Month: March 2019

С.Баярцогтын оффшор бүсэд нуусан хөрөнгийн дансны хуулгыг УИХ-ын гишүүн Т.Аюурсайхан Щвейцариас авч ирсэн гэх мэдээлэл олны анхаарлыг татаад байгаа юм. Гэхдээ уг мэдээллийг улс төрийн хүрээллийнхэн үгүйсгэж байгаа бөгөөд, Т.Аюурсайханыг худлаа ярьж байгаа хэмээн буруутгаад буй. Харин энэ талаар өнөөдөр УИХ-ын гишүүн Т.Аюурсайхан мэдээлэл өгсний дараа УИХ-ын гишүүн Б.Пүрэвдорж өөрийн цахим хуудаснаа байр сууриа илэрхийлсэн. Тэрээр “Аюурсайхан гишүүний оффшорын эсрэг яриаг би дэмждэг. Гэтэл Аюурсайхан намайг оффшорын эсрэг юу ч хийдэггүй гэж зүтгэлээ. Анх төрийн өндөр дээд албан тушаалтан болон хамаарал бүхий этгээдүүдийн эсрэг УИХ-ын тогтоолын төсөл өргөн барьсан боловч оффшорчин олонтой МАН хэлэлцүүлээгүй. Хоёр долоо хоногийн өмнө Щвейцариас ирсэн баримт цэвэр АТГ-ын хийсэн ажил бөгөөд иргэний нийгмийн байгууллагууд идэвхтэй нөлөөлсөн” хэмээсэн байна.

М.САЙНЗАЯА

Эр цэргийн баяраар цагдаагийн байгууллагад гэмт хэрэг зөрчлийн дуудлага харьцангуй бага бүртгэгдсэн байна. Харин эрүүлжүүлэх байранд хоносон хүний тоо өнгөрсөн жилтэй харьцуулахад өссөн бөгөөд нийслэлийн хэмжээнд 324 хүн эрүүлжүүлэх байранд саатуулагдсан гэх мэдээлэл байна. Тухайлбал Сонгинохайрхан дүүргийн хэмжээнд хэрэг, зөрчлийн дуудлага мэдээлэл нэлээд бүртгэгджээ. Үүнээс бусдын биед гэмтэл учруулах, танхайрах хэргүүд дийлэнхийг эзэлсэн байна. Мөн тус дүүргийн “Star” караоке баарны үүдэнд иргэн Ц-г үл таних С, Г нар нь шалтгаангүй зодож танхайрсныг илрүүлсэн аж. Хэргийг Сонгинохайрхан дүүргийн нэгдүгээр хэлтэс хариуцан шалгаж байгаа аж.

М.САЙНЗАЯА

“Тусгаар тогтнол” Улсын математикийн зургадугаар уралдаан энэ сарын 9, 10-ны өдрүүдэд амжилттай зохион байгуулагдаж шилдгүүд тодорлоо. Үндэсний уралдаанд 16 аймаг, нийслэлээс 1890 сурагч оролцож, оюун ухаан мэдлэг чадвараа сорин уралдлаа.

Энэ удаагийн олимпиадад Боловсрол, соёл, шинжлэх ухаан спортын дэд сайд Г.Ганбаярын санаачлагаар “Уран бодолт” гэсэн шинэ төрөл нэмэгдэж “Олонлог” төв сургуулийн 12 дугаар ангийн сурагч Б.Долгормаа дээрх шагналын эзнээр тодорлоо.

Б.Долгормаа нь Улсын математикийн олимпиадаас 4 хүрэл, нэг мөнгөн медаль хүртэж байснаас гадна өнгөрсөн онд Итали Улсад зохион байгуулагдсан олон улсын охидын математикийн олимпиадаас мөнгөн медаль авч байжээ.

“Тусгаар тогтнол” Улсын математикийн зургадугаар олимпиадад “Уран бодолт” төрөлд ялалт байгуулсан Б.Долгормаад БСШУС–ын дэд сайд Г.Ганбаяр шагнал гардуулж, амжилт хүслээ.

Улсын уралдаанд шалгарсан сурагчид энэ сарын 16-17-ний өдөр зохион байгуулагдсан “Тусгаар тогтнол” олон улсын олимпиадад оролцож, ОХУ-ын Бүгд Найрамдах Саха /Якут/, ОХУ-ын Эрхүү хот, Улан-Үд Советский дүүрэг, БНХАУ-ын Эрээн хот, Казахстан Улсын сурагчидтай оюун ухаанаараа өрсөлдлөө. Өчигдөр дүнгээ гаргасан Олон Улсын тэмцээнд Б.Долгормаа алтан медаль хүртсэн байна.

