Month: April 2019

Монгол Улсын Их Хурлын дарга Г.Занданшатар АНУ-аас Монгол Улсад суугаа Онц бөгөөд Бүрэн эрхт Элчин сайд Майкл Клеческиг хүлээг авч уулзлаа. Уулзалтын эхэнд УИХ-ын дарга Г.Занданшатар Монгол Улсад суух Элчин сайдаар томилогдсонд нь баяр хүргэж, ажлын амжилт хүсээд, Монгол оронд тавтай морилон саатахыг хүслээ.

УИХ-ын дарга Г.Занданшатар Монгол Улс АНУ-ыг өөрийн гуравдагч итгэлт хөршөө гэж үздэг бөгөөд ардчилал, хүний эрх, эрх чөлөөг дээдэлсэн, зах зээлийн эдийн засгийн харилцааг төлөвшүүлэхэд эхнээс нь ямагт дэмжин тусалж ирсэнд нь талархаж байдгаа илэрхийлэв.

Түүнчлэн 2018 он хоёр улсын харилцааны түүхэнд чухал ач холбогдолтой болсныг дурдаад, хоёр талын харилцаа Иж бүрэн түншлэлийн түвшинд хүрсэн, Мянганы сорилтын сангийн хоёр дахь Компакт гэрээний хамтарсан тунхаглалд гарын үсэг зурсанд баяртай байгаагаа илэрхийлэв.

Элчин сайд Майкл Клечески Монгол, Америкийн харилцааг Вашингтонд өндрөөр үнэлж, ач холбогдол өгч байдгийг дурдаад, энэхүү харилцаагаа улс төр, эдийн засаг, нийгмийн бүхий л салбарт өргөжүүлэн хөгжүүлж, Монгол Улсын хөгжил дэвшил, шинэчлэлийн төлөөх зорилтуудыг байнга дэмжиж ажиллахад бэлэн байна гэлээ. Тэрбээр УИХ-аар саяхан баталсан Шүүгчийн эрх зүйн байдлын тухай хуульд нэмэлт, өөрчлөлт оруулсан талаар сонирхсон юм.

УИХ-ын дарга Г.Занданшатар “Манай иргэд шүүх засаглалаа нэлээд шүүмжилж байгаа. Тэнд хүний эрхийг зөрчих, шударга, ёс зүйтэй ажиллах зарчмаа хөсөрдүүлэх, иргэдэд биш албан тушаалтанд үйлчлэх явдал байгаа нь баримтаар нотлогдож байгаа. Авлига, албан тушаалын гэмт хэрэгтэй тэмцэх, шударга ёсыг тогтоох нь бидний үндсэн зорилт юм. Ард түмний маань хүсэл эрмэлзэл ч ийм байгаа. Тиймээс шүүх, хуулийн байгууллагын зарим албан тушаалтнуудын Монгол Улсын хууль, бидний нэгдэн орсон олон улсын гэрээ, конвенцийг зөрчсөн үйлдэлд хариуцлага тооцох ёстой. Авлигад идэгдэж, шүүхийн хараат бус байдал, шударга ёсыг алдагдуулж байгаа шүүх, АТГ, прокурор зэрэг байгууллагын зарим албан тушаалтны үйл ажиллагаа Монголын залуу ардчилалд ноцтой заналхийлэл учруулж байна. Бие биедээ хуулийн хяналт тавьж байх ёстой хуулийн байгууллагууд өөрсдийгөө хамгаалагч, хууль бус үйлдлээ хаацайлагч болж хувирсан. Энэ буруу тогтолцоог өөрчлөх ажлыг бид хийж байгаа юм. Цаашид бие даасан, хараат бус, нээлттэй, шударга шүүх засаглалтай болохыг зорьж байна. Бидний хуульд хийсэн өөрчлөлт Үндсэн хуулийг зөрчөөгүй, шшүхийн байгууллагын хараат бус байдалд нөлөөлөх эрх хэнд ч байхгүй” гээд Шүүх засаглалын тогтолцоо, хууль тогтоомж, томилгооны талаар тайлбарлав.

Уулзалтын үеэр Монгол Улсад засаглалыг бэхжүүлэх, төрийн албанд шинэтгэл хийх, шинээр мөрдөгдөж эхэлж байгаа Төрийн албаны хуулийг хэрэгжүүлэх асуудлыг хөндөж ярилцав.

УИХ-ын дарга Г.Занданшатар энэ чиглэлд АНУ-ын Элчин сайдын яам, НҮБ-ын хөгжлийн хөтөлбөр дэмжлэг туслалцаа үзүүлж буйд талархал илэрхийлэв. Мөн Зөвлөлдөх ардчиллыг хөгжүүлэхэд Азийн сан зэрэг байгууллага дэмжлэг үзүүлж байгааг дурдаад, 2017 онд явуулсан Үндсэн хуулийн нэмэлт, өөрчлөлтийн талаарх Зөвлөлдөх санал асуулга амжилттай болсныг тэмдэглэлээ.

