Month: August 2019

Кристина Нобелийн Хүүхдийн сан 60 оюутанд 91 сая төгрөгийн сургалтын төлбөрийн тэтгэлэг олгохоор болжээ.

Тодруулбал, нийт 60 оюутанд 91.217.700 төгрөгийн /3 хүүхдэд 30 хувь, 35 хүүхдэд 50 хувь, 2 оюутанд 60 хувь, 3 оюутанд 70 хувь, 1 хүүхдэд 80 хувь, 16 хүүхдэд 100 хувийн тэтгэлэг/ сургалтын төлбөрийн тэтгэлэг олгох юм.

Нийслэлийн Гэр бүл, хүүхэд, залуучуудын хөгжлийн газар нь зорилтот бүлгийн гэр бүл, хүүхэд, залуучуудыг дэмжих, хөгжүүлэх төсөл, хөтөлбөрийг Кристина Нобелийн Хүүхдийн сантай хамтран хэрэгжүүлдэг билээ.

Кристина Нобелийн Хүүхдийн сан 22 дахь жилдээ хүүхэд, залуучуудыг дэмжих, тэднийг бие болоод сэтгэл зүйн хувьд биеэ даасан, амжилттай иргэн болгон төлөвшүүлэхээр ажилладаг. Жил бүр хөтөлбөрт хамрагдаж буй 1200 гаруй оюутанд цаашид өсөн дэвжих, ахисан түвшинд суралцах боломжийг олгох зорилгоор Боловсролын тэтгэлэг олгох хөтөлбөрийг санаачлан хэрэгжүүлээд 18 жил болжээ.

2019-2020 оны хичээлийн жилд сургалтын тэтгэлэг олгох шалгаруулалтыг оюутан залуучуудын суралцах чадвар, сурах идэвх зүтгэл, нийгмийн идэвх санаачилга болон ар гэрийн нөхцөл байдал зэрэг шалгуураар хоёр үе шаттай зохион байгуулсан байна.

Тэтгэлгийн батламж гардуулах ёслол маргааш Нийслэлийн Хангарди ордны 14 давхрын А танхимд болно.

Цагдаагийн ерөнхий газрын даргын дэргэдэх зөвлөл өчигдөр /2019.08.27/ хуралдаж, нийслэлийн дүүргүүд дэх цагдаагийн хэлтсүүдийг нутаг дэвсгэрийнх нь харьяаллаар нэгдсэн удирдлага, зохион байгуулалтад оруулж, нэгж дээрх орон тоог нэмэгдүүлэх шийдвэр гаргалаа.

Цагдаагийн байгууллагаас иргэдэд үзүүлэх үйлчилгээний хүртээмж, шуурхай байдлыг хангах, алба хаагчдын ажлын ачааллыг тэнцвэржүүлэх, гэмт хэрэгтэй тэмцэх, нийтийн хэв журам хамгаалах үндсэн чиг үүрэг бүхий нэгж дээр ажиллаж байгаа алба хаагчдын орон тоог нэмэгдүүлэх чиглэлээр Цагдаагийн ерөнхий газар, Нийслэлийн цагдаагийн газрын удирдлагын бүтцээс 52 орон тоог дүүргүүдэд шилжүүлж, хороодод цагдаагийн 16 хэсгийг шинээр байгуулж хэсэг дээр эрүүгийн мөрдөгч, мөрдөгч нарыг тогтмол ажиллуулахаар бүтэц зохион байгуулалтын өөрчлөлтийг хийжээ.

Тус байгуулагдсан хэсгүүд дээр эрүүгийн мөрдөгч, мөрдөгч нарыг тогтмол ажиллуулах нь үйлдэгдсэн гэмт хэрэг, зөрчлийг шуурхай илрүүлэх, урьдчилан сэргийлэх цагдаагийн байгууллагын ажил үйлчилгээг иргэдэд ойртуулж, хүртээмжийг нэмэгдүүлэх ач холбогдолтой юм.

Өчигдөр үнэний төлөө, ядарсан зовсон бусдын төлөө үзэг барин тэмцэж явсан ETV телевизийн мэдээний албаны сэтгүүлч Мягмарын Уянга өнөөдөр үхэл амьдралтай тэмцэж байна. Сэтгүүлч М.Уянга нь нөхөр хүүгийн хамт амьдардаг залуу гэр бүл юм. Түүний нөхөр Ц.Ариунболд нар хэвлэлийн бага хурал хийлээ. Тэрбээр:

-М.Уянга маань эхэндээ өвчин зовлонгоо хүнд хэлээд яахав гэж байсан ч өвчин нь хүндэрсээр бөөрний архаг дутагдалтай болсон. Бөөрний дутагдалд орохоор өөрт нь мэдэгдэхгүй яваандаа ууц нуруугаар нь хатгана, ухаан санаа нь балартан, бөөлжих зэрэг шинж тэмдэг илэрсэн.

