Month: March 2019

Вакцин дархлаажуулалтын “Глобал Алянс” сангийн санхүүжилтээр ЭМЯ, НЭМГ, ХӨСҮТ-өөс хамтран халдварт саагийн эсрэг идэвхигүйжүүлсэн вакциныг дархлаажуулалтад нэвтрүүлэх бэлтгэл ажлын сургалтыг дүүрэгчилсэн байдлаар зохион байгуулж эхэллээ. Энэ хүрээнд өнөөдөр Сонгинохайрхан дүүргийн ӨЭМТ, эрүүл мэндийн төвийн эмч, сувилагч, вакцинатор болон нийгмийн ажилтан, бусад холбогдох мэргэжилтнүүд сургалтанд хамрагдаж байна.

Сургалтад хамрагдсанаар дархлаажуулалтын үйл ажиллагааг гүйцэтгэдэг эмч, сувилагч, нийгмийн ажилтан, халдвар судлагч болон бусад холбогдох мэргэжилтнүүдийн мэдлэг хандлага сайжирч, шинэ вакциныг нэвтрүүлэх үйл явц амжилттай хэрэгжих юм.

Дэлхийн Эрүүл Мэндийн Байгууллага (ДЭМБ)-аас халдварт саа өвчнийг дэлхий дахинд устгах зорилтыг тавьж ажилласны дүнд 1988 оныг 2008 онтой харьцуулахад өвчлөлийг 99 хувь бууруулсан ч зэрлэг омгийн полиовирүс Афганистан, Пакистан гэсэн 2 оронд нутагшмал хэвээр үлдсэн тул зөөвөрлөгдөн дэгдэлт үүсгэх эрсдэлтэй байгаа юм. Тиймээс 2013 онд ДЭМБ-аас “Халдварт саа өвчнийг устгах төгсгөлийн шатны төлөвлөгөө”-г батлан хэрэгжүүлж байна.

Дэлхий дахинд 2008-2013 онд бүртгэгдсэн вакцинаас үүдэлтэй омгоор үүсгэгдсэн халдварт саагийн өвчлөлийн 500 гаруй тохиолдлын 98 хувь нь 2-р хэв шинжээр үүсгэгдсэн байжээ. ДЭМБ-ын Номхон далайн баруун бүсийн улс орнууд 2016 оны дөрөвдүгээр сард халдварт саагийн 3 цэнт вакцинаас 2 цэнт вакцинд шилжсэн аж.

Шилжилтийн дараа Монгол Улсад шинээр төрсөн 100 гаруй мянган хүүхдэд халдварт саагийн 2-р хэв шинжийн эсрэг дархлаа байхгүй тул тус дэд хэв шинжээр үүсгэгдсэн халдварт саагийн өвчлөл бусад орноос зөөвөрлөгдөн орж ирэх үед өвчлөх эрсдэл тулгарч байгаа юм. Иймд халдварт саагийн 1, 2, 3-р хэв шинжийг агуулсан идэвхигүйжүүлсэн вакциныг заавал хийх дархлаажуулалтад нэвтрүүлэх зайлшгүй шаардлагатай болсон байна

Монгол Улсын Засгийн газрын 2017 оны 67 дугаар тогтоолоор жил бүрийн гуравдугаар сарын гурав дахь долоо хоногийн Лхагва гарагийг “Газар хөдлөлтийн аюулаас урьдчилан сэргийлэх, таниулах өдөр” болгон орон даяар тэмдэглэдэг болсон. Үүний дагуу энэ оны гуравдугаар сарын 20-нд буюу маргааш улс даяар “Газар хөдлөлтийн аюулаас урьдчилан сэргийлэх, таниулах өдөр”-ийг тэмдэглэн өнгөрүүлнэ. “Газар хөдлөлтийн аюулаас урьдчилан сэргийлэх, таниулах өдөр”-тэй болсноор газар хөдлөлтийн гамшгийн аюулаас урьдчилан сэргийлэх, эрсдэлийг бууруулах, бэлэн байдлыг хангах, аврах үйл ажиллагаанд хүн амыг сургаж бэлтгэх, таниулах, төрийн байгууллага болон гамшгаас хамгаалах албад, аж ахуйн нэгж, байгууллага, төрийн бус байгууллага, ард иргэдийг оролцуулан үндэсний хэмжээнд газар хөдлөлтийн гамшгаас урьдчилан сэргийлэх сургалт, сурталчилгаа хийх, хүн амын дунд аврах, эрэн хайх ажиллагааны дадлага сургуулийг зохион байгуулах, өөрийгөө хамгаалах дадлыг хэвшүүлэх, газар хөдлөлтийн гамшигтай тэмцэх байнгын бэлэн байдлыг дээшлүүлэх нөхцөл бүрдсэн юм.

