Month: June 2019

Монголын чопперчин ахан дүүс ТББ, Нийслэлийн Засаг даргын Тамгын газар, Аялал жуулчлалын газар хамтран “Талын салхи” наадмыг тав дахь жилдээ зохион байгуулах гэж байна. Тус наадам энэ сарын 8,9-ний өдрүүдэд болох бөгөөд зохион байгуулагчдын зүгээс өнөөдөр мэдээлэл өгсөн юм.

Нийслэлийн аялал жуулчлалын газрын дарга Д.Батсүх:

“Энэ наадам нь тусгай сонирхолын аялал жуулчлалыг хөгжүүлэх, Монгол улсын нийслэл Улаанбаатар хотыг дэлхий дахинд сурталчлах, 3 улсын хамтарсан “Цайны зам” төслийг хэрэгжүүлэх зэрэг томоохон ач холбогдолтой. Жил ирэх тусам оролцогчдын тоо өсөж, наадмын зохион байгуулалт илүү сайжирч байгаа. 6 сарын 8-ны бямба гарагийн өглөө 11 цагаас Сүхбаатарын талбайд нээлтээ хийнэ. Нээлтээ хийчихээд мотоциклын цуваа Төв аймгийн Эрдэнэ суманд байрлах Цонжинболдог аялал жуулчлалын цогцолбор газарт 2 өдрийн арга хэмжээг зохион байгуулна” гэв.

“Монголын Харли сонирхогчдын холбоо”-ны УЗ-ын гишүүн Р.Мөнхсайхан:

Энэ жил “Талын салхи” фестивалийн таван жилийн ой тохиож байна. Манай наадмыг зорин Ази, Европын орнуудаас ялангуяа Орос, Хятадаас хамгийн их хүн ирдэг. Энэ жил Герман, Франц, Энэтхэг, Японоос зочид ирсэн байна. Жилийн жил цар хүрээгээ тэлсээр төв Азидаа хамгийн олон мотоцикль цугласан том хэмжээний наадам болох төлөвтэй байна” гэлээ.

“Монголын чопперчин ахан дүүс” ТББ-ын ерөнхийлөгч Ш.Сүхбаяр:

“Энэ жилийн наадамд гадаад дотоодын 800 орчим мотоцикль оролцох төлөвлөгөөтэй байна. Монголын бүх ард түмэнд нээлттэй, ямар нэгэн төлбөргүй болохоор та бүхэн хоёр өдөр агаар салхинд гарангаа мото спортыг сонирхож, урлаг соёлын наадам ирж үзээрэй” хэмээн уриалав.

Тээврийн цагдаагийн албаны урьдчилсан сэргийлэх хэлтсийн дарга Э.Бөхбат:

“Замын цагдаагийн алба мото спорт сонирхогчидтой жилийн жилд хамтран ажилладаг. Энэ жил маш олон орны зочид ирж байгаа юм байна. Монгол Улсын нэр хүнд олон улсад яригдах учраас илүү анхаарч ажиллана. Архи согтууруулах ундаа, улсын дугааргүй мотоцикль, хамгаалалтын малгай, хэрэгсэлгүй явах эдгээр болон бусад зөрчлийг бид хянаж шалгах болно” гэлээ.

Мото наадмын талбайд 300 мотоциклийн үзэсгэлэн зохион байгуулагдах бол орой нь Улаанбаатар чуулга, Харанга, Жонон, Хурд, Нисванис, Булсара, Ice Top, Digital, Rapper Gee, Desantm, NMnN зэрэг дуучдын дууг сонсож, циркийн үзүүлбэрүүдийг үзэж сонирхох боломжтой юм байна.

Б.САРУУЛ

Улсын Дээд шүүхийн Практик судлалын хэлтсээс улсын хэмжээнд анхан шатны шүүхээр 2016-2018 онд шийдвэрлэсэн эрх мэдэл, албан тушаалын байдлаа урвуулан ашиглах (ЭХТА 22.1), хахууль авах (ЭХТА 22.4), хахууль өгөх (ЭХТА 22.5) гэмт хэргээс хөөн хэлэлцэх хугацаа дууссан үндэслэлээр хэрэгсэхгүй болгосон гэмт хэргийн талаарх судалгааг хийжээ.

