Month: March 2019

Монгол Улсын Ерөнхий сайд У.Хүрэлсүхийн урилгаар Бүгд Найрамдах Солонгос Улсын Ерөнхий сайд Ли Наг Ён энэ сарын 25-27-ны өдрүүдэд Монгол Улсад албан ёсны айлчлал хийх гэж байна.

Солонгосын Ерөнхий сайдын айлчлалын үеэр замын хөдөлгөөний хамгаалалт, зохицуулалтыг хийж, Нисэх, Энхтайваны өргөн чөлөө, Чингисийн өргөн чөлөө зэрэг гудамж замуудыг түр хугацаагаар хязгаарлахаар төлөвлөжээ. БНСУ-ын Ерөнхий сайд Ли Наг Ён Монгол Улсын Ерөнхий сайд У.Хүрэлсүхтэй албан ёсны хэлэлцээр хийж, Монгол Улсын Ерөнхийлөгч Х.Баттулга, УИХ-ын дарга Г.Занданшатар нарт бараалхах юм.

Өнөөдөр дэлхий нийтээр сүрьеэ өвчинтэй тэмцэх өдөр болгон өнгөрүүлж байна.

“Сүрьеэтэй тэмцэх үйл хэрэгт олон нийтийн анхаарлыг хандуулах, хүн бүрийн хүчин чармайлт чухал” гэдгийг сурталчлан таниулах зорилгоор дэлхий улс орнууд 1998 оноос хойш “Сүрьеэ өвчинтэй тэмцэх дэлхийн өдөр”-ийг тэмдэглэсээр иржээ. Германы эрдэмтэн Доктор Роберт Кох сүрьеэ өвчний үүсгэгч нянг нээн илрүүлснээс хойш 130 гаруй жил өнгөрсөн хэдий ч уг өвчин дэлхий даяар эрүүл мэндийн салбарын тулгамдсан асуудлын нэг хэвээр байна.

Сүрьеэ нь дэлхийд нас баралтаар тэргүүлэх 10 өвчний нэг бөгөөд дэлхий дээр жил бүр 10 сая шинэ тохиолдол бүртгэгдэж, 1,6 сая хүн уг өвчний улмаас нас барж байна. Ялангуяа сүрьеэгээр өвчилсөн хүүхдийн тоо 1 саяд хүрч 230 мянга орчим хүүхэд эндэж байна. Нас баралт өндөр байгаа нь өрх гэрүүд, улс оронд эдийн засгийн хувьд маш том дарамт учруулж байгаа юм.

Монгол Улс ДЭМБ-ын Номхон далайн баруун эргийн бүсийн 37 орноос сүрьеэгийн өвчлөл өндөртэй 7 улсын нэг болж 4-рт орж байна. Сүүлийн 5 жилийн эрүүл мэндийн статистик үзүүлэлтээр сүрьеэ нь улсын хэмжээнд бүртгэгдэж буй нийт халдварт өвчний дотор дунджаар 9.8 хувийг эзэлж байна.

Энэ жилийн сүрьеэтэй тэмцэх өдрийг Дэлхий даяар “Цаг нь болсон!” уриатайгаар тэмдэглэн өнгөрүүлж байгаа бөгөөд гол утга нь дэлхий нийтээр сүрьеэ өвчнийг устгах амлалтаа биелүүлж, тэмцлийн үйл ажиллагаагаа түргэсгэн хамтдаа тэмцэх цаг нь болсон гэдгийг уриалж байна. Идэвхтэй илрүүлэг, эмчилгээ, үйл ажиллагааны үр дүнд 2000-2015 оны байдлаар нас баралт 22% -иар буурсан боловч цаашид энэ тоог 2020 онд 35%, 2035 онд 95%-иар, шинэ тохиолдлыг 90 хувиар бууруулах зорилтыг дэвшүүлсэн юм.

Өнгөрсөн 9-р сард НҮБ-ын сүрьеэтэй тэмцэх дээд хэмжээний уулзалтаас гарсан шийдвэрүүдийг хэрэгжүүлж, олон сая хүний амийг аврахын тулд алдах цаг мөч байхгүй болохыг НҮБ-ын Ерөнхий Ассамблей анхааруулав. Мөн ДЭМБ-аас эрүүл мэндийн тусламж үйлчилгээг хүн бүрт хүртээмжтэй болгоход улс орнуудын олон талт хамтын ажиллагааг сайжруулах шаардлагатай байгаа талаар онцлон тэмдэглэсэн билээ.

Сүрьеэгээс сэргийлэх ажилд бүх салбарын оролцоо, үүнд засгийн газар, орон нутгийн удирдлага, төрийн болон төрийн бус байгууллага, олон нийтийн байгууллага, иргэний нийгэм, хувийн салбар болон хэвлэл мэдээллийн салбар хамтран ажилласнаар сүрьеэ өвчнөөс сэргийлэх ажил үр дүнд хүрч болохыг Монгол улсын засгийн газар болон ДЭМБ-аас онцолж байна.

