Month: June 2019

Өнөөдөр Хавдар Судлалын Үндэсний Төвд туяа эмчилгээний технологийн дэвшил шугаман хурдасгуур аппаратыг Монгол Улсад анх удаа навтрүүлэх ёслолын үйл ажиллагаа боллоо. Тус үйл ажиллагааг нээж эрүүл мэндийн сайд Д.Сарангэрэл, ХСҮТ-ийн ерөнхий захирал, Анагаах ухааны доктор, профессор Ж.Чинбүрэн, төслийг санаачлагч НЭМГ-ын дарга Л.Төмөрбаатар нар оролцож, энэхүү төсөлд хамтран зүтгэсэн нийт хамт олонд талархал илэрхийллээ.

Монгол Улсад анх 1959 онд туяа эмчилгээ үүссэн бөгөөд 60 жилийнхээ ойн босгон дээр ХСҮТ-д шугаман хурдасгуур аппаратыг туяа эмчилгээний хөгжлийн шинэ дэвшил болгон суурилуулжээ.

ХСҮТ-ийн туяа эмчилгээний тасгийн эрхлэгч, АУ-ны доктор М.Минжмаа :

“Бид бүхний ард цөмийн физикч нарын баг ажиллаж байгаа. Эдгээр хүмүүс цацрагийн чанар, аюулгүй байдлыг ханган ажиллаж байна. Энэ төсөлд бид бүхэн Олон улсын атомын энергийн агентлаг, Монгол Улсын цөмийн энергийн комисс, Хирошимагийн их сургуулийн эмнэлэг, Австралийн хавдрын эмч нарын нийгэмлэг, Австралийн эмнэлэгийн физикч нарын нийгэмлэг зэрэгтэй хамран ажилласан. Манай туяа эмчилгээний хамт олон цаашдаа дэлхийн хөгжилтэй хөл нийлүүлэн алхах зорилготойгоор ажиллаж байна” Гэв.

Н.Энхжин

Ойрын өдрүүдэд ихэнх нутгаар өдөртөө 29-32 хэм хүртэл халах төлөвтэй байгаа тул ТА өөрийн болон гэр бүл, ойр дотны хүмүүсийнхээ эрүүл мэндэд санаа тавьж, наршихаас урьдчилан сэргийлэх арга хэмжээг аваарай.

НИЙСЛЭЛИЙН ЭРҮҮЛ МЭНДИЙН ГАЗАР

Дархан-Уул аймгийн Дархан сумын Малчин багт байшин, граж, автомашин, малын хашаа шатаж зургаан хүний амь нас эрсэдсэн харамсалтай явдал болжээ.

Гал түймрийн тухай дуудлагыг 2019.06.19-ний өдрийн 02:50 цагт хүлээн авч тус аймгийн Онцгой байдлын газрын Гал түймэр унтраах, аврах 22 дугаар ангийн 15 алба хаагч 3 автомашинтай 7 км зам туулан 03:00 цагт очиж, 8х5, 4х5 метрийн хэмжээтэй байшин, 2.5х5 метрийн хэмжээтэй граж, “Портер” загварын автомашин, 4х4, 5х8 метрийн хэмжээтэй малын хашаа тус тус шатаж байсныг 4 цаг ажиллаж, нэмэлтээр тус аймгийн Онцгой байдлын газрын Гал түймэр унтраах, аврах 54 дүгээр ангийн 10 алба хаагч, 3 автомашинтай 03:15 цагт гарч 20 км зам туулан 03:47 цагт очиж 3 цаг 13 минут тус тус ажиллаж унтраасан байна.

Уг гал түймэрт тус багийн харьяат иргэн Б /63 настай, эрэгтэй/, Х /63 настай, эмэгтэй/, Э /6 настай, эрэгтэй/, Г /5 настай, эмэгтэй/, А /5 настай, эмэгтэй/, Э /3 настай, эрэгтэй/ нар өртөж нас барсан тул цогцсыг гаргаж тус аймаг дахь Цагдаагийн газрын жижүүрийн бүрэлдэхүүнд шилжүүлэн өгчээ.