Улсын онцгой комиссын Шуурхай бүлэг 21 аймагт ажиллалаа. Засгийн газрын 2019 оны хоёрдугаар сарын 20-ны өдрийн 72 дугаар тогтоол, хоёрдугаар сарын 27-ны өдрийн 82 дугаар тогтоолуудын хүрээнд авч хэрэгжүүлэх арга хэмжээ, газар дээрх нөхцөл байдалтай танилцав.

Шуурхай бүлэг орон нутагт ажиллах үеэрээ улсын нөөцөөс 50 хувийн хөнгөлөлттэй олгох 4000 тонн өвс, 3000 тонн тэжээлийг эздэд нь хүртээмжтэй хүргэх, дамлан худалдаалах, ах дүү танил тал харгалзан олгох зэрэгт хяналт тавих, гамшгийн үед ажилласан зардал, гарсан хохирлыг үнэн, зөв ирүүлэх, шар усны үерээс урьдчилан сэргийлэх, гуу жалганд хаягдсан мал амьтны сэг зэмийг устгах зэргийг холбогдох албаныханд үүрэг болгож ажиллалаа.

Өнөөдрийн байдлаар Увс, Завхан, Хөвсгөл аймгийн ихэнх нутаг, Баян-Өлгий, Ховд, Говь-Алтай аймгийн хойд, Баянхонгор аймгийн зүүн, Өвөрхангай аймгийн өмнөд, Өмнөговь аймгийн баруун, Дорнод аймгийн төв хэсгээр 1-20 см зузаан цасан бүрхүүл тогтоод байна. Үүнээс хамгийн зузаан нь Увс аймгийн Зүүнговь суманд 20 см, Хяргас суманд 18 см, Баруунтуруун суманд 17 см, Малчин суманд 13 см, Завхан аймгийн Яруу, Баянхайрхан суманд 13 см, Завхан аймгийн Улиастай, Тэс суманд 12 см, Хөвсгөл аймгийн Хатгал, Увс аймгийн Улаангом суманд 10 см байгаа юм.

Төвийн аймгууд, тэр дундаа Дархан-Уул, Орхон, Сэлэнгэ аймгуудын тухайд цас бага орсон тул мал усгүйдэх эрсдэл үүсч байгаа тул бэлчээрийн усан хангамжийг сайжруулах хүрээнд худаг, уст цэгийг завсарлах, шинээр гаргахад шаардлагатай хөрөнгийг шийдвэрлэх саналыг Улсын онцгой комисст уламжилж байлаа. Тухайлбал, Орхон аймгийн мал аж ахуйн усан хангамжийг нэмэгдүүлэхэд онцгой анхаарч, 2019 оны эхний хагас жилд Жаргалант суманд 1 худаг гаргах 20 сая төгрөгийг шийдвэрлэж өгөхийг хүссэн юм.

Салбар яамнаас энэ асуудлыг аль болох нааштайгаар шийдэх, холбогдох зардлыг Хүнс, хөдөө аж ахуй, хөнгөн үйлдвэрийн сайдын багцыг задалж, тусгах боломжийг эрэлхийлнэ гэдгээ хэлж байсан юм. Нөгөөтэйгүүр хаврын улиралд хуурайшилт явагдаж болзошгүй нөхцөл үүссэн тул ой хээрийн түймрээс урьдчилан сэргийлэх олон төрлийн арга хэмжээ авч хэрэгжүүлж байгаагаа аймгийн Онцгой комиссын хурлын үеэр Шуурхай бүлгийн бүрэлдэхүүнд танилцуулсан болно.

Улсын хэмжээнд одоогоор төллөх эх малын 2.2 хувь буюу 683 мянган хээлтэгч мал төллөж, 661.2 мянган төл бойжиж байна. Оны эхний нийт малын 0.3 хувь буюу 213.1 мянган толгой мал хорогджээ. Эдгээр Орхон аймгийн тухайд л гэхэд энэ сарын 9-ний өдрийн байдлаар нийт төллөх эх малын 0.7 хувь буюу 361 толгой эх мал төллөөд байгаа бол Сэлэнгэ аймгийн хэмжээнд 14756 толгой мал төллөж, 14752 төл бойжиж байна.

