Month: August 2019

“Токио 2020” Олимпийн наадмын бэлтгэл ажлыг хангах болон Монгол Улс, Япон Улсын хооронд Соёлын харилцаа тогтоосны 45 жилийн ойн хүрээнд Монголын Жүдо бөхийн холбоо, Японы Жүдо бөхийн бариа заслын холбоо, Монгол Улсаас Япон Улсад суугаа ЭСЯ хооронд Олимпийн их наадам, Дэлхийн аварга шалгаруулах тэмцээн, олон улсын тэмцээнд оролцох Монголын жүдо бөхийн тамирчдад анхан шатны эрүүл мэндийн тусламж үйлчилгээ үзүүлж, нөхөн сэргээлтийн бариа засал хийх чиглэлээр хамтран ажиллах тухай гурвалсан гэрээг энэ сарын 24-ний өдөр Токио хотноо байгуулав.

Уг гэрээнд Монгол Улсаас Япон Улсад суугаа Онц бөгөөд Бүрэн эрхт Элчин сайд Д.Батжаргал, Японы Жүдо бөхийн бариа заслын холбооны тэргүүн Т.Күдо, Монголын Жүдо бөхийн холбооны Ерөнхий нарийн бичгийн дарга М.Бөхбат нар гарын үсэг зуржээ.

Халхын голын түүхэн ялалтын 80 жилийн ойн арга хэмжээний хүрээнд энэ сарын 23-ны өдөр Дорнод аймагт дайчдын хөшөөнд мөнхийн гал асаах үйл ажиллагаа болж, Халхын голын дайны ялалтын 80 жилийн ойг зохион байгуулах комиссоос эх орон, тусгаар тогтнолынхоо төлөө эрэлхэгээр тулалдаж Японы түрэмгийлэгчдийг бут цохисон дайны түүхэн ялалтад амь үрэгдсэн энгийн ард, эрэлхэг зоригт цэрэг эрс, ахмад дайчдаа эргэн санан дурсаж хүндэтгэл үзүүллээ.

Мөнхийн галыг аймгийн Засаг дарга бөгөөд аймгийн Батлан хамгаалах газрын дарга М.Бадамсүрэн, Зэвсэгт хүчний Хуурай замын цэргийн Командлалын ажиллагааны удирдлагын хэлтсийн дарга хурандаа О.Эрдэнэбаатар, ОХУ-ын Дорнод цэргийн тойргийн 36 дугаар армийн командлагч, ОХУ-ын талын сургуулийн удирдагч дэслэгч генерал М.Я.Носулев нар асаалаа. Халхын голын дайны ялалтын баярын өдрүүдэд мөнхийн галын дэргэд Монголын хүндэт харуул байрлах юм.

БНСУ-ын Элчин сайдын яамнаас маргааш хэвлэлийнхэнд мэдээлэл хийхээр тов гаргасан байна. Учир нь БНСУ-ын Хууль зүйн яамны Цагаачлал, шилжилт хөдөлгөөний албаны дарга ноён Ча Гю-геүн Монгол Улсад албан ёсны айлчлал хийж буй.

Айлчлалын хүрээнд хамтын ажиллагааг улам эрчимжүүлэх, иргэд харилцан зорчиход үүсч буй асуудлыг шийдвэрлэх талаар ярилцсан бөгөөд уулзалтаар хоёр орны иргэд харилцан зорчих, оршин суух нөхцлийг бүрдлүүлэх чиглэлээр, ялангуяа визний шаардлагыг хөнгөвчлөх, визний хариу өгөх 90 хоногийн хугацааг багасгах тал дээр тодорхой чиглэлээр харилцан ойлголцолд хүрч, ойрын хугацаанд хэрэгжүүлэхээр тохиролцсон байна.

Энэ талаарх дэлгэрэнгүй мэдээллийг маргааш тус яамнаас өгөхөөр болжээ.

Халх голын дайны ялалтын 80 жилийн ойг зохион байгуулах комисс, Дорнод аймгийн авто тээврийн үндэсний төв, Замын цагдаагийн тасгаас зохион байгуулсан “Хуучны автомашиныг сэргээн засварлах” уралдааны дүн гарчээ.

1-р байр: Б.Одгив, 1973 он үйлдвэрлэгдсэн Газ-51 автомашин

2-р байр: Б.Мөнхчөдөр, 1937 онд үйлдвэрлэгдсэн пикап м415 автомашин

3-р байр: М.Бат-Эрдэнэ, 1962 онд үйлдвэрлэгдсэн Трабант 601 автомашин

4-р байр: М.Бат-Эрдэнэ, 1980 онд үйлдвэрлэгдсэн Нива 21 автомашин тус тус шалгарлаа.

