Month: August 2019

НМХГ-ын дэд даргаас өгсөн үүрэг даалгаврын биелэлтийг хангуулах зорилгоор ХУД дэх МХХэлтэс, цагдаагийн хэлтэстэй хамтран тус дүүргийн 11 дүгээр хорооны нутаг дэвсгэр, Туул голын зам дагуу хоол үйлдвэрлэл явуулж байгаа иргэний үйл ажиллагаанд хяналт шалгалтыг хийлээ.

Шалгалтаар тухайн газар нь нийтийн эзэмшлийн гудамж, талбайд байрлан, цэвэр, бохир ус болон цахилгаанаар хангагдаагүй зориулалтын бус ажлын байранд зөвшөөрөлгүйгээр үйл ажиллагаа эрхэлсэн. Мөн түүхий эд, хүнсний бүтээгдэхүүний гарал үүсэл, чанар, аюулгүй байдлын шинжилгээ, баталгаажилтгүй, хэзээ, хаана, хэн бэлтгэсэн нь тодорхойгүй бүтээгдэхүүнээр иргэдэд үйлчилсэн, хоол үйлдвэрлэлд шаардлагатай сав суулга, тоног төхөөрөмжөөр хангагдаагүй, бохироо ил задгай асгадаг, гар угаах болон бие засах нөхцөлийг бүрдүүлээгүй зэрэг нь хүний эрүүл мэнд, амь нас, хүрээлэн буй орчинд шууд ба шууд бусаар хохирол учруулж болзошгүй нөхцөл бүрдсэн байна.

Иймээс ард иргэд та бүхнийг сонголтоо зөв хийж, учирч болзошгүй эрсдэлээс өөрийгөө болон үр хүүхдээ хамгаалахыг зөвлөж байна.

Сүрьеэгийн өвчлөл 502 тохиолдлоор буурлаа. Олон эмэнд дасал сүрьеэг 24 сараас 9 сар болгож байгаа цөөн орны нэг манай улс боллоо. Сүрьеэгийн оношлогооны дижитал рентген аппарат, женексперт тоног төхөөрөмж нэмэгдлээ. Сүрьеэгийн эмч нарыг тэтгэлэгтэй бэлтгэж байна. Энэ мэтчилэн сайн мэдээнүүд байна.

Гэхдээ дэлхий дахинаа шинээр сэргэсэн энэ өвчинтэй тэмцэхэд дээрх үйл ажиллагаануудыг улам бүр эрчимжүүлэх шаардлагатай. Энэ хүрээнд эмч мэргэжилтнүүдэд зориулсан сүрьеэ өвчнөөс урьдчилан сэргийлэх чиглэлээрх сургалтыг 2019 оны 8 дугаар сарын 31-нээс 9 дүгээр сарын 20-ны өдрүүдэд Бээжин хотод зохион байгуулах гэж байна.

Онол-дадлага хосолсон эдгээр сургалтууд нь эмч мэргэжилтнүүдэд мэргэжлийн чиглэлээр онолын мэдлэгээ дээшлүүлэх, оношилгоо, эмчилгээний сүүлийн үеийн дэвшилтэт арга техникээс суралцах, харилцан мэдлэг, туршлага солилцоход ихээхэн үр дүнтэй, өгөөжтэй, эмч мэргэжилтнүүдийн талархлыг хүлээсэн сургалт болсон юм. Та бүхэн маань өөрийн байгууллагадаа нэр хүндтэй, олон жил тогтвор суурьшилтай, үр бүтээлтэй ажиллаж байгаа, энэхүү сургалтад хамрагдах чин хүсэл эрмэлзэлтэй манай чадварлаг эмч нар гэдгийг онцлон хэлмээр байна.

Мөн өөрийн мэдлэг, туршлагыг улам батжуулж, шинэ мэдлэг, туршлага, мэдээллийг олж авах, сайн туршлагаас харилцан суралцаж, бусдад түгээн, өөрийн байгууллага дээр тодорхой өөрчлөлт хийж, шинэ санаа санаачилга нэвтрүүлнэ гэдэгт итгэлтэй байна гэлээ.

