Month: November 2019

Нийслэлийн Сүхбаатар дүүргийн 3 дугаар хороо, “Цамхаг” хотхоны 12 давхрын цонхноос 16 настай хүүхэд унаж амь насаа алджээ.

Тодруулбал “Хүүхэд байшин дээрээс унах гэж байна” гэсэн дуудлагыг 11 дүгээр сарын 19-ний өдрийн 16:03 цагт хүлээн авч Нийслэлийн аврах ангийн 8 алба хаагч, 2 автомашинтай 3 км замыг туулан 16:12 цагт очиход Баянгол дүүргийн 14 дүгээр хорооны оршин суугч А /16 настай, эмэгтэй/ тус байрны “Наран” их дэлгүүрийн өргөтгөлийн хоёрдугаар давхар дээр унасан байжээ.

Онцгой байдлын аврагчид охиныг дамнуурга, аврах олс ашиглан буулгаж, эмнэлгийн анхан шатны тусламж үзүүлэн эмнэлгийн байгууллагад хүлээлгэн өгсөн ч А нь эмнэлэгт хүргэгдэх замдаа нас барсан байна.

Иймд эцэг эхчүүд та бүхэн үр хүүхэддээ тавих анхаарал халамжаа дээшлүүлж сонор сэрэмжтэй байхыг анхааруулж байна.

Бүгд Найрамдах Индонез Улс дахь Монгол Улсын Өргөмжит консул Чандра Гозали, Монгол Улсын Соёлын элч Сэтионо Жуанди Дармоно нарын санаачилгаар 2019 оны 11 дүгээр сарын 16-ны өдөр Жакарта хотноо “Монгол дуурийн үдэш” арга хэмжээг амжилттай зохион байгууллаа.

Уг арга хэмжээнд оролцсон Монгол Улсын Гавьяат жүжигчин, Монгол Улсын Соёлын элч, дуурийн дуучин Э.Анхбаяр, дуурийн дуучин Д.Отгонжаргал (СТА), дуурийн дуучин Д.Дуйнхоржав (СТА), дуучин Н.Наранбаатар (СТА) нар Ж.Пуччини, Ж.Бизэ, Ж.Верди нарын сонгодог бүтээлүүдээс гадна Б.Тийл, Э.Пресли, Ж.Лоуренс, Э.Ньюли нарын бүтээл, түүнчлэн “Би Монгол хүн”, “Монголын тал нутаг” дуунуудаар үзэгчдийн сонор, мэлмийг мялааж, алга ташилт дүүрэн тоглолт болсон.

“Монгол дуурийн үдэш” арга хэмжээг БНИУ-ын Засгийн газар, бизнес, соёлын төлөөлөгчид болон Жакарта хотод суугаа гадаадын дипломат төлөөлөгчийн газруудын тэргүүн нар өргөнөөр үзэн сонирхсон бөгөөд бөгөөд энэхүү тоглолтыг Индонезийн хэвлэлд “Чингис хааны эх орны дуурийн дөрвөн дуучин Жакартад хүч түрэн орж ирэв” гэж онцолж байлаа.

Монгол Улсын Өргөмжит консул Чандра Мидхарта Гозали уг арга хэмжээний нээлтийн үеэр хэлсэн үгэндээ Монгол, Индонезийн хооронд 1956 онд дипломат харилцаа тогтоосноос хойш улс төр, эдийн засгийн салбарын хамтын ажиллагаа сүүлийн жилүүдэд эрчимтэй хөгжиж байгааг тэмдэглэж, цаашид эрчим хүч, боловсрол, худалдаа, нийгэм, боловсрол зэрэг олон салбарын хамтын ажиллагааг хөгжүүлэх боломжууд байгааг дурдаж, “Монголын дуурийн үдэш” нь соёл, аялал жуулчлалын хамтын ажиллагааг эрчимжүүлэх хүчин чармайлт үр өгөөжөө өгнө гэдэгт итгэж байгаагаа илэрхийлэв.

