Month: June 2019

Нийслэлийн Эрүүл мэндийн газраас нийслэлийн иргэдэд үзүүлж буй гемодиализийн тусламж, үйлчилгээний чанар, хүртээмжийг нэмэгдүүлэх зорилгоор дүүргийн нэгдсэн эмнэлэг, эрүүл мэндийн төвүүдэд гемодиализийн тасаг нээн ажиллуулах зорилт тавин ажиллаж байна. Энэ хүрээнд өнөөдөр нийслэлийн Баянзүрх дүүргийн нэгдсэн эмнэлэгт гемодиализийн тусламж, үйлчилгээ үзүүлэх тасаг нээлтээ хийлээ. Тус арга хэмжээнд Нийслэлийн Засаг даргын Хүний хөгжил, нийгмийн бодлогын асуудал хариуцсан орлогч Ш.Анхмаа, Нийслэлийн Эрүүл мэндийн газрын дарга Л.Төмөрбаатар, Баянзүрх дүүргийн нэгдсэн эмнэлгийн ерөнхий захирал Б.Даш-Яндаг, ерөнхий эмч Ө.Айгиймаа болон холбогдох албаны төлөөлөл оролцсон юм.

Баянзүрх дүүргийн нэгдсэн эмнэлэг нь шинээр гемодиализийн тасаг нээх бэлтгэл ажлынхаа хүрээнд эмч мэргэжилтнүүдээ сургаж, дадлагажуулах, өрөө тасалгаагаа тохижуулах, аппарат, тоног төхөөрөмжөө суурилуулах зэрэг ажлуудыг хийжээ. Ингэснээр тус дүүргийн бөөрний архаг дутагдалтай үйлчлүүлэгчдэд эмнэлгийн тусламж, үйлчилгээг ойртуулан, дүүргийнхээ эмнэлэгт бөөр оруулах эмчилгээг авах боломж бүрэн нээгдэж байна.

Монгол Улсад сүүлийн арван жилийн байдлаар, нийт хүн амын өвчлөлийн тэргүүлэх таван шалтгаанд бөөрний эмгэг 3-4 дүгээр байрыг тогтмол эзэлсээр ирсэн судалгаа бий. Бөөрний үрэвсэлт өвчин болон бусад эрхтэн тогтолцооны өвчин эмгэгийн улмаас үүсэх бөөрний архаг дутагдлын эцсийн үе шатанд зайлшгүй хийгдэх шаардлагатай /бөөр орлуулах эмчилгээний төрлүүд болох/ бөөр шилжүүлэн суулгах, хэвлийн диализ эмчилгээ, гемодиализ эмчилгээг монголын эрүүл мэндийн салбарт амжилттай нэвтрүүлэн ажиллаж байгаа юм.

Ялангуяа сүүлийн жилүүдэд бөөр орлуулах эмчилгээний нэг болох гемодиализийн тусламж, үйлчилгээ шаардлагатай иргэдийн тоо өсч байгаагаас үүдэн эмнэлгийн байгууллагуудын ачаалал нэмэгдэж, шинээр эмчилгээнд орох иргэдийн хувьд хүлээгдэлтэй, мөн эмчилгээнд орсон иргэд стандартын дагуу эмчилгээгээ хийлгэж чадахгүй байгаа зэргээр хүндрэл бэрхшээл учирч байна.

Тиймээс Нийслэлийн Эрүүл мэндийн газраас 2017 онд анх Налайх дүүргийн эрүүл мэндийн төвд таван аппараттай тасаг нээн гемодиализийн тусламж, үйлчилгээг үзүүлж эхэлжээ. Өнөөдрийн байдлаар, нийслэлийн зургаан дүүргийн эмнэлэгт гемодиализийн тасгийг нээн, үйл ажиллагаа явуулж байна. Тухайлбал Хан-Уул, Сонгинохайрхан, Баянгол, Сүхбаатар, Багануур, Налайх зэрэг дүүргийн эмнэлэгт нийт 19 аппаратын тусламжтайгаар өдгөө бөөрний архаг дутагдалтай 80 гаруй үйлчлүүлэгч болон гемодиализийн эмчилгээ шаардлагатай буюу бөөрний хурц дутагдалтай үйлчлүүлэгчид гемодиализийн тусламж, үйлчилгээг үзүүлж байгаа билээ.

Цаашид гемодиализийн аппаратын тоог нэмэгдүүлэн тусламж, үйлчилгээг иргэдэд хүлээгдэл чирэгдэлгүй, хүртээмжтэй, чанартай үзүүлэх зорилт тавин ажиллаж байна.

