Month: April 2019

ЮНЕСКО-ийн Монголын үндэсний комисс ЮНЕСКО-ийн Бээжин дэх төлөөлөгчийн газар болон Боловсрол, соёл, шинжлэх ухаан, спортын яамтай хамтран Боловсролын хяналт шинжилгээний дэлхийн тайланг танилцуулах арга хэмжээг зохион байгуулав. Үйл ажиллагааг Боловсрол, соёл, шинжлэх ухаан, спортын дэд сайд Г.Ганбаяр, ЮНЕСКО-ийн Бээжин дэх төлөөлөгчийн газрын дарга бөгөөд суурин төлөөлөгч М.Оливэйра, Олон улсын шилжилт, хөдөлгөөний байгууллагын үндэсний хөтөлбөрийн мэргэжилтэн Р.Оюунбилэг нар нээж үг хэлэв. Тайлангийн танилцуулгын дараа шилжилт хөдөлгөөн, дүрвэлт ба боловсролын өнөөгийн нөхцөл байдал, боловсролын салбарын бодлого, мастер төлөвлөгөө, стратеги, цаашид авч хэрэгжүүлэх үйл ажиллагааны талаар санал бодлоо солилцож, яриа хэлэлцээ өрнүүлсэн юм.

Тайлан танилцуулах арга хэмжээг боловсролын салбарын бодлогын тойм шинжилгээ хийхэд суурь мэдээлэл болох Монгол улсын Боловсролын суурь мэдээллийн тайланг баталгаажуулах хэлэлцүүлгийн хамт зохион байгуулсан бөгөөд эдгээр үйл ажиллагаа нь боловсролын мастер төлөвлөгөө боловсруулах үйл явцад дэмжлэг үзүүлэх зорилготой юм.

2019 оны эхний гурван сард улсын хэмжээнд объектын гал түймэр нийт 1200 удаа гарч, 3,3 тэрбум төгрөгийн хохирол учирч, 20 хүн нас барж, 4 хүн түлэгдэж гэмтэн 58 толгой мал хорогдож, 555гэр орон сууц шатсан байна. Дээрх гал түймрийн аюулаас аврагч-гал сөнөөгчид 253 хүний амь нас, төр, аж ахуйн нэгж, байгууллагын 15,6 тэрбум төгрөгийн өмч хөрөнгийг авран хамгааллаа.

Объектод гарсан гал түймрийг өнгөрсөн оны мөн үетэй харьцуулахад гал түймрийн тоо 25,3 хувиар өсөж, учирсан хохирлын хэмжээ 62,9 хувиар өссөн байна.

Нийслэл хотод нийт 813 удаагийн гал түймэр гарч, 1,6 тэрбум төгрөгийн хохирол, орон нутагт 387удаагийн гал түймэр гарч, 1,7 тэрбум төгрөгийн хохирол тус тус учирсан байна.

Урьдчилан сэргийлэх, хяналт шалгалтын талаар

Энэ хугацаанд 4721 байгууллага, аж ахуйн нэгж, 47353 айл өрхөд гал түймрийн хяналт шалгалт хийж, гал түймрийн хэрэг зөрчилд хүргэж болзошгүй 25253 зөрчил дутагдал илрүүлэн, 11452 зөрчлийг үзлэг шалгалтын явцад арилгуулан бусад зөрчлийг арилгуулахаар 1295 заавал биелүүлэх албан шаардлага, 1087 мэдэгдэл, 82 танилцуулга, 136 дүгнэлт бичиж, гал түймэр гарч болзошгүй 14 объектын үйл ажиллагааг хэсэгчлэн буюу түр хугацаагаар зогсоож, Галын аюулгүй байдлын тухай хууль тогтоомжийг зөрчсөн байгууллага, аж ахуйн нэгжийн холбогдох албан тушаалтан, иргэдийг 48 сая төгрөгөөр торгож, галын аюулаас урьдчилан сэргийлэх сургалт 528 удаа, дадлага 366 удаа зохион байгуулж, хэвлэл мэдээллийн хэрэгслээр 359 удаа сэрэмжлүүлэг явуулсан байна.