“Монгол дуурийн үдэш” арга хэмжээнд хүндэт зочноор оролцсон Монгол Улсын Гадаад харилцааны дэд сайд Б.Батцэцэг нээж хэлсэн үгэндээ Зүүн өмнөд Азийн бүс нутаг дахь Монгол Улсын чухал түншүүдийн нэг болох Индонезтэй бүхий л салбарт хамтын ажиллагааг өргөжүүлэн хөгжүүлэх сонирхолтой байгаагаа илэрхийлж, соёлын харилцаа нь хоёр орны ард түмнүүдийг харилцан ойлголцлыг бэхжүүлэхэд чухал үүрэг гүйцэтгэдгийг тэмдэглэв. Түүнчлэн дуулах нь нүүдэлчин ард түмний амьдралын чухал хэсэг бөгөөд энэ нь монгол хүн бүрийн цусанд шингэсэн соёл юм гэж онцлов.

Дэд сайд Б.Батцэцэг уг арга хэмжээг үзэж сонирхохоор хүрэлцэн ирсэн Индонез Улсад ажиллаж, амьдарч, сурч буй иргэдтэйгээ уулзаж, “Монгол дуурийн үдэш”-ийг зохион байгуулах санаачилгыг дэвшүүлсэн Индонез дах Монгол Улсын Өргөмжит консулын газрын ажилтан Ч.Нямдоржид талархал илэрхийлэв.

Эрдэнэт үйлдвэрийн зэс, молибдены хүдрийн флотацаас гарч байгаа хаягдал элсээр галд шатдаггүй, өндөр шинж чанартай барилгын материал үйлдвэрлэх судалгааны ажлыг Монгол Улсын Шинжлэх ухаан, технологийн сан 80 сая төгрөгөөр, БНХАУ-ын Шинжлэх ухаан, технологийн яам 1,45 сая юаниар санхүүжүүлэхээр болсон байна. Судалгааг Технологийн сургууль, БНХАУ-ын “BGRIMM” групптэй хамтран 2 жилийн хугацаанд гүйцэтгэхээр төлөвлөжээ. Хаягдал элсээр барилгын материал үйлдвэрлэх судалгааг амжилттай хийснээр Эрдэнэт үйлдвэрийн Хаягдлын аж ахуйн хуримтлагдсан элсээр нэмүү өртөг шингэсэн эцсийн бүтээгдэхүүн үйлдвэрлэн зах зээлд нийлүүлэх боломж бүрдэх юм. Хамтын ажиллагааны хүрээнд шинжилгээ, судалгааны лабораторийн тоног төхөөрөмжөөр хангах, “BGRIMM” группын лабораторид туршилт хийх ажлууд багтжээ.

Нийслэлийн Засаг даргын Тамгын газар, Монголын Хуульчдын холбоотой хамтран “Нийслэлийн иргэдийн хууль, эрх зүйн боловсролыг дээшлүүлэх” дэд хөтөлбөрийн хүрээнд сар бүрийн гурав дахь долоо хоногийн лхагва гарагт иргэдэд хууль, эрх зүйн үнэ төлбөргүй зөвлөгөө өгөх өдөрлөгийг тогтмол зохион байгуулдаг.

Энэ удаагийн өдөрлөг 11 дүгээр сарын 20-ны өдөр нийслэлийн Үйлчилгээний нэгдсэн төвийн “Дүнжингарав”, “Мишээл”, “Драгон”, 6 буудлын “Оргил” салбарууд болон нийслэлийн харьяа есөн дүүргийн Засаг даргын Тамгын газруудад 09:00-17:00 цагийн хооронд зохион явагдана.

Иргэн та өдөрлөгт хүрэлцэн ирснээр иргэний эрх зүй, захиргааны эрх зүй, эрүүгийн эрх зүй болон гэр бүлийн эрх зүй, гэрээний эрх зүй зэрэг өөрт тулгарч буй хууль, эрх зүйн асуудлын талаар үнэ төлбөргүй зөвлөгөө, туслалцаа авах боломжтой.

Нийслэлийн Хөдөлмөр эрхлэлтийн газар (НХЭГ), Манлайлагч хүний нөөцийн менежрүүдийн клуб хамтран МҮЭСТО-нд “Нэг өрх-Нэг ажлын байр” өдөрлөг зохион байгуулж байна.

Өдөрлөгт “Говь”, “АПУ”, “Алтанжолоо трейд”, “Таванбагд фүүдс” зэрэг 31 аж ахуйн нэгж оролцож, иргэдийг худалдагч, үйлчлэгч, ачигчаас эхлээд салбарын захирал хүртэлх 2000 гаруй нээлттэй ажлын байранд бүртгэж байна. Нийслэлийн НХЭГ, Цагийн хөдөлмөрийн бирж 2000 гаруй ажлын байранд бүртгэж байгаа аж. Иргэд өдөрлөгт оролцсоноор нээлттэй ажлын байранд бүртгүүлэхээс гадна “Карьер хөгжлийн төв”-ийн хамт олноос мэргэжлээ зөв сонгох, ур чадвараа тодорхойлох талаар, “Хэрэглээний сэтгэл судлалын хүрээлэн”-гээс шинэ ажлын байрандаа дасан зохицох талаар зөвлөгөө авах боломжтой юм.