Сонгинохайрхан дүүргийн прокурорын газрын ерөнхий прокурор болон НМХГ-ын дэд даргын хамтран баталсан удирдамжийн дагуу СХД-ийн 27 дугаар хороо цагдаагийн нэгдүгээр хэлтсийн эрүүлжүүлэх саатуулах байранд хяналт шалгалт хийлээ. Шалгалтаар Эмч мэргэжилтний тусламж үйлчилгээ үзүүлэх явцдаа баримтлан ажиллах эмнэлзүйн стандарт мөрдөөгүй, Эмчийн хөтлөх анхан шатны бүртгэл маягт хангалтгүй, эмч мэргэжилтний ёс зүйн дүрмийг баримтлан ажилладаггүй, эрүүлжүүлэх байрны орчинд өдөр тутмын халдваргүйтгэл хангалтгүй, байрлаж байгаа байр, ариун цэврийн өрөө, бие засах газрын цэвэрлэгээний хэрэгсэл хүрэлцээгүй, ялгах тэмдэггүй, бие засах газар болон гар угаахад хэрэглэх халдваргүйжүүлэх уусмалгүй, халдваргүйжүүлэх бодисын нөөцгүй, сэтгэц нөлөөт эмийг энгийн эмтэй цуг хадгалж байсан болон хугацаа нь дууссан эм байсан зэрэг зөрчлүүд илэрч зөрчлийн хэрэг нээн шалган шийдвэрлэх ажиллагаа явагдаж байна.

Гэр бүл салалтын буруугаас болж хохирогч нь хүүхдүүд болж үлддэг. Хариуцлагагүй эцгүүд хүүхдүүдээ хүлээн зөвшөөрдөггүйгээр барахгүй тэтгэмж өгдөггүй талаар дуучин Нара өөрийнхөө цахим хуудсаар дамжуулан үг үзэл бодлоо илэрхийлсээр байна. Монгол Улсын хэмжээнд 2018 оны байдлаар өрх толгойлсон эх 72,035, өрх толгойлсон эцэг 19,503, үр хөндөлт 17,530 байна.

Онцгой байдлын газраас Сүхбаатар сумын нэгдүгээр багийн нутагт урсан өнгөрдөг Орхон гол, Сэлэнгэ мөрний мөсөн дээгүүр ард иргэд тогтмол хөдөлгөөн үйлддэг 4 хэсэгт мөсний зузаанд хэмжилт хийжээ. Ингэхэд Орхон голын мөсний хэмжээ 10-25 см, мөсөн дээгүүр халиа гүйж урд эргээр захлан харзалж урссан, мөс сийрэгжиж тээврийн хэрэгсэл болон явганаар хөдөлгөөн үйлдэхэд аюултай байдал үүссэн байна.

Сэлэнгэ мөрөн, Орхон голын бэлчир зах хэсгээр мөс түрэгдэн гарч уснаас хөндийрсөн, нэгдүгээр баг хужир нуга, Охь хөндийн иргэд гардаг гармын хэсэг дөрөвдүгээр тампур гэх хэсгээр мөсний зузаан 40-20 см, мөсөн дээгүүр ус хальж урссан мөсөн гармаар явганаар явах боломжгүй дээд хэсэг, доод хэсгээр урссан байгаа нь хужир нуга, Охь хөндийн иргэд мөсөн дээгүүр зорчиход аюултай байдал үүсжээ.

Иймд Сэлэнгэ мөрөн, Орхон голын мөсөн дээгүүр зорчиход мөс цөмөрч амь насаа алдах аюултай байгаа тул ард иргэд баталгаат замаар тээвэр хийх, хөдөлгөөн үйлдэхийг сэрэмжлүүллээ.

Урин дулааны улирал эхэлж байгаатай холбогдуулан Баянзүрх дүүргийн Засаг даргын Тамгын газраас нутаг дэвсгэрийн хэмжээнд үйл ажиллагаа явуулдаг ахуй нэгж байгууллага, иргэдийн дунд ногоон байгууламжаа нэмэгдүүлж тоосжилтыг бууруулах уриалгыг гаргасан байна.

Тодруулбал мод, бут, сөөгт цэнэг усалгаа хийж хортон шавьж , ус чийг алдагдлаас урьдчилан сэргийлэх зорилгоор мод шохойдох, том оврын буюу масс бүхий моддын өндрийн өсөлтийг хязгаарлахгүйгээр гоёлын тайралт таналтыг хийж хашаа хороо, дүүргийн өнгө үзэмжид чимэг нэмэхийг иргэд, аж ахуй нэгжид уриалж байгаа юм.

Түүнчлэн ногоон байгууламжаа нэмэгдүүлж буй иргэн аж ахуй нэгжүүд цаашид мод буд сөөгний усалгаагаа стандартын дагуу хийж, шатсан болон цаашид ургах чадваргүй хэсгийг модноос зөв тайрч, мод бутны хөрсийг бордох ажлыг тогтмол хийхийг зөвлөж байна.