжүүлээд байна.

Батлагдсан хэсэгчилсэн ерөнхий төлөвлөгөөнд тусгагдсанаар 1.9 га газар буюу 36 нэгж талбарыг чөлөөлөх шаардлага бий бөгөөд эдгээр байршилд авто зам, авто зогсоол, ногоон байгууламж, 960 хүүхдийн сургууль, 240 хүүхдийн цэцэрлэгийн бүтээн байгуулалтын ажил хийгдэнэ. “Ногоон нуур 1008 айлын орон сууц” төсөл 36 сарын хугацаанд хэрэгжих бөгөөд 21 давхар, зоорьтой, 8 блок барилга баригдахаар төлөвлөгдөөд байгаа юм.

Онцгой байдлын ерөнхий газрын дарга, хошууч генерал Т.Бадрал Баянхонгор аймгийн Онцгой байдлын газрын үйл ажиллагаа, өвөлжилтийн бэлтгэл ажилтай танилцаж байна.

Засгийн газрын 2018 оны 114 дүгээр тогтоолоор Баянхонгор аймгийн Бууцагаан суманд өнгөрсөн зургадугаар сард Гал түймэр унтраах, аврах 72 дугаар ангийг байгуулан, үйл ажиллагааг нь эхлүүлсэн.

Тус ангийн барилга нь олон жил ашиглагдаагүй, хуучин байгууламж байсан. Аймаг, орон нутгаас шинэ гал түймэр, аврах анги байгуулахад 70 гаруй сая төгрөгийн дэмжлэг үзүүлж, алба хаагчид өөрсдийн нөөц бололцоог ашиглан богино хугацаанд засварлаж, ангийн барилга, 15 айлын орон сууцын хамт ашиглалтад оруулаад байна.

Бууцагаан сум 4000 өрхтэй. Энэ хугацаанд гал түймрийн бүртгэлтэй зургаан дуудлага, эрэн хайх, аврах ажиллагааны хоёр дуудлагаар ажилласан байна. Шуурганд төөрөх, шавар, голд усанд автомашинтайгаа суух дуудлагууд зохилдог байна. Өнгөрсөн долдугаар сард төөрч алга болсон Франц улсын хоёр, Герман улсын таван иргэнийг эрэн хайх, аврах ажиллагааг зохион байгуулж эсэн мэнд олжээ.

Гал түймэр унтраах, аврах 72 дугаар анги Баянхонгор аймгийн 6, Говь-Алтай аймгийн 5 суманд гамшгаас хамгаалах төрийн үйлчилгээг шуурхай үзүүлэн ажиллаж байна.

Авлигатай тэмцэх газрын нэр барьж тендерт дэмжлэг хүссэн, шалгагдаж байгаа асуудал дээр өмгөөлөгчөөр туслалцаа үзүүлнэ, хамаарал бүхий этгээдээ ажилд оруулах хүсэлт тавьсан зэрэг тохиолдлыг тус газрын Аюулгүй байдал, хяналт шалгалт, нууцын албанаас дотоод хяналтаараа илрүүлэн, тэдгээр хууль бус үйлдлийг таслан зогсоож харьяаллын дагуу холбогдох байгууллагад шилжүүлэн шалгуулж байна.

Тухайлбал, иргэн Б нь 2019 оны 06 дугаар сард “Гаалийн ерөнхий газарт АТГ-аас ажлаар явж байна, хувийн тендерийн асуудал дээр дэмжлэг үзүүлээд өгөөч” гэж гаалийн байгууллагын удирдах албан тушаалтантай уулзсан. 2019 оны 05 дугаар сард иргэн Э нь АТГ-т шалгагдаж байгаа хэргийг шийдвэрлэхэд өмгөөлөгч олж туслалцаа үзүүлж өгнө гэж бусдад амласан байна.

Түүнчлэн төрийн албан хаагчид нэгнийгээ АТГ-аас дуудаж байгаа мэтээр утсаар ярьж ирүүлсэн асуудал гарав. 2019 оны 10 дугаар сард Авто тээврийн үндэсний төвийн мэргэжилтэн Ж нь хамт ажилладаг Д руу утсаар ярин АТГ-аас дуудаж байна гэж хэлэн байгууллагын нэр барьжээ. Иргэн Ж-ийн дээрх үйлдэл нь Монгол Улсын Зөрчлийн тухай хуулийн 15 дугаар бүлгийн 15.21.4 дэх хэсэгт заасан зөрчсөн тул энэ талаар мэдэгдэж анхааруулсан болно.