Түүнчлэн Дэлхийн банкны Цогц хөгжлийн сургалтад бүртгүүлэх боломжтой. Уг сургалтад бүртгүүлснээр барилгын цахилгаанчин, засал чимэглэлчин, оёмол бүтээгдэхүүн, мах, сүү, арьс шир боловсруулах үйлдвэрлэлийн ажилтан, эсгий ноос, ноолуур боловсруулах анхан шатны ажилтан, зочид буудлын өрөөний үйчлэгч мэргэжлээр сургалтад сууж, улмаар ажлын байранд зуучлуулах боломжтой аж.

Өдөрлөг 16.00 цаг хүртэл үргэлжилнэ.

Монгол Улсын Боловсрол, соёл, шинжлэх ухаан, спортын сайд Ё.Баатарбилэг Парис хотноо болж буй Нэгдсэн Үндэстний Байгууллагын Боловсрол, шинжлэх ухаан, соёлын байгууллага буюу ЮНЕСКО-гийн гишүүн орнуудын Соёлын сайд нарын чуулга уулзалтад оролцож байна.

Өмнөх уулзалтаас 20 жилийн дараа зохион байгуулагдаж буй Соёлын сайд нарын хоёр дахь удаагийн чуулга уулзалтад дэлхийн 116 орны соёлын асуудал эрхэлсэн сайд оролцож, соёл, соёлын өв, бүтээлч үйлдвэрлэл, нийгэмд үзүүлэх соёлын нөлөөллийн талаар хэлэлцүүлэг хийлээ.

Сайд Ё.Баатарбилэг Соёлын сайд нарын чуулга уулзалтад оролцож буй Андорра, Армени, Катар зэрэг улсын соёл, спортын асуудал давхар хариуцсан сайд нарт 2020 онд Монгол Улсад зохион байгуулагдах олон улсын залуучуудын ногоон наадмын талаар танилцуулж, наадмын урилгыг гардуулав.

Улсын дээд шүүхийн шүүгч Ц.Зоригийг чөлөөлөх тогтоолыг Ерөнхийлөгчид хүргүүлсэн байна. Түүний өндөр насны тэтгэвэрт гарах хугацаа болсон тул ШЕЗ-өөс чөлөөлөх тогтоол гарган, Ерөнхийлөгчид хүргүүлжээ.

Тэрбээр 2010 оны арваннэгдүгээр сарын 5-ны өдрөөс 2019 оны гуравдугаар сарын 28-ныг хүртэл Улсын дээд шүүхийн Ерөнхий шүүгчээр ажиллаж байгаад Ерөнхийлөгчийн зарлигаар Ерөнхий шүүгчийн албан тушаалаас нь чөлөөлөөд байсан билээ.

Өндөр насны тэтгэвэр тогтоолгох хүсэлтээ гаргасан шүүгч Ц.Зоригийг Улсын Дээд шүүхийн шүүгчийн албан тушаалаас чөлөөлсөн Ерөнхийлөгчийн зарлиг гарсан байна.

Түүнчлэн ШЕЗ-ийн дарга Э.Батбаярын шийдвэрээр Хэргийн хөдөлгөөний ерөнхий зохицуулагч Б.Сарантуяатай байгуулсан хөдөлмөрийн гэрээг цуцалсан байна. Б.Сарантуяа нь ШЕЗ-ийн гишүүнээр ажиллаж байгаад 2017 онд бүрэн эрхийн хугацаа нь дуусгавар болсон юм. Түүнээс хойш тухайн үеийн ШЕЗ-ийн дарга Н.Лүндэндоржтой гэрээ байгуулан Хэргийн хөдөлгөөний ерөнхий зохицуулагч гэх албан тушаал хашиж байсан билээ.

ОБЕГ-ын дарга, хошууч генерал Т.Бадрал өчигдөр Завхан аймагт ажиллаж, орон нутгийн өвөлжилтийн бэлтгэл ажил, Онцгой байдлын газрын үйл ажиллагаатай танилцаж, алба хаагчидтай уулзан Онцгой байдлын байгууллагаас баримталж буй бодлого, чиглэлийн талаар мэдээлэл өглөө.

