Баянзүрх дүүргийн 10, 19 дүгээр тойрогт дахин сонгууль болж байна. Санал хураалт өнөө өглөө 07.00 цагт эхэлсэн бөгөөд 22.00 цаг хүртэл явагдах аж.
Сонгуульд дөрвөн намын найман нэр дэвшигч, дөрвөн бие даагч өрсөлдөж байна. Санал хураалтыг зохион байгуулах ажлыг Нийслэлийн сонгуулийн хорооноос зохион байгуулж байна.
Баянзүрх дүүргийн 10 дугаар хорооны нутаг буюу 142 дугаар сонгуулийн санал авах байранд иргэд идэвхтэй саналаа өгч байна. Хаалганаасаа шат хүртэл иргэд дугаарласан ч залуусын оролцоо муу байна гэв. Тус дүүргийн хувьд хоёр жил гаруйн хугацаанд ИТХ-ын төлөөлөгч нь сонгогдоогүй билээ.
Энэ өдөр Баянзүрх дүүргийн нутаг дэвсгэрт архи, согтууруулах ундаа худалдах, түүгээр үйлчлэхийг түр зогсоох захирамжийг дүүргийн Засаг даргын Тамгын газраас гаргажээ. Мөн нийтийг хамарсан арга хэмжээг бүртгэж, зөвшөөрөл олгохгүй байх, соёл урлаг, үзвэр үйлчилгээ, спорт зэрэг олныг хамарсан аливаа арга хэмжээ зохион байгуулахыг хориглосон байна.
БСШУС-ын сайдын зөвлөлийн анхдугаар хуралдаанаар таван асуудлыг хэлэлцэв. Хурлын эхэнд сайд Ёндонпэрэнлэйн Баатарбилэг боловсрол, соёл, шинжлэх ухаан, спортын салбарын өнөөгийн байдал, 2019 оны зорилтуудын талаар илтгэл тавьж, мэдээлэл хийв. Сайд хэлсэн үгэндээ “Боловсролын салбарт 89.2 мянга, соёл, урлагийн салбарт 7.1 мянга, шинжлэх ухааны салбарт 4.5 мянга, биеийн тамир, спортын салбарт 4.3 мянга, нийт 3218 байгууллагад 105291 албан хаагчид ажиллаж байгаа нь Монгол Улсын төрийн албан хаагчдын 54.7 хувийг эзэлж байна. Монгол Улсын нийт хүн амын 32.5 хувь нь цэцэрлэг, бага, дунд сургууль, дээд боловсрол эзэмшүүлэх үйлчилгээнд хамрагдаж байгаагаас гадна давхардсан тоогоор зургаан сая орчим хүн нэгжид соёл, урлаг, шинжлэх ухаан, спортын салбараар үйлчлүүлж байгаа” гэдгийг онцлоод БСШУСЯ-аас 2019 оныг “Иргэний ёс зүйн боловсролын жил” болгон зарлаж, гурван зорилт дэвшүүлэн ажиллаж эхэлснээ танилцуулав. Зорилтуудын хүрээнд салбарын хууль, эрх зүйн орчны шинэчлэл, салбарын бүтээн байгуулалт, хөрөнгө оруулалтын гүйцэтгэлийг эрчимжүүлэхэд онцгой анхаарч ажиллахаа илэрхийллээ.
Нийслэлийн Залуучуудын хөгжлийн газар, Кристина Ноблийн хүүхдийн сантай байгуулсан хамтын ажиллагааны санамж бичгийн хүрээнд хамтран хэрэгжүүлэх “Залуучуудын хөгжлийн хөтөлбөр-2019” үйл ажиллагааны нээлт өнөөдөр Нийслэлийн иргэний танхимд боллоо.
Онцгой байдлын газраас Сүхбаатар сумын 1-р багийн нутагт урсан өнгөрдөг Орхон гол, Сэлэнгэ мөрний мөсөн дээгүүр ард иргэд тогтмол хөдөлгөөн үйлддэг 4 хэсэгт мөсний зузаанд хэмжилт хийлээ. Орхон голын мөсний хэмжээ 10-25 см, мөсөн дээгүүр халиа гүйж урд эргээр захлан харзалж урссан, мөс сийрэгжиж тээврийн хэрэгсэл болон явганаар хөдөлгөөн үйлдэхэд аюултай байдал үүссэн байна. Сэлэнгэ мөрөн, Орхон голын бэлчир зах хэсгээр мөс түрэгдэн гарч уснаас хөндийрсөн, 1-р баг хужир нуга, Охь хөндийн иргэд гардаг гармын хэсэг 4-р тампур гэх хэсгээр мөсний зузаан 40-20 см, мөсөн дээгүүр ус хальж урссан мөсөн гармаар явганаар явах боломжгүй дээд хэсэг, доод хэсгээр урссан байгаа нь хужир нуга, Охь хөндийн иргэд мөсөн дээгүүр зорчиход аюултай байна.
