Month: January 2019

Агаарын бохирдол, томуу, томуу төст өвчний дэгдэлт их байгаатай холбогдуулан өнгөрсөн оны арванхоёрдугаар сарын 25-наас энэ оны хоёрдугаар сар хүртэл ЕБС-ийн сурагчдыг амраах шийдвэр гаргасан. Гэвч зарим дунд сургуулиуд үйл ажиллагаа явуулж, хичээл орсон хэвээр байна. Мэргэжлийн хяналтын байгууллагаас эдгээр сургуулиудад гаргасан шийдвэрийг хуулийн хүрээнд дагаж мөрдөх мэдэгдэл хүргүүлээд байгаа юм байна. Нийслэлийн хэмжээнд ерөнхий боловсролын 3 дунд сургууль одоог хүртэл амраагүй байна. Эдгээр сургуулиуд нь бүгд олон улсын стандарт, дүрэм журмын дагуу үйл ажиллагаа явуулдаг аж. 3 сургуульд нийт 1400 гаруй хүүхэд суралцаж байна.Сургуулиудын хувьд дотоодын төрийн өмчийн сургуулиудаас амралт, цагийн хуваарь зөрдөгөөс гадна сургалтын хөтөлбөр, гадаад хамтын ажиллагаа, систем зэргээс шалтгаалж сурагчдаа амраах боломжгүй гэсэн тайлбарыг өгч байна. Мөн “Улаанбаатар Бритиш” сургуулийн төгсөх ангийн сурагчид гадаадад дараагийн шатны сургуульд сурах шалгалтаа 1, 2-р сард өгдөг учраас өдийд амраах боломжгүй байдаг гэлээ.

Тэгвэл мэргэжлийн хяналтын байгууллагаас шийдвэрийг мөрдөхгүй бол Зөрчлийн хуулийн дагуу 200 мянган төгрөгөөр торгох цаашлаад тусгай зөвшөөрлийг цуцлах хүртэл арга хэмжээ авна гэдгийг хэлж байна

Эрүүл мэндийн сайд Д.Сарангэрэл, дэд сайд Л.Бямбасүрэн, ЭМЯ-ны Төрийн нарийн бичгийн дарга Б.Бямбадорж нар өнөөдөр НЭМГ-ын харьяа эрүүл мэндийн байгууллагын удирдах ажилтнуудтай томуу, томуу төст өвчний цаг үеийн асуудлаар уулзалт хийлээ.

Нийслэлийн хэмжээнд энэ сарын 10-ны өдрийн байдлаар, амбулаторийн үзлэг 7.3 хувьд хүрч, дүүргийн эрүүл мэндийн төв болон нэгдсэн эмнэлгийн нийт батлагдсан 977 хүүхдийн орон дээр нэмэлтээр 723 орыг дэлгэн зохицуулалт хийгээд байна. Гэвч томуугийн А хүрээний дэд хэв шинжийн А(H1N1), A(H3N2)вирусын идэвхжил нэмэгдэж, өвчлөл хүндрэх байдалтай байгаа тул хүүхдийн орны ачаалал цаашид ч нэмэгдэх хандлагатай юм. Тиймээс энэ асуудалд дорвитой анхаарч, хүүхдийн ор төдийгүй эм бэлдмэл, эмнэлгийн тоног төхөөрөмжийг хангалттай хэмжээнд хүргэх нь зайлшгүй чухал болохыг Эрүүл мэндийн сайд эмнэлгийн удирдлагуудад санууллаа. Мөн энэ хүрээнд өөрийн зүгээс болон Эрүүл мэндийн яамнаас авч хэрэгжүүлж буй ажлуудынхаа талаар мэдээлэл өгч, нийслэлийн эмнэлгүүдэд нэмэлтээр дэлгэсэн хүүхдийн орны тоо, эм тарианы хангамж болон пневмококкийн эсрэг вакцинд хамрагдсан хүүхдүүдийн дунд хийсэн өвчлөлийн судалгаа зэрэг асуудлаар ЭМЯ-ны Бодлого төлөвлөлтийн газрын дарга Р.Оюунханд, Эмнэлгийн тусламжийн газрын дарга М.Баттүвшин нараас гадна НЭМГ-ын удирдлагуудтай мэдээлэл солилцлоо. Азийн хөгжлийн банкны хөнгөлөлттэй зээлээр баригдаж буй СХД-ийн 240 ортой жишиг нэгдсэн эмнэлгийн барилгыг энэ онд ашиглалтад оруулах бөгөөд Хан-Уул, Чингэлтэй дүүргийн шинэ эмнэлгийн барилгын ажлыг эхлүүлэхээр төлөвлөж байгаагаа Эрүүл мэндийн сайд энэ үеэр онцолсон. Мөн БЗД-д 50 ортой хүүхдийн эмнэлэг баригдсан энэ онд ашиглалтанд орох гэж байна. Түүнчлэн тэрбээр “Ханиад томууны өвчлөл өндөр байгаа энэ цаг үед ДЭМБ-аас буцалтгүй тусламжаар өгсөн 550 хүн тун “Тамифлю” эмийг нийслэлийн эмнэлгүүдэд хуваарилсан ч хүрэлцээ муу хэвээр байна. ДЭМБ-аас дахин 75 мг “Тамифлю” эмийг 500 хүн тун, 45 мг “Тамифлю” эмийг 1200 хүн тунг өгөхөөр болсон. Эмнэлгүүдийн хувьд өнөөдөр нөхцөл байдалдаа тохируулан арга хэмжээ авч, эрүүл мэндийн тусламж, үйлчилгээ авахаар ирсэн иргэд, хүүхдийг буцаахгүй гэсэн үүднээс эмнэлгийн зай талбайг ашиглан нэмэлтээр ор дэлгэж, зохицуулалт хийж байна. Эмч, эмнэлгийн ажилтнууд уртасгасан цагаар ажиллаж, ачаалал ихтэй байгаа ч иргэд, үйлчлүүлэгчидтэй харилцах харьцаа хандлагаа сайжруулах нь чухал” хэмээн ярилаа. Уулзалтын төгсгөлд Эрүүл мэндийн сайд Д.Сарангэрэл томуу, томуу төст өвчний хүрээнд төр, хувийн хэвшлийн эрүүл мэндийн байгууллагуудад хүүхдийн ор нэмэлтээр дэлгэх нөхцөл бололцоог судалж, хамтран ажиллах үүрэг өглөө.