Иргэд, олон нийтийн зүгээс авлига, ашиг сонирхлын зөрчил, авлигын гэмт хэргийн талаарх мэдээллийг шуурхай мэдээлэхээс гадна АТГ-ын болон албан хаагчийн нэр барьж хууль бус хүсэлт, шаардлага тавьсан энэ мэт үйлдлийн талаарх мэдээллийг 110 тусгай дугаарт өгч хамтран ажиллахыг хүсэж байна.

УИХ-ын гишүүн асан Д.Гантулгад холбогдох шүүх хурал энэ долоо хоногт болж түүнд Хан-Уул дүүгийн анхан шатны шүүхээс хоёр жилийн хорих ял оноосон. Түүнийг бусдыг хүчирхийлсэн болон хүчирхийлэхийг завдсан хэрэгт буруутгаж хоёр жилийн ял оноосон юм. Тэгвэл Д.Гантулга тус шийдвэрийг хүлээн зөвшөөрөхгүй, давж заалдах ажээ.

Нийслэлийн Захирагчийн ажлын албанаас Улаанбаатар хотын замын түгжрэлийг бууруулах ажлын хүрээнд хэд хэдэн санаачилга гаргаж байсан ч иргэдийн эсэргүүцэлтэй тулгарч, зогссон. Гэхдээ өнөөдрийг хүртэл авто замын түгжрэлийг бууруулах ажлын хүрээнд олон судалгаа хийгдэж байсны нэг нь энэ долоо хоногийн баасан гаригаас хэрэгжихээр болсон байна.

Тодруулбал, арваннэгдүгээр сарын 15-наас эхлэн хүүхдийн автобус явж эхэлнэ. Нийслэлээс авто замын түгжрэлийг бууруулах зорилгоор Ерөнхий боловсролын 27 сургуулийн 3000 орчим хүүхдийг хоёр ээлжээр сургууль руу нь зөөхөөр болжээ. Үүнд хоёроос тавдугаар ангийн сурагчид хамрагдах юм. Нийт 40 автобус хүүхдэд үйлчилнэ.

Энэ ажлын хүрээнд Нийтийн тээврийн газраас хүүхэд тээвэрлэх автобусны аюулгүй байдлыг шалгах ажлууд хийгдэж байна.

Нийслэлийн Засаг дарга бөгөөд Улаанбаатар хотын Захирагч С.Амарсайхан Хууль тогтоомж, стандартын хэрэгжилтийг хангах зарим арга хэмжээний тухай захирамж гаргалаа.

Захирамжид “Холбогдох хууль тогтоомж, стандартын биелэлт, тохижилт, цэвэрлэгээний шаардлагыг хангуулах чиглэлээр худалдаа, үйлчилгээний газруудад хийсэн аттестатчиллын шалгалтын мөрөөр гүйцэтгэлийн хяналт хэрэгжүүлэхтэй холбогдуулан 2019 оны 11 дүгээр сарын 15-ны өдрийн 08:00-22:00 цагийн хооронд Улаанбаатар хотын нутаг дэвсгэрт архи, согтууруулах ундаа худалдах, түүгээр үйлчлэхийг түр зогсоож, хэрэгжилтэд хяналт тавьж ажиллахыг Нийслэлийн Цагдаагийн удирдах газар /Д.Ядамдорж/, Нийслэлийн Мэргэжлийн хяналтын газар /Л.Эрдэнэчулуун/, дүүргүүдийн Засаг дарга нарт тус тус үүрэг болгосугай” гэжээ.

Эрдэнэтээс Улаанбаатарын чиглэлд зорчих галт тэрэг 21 цаг 30 минутад хөдлөх буюу өвлийн цагийн хуваарьт шилжлээ.

Өмнө нь 18 цаг 35 минутаас зорчдог байсан нь иргэдэд багагүй хүндрэл учруулдаг байсан аж. Учир нь оройн 18 цагт явсан галт тэрэг маргааш өглөөнийхөө 5 цаг 55 минутад Улаанбаатар хотод очдог байжээ. Иймд иргэд цагийн хуваарьт өөрчлөлт оруулахыг удаа дараа хүссэний дагуу “Улаанбаатар төмөр зам” ХНН Эрдэнэт-Улаанбаатар чиглэлийн галт тэрэгний хуваарийг энэ сарын хоёрноос өвлийн цагийн хуваарьт шилжүүлсэн байна. Ингэснээр орой 21 цаг 30 минутад Эрдэнэтээс хөдөлсөн галт тэрэг маргааш өглөөнийхөө 7 цаг 55 минутад Улаанбаатар хотод очно. Эрдэнэт-Улаанбаатар чиглэлд өдөрт 1000 орчим иргэн галт тэргээр зорчдог байна.