Эрүүл мэндийн яамнаас сургалтын өгөөж, гарах үр дүнг нэмэгдүүлэх үүднээс сургалтыг монгол хэл дээр явуулах хүсэлт гаргасны дагуу энэ удаагийн сургалт монгол хэл дээр зохион байгуулагдах гэж байгаагаараа онцлог давуу талтай юм.

Сүрьеэ өвчний асуудлаарх энэ удаагийн сургалтад нийслэл болон орон нутгийн нийт 30 сүрьеэгийн эмч мэргэжилтнүүд хамрагдаж байгаа.

Монгол Улсын Их Хурлын дарга Г.Занданшатар Монгол Улсын Их Сургуулийн урилгаар манай улсад хүрэлцэн ирээд байгаа Японы Нагоягийн их сургуулийн профессор, Нобелийн шагналт эрдэмтэн Рёожи Ноёори-г хүлээн авч уулзлаа.

Энэ үеэр УИХ-ын дарга Г.Занданшатар “Таны энэ айлчлал манай хүүхэд залуучуудад шинжлэх ухаан, судалгаанд суурилсан хөгжлийг цогцлоох талаар зөв ойлголт, хандлага төлөвшүүлэхэд чухал ач холбогдолтой гэж үзэж байна” гэж тэмдэглэв.

Тэрбээр Нагоягийн их сургууль манай улсын томоохон их, дээд сургуулиуд, судалгаа шинжилгээний байгууллагуудтай нягт хамтран ажиллаж байдагт талархал илэрхийлэв. Түүнчлэн МУИС-ийн Хууль зүйн сургууль дээр Японы эрх зүйн сургалт, судалгааны хөтөлбөр, ШУТИС-д Хээрийн судалгааны лабораторийн төсөл, мөн төрийн албан хаагчдыг мэргэшүүлэх докторын хөтөлбөр амжилттай хэрэгжүүлж байгааг онцоллоо.

УИХ-ын дарга Г.Занданшатар Монгол Улсын Засгийн газар улс орны хөгжил дэвшлийн гарц нь судалгаанд суурилах ёстой гэж үзэж, судалгааны их сургуулиудтай болох зорилт тавьсныг тэмдэглэж, энэ ажлын хүрээнд МУИС, Нагоягийн их сургуультай ахисан түвшний сургалтдаа судалгаанд суурилсан тогтолцоо бүрдүүлэх талаар хамтарч ажиллаж байгааг сайшаагаад, цаашид эрдэм солилцоо, оюутан солилцоог идэвхжүүлж, судалгааны их сургуулиудыг төлөвшүүлэхэд Япон Улс, түүн дотроос Нагоягийн их сургуулийн оруулах хувь нэмэр чухал гэдгийг онцоллоо.

Уулзалтад оролцсон Нагоягийн их сургуулийн дэд захирал Наоши Сүгияма тус сургууль Монголын их, дээд сургуулиудтай илүү олон чиглэлээр хамтран ажиллах төлөвлөгөөтэй байгааг дурдаж, Нобелийн шагналт эрдэмтэн Рёожи Ноёори-гийн айлчлалын хөтөлбөрт залуу судлаачдад зөвлөгөө өгөх, лекц унших, хоёр их сургууль хоорондын хамтын ажиллагааны цаашдын чиглэлийн талаар санал солилцох зэрэг арга хэмжээ багтсаныг танилцууллаа.

