Өнөөдөр аргын тооллын 2019 оны гуравдугаар сарын 16. Бямба гараг. Билгийн тооллын XVII жарны “Урвуулагч” хэмээх шороон гахай жилийн Хаврын дунд улаагчин туулай сарын 10. Санчир гараг. Өглөгт охин одтой, долоон улаан мэнгэтэй, хар хулгана өдөр.
Барилдлага: Үл тохирох
Шүтэн барилдлага: Өтлөх үхэхүй
Суудал: Гал
Өдрийн наран 7 цаг 03 минутад мандан, 18 цаг 57 минутад жаргана. Тухайн өдөр луу, бич жилтнээ аливаа үйлийг хийхэд эерэг сайн ба гахай, хулгана жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй.
Эл өдөр хууль цааз гаргах, батлах, хэрэглэх, хулгай дээрмийг номхотгох, гэмтнийг шийтгэх, мал адгуус номхруулах, гарагийг тахих, хүүхэд үрчлэн авах, урлан бүтээхэд сайн. Улаа гаргах, хиншүү хярвас гаргах, төлөг тавих, морь уралдахад муу. Өдрийн сайн цаг нь хулгана, үхэр, туулай, морь, бич, тахиа болой. Хол газар яваар одогсод зүүн урагш мөрөө гаргавал зохистой. Хүүхдийн сэвлэг үргээх болон үс засуулбал эрч хүч ихэснэ хэмээжээ.
Монголын үндэсний олимпийн хороо, Монголын үндэсний олимпийн академиас хамтран “Олимпийн боловсрол ба бие бялдрын хүмүүжил” сэдэвт болзолт уралдааныг Монгол Улсын нийт Ерөнхий боловсролын сургуулиудын дунд 2019 оны гуравдугаар сарын 18-наас 2019 оны 11 дүгээр сарын 18-нд зохион байгуулна.
ЦЕГ-ын Мөрдөн байцаах алба ноднин хийсэн ажил, гэмт хэргийн тоон үзүүлэлтийн талаар өнөөдөр танилцуулав. Тус алба 1998 онд гарсан хүн амины хэрэгтэнг олж илрүүлжээ. Харин залилангийн гэмт хэрэг хамгийн их буюу 79.3 хувиар өссөн байна.
Өнөөдөр Осака хотноо болсон Японы мэргэжлийн сумо бөхийн Харү башёгийн зургаа дахь өдрийн барилдаанд 69 дэх Их аварга Хакүхо М.Даваажаргал Нишигикиг, 71 дэх Их аварга Какүрюү М.Ананд Шодайг тус тус давснаар Хакүхо 6, Какүрюү 5 даваатай болов.
ОХУ-ын ЭСЯ, Монгол Улсын БСШУСЯ-ны дэмжлэгтэй “Оросын боловсролын үзэсгэлэн-2019” үзэсгэлэн яармаг дөрөв дэх жилдээ болж байна.
Ой, хээрийн гал түймрээс урьдчилан сэргийлэх, тэмцэх ажлын төлөвлөлт, авч хэрэгжүүлж байгаа арга хэмжээ болон ойн мэргэжлийн байгууллага, нөхөрлөлийн үйл ажиллагаатай танилцаж, зөвлөгөө өгөх, автомашин техник, багаж хэрэгслийн бэлэн байдлыг хангуулах зорилгоор БОАЖ-ын дэд сайд Ц.Батбаяраар ахлуулсан ажлын хэсэг орон нутагт ажиллаж байна.
Фэйсбүүк, Инстаграм, Ватсапп, Мессенжерийн хэвийн ажиллагаа өчигдөр дэлхий даяар доголдож компанийн нэр хүнд багагүй унасан билээ. Уг уналт Телеграм аппликейшн чатад ашигтайгаар эргэж, хэрэглэгчийн тоог 3 саяар нэмэгдүүлжээ. Хэрэглэгчдийнхээ чатыг гуравдагч этгээдэд харуулахгүй байхаар нууцалдаг уг чат аппыг өнгөрсөн жил ОХУ-д хориглож байсан түүхтэй. Телеграм дээр бичсэн чат сервертээ хадгалагддаггүй ажээ.Телеграмын Гүйцэтгэх захирал Павел Дуров өөрийн Твиттер хуудаснаа “Өнгөрсөн 24 цагт манайд шинээр 3 сая хэрэглэгч бүртгүүлжээ. Бид жинхэнээсээ аюулгүй байдлыг тань ханган ажилладаг” гэсэн утга бүхий жиргээг нийтэлсэн байна. Өнгөрсөн жилийн энэ үед Телеграм 200 сая идэвхтэй хэрэглэгчтэй байсан билээ. 
Үнэт цаасны арилжаагаар 2019 оны эхний 2 сард 35.3 тэрбум төгрөгийн гүйлгээ хийж, 74.6 сая ширхэг үнэт цаас арилжсан нь өмнөх оны мөн үеэс гүйлгээ 8.7 тэрбум төгрөгөөр өсөж, арилжсан үнэт цаас 66.5 сая ширхгээр өссөн байна. Харин 2019 оны 2 дугаар сард 13.4 тэрбум төгрөгийн гүйлгээ хийж, 55.6 сая ширхэг үнэт цаас арилжсан нь өмнөх оны мөн үеэс гүйлгээ 9.7 тэрбум төгрөгөөр, арилжсан үнэт цаас 52.5 сая ширхгээр өссөн байна. Засгийн газрын үнэт цаасны хоёрдогч зах зээлийн арилжаагаар 2019 оны 2 дугаар сард 1.2 тэрбум төгрөгийн гүйлгээ хийсэн нь өмнөх оны мөн үеэс 0.7 тэрбум төгрөгөөр буурчээ. Хөрөнгийн зах зээлийн чиг хандлагыг илэрхийлэх ТОП-20 дундаж индекс 2019 оны 2 дугаар сард 21 457.8 нэгж болж, өмнөх сараас 126.6 нэгжээр буурч, өмнөх оны мөн үеэс 341.8 нэгжээр өссөн байна. Хөрөнгийн зах зээлд үйл ажиллагаа явуулж байгаа хувьцаат компаниудын үнэт цаасны зах зээлийн нийт үнэлгээ 2019 оны 2 дугаар сард 2.5 их наяд төгрөг болж, өмнөх оны мөн үеэс 4.0 тэрбум төгрөгөөр өссөн байна.