Орхон аймгийн Оццгой комиссын хурлын үеэр

Дархан-Уул аймгийн Онцгой комиссын хурлын үеэр

Сэлэнгэ аймгийн Онцгой комиссын хурлын үеэр

Ус, цаг уур, орчны шинжилгээний хүрээлэнгээс ирүүлсэн ойрын өдрүүдийн цаг агаарын төлөв байдлын мэдээнээс харахад, энэ сарын 17-нд баруун аймгуудын нутгийн хойд хэсгээр бага зэргийн хур тунадас, 18-нд баруун болон төвийн аймгуудын ихэнх нутгаар, 19-нд ихэнх нутгаар хур тунадас, уулархаг нутгаар нойтон цас орно. Салхи 16-нд Алтайн салбар уулсаар, 17-нд нутгийн зарим газраар секундэд 14-16 метр, 18-нд ихэнх нутгаар, 19-нд говь талын нутгаар секундэд түр зуур 18-20 метр хүртэл ширүүсч, шороон болон цасан шуурга шуурна.

Увс нуурын хотгор, Тэс голын хөндийгөөр шөнөдөө 17-22 хэм хүйтэн, өдөртөө 1 градус дулаанаас 4 хэм хүйтэн, Их нууруудын болон Дархадын хотгор, Завхан голын эх, Идэр голын хөндий, Алтай, Хангай, Хөвсгөл, Хэнтийн уулархаг нутаг, Хүрэн бэлчир орчим, Эг-Үүр, Туул, Тэрэлж голын хөндийгөөр шөнөдөө 8-13 хэм хүйтэн, өдөртөө 1-6 хэм дулаан, говийн бүс нутгийн өмнөд хэсгээр шөнөдөө 2 хэм дулаанаас 3 хэм хүйтэн, өдөртөө 12-17 хэм дулаан, бусад нутгаар шөнөдөө 1-6 хэм хүйтэн, өдөртөө 9-14 хэм дулаан байна. 18-нд баруун болон төвийн аймгуудын нутгийн хойд хэсгээр, 19-нд ихэнх нутгаар эрс сэрүүснэ.

Монгол Улсын Ерөнхийлөгч Х.Баттулга зарлиг гаргаж, Зэвсэгт хүчний 98 жилийн ой “Монгол цэргийн өдөр”, Казах түмний “Наурызын баяр”, “Олон улсын эмэгтэйчүүдийн эрхийг хамгаалах өдөр”-ийг тохиолдуулан боловсрол, соёл урлаг, хөдөө аж ахуй, батлан хамгаалах, эрүүл мэнд, төрийн байгууллагад олон жил үр бүтээлтэй ажилласан нэр бүхий хүмүүст Монгол Улсын Гавьяат цол хүртээлээ.

Улсын хэмжээнд 2018 оны жилийн эцсийн байдлаар 77 058 эх төрсөн нь өнгөрсөн оны мөн үеэс 3174 төрөлтөөр буюу 4.3 хувиар өссөн байна. Төрсөн эхчүүдийн 58 669 нь буюу 76.1 хувь нь эмчийн хяналтын үзлэгт 6 ба түүнээс дээш удаа хамрагдсан байна. Нийт төрөлтийн 0.4 хувийг гэрийн төрөлт эзэлж байгаа ба энэ үзүүлэлт Говь-Алтай /0.8/, ДарханУул /0.6/, Ховд /0.6/, Хөвсгөл /0.5/, Увс /0.5/ аймагт улсын дунджаас өндөр байсан бол Говьсүмбэр аймагт гэртээ төрсөн эх бүртгэгдээгүй аж.

2018 онд кесарево буюу мэс заслын аргаар төрсөн эхчүүд 25.8 хувийг эзэлж байгаагаас 32.7 хувь нь хүндрэлтэй төржээ. Мөн өнгөрсөн онд улсын хэмжээнд 77 528 хүүхэд амьд төрсөн нь өнгөрсөн оны мөн үеэс 3200-гаар буюу 4.3 хувиар өсчээ. Амьд төрсөн хүүхдийн 39 787 буюу 51.3 хувь нь хүү, 37 741 буюу 48.7 хувь нь охин байна. Нийт амьд төрсөн хүүхдийн 3421 нярай буюу 4.4 хувь нь 2500 гр-аас доош жинтэй, 533 тохиолдол буюу 0.7 хувь нь төрөлхийн гажигтай төрсөн хэмээн Эрүүл мэндийн хөгжлийн төвөөс мэдээлэл өглөө.