Баян-Өлгий аймагт шинээр баригдсан Хашаатын даваа-Толбо сум чиглэлийн 60 километр хатуу хучилттай авто замын барилгын ажил дөрвөн жил үргэлжилсний эцэст дуусгавар болж, Улсын комисс ажиллан, тээврийн хэрэгслийн зорчих хэсгийн хөдөлгөөнийг нээлээ. Уг төслийн зөвлөхөөр БНЭУ-ын ICT SAIN CONSALTING LLC компани ажиллсан бол ерөнхий гүйцэтгэгчээр БНХАУ-ын Чайна Хуаши Энтерпрайзис Лимитэд ХХК ажиллалаа.

Азийн хөгжлийн банкны зээлийн хөрөнгөөр хэрэгжсэн энэхүү авто замын зорчих хэсгийн өргөн 7 метр, хоёр талдаа 1.5 метр хөвөөтэй, 5 сантиметр зузаан асфальтан хучилт, 69 хоолой, 15-30 метрийн урттай гурван ширхэг гүүртэй, олон улсын шаардлага стандарт бүхий авто зам юм. Одоогоор замын зарим хэсэгт тэмдэг тэмдэглэгээ, хурд сааруулагч зэрэг ажил хийгдэх үлдсэн бөгөөд Зам, тээврийн хөгжлийн сайд Б.Энх-Амгалан есдүгээр сарын 15 гэхэд үлдсэн ажлаа хийж дуусгасан байхыг холбогдох албаны хүмүүст үүрэг болголоо.

Энэхүү авто зам нь баруун бүсийн босоо тэнхлэгийн Азийн авто замын сүлжээний АН-4 чиглэлд хамаардаг бөгөөд энэ нь ОХУ, Монгол Улс, БНХАУ гурван улсын Новосибирк – Барнау – Горно Алтайск – Ташанта – Улаанбайшинт – Ховд – Ярант – Такешкен – Өрөмч – Каши – Хонкираф гэсэн чиглэлээр дайран өнгөрч, Монгол Улсын нутаг дэвсгэрээр нийт 756 километр авто замын сүлжээг хамардаг.

Энэхүү сүлжээг Баруун босоо тэнхлэгийн авто зам гэж нэрлэдэг ба Монгол Улсын баруун бүс нутгийн эдийн засаг, нийгмийн хөгжилд төдийгүй бүс нутгийн эдийн засгийн хамтын ажиллагаа, худалдаа эргэлтийг нэмэгдүүлэхэд чухал ач холбогдол бүхий авто зам юм. Мөн ОХУ, Монгол Улс, БНХАУ хооронд “Эдийн засгийн коридор” байгуулах хөтөлбөрийн хүрээнд дээрх авто замын сүлжээг дамжин өнгөрөх олон улсын тээвэрлэлтэд идэвхтэй ашилах зорилтыг тавих ажиллаж байна.

Монгол Улсын эрх чөлөө, тусгаар тогтнол, үндэсний аюулгүй байдлыг хангахад жинтэй хувь нэмэр оруулсан XX зууны түүхэн үйл явдлын нэг Халхын голын дайны ялалтын 80 жилийн ой тохиож буй.

Монгол Улсын Засгийн газрын тогтоолоор Халхын голын дайны ялалтын 80 жилийн ойг тэмдэглэн өнгөрүүлэх тухай шийдвэр гарсан. Энэ хүрээнд ойд бэлтгэх, зохион байгуулах хороо байгуулсан бөгөөд тус хорооны даргаар Монгол Улсын Шадар сайд Ө.Энхтүвшин, дэд даргаар Батлан хамгаалахын сайд Н.Энхболд нар томилогдоод ажиллаж байна.

Халхын голын 1939 оны дайны ялалтын ойн баярыг ОХУ-тай хамтран тэмдэглэх бөгөөд ойн баярын хөтөлбөрийг дэлгэрэнгүйгээр хүргэе.

2019-2020 оны хичээлийн жилд нийслэлийн Ерөнхий боловсролын сургуулийн нэгдүгээр ангид орох сурагчдыг тавдугаар сарын 13-27-ны өдрүүдэд бүртгэсэн. Харин энэ үеэр бүртгүүлж амжаагүй хүүхдүүдийг бүртгэх ажил энэ долоо хоногт эхэлжээ. Бүртгэл наймдугаар сарын 30-ныг дуустал үргэлжилнэ. Хавар бүртгүүлсэн хүүхдүүд дахин бүртгүүлэх шаардлагагүйг Нийслэлийн боловсролын газраас мэдээллээ. Таван настай буюу 2014 оны нэгдүгээр сарын 1-нээс хойш төрсөн хүүхдийг бүртгэхгүй юм байна.

БҮРДҮҮЛЭХ МАТЕРИАЛ:

• Хүүхдийн төрсний гэрчилгээний эх хувилбар болон хуулбар
• Эцэг эх болон асран хамгаалагчийн үнэмлэх хуулбарын хамт
• Хүүхдийн 3х4 хэмжээтэй 1 хувь цээж зураг
• Шилжилт хөдөлгөөн хийсэн бол холбогдох материалыг авчирна.
• Шаардлагатай тохиолдолд УБЕГ-ын лавлагаа болон бусад нэмэлт материалыг үзнэ.