Эрүүл мэндийн сайд Д.Сарангэрэл, дэд сайд Л.Бямбасүрэн, ЭМЯ-ны Төрийн нарийн бичгийн дарга Б.Бямбадорж нар өнөөдөр НЭМГ-ын харьяа эрүүл мэндийн байгууллагын удирдах ажилтнуудтай томуу, томуу төст өвчний цаг үеийн асуудлаар уулзалт хийлээ.

Нийслэлийн хэмжээнд энэ сарын 10-ны өдрийн байдлаар, амбулаторийн үзлэг 7.3 хувьд хүрч, дүүргийн эрүүл мэндийн төв болон нэгдсэн эмнэлгийн нийт батлагдсан 977 хүүхдийн орон дээр нэмэлтээр 723 орыг дэлгэн зохицуулалт хийгээд байна. Гэвч томуугийн А хүрээний дэд хэв шинжийн А(H1N1), A(H3N2) вирусын идэвхжил нэмэгдэж, өвчлөл хүндрэх байдалтай байгаа тул хүүхдийн орны ачаалал цаашид ч нэмэгдэх хандлагатай юм. Тиймээс энэ асуудалд дорвитой анхаарч, хүүхдийн ор төдийгүй эм бэлдмэл, эмнэлгийн тоног төхөөрөмжийг хангалттай хэмжээнд хүргэх нь зайлшгүй чухал болохыг Эрүүл мэндийн сайд эмнэлгийн удирдлагуудад санууллаа.

Мөн энэ хүрээнд өөрийн зүгээс болон Эрүүл мэндийн яамнаас авч хэрэгжүүлж буй ажлуудынхаа талаар мэдээлэл өгч, нийслэлийн эмнэлгүүдэд нэмэлтээр дэлгэсэн хүүхдийн орны тоо, эм тарианы хангамж болон пневмококкийн эсрэг вакцинд хамрагдсан хүүхдүүдийн дунд хийсэн өвчлөлийн судалгаа зэрэг асуудлаар ЭМЯ-ны Бодлого төлөвлөлтийн газрын дарга Р.Оюунханд, Эмнэлгийн тусламжийн газрын дарга М.Баттүвшин нараас гадна НЭМГ-ын удирдлагуудтай мэдээлэл солилцлоо.

