Month: August 2019

Categories
мэдээ спорт

Ё.Басхүү дагах барилдаан хийхээр боллоо

Жүдо бөхийн насанд хүрэгчдийн дэлхийн аварга шалгаруулах эрэгтэйчүүдийн 33, эмэгтэйчүүдийн 24 дэх удаагийн тэмцээн Японы Токио хотод үргэлжилж байна.

Риогийн олимпын мөнгөн медальт, 2015 оны дэлхийн аварга, 2018 оны Азийн наадмын аварга Ан Баул, Гүржийн Баграти Ниниашвили, 2017 оны ДАШТ-ий хүрэл медальт Израилын Тал Фликер гээд алдартнууд Ё.Басхүүд ялагдаад тэмцээнийг орхисон билээ.

Харин энэ удаад хэсгийн аваргын төлөө Японы дэлхийн хошой аварга Абэ Хифүмитэй барилдлаа. Барилдаан хэн нь ч илүүрхэх зүйлгүй тэнцүүхэн өрнөсөн. Нэг нэг торгуултай, цаг дуусахад 9 секунд дутуу байхад хутгуулаад вазари алдаж, ялагдав. Өнөөдөр орой 18:00 цагаас Ё.Басхүү дагах барилдаанд Египетийн Мохамед Абделмавгудтай барилдана. Мохамед Азербайжан, Америкийн бөхийг ялаад Японы Марүямад ялагджээ

Categories
мэдээ нийгэм онцлох-нийтлэл туслах-ангилал

Үндсэн хуулийн өөрчлөлтийн төслийн хоёр дахь хэлэлцүүлгийг дэмжлээ

Төрийн байгуулалтын байнгын хороо хуралдлаа. Үндсэн хуульд оруулах нэмэлт, өөрчлөлтийн төслийн талаарх зарим зарчмын зөрүүтэй саналын томьёоллуудаар санал хураалт явуулахад Байнгын хорооны хуралдаанд оролцсон гишүүдийн дийлэнх олонхи дэмжлээ.

Тухайлбал, УИХ-ын С.Бямбацогтын саналаар төслийн хоёрдугаар зүйлд “төрийн өмч” гэснийг “төрийн нийтийн өмч” гэж өөрчлөхөөр болов. Энэ санал дэмжигдсэнээр Монгол Улсын иргэдэд өмчлүүлснээс бусад газар, түүнчлэн газрын хэвлий, түүний баялаг, ой, усны нөөц, ан амьтан төрийн нийтийн өмч байхаар томьёологдож байгаа юм.

Байнгын хороо өнгөрсөн долоо хоногийн хуралдаанаараа Үндсэн хуульд оруулах нэмэлт, өөрчлөлтийн төслийн хоёр дахь хэлэлцүүлгийг хийх явцад төслийн 1.6 дахь заалт буюу Үндсэн хуулийн Дөчин есдүгээр зүйлийн 5 дахь хэсгийг “Шүүхийн ерөнхий зөвлөлийн гишүүдийн тавыг шүүгчид дотроосоо сонгоно; нэгийг Засгийн газар, хоёрыг УИХ-ын холбогдох Байнгын хороо, хоёрыг мэргэжлийн холбооноос нээлттэйгээр нэр дэвшүүлж, УИХ томилгооны сонсгол хийн хуралдаанд оролцсон гишүүдийн гуравны хоёроос доошгүйн саналаар томилно. Тэдгээр нь зургаан жилийн хугацаагаар зөвхөн нэг удаа ажиллах бөгөөд Зөвлөлийн даргыг гишүүд дотроосоо сонгоно. Зөвлөлийн үйл ажиллагааны тайланг Улсын дээд шүүхэд танилцуулна. Зөвлөлийн зохион байгуулалт, үйл ажиллагааны журам, бүрэлдэхүүнд тавигдах шаардлага, сонгох, томилох журмыг хуулиар тогтооно” гэж бүхэлд нь өөрчлөн найруулах саналын томьёоллыг ярилцаад Зөвшилцлийн ажлын хэсэг болон УИХ дахь МАН-ын бүлгийн хуралдаанаар дахин хэлэлцэж, нэгдсэн ойлголцолд хүрэх хүртэл түр хойшлуулаад байсан.

