Month: July 2019

Сонгинохайрхан дүүргийн 11-р хороо 129 дүгээр бага сургууль, цэцэрлэгийн цогцолбороос Хувьсгалчдын гудамж хүртэлх 1 км авто замын ажил хийгдэж байна. Гүйцэтгэгч “Нано экологи” болон, Ринг роуд” ХХК-ууд гэрээ байгуулснаас хойш улаан шугам хүлээлцэх, авто замын трасст орсон аж ахуйн нэгж, иргэдийн судалгаа гаргах, замын трасст орсон цахилгааны шугам шилжүүлэх ажлуудыг гүйцэтгэж байна. Мөн зурагт төсөвт тусгагдаагүй цахилгааны КТП шугам, цэвэр усны шугам ажлын явцад гарч ирснийг шийдэж, график төлөвлөгөөний дагуу ажиллах нөхцөлийг бүрдүүлсэн. Тус замын трассын дагуу 24 нэгж талбар нөлөөлөлд өртсөн бөгөөд үүнээс 9 айл газар чөлөөлөлт хийгдэж, бусад нэгж талбарыг чөлөөлөх ажил зөвшилцөх шатандаа үргэлжилж байна. Авто замыг 2019 оны 08 дугаар сарын 30-ны өдөр хүлээлгэн өгөхөөр төлөвлөн ажиллаж байна. Одоогоор нийт ажлын явц 20 хувьтай байна.

Цахимаар бүртгэлийн дугаар олгох сисmем http;//solongos.hudulmur-halamj.gov.mn-д нэвтэрч өөрийн мэдээллийг бүртгүүлнэ. Систем 2019 оны 8 дугаар сарын 5-ны өдрийн 8:00 цагт нээж, 17:00 цагт хаагдана.

Бүртгүүлэх явц:

1. Та зөвхөн өөрийн оршин суугаа дүүргийг сонгоно. Өөр дүүрэг сонгосон тохиолдолд тухайн дүүрэг бүртгэлийн байран дээр дахин баримт бичиг болон бүртгэлийн дугаарын жагсаалтын дагуу таны бичиг баримтыг тулгаж шалгахыг анхаарна уу.
2. Гар утас болон компьютерээс нэвтрэх боломжтой.
3. Өөрийн мэдээллийг буруу оруулсан тохиолдолд дахин бүртгүүлэх боломжгүй.
4. Системд бүртгүүлэх загвар, зөвлөмжийг холбогдох мэдээллийн хэрэгслээр мэдээлнэ.
5. Системийн цонхонд “Та бүртгэгдлээ” гарч ирэхэд таны оршин суугаа дүүргийн Хөдөлмөр, халамжийн үйлчилгээний хэлтсийн бүртгэл хийгдэх хаяг, огноо, цаг минут гарч ирэх тул заасан хугацаанд бүртгүүлнэ. Хоцорсон тохиолдолд дугаар хүчингүй болох тул хариуцлагатай хандана уу.
6. Та бүртгүүлж амжаагүй бол дараа жилийн бүртгэлд хамрагдах боломжтой.

НИЙСЛЭЛИЙН 6 ДҮҮРГИЙН ХЭМЖЭЭНД ЦАХИМААР БҮРТГЭГДЭЖ ДУГААР АВСАН ИРГЭДИЙГ 2019 ОНЫ 8 ДУГААР САРЫН 6, 7-НЫ ӨДРҮҮДЭД 8;00-12;00, 13;00-17;00 ЦАГИЙН ХООРОНД БҮРТГЭНЭ.

1. Бүртгүүлэгч нь өөрийн биеэр ирнэ.

2. Бүртгүүлэхдээ дараах бичиг баримтыг авч ирнэ.