Боловсрол, соёл, шинжлэх ухаан, спортын сайдын 2019 оны гуравдугаар сарын 12-ны өдрийн А/133 тоот тушаалаар Сургуулийн өмнөх боловсролын сургалтын цөм хөтөлбөрт шинжилгээ хийж, зөвлөмж, боловсруулах Үндэсний хэлэлцүүлэг эхэллээ.

Сум, аймаг, нийслэл, дүүргээс ирсэн цэцэрлэгийн эрхлэгч, арга зүйч, багш нараас бүрдсэн 45 хүний бүрэлдэхүүнтэй Үндэсний баг 2019 оны гуравдугаар сарын 18-ны өдрөөс эхлэн таван хоногийн хугацаанд Энхийг сахиулах цогцолборт байрлан сургуулийн өмнөх боловсролын өмнө тулгамдаж байгаа асуудлаа хэлэлцэх юм.

Хэлэлцүүлгийн хоёр дахь өдөр буюу өнөөдөр Боловсрол, соёл, шинжлэх ухаан, спортын сайд Ё.Баатарбилэг газар дээр нь Үндэсний багт очиж ажиллалаа.

Цэцэрлэгийн хүүхдүүд маш их ядарч гэртээ ирдэг, багш нарын ачаалал их байна, тайлан мэдээ хөтлөх зэрэг бичиг цаасны ажилд дарагдаж, хүүхэдтэйгээ ажиллах боломж олдохгүй байна гэх гомдол, шүүмж багш эцэг эх аль аль талаас гарч байгаа учраас, сургуулийн өмнөх боловсролын хөтөлбөр, агуулгаа нэгтгэж сайжруулахаар үндэсний баг гарган ажиллуулж байгаа юм.

Багш нарын зүгээс сургуулийн өмнөх боловсролын ЦӨМ хөтөлбөрийг мөрдлөг болгон хөтөлбөрөө цэцэрлэг бүр өөрсдөө боловсруулдаг байна. Багш нарын нэгдсэн агуулга, аргачлал сайтай гарын авлага зайлшгүй шаардлатай байна. Багшийн ур чадвараас хүүхдийн хөгжил төлөвшил шалтгаалдаг учраас цэцэрлэгийн багшийн мэргэжил дээшлүүлэх, туслах багшийг сургалтад хамруулах зэргээр багш бэлтгэх тогтолцоонд анхаарах шаардлагатай зэрэг саналаа сайдад танилцууллаа.

Үндэсний баг цэцэрлэгийн багш нарын их байгаа ачааллыг бууруулах, хөтөлбөр агуулгыг сайжруулах талаар энэ хугацаанд хэлэлцэж, саналаа нэгтгэх юм.

БСШУС–ын сайд Ё.Баатарбилэг хэлэлцүүлэгт оролцогчдын асуултад хариулж, товч мэдээлэл өгөн, Хэлэлцүүлгийн тав хоногийг үр бүтээлтэй ашиглаж, ажил хэрэг болгож болохуйц олон сайн санал гарна гэдэгт итгэлтэй байна гээд амжилт хүслээ.

Сонгинохайрхан дүүргийн 14 хороонд гуравдугаар сарын 18-ны өдөр буюу цэргийн баяраар шөнийн 01:20 цагт нөхрөө нуруун тус газарт нь хутгалж гэмтээсэн хэрэг гарчээ. Тодруулбал баярын өдрийг тохиолдуулан ахуйн хүрээнд архидан согтуурч улмаар маргалдан 26 настай эрэгтэй Э-г түүний эхнэр болох 26 настай А нь цайны аяга хагалж, түүгээрээ нуруун тус газарт нь нэг удаа хутгалж, хүнд гэмтэл учруулсан байна. Хэргийг үйлдсэн 26 настай эмэгтэй А нь одоогоор хоригдож байгаа буюу тус дүүргийн нэгдүгээр хэлтэст хүний эрүүл мэндэд хохирол учруулсан хэрэгт буруутган мөрдөн шалгагдаж байгаа аж.