Хамран сургах тойргийн хүүхдийг ямар нэг элсэлтийн шалгалтгүйгээр бүртгэж, элсүүлэх бөгөөд элсэгчдээс бүртгэлийн хураамж бусад төлбөр авахгүй.

Энэ хичээлийн жилд 38,232 сурагч нэгдүгээр ангид элсэн орох аж.

Баянзүрх дүүрэг дэх цагдаагийн гуравдугаар хэлтсийн алба хаагчид мансууруулах эм, сэтгэцэд нөлөөт бодис хууль бусаар олж авсан, хадгалсан, хэрэглэсэн долоон этгээдийг илрүүлэн шалгаж байна.

Шалгалтаар НҮБ –ын 1971 оны “Сэтгэцэд нөлөөлөх бодисын тухай” конвенцын хоёрдугаар жагсаалтад багтсан дельта – 9 тетрагидроканнабинолын агууламжтай байж болзошгүй 390 грамм Каннабисын төрлийн ургамал хадгалж байсныг хураан авч шалгалтын ажиллагааг явуулж байна. Дээрх этгээдүүд нь 17 – 29 настай, урьд нь хулгайлах, дээрэмдэх, булаалтын гэмт хэрэгт 1 -3 удаагийн ял шийтгэгдэж байсан байна.

Эх орон, Зэвсэгт хүчнийхээ нэрийг гаргаж, сургалт бэлтгэл, ур чадвараараа манлайлсан “Армийн тоглолт-2019”-д оролцсон баг тамирчид, ажиглагч нарыг өнөөдөр /2019.08.24/ЗХЖШ-ын дарга, хошууч генерал А.Ганбат, ЗХЖШ-ын нэгдүгээр орлогч дарга, хошууч генерал Р.Сүхбат тэргүүтэй ЗХЖШ-ын даргын зөвлөлийн гишүүд хүлээн авч уулзаж, хүндэтгэл үзүүллээ. Монгол Улсын Зэвсэгт хүчин ОХУ-ын Батлан хамгаалах яамнаас зохион байгуулдаг “Армийн тоглолт-2019”-д амжилт дүүрэн оролцлоо. Энэ жил оролцогчоос зохион байгуулагч орны статустайгаар “Аравт” олон улсын морин цэргийн анхдугаар уралдааныг зохион байгуулж, ОХУ-д зохион байгуулагдсан “Танкийн биатлон”, “Инженерийн томьёолол”, “Хээрийн гал тогоо”, Беларусь улсад явагдсан “Мэргэн буудагчийн зааг” тэмцээнд баг тамирчид оролцож, Казахстан улсад зохиогдсон “Артиллерийн галын мастер”, БНХАУ-д явагдсан “Цэлмэг тэнгэр”, “Галын мастер” тэмцээнд томилогдсон цэргийн алба хаагчид ажиглагчаар оролцсон юм.

Арга хэмжээний эхэнд ЗХЖШ-ын орлогч дарга, хошууч генерал Ж.Бадамбазар Монгол Улсын Зэвсэгт хүчин “Олон улсын цэргийн наадам”-д ямар, ямар төрлөөр анх оролцсоноос эхлээд үзүүлсэн амжилт, туршлага сургамжийн талаар ярилаа. Анх “Танкийн биатлон”-д баг тамирчдаа илгээхээс эхэлсэн Монгол Улсын Зэвсэгт хүчин өдгөө зохион байгуулагч орон болохын зэрэгцээ оролцох төрлүүдээ ч өргөжүүлж, “Олон улсын цэргийн наадам”-д эзлэх байр сууриа нэмэгдүүлсэн талаар онцлов. Төгсгөлд нь манай цэргийн алба хаагчдад байхгүй зэвсэглэл, техникээр уралдана гэдэг амаргүй. Гэхдээ энэ бол та бидэнд мэргэжлийн ур чадвараа дээшлүүлэхэд чухал нөлөө үзүүлэх учиртай. Цаашдаа өөрийн анги, салбартаа уралдаанаас авсан туршлага сургамжийн талаар яриа таниулга хийж, алба хаагчдадаа сурталчлах ёстой. Үүнийг үүрэг гэж хүлээн авч, заавал хэрэгжүүлээрэй гэсэн юм.

Мөн энэ үеэр Батлан хамгаалахын сайд болон ЗХЖШ-ын даргын тушаалаар шагнагдсан цэргийн алба хаагчдад ЗХЖШ-ын дарга, хошууч генерал А.Ганбат, ЗХЖШ-ын нэгдүгээр орлогч, хошууч генерал Р.Сүхбат, ЗХЖШ-ын орлогч дарга, хошууч генерал Ж.Бадамбазар нар шагналыг нь гардуулан өглөө.