Завхан аймаг 24 сум, 116 багийн 9.1 мянган малчин өрхөд 3.8 сая мал өвөлжиж, хаваржих бөгөөд малчид өвөлжилтийн бэлтгэлээ 93.9 хувьтай хангажээ.

Аймгийн Онцгой байдлын газар Тосонцэнгэл сум дахь Онцгой байдлын хэлтэс, Гал түймэр унтраах, аврах 39, 43, 57 дугаар анги, Эрэн хайх аврах бүлэг, Улсын нөөцийн салбартайгаар үйл ажиллагаагаа явуулдаг. 2019 онд аюулт үзэгдэл, ослын нийт 79, гал түймрийн 25 удаагийн дуудлагаар ажиллаж, иргэд, аж ахуйн нэгж байгууллагын 300 гаруй сая төгрөгийн эд хөрөнгийг авран хамгаалсан байна.

Онцгой байдлын газрын алба хаагчдын хүүхдийн болон хөгжлийн бэрхшээлтэй хүүхдүүдийн цэцэрлэгийг байгуулж, дөрвөн багш, 30 гаруй хүүхэдтэй үйл ажиллагаагаа явуулж байна. 2012-2019 онд нийт 17 алба хаагчийн гэр бүлийг ажлын байраар хангасан, тухайлбал, цэцэрлэгийн багшаар хоёр алба хаагчийн гэр бүл ажилладаг байна.

Алба хаагчдын нийгмийн асуудлыг шийдвэрлэх хүрээнд 2016 онд 24 айлын орон сууцыг ашиглалтад оруулж байсан. Мөн алба хаагчдын ажлын байрны орчин, нөхцлийг сайжруулах, таатай уур амьсгалыг бүрдүүлэх чиглэлээр алба хаагчдын дотоод нөөц, бололцоог дайчлан тохижилтыг ажлуудыг хийж гүйцэтгэсэн байна.

Аймгийн Иргэдийн төлөөлөгчдийн хурлын тэргүүлэгчдийн тогтоолоор Онцгой байдлын газрыг Улсын иргэний хамгаалалтын газрын даргаар ажиллаж байсан, тус аймгаас төрөн гарсан дэслэгч генерал Г.Дамдинсүрэнгийн нэрэмжит болгосон.

Сонгино сум дахь шатахууны цэгийг түшиглэн Шатахуун түгээх станц, Аврах бүлгийн байр барих санхүүжилтыг шийдвэрлүүлсэн байна.

Аймгийн засаг захиргаа, нутаг дэвсгэрийн нэгжийн түвшинд Гамшгийн эрсдэлийн тойм судалгааг хийсэн байна. Судалгааны дүнд аймгийн гамшгийн эрсдэлийн түвшин 48,8 буюу “дунд” эрсдэлтэй гарчээ.

Уул уурхай болон авто зам угсралтын чиглэлээр үйл ажиллагаа явуулж буй аж ахуйн нэгж байгууллагуудад гамшгаас хамгаалах болон гал тйүмрийн улсын хяналт, шалгалтыг эрчимжүүлэн ажилласан байна.

Сурагчдыг эрүүл, эрсдэлгүй, аюулгүй орчинд сургах, гамшиг, ослоос урьдчилан сэргийлэх мэдлэг, дадал эзэмшүүлэх зорилгоор ерөнхий боловсролын сургууль бүр дээр “Гамшгаас хамгаалах танхим”ыг байгуулахаар ажиллаж байгаа аж.

Ирэх жил тус аймагт зохион байгуулах Гамшгаас хамгаалах команд штабын сургуулийн бэлтгэл ажлыг хангах, гал унтраах сайн дурын хэсгүүдийг чадахижуулах, шаардлагатай тоног төхөөрөмж, багаж хэрэгслээр хангах, алба хаагчдын ажлын байрны орчин, нөхцлийг сайжруулах, автомашины гаражаар ашиглаж байсан тавиулангийн байрыг спорт заал болгон тохижуулж засварлах, Тосонцэнгэл сум дахь Онцгой байдлын хэлтсийн Гал түймэр унтраах, аврах 39 дүгээр ангийн 60 жилийн ойг тэмдэглэн өнгөрүүлэх зэрэг томоохон ажлуудыг төлөвлөн ажиллаж байна юм.