Анхан шатны шүүхүүд 2016-2018 онд тухайн төрлийн нийт 212 хүнд холбогдох 92 хэргийг хянан шийдвэрлэснээс 150 хүнд хорих болон торгох ял оногдуулсан нь хэрэгт холбогдогчдын 70.8 хувийг эзэлж байна.

Эрх мэдэл, албан тушаалын байдлаа урвуулан ашиглах, хахууль авах, өгөх гэмт хэрэгт 2016 онд 16 хэрэгт 26 хүн, 2017 онд 35 хэрэгт 77 хүн, 2018 онд 41 хэрэгт 47 хүн ял шийтгүүлсэн аж. 2018 онд шүүхээр шийдвэрлэсэн тухайн төрлийн гэмт хэргийг 2016 онтой харьцуулан үзвэл шийдвэрлэсэн хэрэг 25-аар буюу 1.6 дахин, ял шийтгүүлэгч 21-ээр буюу 80.8 хувиар тус тус өссөн байна. Анхан шатны шүүхүүд 2016-2018 онд тухайн төрлийн 9 хэргийн 29 хүнийг цагаатгажээ.

Эрх мэдэл, албан тушаалын байдлаа урвуулан ашиглах, хахууль авах, өгөх гэмт хэрэгт шалгагдсан 21 хүнд холбогдох хэргийг шүүх хэрэгсэхгүй болгосон бөгөөд үүний үндэслэлийг нарийвчлан судалсан байна. Судалгаанаас үзвэл 10 хүнийг гэмт хэргийн бүрэлдэхүүнгүй /шинжгүй/ үндэслэлээр, 8 хүнийг Өршөөл үзүүлэх тухай хуулиар, 1 хүнийг нэмэлт нотлох баримтыг цуглуулах ажиллагааг хийсэн боловч гэмт хэрэг үйлдсэн нь нотлогдоогүй гэсэн үндэслэлээр хэргийг хэрэгсэхгүй болгож, эрүүгийн хариуцлагаас чөлөөлжээ. Харин хөөн хэлэлцэх хугацаа дууссан үндэслэлээр 2 хүнд холбогдох хэргийг хэрэгсэхгүй болгож, эрүүгийн хариуцлагаас чөлөөлсөн бөгөөд энэ нь шүүхээр шийдвэрлэсэн эрх мэдэл, албан тушаалын байдлаа урвуулан ашиглах, хахууль авах, өгөх нийт 92 гэмт хэргийн 2.2 хувийг, нийт хэрэгт холбогдогчдын 0.9 хувийг тус тус эзэлж байна.

Хөөн хэлэлцэх хугацаа дууссан үндэслэлээр хэргийг нь хэрэгсэхгүй болсон 2 хүний 1 нь Эрүүгийн хуулийн тусгай ангийн 22.1 дүгээр зүйл буюу эрх мэдэл, албан тушаалын байдлаа урвуулан ашиглах гэмт хэрэгт, нөгөө нь Эрүүгийн хуулийн тусгай ангийн 22.4 дүгээр зүйл буюу хахууль авах гэмт хэрэгт тус тус холбогдсон аж. Дашрамд дурдахад хөөн хэлэлцэх хугацаа нь дууссан үндэслэлээр эрүүгийн хариуцлагаас чөлөөлөгдсөн хүмүүс нь хэрэгт холбогдох үедээ нэгэн аймагт төрийн албанд удирдах болон гүйцэтгэх албан тушаал хашиж байсан ажээ.

Онцгой байдлын байгууллагын 2019 оны Гал унтраах техникийн олон төрөлт спортын бүсийн аварга шалгаруулах тэмцээн энэ сарын 04-05-ны өдрүүдэд боллоо.

Тэмцээнд Улаанбаатар, Баруун, Зүүн, Хойд, Өмнөд бүсийн 64 багийн 500 гаруй тамирчин оролцож, довтолгооны шат, саадтай 100 м, 4х100 метрийн буухиа гүйлт, байлдааны тархалт гэсэн дөрвөн төрлөөр аваргуудаа шалгаруулсан юм.