А. Иргэний үнэмлэх ба хуулбарын хамт /үнэмлэхгүй бол ТҮЦ машинаас авсан лавлагааг үндэслэнэ/

Б. 3,5*4,5 хэмжээтэй цээж зураг 2% /сүүлийн 3 сарын дотор авахуулсан байх, фотошопоор засаагүй байх/

В. Бүртгэлийн хураамж 24 ам доллар Бүртгүүлэгчдэд тавигдах шаардлага:

а.18-аас 39 настай байх (1979 оны 8-р сарын 7-ноос 2001 оны 8-р сарын 06- ны өдрийн хооронд төрсөн байх)

б. Хорих ялтай эсвэл түүнээс илүү хүнд ялтай гэмт хэрэгт холбогдоогүй байх

в. Солонгосоос албадан гаргах буюу тус улсыг орхин явах захирамж гаргуулж байгаагүй байх

г. Монгол улсаас гарах эрхээ хязгаарлуулаагүй байх

д. Өнгө ялгах чадвартай байх (нурууны дисктэй, гарын хуруу дутуу тохиолдолд хэлний шалгалтанд орж болох хэдий ч 2 дахь шалгалтанд ажил үүрэг гүйцэтгэх чадамжгүй гэж үзэн хасах болно.)

е. Мэргэжлийн бус ажилчны E-9, усан онгоцны ажлын E-10 визээр БНСУ-д 5-аас дээш ажиллаагүй байх

Хөдөлмөр, халамж үйлчилгээний хэлтсийн 202 тоот Холбогдох утасны дугаар: 70109008, 70002274

Цагдаагийн тангараг өргөх ёслолын ажиллагаа өнөөдөр Тээврийн цагдаагийн албаны төв байранд боллоо.

Цагдаагийн тангараг

Монгол Улсын иргэн би

Цагдаагийн албанд ажиллахдаа

Монгол Улсын Үндсэн хууль бусад хууль,

Алба хаагчийн ёс зүй, сахилга,

Албаны нууцыг чанд сахин,

Чин шударгаар ажиллаж,

Шаардлага гарвал амь биеэ үл хайрлан

Зүтгэхээ батлан тангараглая.

Би энэ тангаргаасаа няцваас хуулийн хариуцлага хүлээнэ. хэмээн цагдаагийн алба хаагчид тангараг өргөлөө.

Шинээр томилогдсон эрэлхэг шонхорууддаа амжилт хүсье.

Нийслэлийн төрийн өмчийн цэцэрлэгүүд шинээр элсэх хоёр настай хүүхдүүд болон тав хүртэлх насны хүүхдүүдийн бүртгэлийг гурав дахь жилдээ цахимаар бүртгэж эхэллээ. Үүнтэй холбоотойгоор “Цэцэрлэгийн бүртгэлд 2017 онд төрсөн бүх хүүхдүүд хамрагдана. Энэ жил нэг бүлэгт байх хүүхдийн тоо 40, бага бүлэгт байх хүүхдийн тоо 30-аас хэтрэхгүй байх бодлогыг барина. Харин 186, 10-р тусгай цэцэрлэг мөн сувиллын болон халамжийн дөрвөн цэцэрлэг уламжлалт аргаараа бүртгэнэ” гэж Боловсрол Соёл Шинжлэх ухаан Спортын яамны Сургуулийн өмнөх Боловсролын бодлого зохицуулалтын газрын дарга Н.Дуламжав ярьлаа.

Эцэг эх, асран хамгаалагчид хүүхдээ наймдугаар сарын 22-ны өдрийн 23.59 цаг хүртэл хугацаанд “Tsetserleg.ulaanbaatar.mn” гэсэн хаягаар бүртгүүлэх боломжтой аж. Мөн энэ хугацаанд өмнөх хичээлийн жилүүдэд элссэн хүүхдүүдийн бүртгэлийг шалгаж, баталгаажуулах гэнэ. Цахимаар бүртгүүлсэн хүүхдүүд наймдугаар сарын 12-ноос тухайн цэцэрлэг дээрээ очиж, гараар бүртгүүлнэ.

Цэцэрлэгт хамрагдаагүй 3-5 настнууд орон тоо гарсан тохиолдолд цэцэрлэгт бүртгүүлэх ажээ. “Цахим элсэлт”-ийн үр дүнгийн мэдээллийг эцэг эх, асран хамгаалагч нарын гар утсанд мессэжээр илгээнэ. Цахим элсэлт дууссаны дараа шинээр бүртгүүлсэн хүүхдийн бүртгэлийг www.tsetserleg.ulaanbaatar.mn-ийн “Шалгах” цэс рүү орж бүртгэлийн дугаараа хийж хамран сургах тойргийн цэцэрлэгтээ орсон эсэхийг шалгах боломжтой юм.