М.САЙНЗАЯА

Нийслэлийн Засаг даргын хэрэгжүүлэгч агентлаг Залуучуудын хөгжлийн газарзалуучуудын сайн дурын ажлыг дэмжиж, тэдний оролцоог нэмэгдүүлэх, тусч соёлыг дэлгэрүүлэх, эерэг хандлагатай, бүтээлч иргэдийг төлөвшүүлэх зорилгоор “Нийслэлийн залуучуудын сайн дурынхны хөгжлийн төв”-ийг “Сайн дурынхны хөгжлийн төв” НҮТББ-тай хамтран нээж байна.

Нийслэлийн Залуучуудын хөгжлийн газрын дарга С.Сүх-Очир: Тус төвийн үйл ажиллагааг “Сайн дурынхны хөгжлийн төв” НҮТББ бие даан явуулах бөгөөд энэхүү төвөөр дамжуулансайн дурын ажлын ач холбогдол, соёлыг залуучуудад түгээх, нийгмийн бүхий л салбарт ажиллах сайн дурын ажилтнуудыг чадавхжуулах, хөгжүүлэх замаар төрийн болон төрийн бус байгууллага, иргэний нийгмийн байгууллагуудтай хамтран нийгмийн хөгжилд залуучуудын хувь нэмэр, оролцоог нэмэгдүүлэх зорилготой юм.

Нийслэлийн Залуучуудын хөгжлийн газар тус төвийн үйл ажиллагааг дэмжиж оффис болон хурлын танхимыг түрээс, урсгал зардалгүйгээр ашиглах боломжийг нээж, сайн дурын ажил хийсэн залуучуудын ажилласан цагийг баталгаажуулах ажлыг “Сайн дурынхны хөгжлийн төв” НҮТББ-тай хамтран зохион байгуулна.

Нийслэлийн залуучуудын сайн дурынхны хөгжлийн төв нь сайн дурынхны санаачилга, оролцоотойгоор дараах ажлуудыг хийнэ.

• Хүүхэд залуучууд, олон нийтийн хөгжил
• Хүрээлэн буй орчин, байгаль хамгаалах (мөн амьтан, ургамлыг болон соёлын өвийг хамгаалах) үйл ажиллагаа
• Нийгмийн эрүүл мэнд – аливаа өвчнөөс урьдчилан сэргийлэх үйл ажиллагаа
• Байгалийн гамшиг, аюулт үзэгдэл, осол гэмтлээс урьдчилан сэргийлэхэд чиглэсэн үйл ажиллагаа
• Ахмад настанд чиглэсэн нийгмийн халамжийн үйл ажиллагаа
• Нийгмийн хамгаалал (Үүнд: зорилтот бүлэгт чиглэсэн тусламж үйлчилгээ)
• Үе тэнгийн болон албан бус боловсрол олгох үйл ажиллагаа
• Хүний эрхийг хамгаалахад чиглэсэн үйл ажиллагаа
• Хувь хүний бүтээлч чадавхыг хөгжүүлэх, иргэдийн санал санаачилгыг дэмжих үйл ажиллагаа
• Хотын соёл – иргэдийн ухамсар, хандлагыг дээшлүүлэхэд чиглэсэн үйл ажиллагаа

Хүмүүнлэгийн болон сайн дурын ажилд оролцох, нийгэмд өөрийн гэсэн хувь нэмрээ оруулах хүсэл эрмэлзэлтэй залуучуудад “Нийслэлийн залуучуудын сайн дурынхны хөгжлийн төв”-ийн үүд хаалга үргэлж нээлттэй байх болно. гэж нийслэлийн Залуучуудын хөгжлийн газраас мэдээллээ.

НИЙСЛЭЛИЙН ЗАЛУУЧУУДЫН САЙН ДУРЫНХНЫ ХӨГЖЛИЙН ТӨВ
Хаяг: Сүхбаатар дүүрэг, Нийслэлийн Засаг захиргааны 5-р байр,
https://www.facebook.com/Niisleliinzaluuchuud/
https://www.facebook.com/VolunteerDevelopmentCenter/
Холбоо барих утасны дугаар: 70117085, 9812-5557

Сонгинохайрхан дүүргийн эдийн засаг, нийгмийн үндсийг бэхжүүлж, төрийн үйлчилгээний чанар хүртээмжийг нэмэгдүүлэх, засаг захиргаа нутаг дэвсгэрийн нэгжийн тогтвортой хөгжлийн орчныг бүрдүүлэх зорилгоор 10 мянгаас дээш хүн амтай хороог хувааж, хилийн цэст өөрчлөлт оруулах замаар шинээр 9 хороо байгуулах тооцоо, судалгааг гаргасан байна. Ингэснээр Сонгинохайрхан дүүрэг нийслэлийн дүүргүүд дундаа хамгийн олон буюу 41 хороотой болох юм. Хороодыг хувааж шинээр хороо байгуулах асуудлыг шийдэж өгөхийг Сонгинохайрхан дүүргийн Засаг дарга Ж.Сандагсүрэн өнөөдөр болсон нийслэлийн удирдах ажилтнуудын шуурхай зөвлөгөөн дээр хотын даргаас хүсчээ.