Азийн хөгжлийн банкны хөнгөлөлттэй зээлээр баригдаж буй СХД-ийн 240 ортой жишиг нэгдсэн эмнэлгийн барилгыг энэ онд ашиглалтад оруулах бөгөөд Хан-Уул, Чингэлтэй дүүргийн шинэ эмнэлгийн барилгын ажлыг эхлүүлэхээр төлөвлөж байгаагаа Эрүүл мэндийн сайд энэ үеэр онцолсон. Мөн БЗД-д 50 ортой хүүхдийн эмнэлэг баригдсан энэ онд ашиглалтанд орох гэж байна. Түүнчлэн тэрбээр “Ханиад томууны өвчлөл өндөр байгаа энэ цаг үед ДЭМБ-аас буцалтгүй тусламжаар өгсөн 550 хүн тун “Тамифлю” эмийг нийслэлийн эмнэлгүүдэд хуваарилсан ч хүрэлцээ муу хэвээр байна. ДЭМБ-аас дахин 75 мг “Тамифлю” эмийг 500 хүн тун, 45 мг “Тамифлю” эмийг 1200 хүн тунг өгөхөөр болсон.

Эмнэлгүүдийн хувьд өнөөдөр нөхцөл байдалдаа тохируулан арга хэмжээ авч, эрүүл мэндийн тусламж, үйлчилгээ авахаар ирсэн иргэд, хүүхдийг буцаахгүй гэсэн үүднээс эмнэлгийн зай талбайг ашиглан нэмэлтээр ор дэлгэж, зохицуулалт хийж байна. Эмч, эмнэлгийн ажилтнууд уртасгасан цагаар ажиллаж, ачаалал ихтэй байгаа ч иргэд, үйлчлүүлэгчидтэй харилцах харьцаа хандлагаа сайжруулах нь чухал” хэмээн ярилаа.

Уулзалтын төгсгөлд Эрүүл мэндийн сайд Д.Сарангэрэл томуу, томуу төст өвчний хүрээнд төр, хувийн хэвшлийн эрүүл мэндийн байгууллагуудад хүүхдийн ор нэмэлтээр дэлгэх нөхцөл бололцоог судалж, хамтран ажиллах үүрэг өглөө.

2019 оны нэгдүгээр сарын 11

Сар шинийн баяр болох гэж байгаатай холбоотойгоор хөдөлгөөний эрчим нэмэгдэж, иххэмжээний цас орсон үед зам даваа хаагдаж, хальтиргаа, гулгаа үүсэх нөхцөл бүрдэх, иргэдийн амь нас, эрүүл мэнд, эд хөрөнгийг болзошгүй гамшгаас урьдчилан сэргийлэх, хөдөлгөөний аюулгүй байдлыг хангуулах зорилгоор авто замын ашиглагч, хариуцагч, автотээврийн холбогдох байгууллага, албан тушаалтан, жолооч, зорчигчдод болон хяналт хэрэгжүүлэгч байгууллагуудад дараах зүйлүүдийг анхаарч, шаардлагатай арга хэмжээг авч ажиллахыг Мэргэжлийн хяналтын байгууллагаас СЭРЭМЖЛҮҮЛЖ байна. Үүнд:

1. Олон улсын болон улсын чанартай авто замын хариуцагч байгууллагууд, түүний харьяа байгаа шуурхай ажлын хэсгүүд, өвлийн засвар арчлалтын ажилд шаардлагатай машин механизм, тоног төхөөрөмж, хальтиргаанаас хамгаалах элс, бодис, хүн хүчийг бэлэн байлгах арга хэмжээг авч ажиллах;

2. Аймаг, сумын Засаг дарга нар Монгол Улсын “Автотээврийн тухай” хуулийн 7 дугаар зүйлийн 7.1.4, 7.1.6-д заасны дагуу нийтийн тээвэр, шуудан тээвэрлэлтийг зохицуулах, гол, нуурын мөс хөлдөх, хайлах, цөн түрэлт явагдаж, шар усны үер гарч дуусталх хугацаанд шаардлагатай газруудад мөсөн замын тээвэрлэлтийг түр хязгаарлаж, хориглох талаар зохих шийдвэрийг гарган мөрдүүлж ажиллах;

3. Аймаг, нийслэлийн удирдлага тухайн орон нутгийн чанартай авто замын аюулгүй байдлыг хангуулах, шаардлагатай тохиолдолд мэргэжлийн байгууллагаар авран хамгаалах, урьдчилан сэргийлэх арга хэмжээг авхуулах, хаагдсан зам, даваа, гүүр засварлагдсан тохиолдолд тэдгээрээр явах тээврийн хэрэгслийн хөдөлгөөнийг сэргээхдээ холбогдох мэргэжлийн байгууллагуудын дүгнэлт, зөвшөөрлийг үндэслэн шийдвэрлэх;