Энэ саналыг намын бүлгээр ярилцаж, зөвшилцсөнний үндсэн дээр төслийн 3 дугаар зүйлийн “Шүүхийн ерөнхий зөвлөлийн гишүүдийн тавыг шүүгчид дотроосоо сонгож, бусад таван гишүүнийг нээлттэйгээр нэр дэвшүүлж томилно. Тэдгээр нь дөрвөн жилийн хугацаагаар зөвхөн нэг удаа ажиллах бөгөөд Зөвлөлийн даргыг гишүүд дотроосоо сонгоно. Зөвлөлийн үйл ажиллагааны тайланг Улсын дээд шүүхэд танилцуулна. Зөвлөлийн зохион байгуулалт, үйл ажиллагааны журам, бүрэлдэхүүнд тавигдах шаардлага, томилох журмыг хуулиар тогтооно” гэж өөрчлөн найруулахаар Ажлын хэсгээс гаргасан саналыг хуралдаанд оролцсон гишүүдийн 81.8 хувь нь дэмжив.

Мөн төслийн “Монгол Улс өөрийн тусгаар тогтнол, нутаг дэвсгэрийн бүрэн бүтэн байдлыг үгүйсгэх аливаа оролдлогыг үл зөвшөөрөх бөгөөд ийм зорилгоор ард нийтийн санал асуулга явуулахыг хориглоно” гэсэн агуулгатай 2 дахь өгүүлбэрийг нэмэхээр тогтов. Түүнчлэн төрийн албаны зарчим, үйл ажиллагаатай холбоотой төслийн “Төрийн жинхэнэ алба нь мэргэшсэн, тогтвортой, ёс зүйтэй, хариуцлагатай байх, шатлан дэвших чадахуйн зарчимд үндэслэх бөгөөд хараат бусаар ажиллана. Төрийн жинхэнэ албан хаагчийг хуульд зааснаас бусад үндэслэлээр төрийн албанаас чөлөөлөх, халахыг хориглоно” гэж өөрчлөн найруулахаар боллоо.

Ингээд Үндсэн хуульд оруулах нэмэлт, өөрчлөлтийн төслийн хоёр дахь хэлэлцүүлгийг хийж дууссантай холбогдуулан гишүүн З.Нарантуяа, Д.Хаянхярваа нар үг хэлж байр сууриа илэрхийлсэн юм. Дараа нь Үндсэн хуульд оруулах нэмэлт, өөрчлөлтийн төслийн хоёр дахь хэлэлцүүлгийг чуулганы нэгдсэн хуралдаанд оруулж хэлэлцүүлэх санал хураалт явуулахад Байнгын хорооны хуралдаанд оролцсон 83.3 хувь нь дэмжив.

Ийнхүү Үндсэн хуульд нэмэлт өөрчлөлт оруулах төслийн хоёрдугаар хэлэлцүүлэгт бэлтгэн чуулганы хуралдаанд шилжүүлэхээр болсон юм.

Categories
мэдээ нийгэм онцлох-нийтлэл туслах-ангилал

БНСУ руу виз мэдүүлэхэд таван сая төгрөг байршуулах шаардлагагүй боллоо

БНСУ-ын Элчин сайдын яам, Монгол Улсын Гадаад харилцааны яам, Гадаадын иргэн харьяатын газраас өнөөдөр /2019.08.26/ сэтгүүлчдэд мэдээлэл хийлээ. БНСУ руу монгол иргэд зорчиход тавигддаг визний журамд тодорхой өөрчлөлт орсон байна. Энэ талаар Гадаад харилцааны яамны Консулын газрын дарга мэдээлэл өглөө.

  • Виз мэдүүлэхэд байршуулж буй таван сая төгрөгийн барьцаа байршуулах шаардлагыг цуцлах
  • БНСУ-д хөдөлмөрийн гэрээгээр ажиллаж буй монгол иргэдийн гэр бүл /эхнэр, нөхөр/ ямар нэг мөнгөн барьцаа, нэмэлт шаардлага тавихгүйгээр сүүлийн зургаан сарын хугацаанд гэр бүлдээ шилжүүлсэн мөнгөн гуйвуулгын хуулгыг хавсарган өгсөн тохиолдолд 90 хоногийн виз олгох

БНСУ-д визийн хугацааг хэтрүүлэх магадлал багатай, тус улсад өмнө нь хууль ёсоор зорчиж байсан иргэд болон төрийн албан ажлаар зорчих иргэдийн виз мэдүүлгийг яаралтай горимоор хянаж 10 хоногийн дотор шийдвэрлэх зэрэг нааштай өөрчлөлтүүд гарч байна. Эдгээр хөнгөвчилсөн нөхцөл нь ирэх есдүгээр сарын 1-нээс эхлэн хэрэгжих юм байна.