Улаанбаатар хотод болон орон нутгийн хэмжээнд шинээр баригдах барилга байгууламжийн 160зураг төсөлд хяналт хийж баталгаажуулан, барилга байгууламжийг байнгын ашиглалтад хүлээж авах улсын комиссын бүрэлдэхүүнд 104 удаа орж ажиллав.

Объектын түймрийн шалтгааныг авч үзвэл:

• Пийшин, зуух, яндангийн цонолтоос 311 гал буюу 25,9 хувь,
• Ил задгай гал, асгасан үнс нурмаас 259 гал буюу 21,6 хувь,
• Лаа, дэн, тамхи, шүдэнзний галаас 226 гал буюу 18,8 хувь,
• Цахилгаанаас 206 гал буюу 17,1 хувь,
• Машин техникийн гэмтэл ашиглалт буруугаас 93 гал буюу 7,7 хувь,
• Шалтгаан тогтоогдоогүй 55 гал буюу 4,6 хувь,
• Гагнуур, паялник, бамбараас 12 гал буюу 1 хувь,
• Хүүхдийн болгоомжгүй үйл ажиллагаанаас 11 гал буюу 0,9 хувь
• Бусад шалтгаанаас 9 гал буюу 0,7 хувь,
• Санаатай үйлдлээр 6 гал буюу 0,5 хувь,
• Технологийн горим зөрчснөөс 5 гал буюу 0,4 хувь,
• Архидан согтуурснаас 4 гал буюу 0,3 хувь,
• Тэсрэлт дэлбэрэлт ослоос 2 гал буюу 0,1 хувь
• Байгалийн үзэгдлээс 1 гал буюу 0,08 хувь
• Машин, техникийн яндангийн цонолт, оч болон цахилгааны очноос 0 гал буюу 0,0 хувь
• Газрын тосны бүтээгдэхүүний ашиглалтын буруугаас 0 гал буюу 0,0 хувь

Ус, цаг уур орчны шинжилгээний газраас өнөөдөр Дорнодын өмнөд, Сүхбаатарын нутгаар хүчтэй шороон шуурга болон цасан шуурга шуурахыг онцгойлон анхаарууллаа. Зарим нутагт салхи секундэд 18-20 метр хүрэх ба 24 метр хүрч ширүүсэх тул сэрэмжтэй байхыг мэдээллийг өглөө.

Ардчилсан эмэгтэйчүүдийн холбооноос өнөөдөр мэдээлэл хийж, эрх баригчдаас амлалт нэхэхээ мэдэгдлээ.

АН-ын Онц их хуралдай гэж нэрийдсэн цуглаан маргааш Сүхбаатарын талбайд болно. Энэ цуглаанд эмэгтэйчүүдийн байгууллага идэвхтэй оролцоно гэдгийг тэргүүн С.Одонтуяа хэллээ. Тэрбээр “Сонгууль болсноос хойш гурван жилийн хугацаа өнгөрч байна. Энэ хугацаанд эрх баригчид амлалтаа хэрхэн биелүүлсэн бэ. Амлалтаа биелүүлэхэд хангалттай урт хугацаа өнгөрлөө. Тиймээс Ардчилсан эмэгтэйчүүдийн холбоо, ээжүүд бид өнөөдрөөс эхлэн амлалтыг нэхэж шаардаж, тэмцэнэ” гэв.

МАН сонгуулийн мөрийн хөтөлбөртөө Хүүхдийн мөнгийг ялгаваргүй олгоно, хүүхэд бүрийг цэцэрлэгтэй болгоно гэж заасан. Мөн хүүхэд хамгаалах, хөгжлийн төвийг аймаг дүүрэг бүрт байгуулна гэж амалсан. Гэвч мөрийн хөтөлбөрийн бүх заалт хэрэгжээгүй учраас эмэгтэйчүүдийг маргаашийн жагсаалд нэгдэж, амлалт нэхэхийг уриалав.