Сонгинохайрхан дүүргийн хүн амын тоо сүүлийн жилүүдэд эрс нэмэгдэж байгаа тул өнгөрсөн 2018 оноос оршин суугчдын дунд хэлэлцүүлэг өрнүүлж, хороо, дүүрэг, нийслэлийн ИТХ-ууд шат шатандаа хэлэлцэж дүүргийг хоёр хуваах саналаа УИХ, Засгийн газарт өргөн мэдүүлэхээр ажилласан юм байна. Хэрвээ хуваагдах юм бол Баянхошуу, “Өнөр” хороолол хамтдаа нэг дүүрэг болох төсөөлөл бий ажээ.

Сонгинохайрхан 321 мянган хүн амтай, нийслэлийн хамгийн том дүүрэг. Орон нутгаас нийслэлд шилжин ирэх хөдөлгөөнийг зогсоосон ч хотын дүүргүүд хооронд шилжих хөдөлгөөн их байдаг юм байна. Дүүргийн хэмжээнд жил бүр найман мянга орчим шинэ хүн мэндэлдэг. Энэ бүх өсөлтийг нэмээд үзвэл тус дүүрэг яах аргагүй хоёр хуваагдахаас өөр аргагүй гэж үзэх хүн цөөнгүй. Ямар ч байсан дүүрэг хуваагдах асуудлыг шийдэхийн өмнө хэт олон хүн амтай хороодыг хоёр хуваах талаар албан ёсоор санал тавьж байгаа ажээ.

УНТЭ-ийн Гастроэнтерологийн төв жил бүр уламжлал болгон зохион байгуулдаг ”Элэгний эмгэг–урхаг хүндрэл, оношилгоо эмчилгээний менежмент 2019” сургалтаа 2019 оны 03 дугаар сарын 16-нд Эрүүл Мэндийн Яамны хурлын танхимд амжилттай зохион байгууллаа. Уг сургалтыг 2015 оноос жил бүр зохион байгуулж байгаа бөгөөд бүх шатлалын ерөнхий мэргэжил, дотор, гастроэнтеролог, халдварт, эрчимт эмчилгээ болон бусад мэргэжлийн эмч нарт элэгний эмгэг, түүний хүндрэлийн оношилгоо эмчилгээний чиг хандлагын талаар хамгийн сүүлийн үеийн мэдлэг, ур чадварыг олгох зорилготой юм.

Энэ удаагийн сургалтанд 17 аймаг, Улаанбаатар хотын 8 дүүрэг, ЭМЯ, Хууль зүйн яам, Батлан хамгаалах яамны харъяа эмнэлгүүд болон хувийн хэвшлийн 21 эмнэлгийн гастроэнтеролог эмч 21, дотрын эмч 18, халдвартын эмч 13, лабораторийн эмч 2, эрчимт эмчилгээний эмч 4, дурангийн эмч 10, ерөнхий мэргэжлийн нийт 221 эмч мэргэжилтнүүд оролцож, вирүсийн ба вирүсийн бус шалтгаант элэгний эмгэг, элэг гэмтээгч вирүсийн шалтгаант бөөрний эмгэг ба чихрийн шижин, элэгний циррозийн хүндрэлүүдийн менежмент, элэг шилжүүлэн суулгах эмчилгээний талаар сүүлийн үеийн мэдээллийг агуулсан онол дадлагын хосолсон сургалт боллоо. Энэ удаагийн сургалтын нэг онцлог нь аль ч шатлалын эмчид тохиолдож болох эмнэлзүйн 2 тохиолдлоор интерактив хэлэлцүүлэг хийж мэтгэлцээн өрнүүлэн, шинжээч мэргэжилтнүүдийн санал, дүгнэлтийг сонссон нь сургалтанд оролцогчдын талархалыг хүлээсэн юм.