Мишээл групп ХХК нь 2019 оны зургаадугаар сараас эхлэн “Мишээл фүүд стрийт” энтертаймент гудамжны шинэ төслийг хэрэгжүүлэх болсонтой холбогдуулж иргэдийн зорчих эрэлт хэрэгцээг хангах зорилгоор нийтийн тээврийн үйлчилгээний автобусны эцсийн зогсоолыг Мишээл 2 объектын хойно шилжүүлсэн байна.

Мөн нийтийн тээврийн үйлчилгээний БММЗ нэрийн эцсийн зогсоолоор дайран өнгөрдөг чиглэлийн тээврийн хэрэгслүүдийн хөдөлгөөний аюулгүй байдлыг хангах үүднээс 2019 оны долоодугаар сарын 24-ний өдрөөс эхлэн Мишээл экспо хүртэл сунгаад байна. Иймд дээрх гудамж замаар дайран өнгөрдөг нийтийн тээврийн үйлчилгээний Ч:10 “Ганц худаг – Сансар – Баянмонгол хороолол – Мишээл экспо”, Ч: 61 “Офицеруудын ордон – МУБИС – 120 мянгат – Алтай хотхон – Мишээл экспо”, Ч:50 “БММЗ – Улаанхуаран”, Ч:58 “3, 4-р хороолол – БММЗ” чиглэлүүдэд доорх өөрчлөлт орж байгаа ажээ. Нийтийн тээврийн үйлчилгээтэй холбоотой санал, хүсэлтийг тус газрын 70044040 дугаарын утсаар тогтмол хүлээн авч, шуурхай шийдвэрлэнэ.

Төр нийгмийн нэрт зүтгэлтэн С.Зоригийг хөнөөсөн хэргээр ял эдэлж буй Б.Содномдаржаа, Т.Чимгээ нарыг эрүүдэн шүүсэнтэй холбоотойгоор Тагнуулын ерөнхий газрын дарга асан, хошууч генерал Б.Хурц, УЕП-ын орлогчоор ажиллаж байсан Г.Эрдэнэбат нарын есөн хүнийг шалгаж байгаа билээ. Хэргийн урьдчилсан хэлэлцүүлгийг энэ сарын 8-нд Төв аймгийн анхан шатны шүүхэд хийж шүүх хурлыг товлосон. Хэрэгт гэрчээр талийгаач С.Зоригийн эхнэр Б.Булган оролцож байгаа бол ял эдэлж буй Т.Чимгээ, Б.Содномдаржаа нар хохирогчоор тогтоогджээ. Б.Хурц нарын есөн хүний гэм бурууг анхан шатны шүүх хурал маргааш 10:00 цагт Төв аймгийн шүүхэд болно.

Тээврийн цагдаагийн алба өнгөрсөн амралтын өдрүүдэд 411 дуудлага хүлээн авснаас зам тээврийн ослын шинжтэй 245 зөрчлийг шалгажээ. Ослын улмаас нийслэлд 5 хүн бэртэж, орон нутагт нэг хүний амь хохирчээ. Зам тээврийн ноцтой ослоос дурдвал, энэ сарын 20-ны 03.20 цагт Дундговь аймгий Луус сумын хоёрдугаар багийн нутаг “Наран” гэх газар засмал замд “Lexus-470” загварын автомашин “Howo” загварын автомашинтай мөргөлдөж, зорчигч 46 настай эмэгтэй нам барьжээ. Эл хэргийг харъяаллын дагуу тус аймгийн цагдаагийн газар шалгаж байна. Амралтын өдрүүдэд бүртгэсэн ослын гурав нь архи, согтууруулах ундаа хэрэглэсэн үедээ замын хөдөлгөөнд оролцсоноос болсон байна. Замын цагдаа нар эдгээр өдөр согтуугаар тээврийн хэрэгсэл жолоодсон 81 жолоочийг илрүүлж, хуулийн дагуу шийтгэл оноов. Иймд архи, согтууруулах ундаа хэрэглэсэн үедээ тээврийн хэрэгсэл жолоодохгүй байх, орон нутгийн замд хурдаа тохируулж, хамгаалах бүс зүүж, замын хөдөлгөөний дүрмээ биелүүлэхийг Тээврийн цагдаагийн албанаас анхаарууллаа.