Мөн Ардчилсан эмэгтэйчүүдийн холбоо хүний эрх, хүүхэд эмэгтэйчүүдийн эрхийн төлөө цаашид тэмцэнэ гэдгээ илэрхийллээ.

Эрүүл мэндийн сайд Д.Сарангэрэл өнөөдөр Азийн хөгжлийн банкны Зүүн Азийн Хот Болон Нийгмийн Салбар хариуцсан дарга ноён Сангэй Пенжортойг хүлээн авч уулзлаа. Уулзалтаар Азийн хөгжлийн банкнаас Эрүүл мэндийн салбарт хэрэгжүүлж буй зээл, буцалтгүй тусламж болон техник туслалцааны төслүүдийн хэрэгжилт болон шинэ төсөл, хөтөлбөрийн талаар санал бодлоо солилцлоо.

Азийн хөгжлийн банк 1993 оноос хойш Монгол Улсын эрүүл мэндийн салбарийн тогтолцоон өөрчлөн шинэчлэхэд техникийн болон арга зүйн дэмжлэг үзүүлж ирсэн. Өнөөдрийн байдлаар 84.9 сая ам.долларын 5 зээлийн төсөл, 37 сая ам. долларын 7 удаагийн буцалтгүй тусламж, 10.65 сая ам.долларын 15 техникийн туслалцааны төслүүд буюу нийт 132.55 сая ам. долларын тусламж үзүүлээд байна. Тухайлбал,
Эрүүл мэндийн тусламж үйлчилгээг сайжруулах, санхүүжилт эрүүл мэндийн даатгал болон эмийн аюулгүй байдлыг хангах, эрүүл мэндийн мэдээллийн технологи, хүний нөөцийг хөгжүүлэх, төр хувийн хэвшлийн түншлэлийг сайжруулах, ХДХВ/ДОХ-оос урьдчилан сэргийлэх чиглэлээр томоохон төсөл хөтөлбөрүүдийг амжилттай хэрэгжүүлж байна.

АХБ-ны хөнгөлттэй зээлээр хэрэгжих Эмзэг бүлгийн иргэдэд үзүүлэх эрүүл мэндийн тусламж үйлчилгээг сайжруулах АХБ-ны төсөл нь Монголд анх удаа Олон шатлалт санхүүжилтийн хөтөлбөрийн хүрээнд 2019 оноос эхлэн нийт 10 жилийн хугацаанд хэрэгжүүлэхээр ажиллаж байна.
Тус хөтөлбөрийн хүрээнд Ховд аймгийн БОЭТ-, Хан-Уул дүүргийн нэгдсэн эмнэлгийн барилгын засвар, өргөтгөл, Чингэлтэй дүүргийн нэгдсэн эмнэлгийн барилга, Яаралтай тусламжийн төвийн барилга, сумын эрүүл мэндийн төвийн 6 барилга, өрхийн эрүүл мэндийн төвийн нийт 6 барилга барих үйл ажиллагаа хэрэгжинэ.

Мөн эрүүл мэндийн тусламж үйлчилгээний Стратегийн худалдан авагчийн тогтолцоо бий болгох, Эрүүл мэндийн салбарын хүний нөөцийн чадавхийг бэхжүүлэх үйл ажиллагаа хамтдаа хэрэгжинэ.
Төслийн нийт санхүүжилт 160.0 сая ам доллар бөгөөд олон шатлалт санхүүжилтийн хөтөлбөрийн дагуу 3 үе шаттайгаар санхүүжинэ. Үүнд: эхний үе шатанд 80.0 сая, 2 дахь шатанд 40.0 сая, 3 дахь шатанд 40.0 сая ам доллар тус тус болно.

Уг зөвлөгөөнийг Эрүүл мэндийн даатгалын ерөнхий газар Эрүүл мэндийн яам, Дэлхийн эрүүл мэндийн байгууллагатай хамтран зохион байгуулсан бөгөөд Эрүүл мэндийн даатгалын салбарын төв, орон нутгийн нийт 130 гаруй ажилтнууд оролцлоо.