Тэрбээр НҮБ-ын Хөгжлийн хөтөлбөрөөс хэрэгжүүлж буй “Монгол Улсад мэргэжлийн, иргэн төвтэй төрийн албыг төлөвшүүлэх” төсөл төрийн албаны шинэтгэлийн үйл ажиллагаанд чухал үр нөлөөтэй байгааг онцолсон юм. Түүнчлэн төрийн албаны тогтвортой байдлыг хангах, улс төрийн нөлөөнөөс ангид, мэдлэг чадварт суурилсан, хариуцлагатай, ёс зүйтэй төрийн албыг төлөвшүүлэх зорилтыг дэвшүүлж, хууль баталж, хэрэгжүүлэхээр ажиллаж байгаа талаараа танилцуулав.

Мөн Монгол Улсын Үндсэн хуульд нэмэлт, өөрчлөлт оруулах асуудал хөндөгдсөн бөгөөд УИХ-ын дарга Г.Занданшатар “Удахгүй эхлэх ээлжит чуулганаар энэ асуудлыг ярихаар төлөвлөж байна. Өөрчлөх ёстой гэдэгт улс төрийн нам, иргэний нийгмийн байгууллагууд, эрдэмтэн судлаачид, иргэдийн дийлэнх олонхийн санал нэгдэж байгаа. Гэхдээ чухам юуг, яаж өөрчлөх асуудалд маш нухацтай хандах ёстой гэж үзэж байна. Энэ асуудлыг бараг 20 шахам жил ярьсан. Одоо цаг нь болсон” гээд, Засгийн газар тогтворгүй, засаглалын институцүүдийн харилцан хяналт тэнцэл зохистой биш байгааг өөрчлөх ёстой гэж үзэж байгаагаа тэмдэглэв.

УИХ-ын дарга Г.Занданшатар Монголын ноос ноолуур, оёмол, сүлжмэл бүтээгдэхүүнийг АНУ-д татваргүй нэвтрүүлэх хуулийг дэмжиж ажиллахыг Элчин сайдаас хүссэн бөгөөд Элчин сайд Майкл Клечески “Конгресс, Сенат ямар шийдвэр гаргахыг одоогоор тааж мэдэхгүй ч Элчин сайдын хувиар Монгол Улстай тогтоосон худалдаа, эдийн засгийн харилцааг өргөжүүлэх аливаа санаачилгыг дэмжиж ажиллах болно” гэдгээ илэрхийллээ.

Түүнчлэн шүүх засаглалаа шинэчлэх Та бүхний эрмэлзлийг дэмжиж, АНУ-ын мэдлэг туршлагаас хуваалцах, шүүгч, хуулийн байгууллагын ажилтнуудыг сургах, давтан сургахад бэлэн байна гэв. Уулзалтын үеэр Монгол Улсын Их Хурал, АНУ-ын Конгресс болон Сенат хоорондын хамтын ажиллагааг өргөжүүлэх, гишүүдийг харилцан айлчлуулж, туршлага солилцох, парламент дахь бүлгүүдийн харилцааг идэвхжүүлэх нь чухал гэдэгт санал нэг байгаагаа УИХ-ын дарга Г.Занданшатар, Элчин сайд Майкл Клечески нар илэрхийлэв.

Монгол Улсын Их Хурлын дарга Г.Занданшатар Канад Улсаас Монгол Улсад суугаа Онц бөгөөд Бүрэн эрхт Элчин сайд, ноён Дэвид Уиллиам Спрулийг өнөөдөр хүлээн авч уулзав.

Монгол Улсын Их Хурлын дарга Г.Занданшатар ноён Элчин сайд Дэвид Спрултэй дахин уулзаж байгаадаа баяртай байгаагаа уулзалтын эхэнд илэрхийлээд “Манай хоёр орны хооронд найрсаг дотно харилцаа амжилттай хөгжиж байна. Цаашид харилцаа, хамтын ажиллагааг “Стратегийн түншлэл”-ээс “Иж бүрэн түншлэл”-д хүргэх зорилттой байна. Монгол Улсад ардчилал, сайн засаглал, хүний эрх, иргэний нийгмийг хөгжүүлэхэд дэмжлэг үзүүлдэгт Та бүхэнд талархаж байдаг” гэж тэмдэглэсэн юм.

Ноён Элчин сайд Дэвид Спрул Монгол Улсын Их Хурлын даргаар сонгогдсонд нь УИХ-ын дарга Г.Занданшатарт баяр хүргэв.

Тэрбээр, Монгол оронд өрнөсөн ардчилсан шинэтгэлийн жилүүдэд танай улсад хөл тавьсан анхны хөрөнгө оруулагчдын нэг нь канадчууд юм. Хөрөнгө оруулалт, түүний дотор уул уурхайн салбарын хамтын ажиллагаа цаашид ч амжилттай үргэлжлэн хөгжинө гэдэгт итгэлтэй байна гээд УИХ-аас байгуулагдсан Оюутолгойн ордыг ашиглах, хөрөнгө оруулалтын гэрээний хэрэгжилтийг шалгаж, санал дүгнэлт гаргах үүрэг бүхий ажлын хэсгийн дүгнэлтийн талаар тодруулав. Түүнчлэн хөрөнгө оруулалтыг нэмэгдүүлэх, хуулийн дагуу тэдний эрх ашгийг хамгаалах, бэрхшээлийг хөнгөвчлөх, ойлголцон зөвшилцөх талаар парламентын тэргүүний хувьд анхаарлаа хандуулж ажиллахыг хүслээ.