Эрдэмтэн Рёожи Ноёори япончууд Монголыг ихэд дотночилж үздэгийг онцлоод, шинжлэх ухаан, технологийн сургалт, судалгааг хамтран хөгжүүлэх, өөрийн мэдлэг, чадвар, хурааж хуримтлуулсан туршлагаа монголчуудтай хуваалцаж, Монгол Улсын хөгжил, шинжлэх ухаан, технологийн дэвшил, их сургуулиудыг дэлхийн түвшинд хүргэх зорилтод хувь нэмрээ оруулахад бэлэн байгаагаа илэрхийллээ. Тэрбээр “Би залуу эрдэмтэн, судлаачдад туулсан амьдрал, эрдэм судлалын ажлын арга барилаа танилцуулна. Гэхдээ энэ бол үлдэж хоцорсон хуучин түүх. Ирээдүй бидний өмнө бий. Тиймээс ирээдүйг авч явах залууст илүү их итгэж байна. Монголын залуу эрдэмтэн, судлаачдад судлах, шинжлэх, ихийг бүтээх эрмэлзэл, хүслийг төрүүлж чадвал миний зорилго биелэх болно” гэлээ.

УИХ-ын дарга Г.Занданшатар Аж үйлдвэрийн IV хувьсгалын эринд хиймэл оюун ухаан, онлайн сургалт эрчээ авч, тэр нь их, дээд сургуулиудад сорилт болж байна. Үүнийг Стэнфордын их сургуулийн захирал, нэрт эрдэмтэн Жон Хеннеси “Их сургуульд цунами ойртож байна” гэж хэлсэн байдаг. Орчин үед дээд боловсролын диплом, зэрэг, дэв чухал биш болж, авьяас, ур чадвар, бүтээлч сэтгэлгээтэй ирээдүй үеийг төлөвшүүлэхэд илүү анхаарч байна. Тиймээс манай их сургуулиуд дэлхийн түвшинд хүрсэн, судалгааны сургуулиуд болох ёстой. Дэлхийд нэр хүндтэй Нагоягийн их сургуультай тогтоосон энэхүү түншлэл бидний хувьд боломж мөн. Тус сургуулийн ололт амжилтаас суралцах нь бидний хувьд нэр төрийн хэрэг байх болно гэж уулзалтын төгсгөлд тэмдэглэж хэлэв.

Уулзалтад Нагоягийн их сургуулийн дэд захирал Наоши Сүгияма, АСКИ институтийн захирал Фүмио Исода, МУИС-ийн захирал, доктор Я.Төмөрбаатар, дэд захирал Б.Очирхуяг, Ч.Лодойравсал, академич, Нагоягийн их сургуулийн Хүндэт доктор С.Нарангэрэл, МУИС-ийн Хууль зүйн сургуулийн доктор, Нагоягийн их сургуулийн Монгол дахь төлөөлөгчийн газрын захирал Д.Гангабаатар нарын зэрэг хүмүүс оролцлоо.

Ноён Рёожи Ноёори 2001 онд химийн шинжлэх ухааны салбарт Нобелийн шагнал хүртсэн, Японы шинжлэх ухаан технологийн агентлаг, Хөгжлийн стратеги, судалгааны төвийн захирлаар ажилладаг, шинжлэх ухааны салбарт онцгой гавьяа байгуулсан хүмүүст олгодог дэлхийн хэмжээний томоохон 10 гаруй шагнал хүртсэн, нэрт эрдэмтэн юм.

Сүхбаатар аймгийн Баруун-Урт сумын наймдугаар багийн нутаг дэвсгэрт үнэг галзуурч, айлын нохой болон хүүхэд рүү дайрсан тохиолдол энэ сарын 27-ны өдөр гарчээ.

Дуудлагын дагуу аймгийн Мал эмнэлгийн газраас ажлын хэсэг гарч ажиллан урьдчилсан байдлаар галзуу өвчин мөн болохыг тогтоожээ. Үүнтэй холбоотойгоор Баруун-Урт сумын Засаг даргын А/174 тоот захирамжаар хязгаарлалтын дэглэм тогтоон ажиллаж байна.

Иймд зэрлэг амьтны шилжилт хөдөлгөөн зан авирт байнгын хяналт тавьж, мал сүргээ байнгын хариулгатай байлгахыг малчдад анхааруулж байна.