Зөвлөгөөнийг нээж, Эрүүл мэндийн даатгалын ерөнхий газрын дарга Ч.Алтанхуяг “Эрүүл мэндийн даатгалын салбарын 2018 оны ажлын гүйцэтгэл, 2019 онд анхаарах чиглэл” сэдвээр илтгэл тавьлаа.
Илтгэлийнхээ эхэнд эрүүл мэндийн даатгалын байгууллага байгуулагдсанаас хойш нэг жилийн хугацаанд эрүүл мэндийн даатгалын сангаас иргэд даатгуулагчдад үзүүлсэн тусламж үйлчилгээний зарлагын гүйцэтгэлийн талаар танилцууллаа.
Мөн “Элэг бүтэн Монгол” хөтөлбөрийн хэрэгжилт,эрт илрүүлэх,урьдчилан сэргийлэх үзлэг,оношилгоо шинжилгээний зардлын 2018 оны гүйцэтгэл ,2019 оны төсвийн талаар дэлгэрэнүй танилцуулж хөтөлбөрүүдийн хэрэгжилтийг эрчимжүүлэх талаар нийт ажилтнуудад үүрэг чиглэл өглөө.
Түүнчлэн эрүүл мэндийн даатгалын хуулийн зарим зүйл заалтын хэрэгжилтийг хангахаар 2019 оны төсөвт тусгаж хэрэгжүүлэх хөтөлбөр, шинээр хийх ажлуудын талаар дэлгэрэнгүй танилцуулж,хэрхэн хэрэгжүүлэх талаар мэргэжил,арга зүйн зөвлөгөө өглөө.
Эрүүл мэндийн даатгалын байгууллага 2019 онд магадлан итгэмжлэгдсэн спорт клубт идэвхтэй хөдөлгөөн,спортоор хичээллэх үйлчилгээний журам, төлбөрийн хэмжээг батлуулах, хэрэгжилтийг хангах, “Эрүүл хүүхэд- Эрүүл шүд” үндэсний хөтөлбөрийн хүрээнд шүдний чиглэлийн хувийн эмнэлгүүдийг сонгон шалгаруулах, гэрээ байгуулах, хөтөлбөрийн хэрэгжилтийг зохион байгуулах ажлуудыг хийж хэрэгжүүлнэ.

Мөн элэгний В,С вирусын илрүүлэг,шинжилгээний оношлуурыг нэгдсэн худалдан авалтаар авч, ӨЭМТ-д дээрх шинжилгээний зардлыг шууд олгох, төрийн болон хувийн хэвшлийн эмнэлгийн тарифын ялгааг үе шаттай арилгах, нийт 16 хувийн эмнэлгийн өндөр өртөгтэй тусламж, үйлчилгээ эмнэлгийн хэрэгслийн зардлыг ЭМД-ын сангаас хариуцах ажлыг эхлүүлэхээр төлөвлөж байгаа тухай ярилаа.