Тэрээр жил гаруй хугацаанд хэвлийн диализтай явж өдөр болгон түүнийгээ сольж ажлаа тасралтгүй хийсээр ирсэн. Гэвч өвчин нь хүндэрсээр хөл гар нь хавагнаж, ажлаа хийх байтугай явахад ч хүндрэлтэй болсон. Одоогийн байдлаар өвчин нь хүндэрч дотор эрхтэндээ нөлөөлөөд байна. Тиймээс бидэнд сүүлийн боломж нь бөөр шилжүүлэн суулгах мэс засал болоод байна. БНСУ-д цусны бүлэг ижилсүүлэх эмчилгээ мөн бөөр шилжүүлэн суулгах мэс заслыг хийлгэхэд 120 сая төгрөг шаардлагатай гэсэн. Цалингаас цалингийн хооронд амьдардаг манай гэр бүлийн хувьд 120 сая төгрөг бол төсөөлөгдөхгүй их мөнгө. Тийм учраас сайхан сэтгэлт хүмүүсээсээ тусламж хүсэж байна” хэмээн мэдээлэв.

ETV Телевизийн захирал Т.Ганзул:

-Хоёр жилийн өмнө анх бөөрний архаг дутагдалтай гэж хэлж байсан. Хүнд шатандаа орсон ажил хийхэд хүндрэл учраад байна гэж нээлттэй ярилцдаг байсан. Сүүлийн гурван сар гэдсэндээ гуурс суулгуулж ажилдаа ирдэг байсан. Тэр гуурсаа өдөрт нэг вакум орчинд сольдог. Бид аль болох дэмжиж гуурсаа солих цэвэр өрөөг бэлдэж өгдөг байсан. Монголд бөөр шилжүүлэн суулгах боломжтой боловч донорын хууль гэх мэт олон асуудалтай тулгардаг юм байна. Төрсөн ах нь бөөрөө өгье гэсэн боловч цусны бүлэг өөр. Гэтэл бүлэг ижилсүүлэх эмчилгээг Монголд хийдэггүй. Солонгост маш өндөр түвшинд сайн хийдэг. Арав хоногийн өмнө эмнэлгээс бусад эрхтнүүддээ нөлөөлсөн байна, ялангуяа элгэнд нөлөөлсөн цаашдаа зүрх болон бусад эрхтэнд хурдацтай нөлөөлнө гэж хэлсэн. Тийм учраас хагалгааг яаравчлах хэрэгтэй. байна. Хамгийн түрүүнд хэвлэл мэдээллийн салбарынхандаа хандсан. Мөн иргэд компаниудаасаа хандив хүсэж байна” гэв.

СЭТГҮҮЛЧ М.УЯНГАД ТУСЛАХ ХАНДИВЫН АЯНД НЭГДЭЦГЭЭЕ

ХАНДИВЫН ДАНС: 5429322222 /М.УЯНГА/

УТАС: 94699363 99122471

Хүчит шонхор, Нарантуул-2 худалдааны төвүүдийн үйл ажиллагаанд өдөр тутам байнгын хяналт шалгалт хийж, болзошгүй эрсдэлээс урьдчилан сэргийлэн ажиллаж байна.Мэргэжил арга зүйн зөвлөгөө зөвлөгөө өгөх, илэрсэн зөрчилд Зөрчлийн тухай хуулийн холбогдох заалтын дагуу арга хэмжээ авах, улсын байцаагчийн хугацаатай албан шаардлага өгөх зэрэг арга хэмжээнүүдийг авч хэрэгжүүлэн ажиллаж байна. Хяналт шалгалт үргэлжилж байна.

Агаар, орчны бохирдлыг бууруулж иргэдийн эрүүл, аюулгүй орчинд амьдрах нөхцөлийг хангах зорилгоор батлагдан гарсан Монгол Улсын Агаарын тухай, Хог хаягдлын тухай хууль, Засгийн газрын тогтоол, дүрэм, журам, стандартын биелэлтийг хангуулахаар “МЭДЭГДЭХ ХУУДАС”-ийг иргэн аж ахуйн нэгжид хүргүүлж байна.СБД-ийн 15 хороонд үйл ажиллагаа явуулж байгаа 29 аж ахуй нэгж, иргэнд хүргэж, хорооны зохион байгуулагч, эко ажилтантай хамтран ажиллаж хяналт тавин ажиллаж байна.

Халхын голын байлдааны ялалтын 80 жилийн ойд зориулсан хүчит 64 бөхийн барилдаан Хүй долоон худагт болж, Завхан аймгийн Алдархаан сумын харьяат, Монгол Улсын начин Л.Лха-Очир түрүүлж, Төв аймгийн Баянхангай сумын харьяат, Монгол Улсын заан Б.Батмөнх үзүүрлэлээ.