4. Аймгийн Засаг дарга нар орон нутгийн томоохон нуур, голууд дээр цас, мөсний баяр, амралт зугаалгын арга хэмжээг зохион байгуулахдаа орон нутгийн цаг уурын байдлыг харгалзан мөсөн замын тээвэрлэлтийн эхлэх, дуусах хугацаа, тээвэрлэлтийн чиглэл, мөсний даацыг орон нутгийн ус цаг уур, орчны хяналт шинжилгээний байгууллагатай хамтран тогтоож ажиллах

5. Цасан шуурганд хаагдах, эвдрэх, нурах болзошгүй зам, гүүр болон гол, нуурын мөс цөмрөх газруудын судалгааг гаргаж, түүгээр тээврийн хэрэгслийг явуулахгүй байх, хязгаарлах арга хэмжээг авахын зэрэгцээ эвдэрч нурсан зам, гүүр, нуур, голын орчимд анхааруулсан, хориглосон тэмдэг, тэмдэглэгээг байрлуулах, гүүрийн тооцоот даацад тохирсон хөдөлгөөнийг нэвтрүүлэх, анхааруулах, мэдээлэх ажлыг аймгуудын авто замын засвар, арчлалт хариуцсан болон автотээврийн эрх бүхий байгууллагууд хамтарч хийж гүйцэтгэх;

6. Болзошгүй эрсдэлээс урьдчилан сэргийлэх ажлын хүрээнд аймаг, нийслэлийн Мэргэжлийн хяналтын газар, аймгуудын Тээвэр, авто замын асуудал хариуцсан байгууллагууд улс, хот хооронд, орон нутгийн нийтийн тээвэр, ачаа тээвэрлэлтийн үйлчилгээ эрхлэгч, тээврийн хэрэгсэл бүхий иргэдийн зорчих хөдөлгөөнийг батлагдсан маршрут, баталгаатай авто замаар гүйцэтгүүлэхэд хяналт, шалгалтын үйл ажиллагаагаа чиглүүлж хөдөлгөөний аюулгүй байдлыг сахиулах;

7. Тээврийн байгууллагуудаас тээвэрчдэд автозам, замын байгууламжийг техникийн нөхцөл шаардлагын дагуу ашиглах, гүүрээр түүний тооцоот хурд, даацад тохирсон жинтэй тээврийн хэрэгслээр тээвэрлэлт гүйцэтгэх, даац, суудлын тоог хэтрүүлэхгүй байх талаар анхааруулга, сэрэмжлүүлэг бүхий мэдээлэл сурталчилгааг тогтмол хийж байх;

8. Ачаа, зорчигч тээврийн үйлчилгээ эрхэлж байгаа аж ахуйн нэгж, байгууллагууд жолооч нартаа үйлчилгээнд гарахын өмнө тээвэрлэлтийн аюулгүй ажиллагааг хангуулахын тулд цас, мөсний хайлалт, шар усны үер гарсан болон тэдгээрийн улмаас эвдэрч нурсан зам, гүүр болон гол, нуурын мөс цөмрөх магадлалтай газруудын талаарх судалгаа, мэдээллийг өгч, аюулгүй байдлыг хангуулах арга хэмжээг авах;

9. Нийтийн зорчигч тээврийн үйлчилгээ эрхлэхдээ гэрээ байгуулсан байгууллагатай тохиролцсон цагийн хуваарь, чиглэлийг баримтлах, автотээврийн хэрэгслийн хэрэглээний стандартын үзүүлэлт, техникийн шаардлагыг хангасан зориулалтын тээврийн хэрэгслээр тав тухтай, аюул, осолгүй тээвэрлэх, тээвэрлэлтийн ажил, үйлчилгээг тухайн ангиллын тээврийн хэрэгслийн мэргэшсэн жолоочоор гүйцэтгүүлэх, жолоочийн ажил, амралтын зохицуулалтын байдалд анхаарч ажиллах;

10. Тээвэрлэлтийн ажил үйлчилгээнд гарахын өмнө жолоочийн эрүүл мэндийн байдалд үзлэг хийж, тээврийн хэрэгслийн техникийн бүрэн бүтэн байдал, тээвэрлэлтийн нөхцлийг хангасан байдлыг шалгаж, замын хуудсыг баталгаажуулж байх;