Эрүүл мэндийн даатгалын байгууллагын хийж хэрэгжүүлж байгаа томоохон ажлыг нэг болох мэдээллийн технологийн чиглэлээр хэрэгжүүлэх ажлууд дотор цахим системийг хяналт санхүүжилт,судалгааны чиглэлээр хөгжүүлж судалгаа,нотолгоонд суурилсан бодлогын шинжтэй шийдвэрийг гаргах,байцаагчийн болон даатгуулагчийн гар утасны аппликешнийг хөгжүүлэн нэвтрүүлэх,эрүүл мэндийн даатгалын гэрээг цахим хэлбэрээр хийж шалгах,хянах,цахим гэрээний программыг хөгжүүлэх зэрэг зорилтууд багтжээ.
Мөн иргэд,даатгуулагчдын санал,хүсэлтийг хүлээн авч,зөвлөгөө өгөх,иргэд даатгуулагчдыг хүлээн авах “Хэрэглэгчтэй харилцах төв” /Call center/-ийг байгуулан ажиллуулах зорилтыг дэвшүүлээд байна.
ЭМДЕГ-ын дарга Ч.Алтанхуяг илтгэлдээ 2019 онд эрүүл мэндийн салбарын дэвшүүлсэн 8 зорилтыг онцлон дурьдаж эдгээр зорилтыг хэрэгжүүлэхэд эрүүл мэндийн даатгалын салбарын хийж гүйцэтгэх ажлууд тэдгээрийг хэрэгжүүлэхэд нийт ажилтнуудын идэвх оролцоо,үүрэг хариуцлагын талаар чиглэл өглөө.
Мөн эрүүл мэндийн даатгалын ерөнхий газрын ажилтнууд эрүүл мэндийн даатгалын өнөөгийн байдал, цаашдын чиг хандлага, Эрүүл мэндийн байгууллагаас даатгуулагчдад үзүүлсэн тусламж, үйлчилгээний чанарын хяналт хийх аргачлал, “Элэг бүтэн Монгол” хөтөлбөр, “Урьдчилан сэргийлэх үзлэг”, “Эрүүл шүд-Эрүүл хүүхэд” хөтөлбөрүүдийн хэрэгжилтэнд анхаарах асуудал зэрэг сэдвүүдээр илтгэл тавьж мэдээ мэдээлэл солилцлоо.

ЭМЯ-ны Бодлого төлөвлөлтийн газрын дарга Р.Оюунханд,Эрүүл мэндийн даатгалын Бодлого төлөвлөлтийн хэлтсийн дарга Г.Ганхуяг болон холбогдох албан тушаалтнууд оролцож “Эрүүл мэндийн даатгалын өнөөгийн байдал, цаашдын чиг хандлага” –ыг талаар мөн ахлах мэргэжилтэн О.Батбаяр,мэргэжилтэн Н. Оюунгэрэл нар “Эрүүл мэндийн даатгалын санхүүжилтийн бодлого, цаашдын чиг хандлага, санхүүжилтийн бодлогын хэрэгжилтийг хангахад тулгамдаж буй асуудал, шийдвэрлэх арга зам сэдвүүдээр тус тус илтгэл тавьж мэдээлэл хүргэлээ.

Эрүүл мэндийн даатгалын ерөнхий газрын Санхүүгийн хэлтэс, Мэдээллийн технологийн хэлтэс хамтран аймаг, орон нутгийн эрүүл мэндийн даатгалын тасгийн ажилтнуудад зориулан эрүүл мэндийн даатгалын цахим системийн хэрэгжилт одоогийн үйл явц болон “Өрх, сум, тосгоны үзүүлж буй тусламж, үйлчилгээний цахим бүртгэл болон зардлын тухай” аргачлалаар сургалт явууллаа.Энэ сургалтын үеэр цахим системмйн хөгжүүлэлт,холбоотой бусад асуудлуудаар харилцан ярилцаж,санал солилцож нэгдмэл ойлголтонд хүрсэн нь ач холбогдолтой боллоо.

2018 оны ажлын гүйцэтгэл, үр дүнгээр салбартаа тэргүүлж “Эрүүл мэндийн даатгалын шилдэг тасаг”-аар шалгарсан Дархан-Уул, Хөвсгөл, Сэлэнгэ аймгуудын тасгийн дарга,хяналтын эмч О.Энхчимэг,Ц,Дэлгэр,Ж.Түвшинтөс нар өөрсдийн хийж хэрэгжүүлсэн онцлог ажлууд болон цаашдын үйл ажиллагааны зорилтоо танилцуулж , сайн туршлагаасаа хуваалцлаа..
ЭМДЕГ-ын 2019 оны гүйцэтгэлийн төлөвлөгөг 7 бүлэг 28 зорилт 127 арга хэмжээг хэрэгжүүлэхээр баталгаажуулан хэрэгжилтийг зохион байгуулан ажиллаж байна. Энэ ажлын хүрээнд ЭМД-ын тасгуудын 2019 оны эхний хагас жилийн төлөвлөгөөг 4 зорилт, 37 арга хэмжээг хэрэгжүүлэхээр батлуулж, тасгуудад танилцуулав.