“Нийслэлийн орон сууцны корпораци” ХК-иас “Буянт-Ухаа 2” хорооллын 972 айлын орон сууцанд хамрагдах иргэдийн цахим бүртгэл, сонгон шалгаруулалтын талаар өнөөдөр мэдээлэл хийлээ.

Нийслэлийн орон сууцны корпорци” ХК-ийн дэд захирал С.Дорждэрэм “Долдугаар сарын 22-оос наймдугаар сарын 5-ны өдрийг хүртэл цахим бүртгэлийг иргэдийн дунд нээлттэй явуулсан. Ингэхдээ түрээсийн орон сууцанд залуу гэр бүл, ахмад настан, хөгжлийн бэрхшээлтэй иргэн, гачигдалтай иргэн, төрийн албан хаагч, хувийн хэвшилд ажиллагсад, өрх толгойлсон эцэг, эх, дөрөв ба түүнээс дээш хүүхэдтэй өрхүүдийг хамруулах юм.

Цахим бүртгэлд дээрх найман ангиллын түрээслээд өмчлөх, энгийн түрээс гэсэн 16 төрөл дээр нийтдээ 3558 иргэн бүртгүүлсэн. Эдгээрээс 582 иргэнд 972 айлын орон сууцны 60 хувьд ногдож байгаа. Үлдсэн 390 айлыг газар чөлөөлөлтөөр байр нь олгогдоно. Орон сууцыг газраар чөлөөлөх журмыг боловсруулаад дууссан. Ирэх долоо хоногт олон нийтэд журмаа танилцуулна. 972 айлын орон сууц бэлэн болсон. Одоо ганцхан улсын комисс хүлээж авах л дутуу байгаа. Эхний шалгаруулалтад тэнцсэн иргэдийн материалыг наймдугаар сарын 19-өөс 23-ны өдрүүдэд нэг цэгийн үйлчилгээгээр дамжуулж иргэдийн материалыг хүлээж авсан. Энэ долоо хоногт манай ажилтнууд иргэдийн цахим бүртгэл дээрх мэдээлэл болон цаасаар ирсэн мэдээллүүдийн үнэн бодит эсэхийг нэг бүрчлэн шалгасан. Маргааш /2019.08.30/ орон сууцны зөвлөх комисс хуралдана. Хурлаар хоёр асуудал шийдэгдэнэ. Нэгдүгээрт эхний шалгаруулалтад тэнцсэн иргэдийн мэдээлэл нь үнэн бодит, зөрчилгүй байвал иргэдийн мэдээллийг эцэслэн баталж, цаашид НОСК-д гэрээ байгуулах, байр, давхраа сонгох зэрэг ажлууд хийгдэнэ. Хоёрдугаарт гамшигт нэрвэгдэж орон гэргүй болсон иргэдийн эхний сонгон шалгаруулалтад тэнцсэн 30 айлтай гэрээ байгуулна. Маргаашаас эхлээд эрэмбийн дагуу дараагийн иргэд рүү нэг бүрчлэн ярьж мэдээлэл өгнө” гэв.