11. Авто замын арчлалт, урсгал засварыг хариуцагч болон захиалагч байгууллагууд тухайн хариуцсан зам, гүүрийн нөхцөл байдлын талаарх мэдээллийг жолооч нарт тогтмол өгч, “Авто замын тухай” хуулийн 23.3.2-т заасны дагуу авто замаар зорчиж буй иргэд, зорчигчдоос зам, замын байгууламжийн эвдрэл гэмтлийн талаарх мэдээллийг авч, шуурхай арга хэмжээгзохион байгуулах;

12. Иргэд, тээврийн хэрэгслийн жолооч нар ашиглалтын нөхцөл, шаардлага хангагдаагүй, эвдрэлтэй авто болон мөсөн зам, гүүр, тэдгээрийн байгууламжийн талаарх мэдээллийг Мэргэжлийн хяналтын ерөнхий газар, аймгуудын Мэргэжлийн хяналтын газар, Онцгой байдлын газар болон бусад холбогдох байгууллагуудад өгч, зохих арга хэмжээг авахуулж байх зэрэг болно.

МЭРГЭЖЛИЙН ХЯНАЛТЫН ЕРӨНХИЙ ГАЗАР

Улсын Дээд шүүх 2018 онд эрүү, иргэн, захиргааны нийт 3764 хэрэг хүлээн авч, шүүх хуралдаанаар 3017 хэрэг хянан шийдвэрлэжээ. Хянан шийдвэрлэсэн хэргийн 64 хувь нь иргэний, 19 хувь нь эрүүгийн, 17 хувь нь захиргааны хэрэг байсан байна.

Эрүүгийн хэргийн танхимын хяналтын шатны шүүх хуралдаан нийт 68 өдөр хуралдаж, өдөрт дунджаар 8 хэрэг хэлэлцсэн байна. Эрүүгийн хэргийн танхимд хяналтын шатны журмаар ирүүлсэн хэргээс нэг шүүгчид 193 хэрэг ногджээ. Өмнөх онтой харьцуулахад хүлээн авсан эрүүгийн хэрэг 395-аар буюу 84.8 хувиар, хяналтын шатны шүүх хуралдаанаар шийдвэрлэсэн хэрэг 231-аар буюу 67.5 хувиар өсчээ.

Улсын Дээд шүүхийн Иргэний хэргийн танхим нийт 2163 хэрэг хүлээн авч, 1932 хэргийг шүүх хуралдаанаар хянан шийдвэрлэж, 55 хэргийг шинээр илэрсэн нөхцөл байдалд тооцуулахаар хэлэлцэж, 74 хэргийг хяналтын журмаар хэлэлцэхээс татгалзаж, 13 хэргийн харьяаллыг тогтоосон байна. Өмнөх онтой харьцуулахад хүлээн авсан иргэний хэрэг 172-аар буюу 8.6 хувиар, хяналтын шатны шүүх хуралдаанаар шийдвэрлэсэн хэрэг 228-аар буюу 13.4 хувиар тус тус өсчээ.

Харин өмнөх онтой харьцуулахад хүлээн авсан захиргааны хэрэг 24-өөр буюу 3.1 хувиар, хяналтын шатны шүүх хуралдаанаар шийдвэрлэсэн хэрэг 31-ээр буюу 5.7 хувиар буурчээ. Улсын Дээд шүүхийн Захиргааны хэргийн танхим Захиргааны ерөнхий хуулийн 3.1.4, 37.1, Захиргааны хэрэг шүүхэд хянан шийдвэрлэх тухай хуулийн 7.3, 112.9 дэх заалтууд Монгол Улсын Үндсэн хуульд нийцэж байгаа эсэх асуудлыг Дээд шүүхийн нийт шүүгчдийн хуралдаанаар хэлэлцүүлж, Монгол Улсын Үндсэн хуулийн цэцэд хүсэлт өргөн мэдүүлж, дүгнэлт гаргуулан улмаар УИХ дээрх хуулийн заалтуудыг хүчингүй болгосон байна.

Хууль зүүн сайдын Д.Дорлигжав өмгөөлөгч Д.Оросоо, А.Ууганбаяр нараар дамжуулан Хан-Уул дүүргийн Эрүүгийн хэргийн анхан шатны Ерөнхий шүүгчид гомдол гаргасан. Уг хүсэлтийн дагуу давж заалдах шатны шүүх хуралдааныг энэ сарын 14-ний 15:00 цагт товложээ.