УИХ-ын дарга Г.Занданшатар ажлын хэсгийнхэн дүгнэлтээ гаргаад УИХ-д өргөн барьсан. Гэхдээ хараахан УИХ-аар хэлэлцэгдээгүй байна. Гадаадын хөрөнгө оруулалтыг нэмэгдүүлэх, хөрөнгө оруулагчдын эрх ашгийг хамгаалах, харилцан ашигтай, эрх тэгш хамтын ажиллагаа өрнүүлэхийг парламентаас ямагт дэмжиж ажиллах болно гэв.

Уулзалтын хүрээнд талууд УИХ-ын ээлжит болон ээлжит бус чуулганаас батлан гаргасан хууль тогтоомжуудын талаар болон нийгэм, эдийн засгийн нөхцөл байдлын талаар ярилцаж, санал солилцов. “Монгол Улсын Үндсэн хуулиар олгогдсон хүний эрх, эрх чөлөөг хамгаалах, засаглал хоорондын хяналт-тэнцвэрийн зарчмыг сонгодог жишгээр нь хөгжүүлэх, авлигаас ангид нийгмийг цогцлоохын төлөө УИХ тууштай ажиллаж байна. Ардчилсан нийгэмд хууль тогтоох, гүйцэтгэх, шүүх эрх мэдлийн байгууллагуудын бүхий л үйл ажиллагаа хүний төлөө, тэдний эрх, эрх чөлөөг ханган хамгаалахад чиглэх ёстой. Бид тогтолцооны шинэчлэлийн төлөө ажиллаж, эхний алхмуудаа хийсэн. Багагүй эсэргүүцэлтэй тулгарч байгаа ч Монгол Улсын, монгол хүний язгуур эрх ашгийг хамгаалж, хуулийн өмнө хүн бүхэн тэгш эрхтэй байх, хууль ёсоо дээдэлдэг, хууль зөрчсөн хэн ч хариуцлага хүлээдэг байх эрх зүйт төрийн мөн чанарыг бүрдүүлэх зорилтоо биелүүлэхийн төлөө ажиллаж байна” гээд тус улсын сайн туршлагаас судалж, суралцах хүсэлтэй байгаагаа уламжлав.

Ноён Элчин сайд Дэвид Спрул авлигатай тэмцэх, ардчилал, шударга ёсыг бэхжүүлэх, ил тод байдлыг хангах талаар Монгол Улсын төр, засгаас тавьж буй хүчин чармайлтыг өндрөөр үнэлж байгаагаа илэрхийлэв. Мөн тэрбээр тогтолцооны шинэчлэлийг амжилттай хийхэд төрийн албыг чадавхжуулах, тогтвортой байлгах, салбар бүрийн экспертүүдтэй нягт хамтран ажиллах, засаглал хоорондын уялдаа, бие даасан байдлыг хангахын чухлыг онцлов.

Нийслэлийн Засаг дарга бөгөөд Улаанбаатар хотын Захирагч С.Амарсайхан Япон Улсаас Монгол Улсад суугаа Элчин сайд Масато Такаока-г хүлээн авч уулзлаа.

Улаанбаатар хот тус улсын Токио, Саппоро, Мияконожо хотуудтай харилцаа хамтын ажиллагаатай юм.

Улаанбаатар хот Япон Улсын Саппоро, Мияконожо хотуудтай харилцаа, хамтын ажиллагааг тогтоон ажиллаж байна. Хэдийгээр Токио хоттой албан ёсоор харилцаа тогтоогоогүй хэдий ч харилцаа хамтын ажиллагаагаа цаашид идэвхжүүлж хамтран ажиллах болно гэдгээ нийслэлийн Засаг дарга уламжиллаа.

Улаанбаатар хот 1998 онд Дэлхийн Өвлийн хотуудын дарга нарын холбоонд элссэнээр Саппоро хоттой харилцааг тогтоосон бөгөөд аялал жуулчлалын салбарт хамтын ажиллагааг өрнүүлж байна.

Харин Мияконожо хоттой 1999 онд Найрамдалт харилцааг албан ёсоор тогтоосон. Хоёр хот хооронд сурагч солилцооны хөтөлбөрийг 2014 оноос хэрэгжүүлж эхэлсэн бөгөөд тус хотын ахмад иргэд, ерөнхий боловсролын сурагчид тус тус Улаанбаатар хотод айлчилж байсан юм.

Монгол залуучуудын оюуны бүтээмж өндөр, энэ төрлийн салбарт амжилт гаргах магадлал их учраас оюуны спорт, дэвшилтэт технологи, мэдээлэл технологийн салбарт ажиллах, чадавх дээшлэх өргөн боломж байна гэж Япон Улсаас Монгол Улсад суух элчин сайд хэллээ