Нийслэлийн орон сууцны корпорци” ХК-ийн захирал Б.Сүхбаатар “Бүртгэл, сонгон шалгаруулалттай холбоотой ямар нэгэн асуудал гараагүй. Ажил гацаж зогссон зүйл байхгүй. Иргэдийг эхний ээлжид сонгон шалгарсан байдлаар нь жишээ татаж ярья. Тухайлбал, байраа түрээслэх залуу гэр бүлийн ангилалд 6-14 жил ажилласан залуучууд нийгмийн даатгал төлснөөрөө орж байна. Байраа түрээслээд өмчлөх ангилалд 12-16 жил ажилласан иргэд, төрийн албан хаагчид энгийн түрээсийн ангилалд 25-45 жил ажилласан иргэд, түрээслээд өмчлөх ангилалд 34-44 ажилласан хүмүүс орж ирсэн байх жишээний. Ахмад настны ангилалд энгийн түрээсийн ангилалд 87-100 настай ахмадууд орсон бол түрээслээд өмчлөх ангилалд 91-102 настай ахмадууд орсон. Хэрэв 3000 орон сууц баригдах юм бол 70-аас дээш насны ахмадууд бүгд хамрагдах боломжтой гэдгийг тоо баримтууд харуулж байна. Цахим бүртгэлийн давуу тал нь маш том судалгаа болж байна. Нөгөөтэйгөөр хамгийн шударгаар хэн нэгэн хүний оролцоогүйгээр явагдаж байгаа гэдгийг хэлмээр байна. Хэрэв иргэд буруу бүртгүүлэх юм уу албаар худал мэдээлэл өгвөл хар жагсаалтад орж байгаа. Тиймээс сонгон шалгаруулалтад орсон иргэдээс зарим нь нь өөрсдөө мэдээллээ албаар буруу хийсэн учраас материалаа өгөхөөс татгалзсан” гэв.

Монгол Улсын их хурлын гишүүн, Боловсрол, соёл, шинжлэх ухаан, спортын сайд Ё.Баатарбилэг Нобелийн шагналтан, Япон Улсын Нагояа их сургуулийн профессор Ноёори Рёожи тэргүүтэй төлөөлөгчдийг хүлээн авч уулзлаа.

Сайд Ё.Баатарбилэг хичээлийн шинэ жилийн нээлт тохиох энэ өдрүүдэд Монгол Улсад хүрэлцэн ирж багш, эрдэмтэн, оюутан, судлаач нарт өөрийн лекцийг толилуулах гэж буй профессор Ноёорид талархал илэрхийлээд Монгол-Японы боловсрол, шинжлэх ухааны салбарын хамтын ажиллагааны асуудлаар санал солилцох завшаан тохиож байгаад баяртай байна гэлээ.

Судалгаанд суурилсан их сургуулийг хөгжүүлэх үндэсний хөтөлбөр болон Азийн шилдэг их сургуулиудын эгнээнд нэгдэн орох зорилгын хүрээнд Монгол Улсын дээд боловсролын салбарын хүний нөөцийг чадавхжуулах, сайн туршлагыг нэвтрүүлэх, гадаад хамтын ажиллагааг идэвхжүүлэх чиглэлээр туршлага судлах хүсэлтээ илэрхийлэв.

Нобелийн шагналтан Ноёори Монгол Улсын дээд боловсролын салбарын хөтөлбөр, зорилгыг сайшаагаад түүнд хүрэхэд шинжлэх ухаан, дээд боловсролын байгууллагуудын хамтын ажиллагаа нэн чухал болохыг санууллаа. Түүнчлэн гадаадын их сургуулиудтай хамтран ажиллаж, харилцан суралцахыг зөвлөв.

Уулзалтад БСШУСЯ-ны Шинжлэх ухаан, технологийн бодлогын газрын дарга С.Мөнхбат болон Монгол Улсын их сургууль, Япон Улсын Нагояа их сургуулийн захирал, профессоруудын төлөөлөл оролцлоо.

Профессор Ноёори 27 насандаа Киотогийн их сургуульд ажиллаж байхдаа удирдагч багш профессор Нозакитай хамтран хирал органикметал молекулын катализаторыг ашиглан асиметрик синтез явуулах зарчмыг анх нээжээ. Дараа нь хурдан бөгөөд дахин хэрэглэх боломжтой шилжилтийн металл дээр суурилсан олон тооны сунгамал катализаторыг гарган авсан байна.

Түүний рацемат хольцийн R юм уу L энантомерийг дангаар нь ялгах судалгаа 1992 онд АНУ-ын Эм, Хүнсний Удирдах Газрын удирдамжид орсноор анагаах ухаанд асар их хөгжил дэвшлийг авч ирсэн юм.