Харин их шөвөгт Ховд аймгийн Зэрэг сумын харьяат, улсын харцага Б.Батөлзий, Завхан аймгийн Баянтэс сумын харьяат, аймгийн арслан Ш.Пүрэвгарьд нар шалгарлаа.

Монгол Улс дахь хүний эрхийн төлөв байдлын тухай ээлжит хоёр дахь тайланг НҮБ-ын Хүний эрхийн зөвлөл 2015 онд хэлэлцэж Засгийн газарт хандаж 150 зөвлөмж өгсөн. Монгол Улс 2020 оны 5 дугаар сард эдгээр зөвлөмжийг хэрэгжүүлсэн тухай буюу удаах гурав дахь удаагийн тайлангаа Хүний эрхийн зөвлөлөөр хэлэлцүүлэх юм.

Өнөөдөр Гадаад харилцааны яаманд Засгийн газар, иргэний нийгмийн байгууллагууд дээрх зөвлөмжийг хэрэгжүүлэх чиглэлээр Засгийн газраас авч хэрэгжүүлсэн бодлого, үйл ажиллагаа, үр нөлөөнд иргэний нийгмээс өгч байгаа дүгнэлт тайланг хэлэлцэх зөвлөлдөх уулзалт болж байна.

Зөвлөлдөх уулзалтад Монголын хүний эрхийн төрийн бус байгууллагуудын форум, холбогдох яамд, ЦЕГ, МХЕГ, ШШГЕГ, Жендэрийн үндэсний хороо, Харилцаа холбооны зохицуулах хороо, Нийслэлийн Засаг даргын тамгын газар болон бусад байгууллагын төлөөлөгчид оролцов.

НҮБ-ын Хүний эрхийн зөвлөлөөс өгсөн зөвлөмжийн хүрээнд өнөөдрийн зөвлөлдөх уулзалтад оролцогчид хүний эрхийн үндэсний тогтолцоо, бодлогын уялдаа холбоо, үзэл бодлоо илэрхийлэх эрх чөлөө, хүн худалдаалах гэмт хэрэг, бэлгийн хүчирхийлэл, эрүүдэн шүүхтэй тэмцэх, урьдчилан сэргийлэх мөн гэр бүлийн хүчирхийлэл, хүнсний аюулгүй байдал, эрүүл мэндийн даатгалын тогтолцоо, хар тамхи, мансууруулах бодисоос ангид байх болон хүүхэд, эмэгтэйчүүд, ахмад настан мөн хөгжлийн бэрхшээлтэй хүмүүсийн эрхийн хэрэгжилтийг хэлэлцэж байгаа юм.

Зөвлөлдөх уулзалт Монгол Улс дахь хүний эрхийн төлөв байдлын талаарх Засгийн газар, иргэний нийгмийн байгууллагын ойлголтыг нэгтгэх, харилцан мэдээлэл солилцох мөн хүний эрхийн төлөв байдлыг бодитоор үнэлэхэд ач холбогдолтой болж байна.

УИХ, Засгийн газрын гишүүн, Батлан хамгаалахын сайд Н.Энхболд ОХУ-ын ЗХЖШ–ын орлогч дарга, дэслэгч генерал А.Ю.Чайков тэргүүтэй төлөөлөгчдийг Төрийн ордноо хүлээн авч уулзлаа. Уулзалтын эхэнд талууд жилээс жилд улам өргөжин тэлж байгаа хоёр орны Батлан хамгаалах, Зэвсэгт хүчний харилцаа, хамтын ажиллагааны талаар санал солилцож, Халхын голын байлдааны ялалтын түүхт ойг хамтран тэмдэглэж байгаадаа сэтгэл хангалуун байгаагаа илэрхийлсэн.

Батлан хамгаалахын сайд Н.Энхболд “Халхын голын байлдааны ялалтын түүхэн ялалтыг тэмдэглэхэд ОХУ-ын БХЯ–наас онцгой анхаарч, А.В.Александровын нэрэмжит ОХУ-ын ЦДБЭЧ-ын уран бүтээлчид болон ОХУ-ын Агаар-сансрын хүчний уран нислэгийн үзүүлбэрийн багийн бүрэлдэхүүнээ манай улсад илгээж, баяр дээр баяр нэмж байгаад талархаж байна” гэв.

Мөн энэ үеэр Халхын голын байлдааны ялалтын түүхт 80 жилийн ойд зориулсан дурсгалын медалиар дэслэгч генерал А.Ю.Чайков тэргүүтэй төлөөлөгчдийг шагнасан юм.