УИХ-ын нэр бүхий гишүүд Усны тухай хуульд нэмэлт, өөрчлөлт оруулах тухай хуулийн төслийг УИХ-ын даргад өргөн барилаа.
МОНЦАМЭ агентлагийн гэрэл зургийн албаны санаачлагаар, Монголын гэрэл зурагчдын нэгдсэн холбоо “Mongolian press photo” гэрэл зургийн үзэсгэлэнг Монголын уран зургийн галерейд өчигдөр нээв. Тус үзэсгэлэнд хэвлэл мэдээллийн салбарын 25 зурагчны ур чадвар шингэсэн 170 бүтээл дэлгэсэн бөгөөд маргааш хүртэл үргэлжлэх юм.
Баянзүрх дүүргийн 10, 19 дүгээр тойрогт дахин сонгууль энэ сарын 23-ны өдөр буюу өнөөдөр болохтой холбогдуулан нийслэлийн Засаг дарга бөгөөд Улаанбаатар хотын Захирагч захирамж гаргалаа. Санал авах өдөр буюу 03 дугаар сарын 23-ны өдөр нийтийг хамарсан арга хэмжээг бүртгэж, зөвшөөрөл олгохгүй байх, соёл урлаг, үзвэр үйлчилгээ, спорт зэрэг олныг хамарсан аливаа арга хэмжээ зохион байгуулахгүй байхыг Баянзүрх дүүргийн Засаг дарга Т.Баясахад үүрэг болгожээ. Мөн санал авах өдөр болон техникийн тооллого хийх өдөр буюу 3 дугаар 23, 24-ны өдрүүдэд тус дүүргийн 10, 19 дүгээр хорооны нутаг дэвсгэрт архи, согтууруулах ундаа худалдах, түүгээр үйлчлэхийг түр зогсоох захирамж гаргасан байна.
Япон улсын Засгийн газрын “Өвсний үндэс-Хүний аюулгүй байдлыг хангах буцалтгүй тусламжийн хөтөлбөрийн хүрээнд Баян-Өлгий аймгийн Өлгий сумын Ерөнхий боловсролын бүрэн дунд 4-р сургууль, Увс аймгийн Улаангом сумын Ерөнхий боловсролын бүрэн дунд 4-р сургууль, Завхан аймгийн Баянхайрхан сумын эмнэлэг, Дорноговь аймгийн Сайншанд сумын Ерөнхий боловсролын 1-р сургуулийн дотуур байр болон насан туршийн боловсролын төвийг засварлахаар болжээ. Засварын төслийн гэрээнд гарын үсэг зурах арга хэмжээ 2019 оны 3 дугаар сарын 27-ны өдөр 14:00 цагаас Японы Элчин сайдын яаманд болно. Япон улсын Засгийн газраас 1990 оноос эхлэн хэрэгжүүлж эхэлсэн “Өвсний үндэс – Хүний аюулгүй байдлыг хангах хөтөлбөр” нь хөгжиж буй орнуудын орон нутгийн засаг захиргаа болон боловсрол, эрүүл мэндийн байгууллагууд гардан хэрэгжүүлдэг хамтын ажиллагааны төсөл юм. Тухайн орон нутгийн ард иргэдийн эрэлт хэрэгцээнд тулгуурлан хэрэгжүүлдэг уг төслийн үр ашгийг иргэд шууд хүртэх давуу талтай бөгөөд Япон улсын дипломат төлөөлөгчийн газар санхүүжилтийн дэмжлэг үзүүлэхэд голлох үүргийг гүйцэтгэдэг аж
ЗГХЭГ-ын дарга Л.Оюун-Эрдэнэ Улсын Дээд шүүхийн Захиргааны танхимын тэргүүн М.Батсуурь, Сүхбаатар дүүргийн шүүхийн шүүгч Х.Идэр нарт хариуцлага тооцуулахаар Ерөнхийлөгч Х.Баттулга, АТГ-ын дарга Х.Энхжаргал, Шүүхийн ерөнхий зөвлөлийн дарга Н.Лүндэндорж, Шүүхийн ёс зүйн хорооны дарга Н.Эрдэнэцогт нарт хандаад байна.
МАХН-ын дарга Н.Энхбаяр, нийслэлийн МАХН-ын дарга Э.Эрдэнэжамъяан мэдээлэл хийж прокурор Ё.Сагсайтай холбоотой бичлэгийг дэлгэхээ мэдэгдсэн билээ. Улмаар нийслэлийн МАХН-ын дарга Э.Эрдэнэжамъяан Е.Сагсай прокурортой хогбогдох бичлэгийг олон нийтэд үзүүлсэн билээ. Тэгвэл прокурор Е.Сагсай нэр төрд нь халдсан гэх үндэслэлээр шүүхэд хандахаар болсон байна. Мөн тэрээр ирэх даваа гарагт Э.Эрдэнэжамъяан нарын дэлгэсэн бичлэгтэй холбоотой тайлбарыг өгөх юм байна.