Хан-Уул дүүргийн 1 дүгээр хорооны иргэд болон тус хорооны нутаг дэвсгэрт байрлах орон сууцны хороолол дундах ногоон байгууламж бүхий талбайд газрын зөвшөөрөл авсан аж ахуйн нэгжийн хооронд маргаан үүсээд байгаа аж. Уг газарт барилга барихаар болсныг иргэд эсэргүүцэн суулт хийж байгаа юм. Нийслэлийн Засаг дарга бөгөөд Улаанбаатар хотын Захирагч С.Амарсайхан өнөөдөр тухайн газарт очин иргэдтэй уулзаж, хууль бусаар олгосон тус газрын зөвшөөрлийг цуцлах болно гэдгээ мэдэгдлээ.

Иргэд оршин суугчдын эсэргүүцэн тэмцэж буй уг газрын зөвшөөрлийг 2014 онд нийслэлийн Засаг даргын А/502 дугаар захирамжаар олгосон байна. “Газар эзэмших эрхийг баталгаажуулах тухай” захирамжаар энэхүү 576 ам метр газрыг иргэн Э-д үйлчилгээний зориулалтаар 5 жилийн хугацаатай эзэмшүүлэхээр шийдвэрлэсэн аж. Иргэн Э-д олгосон газрын зориулалтыг 2018 оны зургаадугаар сарын 18-ны өдрийн А/546 дугаар захирамжаар үйлчилгээтэй орон сууц зориулалттай болгож өөрчилсөн байна.

Нийслэлийн Засаг дарга бөгөөд Улаанбаатар хотын Захирагч С.Амарсайхан “Барилга байшин бариагүй зай талбай хангалттай газар бүтээн байгуулалт хийж болно. Харин орон сууцны хороолол дунд ард иргэдийн салхилах, хүүхэд багачуудын тоглох нийтийн эзэмшлийн ногоон байгууламжтай газарт иргэдийн амьдрах орчны аюулгүй байдлыг алдагдуулах барилга байшин бариулахгүй. Тиймээс энэ маргаан үүсгээд байгаа газрын эрхийг хүчингүй болгоно. Зөвхөн энэ газар ч биш, өөр олон байршилд орон сууцны хороололд хууль бус газрын эрхийн зөвшөөрлүүд олгосон байна. Цаашид энэ асуудлуудыг шат дараатай шийднэ” хэмээлээ.

Хотын Захирагч энэхүү орон сууцны хороолол дундах ногоон талбайд газар олгосон шийдвэрийг цуцласнаар нийтийн эзэмшлийн ногоон байгууламж хэвээр үлдэхээр болов.

Улсын их баяр наадмын үеэр Хүй долоо худгийн Соёл, урлагийн талбайд худалдаа үйлчилгээний чиглэлээр үйл ажиллагаа явуулах хүсэлтэй аж ахуйн нэгж, иргэдийн хүсэлтийг хүлээн авч эхэллээ.

Соёл, урлагийн талбайд гар урлал, бэлэг дурсгал, соёлын барааны худалдаа, хөдөлгөөнт тоглоом, кофе шопын үйлчилгээний зөвшөөрөл хүссэн хүсэлт, холбогдох материалыг ирэх сарын 3-ныг хүртэл “Монгол наадам цогцолбор” ОНӨТҮГ-ын байранд хүлээн авах юм.

Худалдаа, үйлчилгээ явуулах хүсэлтэй аж ахуйн нэгж, иргэн 8820-5242, 9110-6888 тоот дугаараас дэлгэрэнгүй мэдээллийг авах боломжтой.

Шалгарсан аж ахуйн нэгж, иргэдийг ирэх сарын 5-нд олон нийтэд зарлах юм.

Нийслэлийн Соёл, урлагийн газраас харьяа байгууллагууд тэр дундаа нийслэлийн дүүргүүдийн соёлын ордны дуу, бүжиг, хөгжмийн дугуйлангийн багш нарт зориулсан вакумжуулсан сургалтыг СУИС-тай хамтран тус сургуулийн харьяа “Эгшиглэн зуны сургалтын төвд 2019 оны зургаадугаар сарын 25-наас 28-ны өдрүүдэд зохион байгуулах гэж байна.

Дүүргүүдийн соёлын ордны багш нарын чадавхыг сайжруулах, туршлага солилцуулах зорилготой тус сургалтад нийслэлийн 7 дүүргийн соёлын орднуудын 25 багшийг хамруулж байна. Энэ дашрамд дуулгахад нийслэлийн соёл, урлагийн салбарын ажилтан, албан хаагчид, уран бүтээлчдийг чадавхжуулах тус сургалтыг мэргэжлийн төрийн болон төрийн бус байгууллагуудтай хамтран тогтмол зохион байгуулна.