Categories
мэдээ нийгэм

Боловсролын байгууллагуудад хяналт шалгалт хийж байна

Онцгой байдлын ерөнхий газрын даргын нэрэмжит боловсролын байгууллагуудад Гамшгаас хамгаалах болон Галын аюулгүй байдлын тухай хууль, стандарт, норм, нормативын баримт бичгийн хэрэгжилтийг хангуулах төлөвлөгөөт хяналт шалгалт өнөөдрөөс эхэллээ.Хяналт, шалгалтад улсын хэмжээнд үйл ажиллагаа явуулж байгаа их, дээд сургууль, коллеж, ерөнхий боловсролын сургууль, цэцэрлэгийн байгууллагууд хамрагдах юм.

Хичээлийн шинэ жил эхэлж байгаатай холбогдуулан сурч хүмүүжих орчны аюулгүй байдлыг хангуулах, болзошгүй эрсдэлээс урьдчилан сэргийлэх зорилгоор зохион байгуулагдаж байгаа тус хяналт, шалгалт энэ сарын 31-нийг хүртэл үргэлжилнэ гэж Онцгой байдлын ерөнхий газраас мэдээллээ.

Categories
мэдээ нийгэм

Томоохон зах худалдааны төвүүд цагийн хуваарийн дагуу ажиллаж байна

Хичээлийн шинэ жил эхлэх гэж буйтай холбогдуулан амралтын өдрүүдэд автомашины дугаарын хязгаарлалт үйлчилж эхлээд байгаа. Харин томоохон зах худалдааны төвүүдийн цагийн хуваарь өөрчлөлт орсон эсэх талаар Улаанбаатар хотын Захирагчийн ажлын албанаас тодруулахад, өөрчлөлт ороогүй тухай хэлэв. Тэдний хэлснээр “Хотын дарга захирамждаа зах, худалдааны төвүүд амрах хуваарьтай өдрөө ажиллаж байна уу үгүй юу гэдгийг хянах үүрэг өгсөн. Тийм болохоор захуудын цагийн хуваарьт өөрчлөлт ороогүй. Ердийн цагийн хуваарийн дагуу ажиллана” гэлээ.

Нийслэлийн томоохон худалдааны төв “Хархорин” даваа гарагт, “Нарантуул” мягмар гарагт амардаг хуваарьтай билээ.

Categories
мэдээ нийгэм

Алт олборлодог компанийнхан шалгалтын үеэр техник хэрэгслээ нуусан байжээ

Хууль бусаар ашигт малтмал хайх, ашиглах үйл ажиллагаа явуулж буй иргэн, аж ахуйн нэгж, нөхөрлөлийг албадан буулгах, нөхөн сэргээлтийн ажлыг гүйцэтгүүлэх зорилгоор Сэлэнгэ аймгийн Мэргэжлийн хяналтын газар, Цагдаагийн газар, ГХХБГ, БОАЖГ, Онцгой байдлын газар, Тагнуулын газар, Гадаадын иргэн харьяатын хойд бүс дэх газар, Хүдэр сумын Засаг дарга, хэсгийн мөрдөгч, байгаль орчны хяналтын ажилтнуудын бүрэлдэхүүнтэй хамтарсан ажлын хэсэг Хүдэр, Ерөө сумдын нутагт хяналт шалгалт хийж байна.

Хяналт шалгалт хийх явцад зохих зөвшөөрөлгүйгээр бичил уурхайгаар хууль бусаар алт олборлоход ашигласан техник хэрэгслээ нуух, далдлах, эзгүй хаяж хяналт шалгалтаас зайлсхийж зугатах зэрэг зөрчлүүд гарч байгаа ч энэ бүхнийг илрүүлж эзэн холбогдогчийг тогтоох, холбогдох хууль тогтоомжийн дагуу зөрчлийг шалган шийдвэрлэх ажил үргэлжлэн хийгдэж байна.Тухайлбал Толгойт, Агуйт гэх газарт ууланд далдалж нуусан экскаваторууд, угаах төхөөрөмжүүдийг илрүүлж эзэн холбогдогчийг тогтоох, албадан буулгах арга хэмжээ авлаа.

Categories
мэдээ улс-төр

Дахин нэр бүхий таван шүүгчийн асуудлыг ШЕЗ-д хүргүүлжээ

ҮАБЗ-өөс дахин нэр бүхий таван шүүгчийн асуудлыг шийдвэрлүүлэхээр Шүүхийн Ерөнхий зөвлөлд шилжүүлсэн талаар эх сурвалж мэдээллээ. Үүнд Дээд шүүхийн Эрүүгийн хэргийн танхимын тэргүүн Б.Цогт, Дээд шүүхийн Захиргааны хэргийн танхимын тэргүүн М.Батсуурь, Дээд шүүхийн шүүгч Ц.Зориг, Нийслэлийн Эрүүгийн хэргийн давж заалдах шатны шүүхийн шүүгч М.Алдар, Сүхбаатар дүүргийн Эрүүгийн анхан шатны шүүхийн шүүгч Х.Идэр нар багтжээ.