Зөвлөгөөний үеэр “Медипас” эмнэлгийн Гастроэнтерологи, дурангийн тасгийн эрхлэгч, их эмч Т.Цэрэнтогтох монголчуудын дунд өвчлөл ихтэй ходоодны хорт хавдрын талаар тоон судалгаанд үндэслэн танилцуулж эрүүл мэндийн салбарын ажилтнуудын анхаарах,хамтран шийдвэрлэх асуудлуудын талаар санал солилцлоо.
Мөн ходоодны өвчлөлийн тухай, эрт илрүүлэх,үзлэг оношилгоонд хамрагдаж хорт хавдраас хэрхэн урьдчилан сэргийлэх талаар эрүүл хооллолт,амьдралын зөв дадал хэвшил,хөдөлгөөн хүний эрүүл мэндэд ямар үр нөлөөтэй болох талаар монголчуудын амьдралын уламжлалт зан заншилтай холбон тайлбарлаж зөвлөгөө өглөө.

Төрийн албан хаагчид, дарга нар гадаадад очиж казино, мөрийтэй тоглохыг хориглох тухай асуудлыг ЗГХЭГ-ын дарга Л.Оюун-Эрдэнэ Засгийн газрын ээлжит хуралдаанаар хэлэлцүүлж шийдүүллээ.

Төрийн албаны тухай хуулийн 40.2-г үндэслэж Засгийн газраас Төрийн бүх шатны албан тушаалтны ёс зүйн дүрэмд өөрчлөлт оруулсан юм. Үүнд, Төрийн захиргааны болон үйлчилгээний албан хаагчийн ёс зүйн дүрмийн 3 дахь хэсгийн 3.1.4.в, 3.1.4.г дэх дэд заалтуудыг нэмж, гадаад улсад албан томилолтоор ажиллах хугацаандаа дипломат ёс жаягийг хатуу барих…мөрийтэй, казино тоглохгүй байхаар тусгаж өгсөн.

ЗГ-ын ээлжит хуралдаан дуусмагц төрийн албан хаагчдын ёс зүйтэй холбоотой энэхүү чухал шийдвэрийг танилцуулахаар ЗГХЭГ-ын дарга Л.Оюун-Эрдэнэ Төрийн албаны зөвлөлийн дарга, гишүүдтэй уулзсан юм.

Уулзалтын эхэнд тус зөвлөлийн гишүүд байгууллагынхаа бүтэц, орон тоо, үйл ажиллагааны хамрах хүрээ, төрийн албан хаагчдыг чадавхижуулах чиглэлээр хийж байгаа ажлууд, төрийн албаны шинэтгэлийг хэрхэн хийх талаарх дэлгэрэнгүй мэдээллийг ЗГХЭГ-ын дарга Л.Оюун-Эрдэнэд өгсөн юм.

ЗГ-ын өнөөдрийн хурлаас төрийн албаны бүх шатны дарга, албан хаагчдыг мөрийтэй тоглоом, казино тоглохыг хориглох шийдвэр гаргасан талаар Л.Оюун-Эрдэнэ сайд тус зөвлөлийнхөнд дэлгэрэнгүй танилцуулсан юм. Тиймээс ЗГ-аас гаргасан энэ шийдвэрийг ТӨБЗГ-тай хамтарч төрийн албан хаагчдад ойлгуулах, сурталчлах, сургалт зохион байгуулах, улирал тутамд энэ хүрээнд хийсэн ажлаа тайлагнах, хэрэгжилтийг нь хангуулах зэрэгт ТАЗ анхаарахыг Л.Оюун-Эрдэнэ сайд тус зөвлөлийн гишүүдэд чиглэл болгосон юм.