Их хэмжээний хахууль бусдаас авсан хэрэгт холбогдуулан Д.Дорлигжавыг түүний төрсөн дүү Д.Баатар, баруун гар гэгддэг Ч.Бямбаа нарын хамт ШШГЕГ-ийн харъяа 461 дүгээр урьдчилан хорих ангид цагдан хорьсон билээ. Ингэхдээ Хан-Уул дүүргийн эрүүгийн хэргийн анхан шатны шүүхээс Нийслэлийн прокурорын газраас цагдан хорих таслан сэргийлэх арга хэмжээ авахуулахаар ирүүлсэн саналын дагуу яллагдагчаар нэг сарын хугацаагаар цагдан хорихоор шийдвэрлэсэн.

Учир нь Д. Дорлигжав, түүний төрсөн дүү болох Д.Баатар, туслах Ч.Бямбаа нарыг “Рекат Монголиа “ ХХК-ий Голомт банк дахь дансаар Т.Ганболдын “Эн Ар Ай”, “Пайонеринг интернешил “компаниудаас 2011 оны есдүгээр сараас аравдугаар сар хүртэлх хугацаанд гурван удаагийн шилжүүлгээр дөрвөн сая ам.долларын хахууль авсан гэмт хэрэгт холбогдсон юм.

НИТХ-ын Тэргүүлэгчдийн өнөөдрийн хуралдаанаар Аюултай хог хаягдлын төвлөрсөн байгууламж барих газрыг сонгон улсын тусгай хэрэгцээнд авах тухай хэлэлцлээ.

Нийслэлийн хэмжээнд жилд 27 мянгаас 54 мянган тонн аюултай хог хаягдал гардаг бөгөөд Хог хаягдлын тухай хуульд зааснаар аюултай хаягдлыг ангилан ялгахаас гадна нарийн хяналттай тээвэрлэж, булж, үйлдвэрийн аргаар устгадаг тул ийм төвлөрсөн байгууламж барих газрыг суурьшлын бүсээс дор хаяж 2-3 км-ын зайд сонгох, тухайн нутаг дэвсгэрийн иргэдэд мэдэгдэж саналыг авах зэрэг ажлыг хийж мэргэжлийн хяналт дор гүйцэтгэдэг байна. Тиймээс газрыг нарийн сонгох ёстойг НИТХ-ын Тэргүүлэгчид дээрх асуудлыг танилцуулсан Нийслэлийн Захирагчийн алба, Тохижолт, хог хаягдлын хэлтсийн удирдлагад сануулж байлаа. НИТХ-ын тэргүүлэгч Н.Батсүмбэрэл, “Иргэд оршин суугчдын эрүүл ахуй, аюулгүй байдлыг хангах учиртай чухал асуудлыг НИТХ-аар оруулж хэлэлцэх гэж байхад гол албан тушаалтан Улаанбаатар хотын ерөнхий менежер нь байлцсангүй. Хууль эрхзүйн талаас энэ асуудлыг хэрхэн шийдэх талаар тайлбарлах хүн байхгүй, асуудалд хариуцлагагүй хандаж байна” хэмээн шүүмжлэлттэй хандаж байв.

Хотын Захирагчийн алба, Тохижилт үйлчилгээний холбогдох мэргэжилтнүүдийн хэлж буйгаар Аюултай хог хаягдлын төвлөрсөн байгууламжийг эхлээд Багахангай болон Багануур дүүргийн нутаг дэвсгэрт барихаар төлөвлөж байсан ч нэгд, малын бэлчээр, нүүрсний орд бүхий газруудад таарахгүй, хоёрт, хол газар аюултай хог хаягдлыг тээвэрлэх боломжгүй гэдгээр Баянзүрх дүүргийн 24 дүгээр хороо буюу Цагаандавааны хогийн цэгийг сонгоод байгаа аж. Гэвч газрын асуудлыг хэлэлцэж байхад Хот төлөвлөлт, ерөнхий төлөвлөгөө, Эрүүл мэндийн болон байгаль орчин, мэргэжлийн хяналт зэрэг нийслэлийн холбогдох газар, албаныхан байхгүй, байгууламжийн талаарх ТЭЗҮ бэлэн бус байгаа учир Аюултай хог хаягдлын төвлөрсөн байгууламжийн асуудлыг НИТХ-ын Тэргүүлэгчдийн дараагийн хурлаар дахин оруулж ирж хэлэлцүүлэхээр буцаав.