Categories
мэдээ спорт

Б.Хорлоодой хоёрдугаар тойрогт ялагдан, тэмцээнээ дуусгалаа

Жүдо бөхийн дэлхийн аварга шалгаруулах эрэгтэйчүүдийн 33, эмэгтэйчүүдийн 24 дэх удаагийн тэмцээн Японы Токио хотод зохиогдож байна.

Нийт 149 орны 863 жүдоч дэлхийн аваргад хүч сорьж буй тус тэмцээн наймдугаар сарын 24-31 хүртэл үргэлжилнэ.

Токиогийн дэвжээнээс Гавьяат тамирчин, ДАШТ-ий алт, мөнгөн медальт М.Уранцэцэг өчигдөр хүрэл медаль хүртсэн амжилтыг үзүүлээд байна.

Өнөөдрийн хувьд эмэгтэйчүүдийн 52 кг-д барилдаж буй Б.Хорлоодой хоёрдугаар тойрогт Их Британийн Ч.Гилест, залуучуудын олимын дэд аварга, Азийн АШТ-ий мөнгөн медальт Л.Сосорбарам олимпын мөнгөн медальт, Италийн О.Гиуфридагд ялагдан, тэмцээнээ дуусгалаа.

Монголын шигшээ багийн бүрэлдэхүүний дасгалжуулагчаар О.Балжинням, Х.Эрдэнэт-Од, Т.Томоо, Г.Дашдаваа, Ш.Цэвэлмаа, Л.Лувсандэмбэрэл нар ажиллаж байгаа ажээ.

Categories
мэдээ спорт

Ахмадын спортын их наадмаас хүрэл медаль хүртлээ

Хэнтий аймагт зохион байгуулагдсан “Ахмад мастeруудын спортын V их наадам”-д Говьсүмбэр аймгийн Онцгой байдлын газрын аврагч, ахлах ахлагч Д.Ариунжаргал кросс гүйлтийн 5 км-ийн төрөлд хүрэл мeдаль хүртлээ.

Тус тэмцээн энэ сарын 23-24-ний өдрүүдэд зохион байгуулагдсан бөгөөд 1000 гаруй тамирчин зургаан төрөлд өрсөлдөж, аваргуудаа шалгаруулсан байна.

Харин кросс гүйлтийн төрөлд нийт 200 гаруй тамирчин оролцсон юм гэж Онцгой байдлын ерөнхий газраас мэдээллээ.

Categories
мэдээ улс-төр

УИХ-ын гишүүн О.Баасанхүү: УИХ-ын дарга нь рекламны модель болж байгаад би харамсаж байна

УИХ-ын гишүүн О.Баасанхүү сэтгүүлчдэд мэдээлэл хийлээ. Тэрбээр:

-Үндсэн хуульд өөрчлөлт оруулах төслийг өргөн барихад миний бие оролцсон. Хэлэлцүүлэхэд байнгын хороон дээр долоон гишүүн зөвшөөрсөн. Өргөн бариагүй нэг гишүүн санал оруулсан. Гэтэл өнөөдөр Үндсэн хуульд өөрчлөлт оруулах төсөл өргөн барьсанаасаа өөрчлөгджээ.

УИХ-ын дарга нь рекламны модель болж байгаад би харамсаж байна. Үндсэн хуульд өөрчлөлт оруулах төслийг ард түмнээр хэлэлцүүлнэ гэвэл тэр бүр мэдэхгүй. Тэр утгаараа хэлэлцүүлэг хийсэн оролдлого нь зөв. Гэхдээ ард түмнээс заавал асуух таван асуулт байна. Тийм учраас миний бие Ерөнхийлөгч, УИХ-ын дарга, Ерөнхий сайд нарт бичиг хүргүүлж байна. Үүнд:

-УИХ-ын гишүүдийн тоог 99 болгох нь зөв үү

-УИХ-ын бүрэн эрхийн хугацааг таван жил болгох нь зөв үү

-Сонгуулийн тогтолцоог холимог байлгах нь зөв үү

-Байгалийн баялгийн сан байгуулах уу

-Шүүх хараат бус байх нь зөв үү гэдгийг ард түмнээс асуух хэрэгтэй хэмээн мэдээлэв.