Төрд ажиллаж буй хэн боловч гадаад, дотоодод казино, мөрийтэй бусад тоглоом тогловол ажлаас нь чөлөөлөх, хариуцлага хүлээлгэдэг болохоос гадна хэвлэл мэдээлэл, иргэд, олон нийтийн хяналт үүнд чухал гэдгийг ч мөн тодотгосон юм. Тэрбээр, “Аливаа улс төрийн болон төрийн албан тушаалтнууд нийгмийн сайн сайхны төлөө сайн дурын үндсэн дээр тангараг өргөж ажилладаг албан хаагчид. Харамсалтай нь сүүлийн 10 гаруй жил албан тушаалтнууд мөрийтэй тоглох асуудал хавтгайрч, казино тоглох замаар мөнгө угаах, авлига, хээл хахууль авах, нөлөөлөлд автах нөхцөл байдалд Монгол төрийн албан хаагчид, тэр дундаа төрийн өмчит ААН-ийн дарга, захирлууд олноор холбогдох болсон.

Саяхан БНСУ-д ажлаар очиход тэндхийн казиногийн тусгай үйлчлүүлэгчид нь Монголын төрийн өндөр албан тушаалтан, төрийн өмчит газруудын дарга, захирал, удирдах албан тушаалтнууд гэдгийг хэлж байсан. Байнгын үйлчлүүлэгчдийн нэрсийг ч гаргуулж авсан. Гэтэл багш, эмч, цагдаа зэрэг төрийн жирийн албан хаагчид болохоор цалин нь амьдралдаа хүрэхгүй, Солонгост олон мянгаараа очиж 3 сараар ажиллаж байгаа. Тийм болохоор Засгийн газар үүнд анхаарч ийм шийдвэр гаргасан. Үүний хэрэгжилтийг ТАЗ хариуцаж, төрийн албан хаагчдын ёс зүйг дээшлүүлэхэд онцгой анхаараарай” гэсэн юм.

Үүнээс гадна Засгийн газраас Монгол улсын өнгөрсөн 27 жилийн алдаа, оноог бүхэлд нь дүгнэхээр ажлын хэсэг гарган ажиллаж байгаа. Өнгөрсөн жилүүдийн хамгийн гол алдаа нь хөгжлийн бодлогын асуудал болон хүний нөөц буюу төрийн албан хаагчийг мэргэшүүлэх, улс төрөөс ангид тогтвортой байлгах, төрийн залгамж чанарыг хангах асуудал байсан гэдгийг бас Л.Оюун-Эрдэнэ сайд хэлсэн үгэндээ онцолсон. Үүнтэй холбогдуулж Монгол улсын төрийн алба дараагийн 25 жилд ямар түвшинд хүрэх талаарх төсөөллөө тодорхойлж, 5, 6-р үеийн шинэтгэлээ боловсруулж ойрын үед уулзалт зохион байгуулж, эргэж танилцуулахыг чиглэл болгосон юм.

Мөн төрийн албыг үнэлж зарах хэмжээнд очсон байгааг хэрхэн засах вэ, гадаадын нэр хүндтэй байгууллагад ажиллаж байгаа чадварлаг хүмүүсийг төрийн албанд давуу эрхээр яаж татах вэ, төрийн албаны шинэчилсэн хуулийн шалгуурт нийцэхгүй байгаа хүмүүсийг хэрхэн цэгцлэх вэ гэх зэрэг хэд хэдэн асуудалд анхаарах шаардлага үүсч байгааг ЗГХЭГ-ын дарга Л.Оюун-Эрдэнэ уулзалтын төгсгөлд онцлоод ТАЗ-ийг санасан хэмжээнд сайн ажиллаж байна хэмээн дүгнэсэн юм.

Энэ оны 01 дүгээр сарын 01-ний байдлаар Монгол улсын төрийн албан хаагчдын тоо 193,557 байгаа аж. Төрийн албаны тухай хуулийг 1995 онд анх баталж гаргаснаас хойш 2019 он хүртэл төрийн албаны шинэтгэлийг 4 үе шаттай хийгээд байгаа аж. Тиймээс төрийн албаны дараагийн шинэчлэлийг одооноос ярих шаардлагатай байгаа юм.