Хөвсгөл аймагт хоёр настай хүү нүхэн жорлонд унаж амиа алдсан харамсалтай хэрэг гарсан байна. Тус аймгийн Тариалан сумын Мандал багийн иргэн О-гийн хүү дөрвөн метр орчим гүнзгий жорлонд унаж нас барсан гэх дуудлага өчигдөр 11.53 цагт аймгийн Онцгой байдлын газарт иржээ. Дуудлагын дагуу аймгийн Онцгой байдлын газрын дөрвөн аврагч 11:55 цагт очиж, цогцсыг гарган Цагдаагийн хэсгийн төлөөлөгчид шилжүүлэн өгчээ. Бага насны хүүхэддээ тавих анхаарал халамжаа дээшлүүлж, харгалзахгүй хүнгүйгээр гэрт нь орхихгүй байхыг холбогдох байгууллагаас анхааруулж байна.

Ирэх сарын 2-3-ны өдрүүдэд хөгжлийн бэрхшээлтэй хүнийг хамт олонд түшиглэн хамруулан хөгжүүлэх Ази, Номхон далайн бүсийн IV конгресс Улаанбаатар хотноо анх удаа зохион байгуулагдах гэж байна.

Тус чуулганыг чанарын өндөр түвшинд зохион байгуулах, оролцогчдод хэрэгцээт үйлчилгээг соёлтой боловсон хүргэхэд туслах үндэсний сайн дурын ажилтнуудыг бэлтгэх, чадавхижуулах зорилгоор ХНХЯ, ХБХХЕГазар, “Жайка” ОУ-ын байгууллагын Улаанбаатар хот дахь “Хөгжлийн бэрхшээлтэй иргэдийн нийгмийн оролцоог дэмжих төсөл”, Скаутын холбоо, “Бэрхшээл ба тэгш байдлын сургалт форум” ТББ-тай хамтран “Хөгжлийн бэрхшээл ба тэгш байдал”, “Сайн дурын ажилтан гэж хэн бэ” сэдэвт цуврал сургалтуудыг зохион байгуулж байна.

Сургалтанд Ази, Номхон далайн бүсийн зочид буудлын ажилтнууд болон конгрессийн үеэр ажиллах сайн дурын ажилчид хамрагдах бөгөөд тавдугаар сарын 13-наас зургадугаар сарын 11-нийг дуустал үргэлжлэх аж.

Харин өчигдөр сайн дурын ажилчдад зориулсан сургалтыг зохион байгуулж сургалтанд хамрагдагсдад сертификат олголоо.

Тус сургалтаар дамжуулж хөгжлийн бэрхшээлтэй иргэнтэй хэрхэн харилцах, тэдэнд хэрхэн дэмжлэг үзүүлэх талаар олон нийттэй харилцаж, ханган нийлүүлэх төрлийн үйлчилгээ үзүүлдэг ажилтан албан хаагчдад мэдлэг олгож, тэднийг чадавхижуулахыг зорьж байгаагаа зохион байгуулагчдын зүгээс хэлж байлаа.

Н.АМАРТҮВШИН

Сэлэнгэ аймгийн Баянгол сумын Нарангийн гол гэх газар үйл ажиллагаа явуулдаг “Пентатерра” ХХК-ийн туслан гүйцэтгэгч “Шарын гол” ХХК-д тавдугаар сарын 23-нд осол гарсан. Тус уурхайн ажилтан 29 настай эрэгтэй Б хөрсний овоолго зөөж тээвэрлэн ашиглалт явуулсан талбайд нөхөн дүүргэлт хийж байхдаа “Хово 371” загварын ачааны автомашинтайгаа уурхайн ухаш буюу нуур руу унаж осолдсон юм. Онцгой байдлын газрын алба хаагчид хагас сарын турш осолдсон ажилтны цогцсыг хайсан бөгөөд өчигдөр 17.00 цагт олжээ.

Шүүхийн ерөнхий зөвлөлийн дарга Н.Лүндэндорж болон зөвлөлийн бусад гишүүдийн бүрэн эрхийн хугацаа дуусгавар болсон. Тиймээс тус зөвлөлийн бүрэлдэхүүнийг сонгон шалгаруулах шалгаруулалт эхлээд явж байгаа. Уг шалгаруулалтын хүрээнд ШЕЗ-ийн гишүүнд нэр дэвшигчдээр санал хураалт явуулах ажиллагаа өчигдөр болсон байна.

Санал хураалтад Давж заалдах шатны шүүхийн 109 шүүгч оролцсоноос 87.2 хувь нь Дашнямын Цогтсайханыг Шүүхийн ерөнхий зөвлөлийн гишүүнд санал болгожээ. Иймээс Д.Цогтсайханы нэрийг Монгол Улсын Ерөнхийлөгчид өргөн барихаар болжээ. Мөн ШЕЗ-ийн гишүүнд нэрээ дэвшүүлсэн Т.Мэндсайхан, А.Насандэлгэр, А.Сарангэрэл нар олонхын санал авч чадаагүй тул хамгийн олон санал авсан нэр дэвшигчдийн дунд ирэх даваа гаригт дахин санал хураалт явуулахаар болжээ.