Улаанбаатар бүсийн тэмцээнд нийслэлийн хүрээний анги, байгууллагуудын баг тамирчид оролцсоноос нийлбэр дүнгээр НОБГ-ын Чингэлтэй дүүргийн ОБХ-ийн Гал түймэр унтраах, аврах 10 дугаар ангийн баг тамирчид тэргүүлсэн бол зүүн бүсийн тэмцээнд Дорнод, Хэнтий, Сүхбаатар аймгийн Онцгой байдлын газрын баг тамирчдаас нийлбэр дүнгээр Говьсүмбэр аймгийн Онцгой байдлын газрын баг тамирчид тэргүүн байрт шалгарчээ.

Баруун бүсийн тэмцээнд оролцсон Ховд, Баян-Өлгий, Увс, Завхан, Говь-Алтай аймгийн Онцгой байдлын газрын баг тамирчдаас тэргүүн байрыг Увс аймгийн Онцгой байдлын газрын баг тамирчид эзэлсэн бол Өмнөд бүсийн тэмцээнд Баянхонгор, Говьсүмбэр, Дорноговь, Дундговь, Өмнөговь, Өвөрхангай аймгийн Онцгой байдлын газрын баг тамирчдаас Баянхонгор аймгийн Онцгой байдлын газрын баг тамирчид нэгдүгээр байрт шалгарсан байна.

Харин хойд бүсийн тэмцээнд Хөвсгөл, Архангай, Булган, Дархан-Уул, Эрдэнэт, Сэлэнгэ, Төв аймгийн Онцгой байдлын газрын баг тамирчид оролцсоноос Орхон аймгийн Онцгой байдлын газрын баг тамирчид тэргүүллээ гэж Онцгой байдлын ерөнхий газраас мэдээллээ.

Хүнс, хөдөө аж ахуй, хөнгөн үйлдвэрийн яам, Нийслэлийн Засаг даргын Тамгын газрын Захирагчийн ажлын алба, Дэлхийн тогооч нарын холбоо, Монголын мастер тогоочдын холбоо хамтран Улаанбаатар хотноо хоёр дахь жилдээ зохион байгуулж буй “Чингис хааны цом 2019” олон улсын тогооч нарын тэмцээн өнөөдөр “Мишээл экспо” төвд эхэллээ. Нээлтийн арга хэмжээнд ХХААХҮЯ-ны дэд сайд Ж.Сауле, Улаанбаатар хотын Захирагчийн ажлын албаны хүнс, худалдаа үйлчилгээний хэлтсийн дарга Б.Эрдэнэчимэг болон бусад албаны төлөөлөл, Монголын мастер тогоочдын холбооны удирдлагууд, тэмцээнд ур чадвараа сорьж буй тогооч нар оролцов.

Тэмцээний шүүгчээр Монгол, Солонгос, Румын, Хятад, Сыри, Казкастан, Миксикийн олон улсын эрхтэй шүүгчид, оролцогчоор Монгол, Турк, Солонгос, Хятад, Румын, Орос, Миксик, Сыр, Хятад улсын тогооч нарын төлөөлөл оролцож байна. Тэмцээн залуу тогооч, мэргэжлийн тогооч, багийн цом төрлүүдээр явагдах аж.

Энэ удаагийн тэмцээн нь Дэлхийн тогооч нарын холбооны албан ёсны зөвшөөрөлтэйгөөр зохион байгуулагдаж байгаагаараа онцлог юм. Тэмцээний зорилго нь Олон улсын шилдэг тогооч нараар дамжин Монгол хоолны соёлыг дэлхийд таниулах, хөрөнгө оруулалт, аялал жуулчлал, худалдааг хамгийн ихээр татдаг хоол үйлдвэрлэлийн салбарыг хөгжүүлэх, олон улсын хамтын ажиллагааг өргөжүүлэхэд оршино гэж тэмцээний зохион байгуулагчид нээлтийн үеэр онцолж байв.