Month: January 2019

Хэнтий аймгийн Мэргэжлийн хяналтын газраас шингэрүүлсэн шатдаг хийн аюулгүй зөв хэрэглээг хэвшүүлэх, буруу хэрэглээнээс үүдэн гарах осол, түүнээс урьдчилан сэргийлэх чиглэлээр зөвлөмж гарган иргэдэд хүргэлээ. Хууль тогтоомжийн хэрэгжилтийг хангах, аюулгүй ажиллагааны холбогдох стандарт шаардлагыг мөрдүүлэх зорилгоор 220 граммаар савласан шингэрүүлсэн шатдаг хийг худалдахаар заасан цэгүүдээс өөр газар худалдан борлуулахгүй байх талаарх мэдэгдлийг аймгийн төвийн болон 22 сум суурин газрын аж ахуйн нэгж, худалдааны төвийн худалдагч, менежерүүдэд түгээгээд байна. Түүнчлэн аймгийн төв болон 7 сумын цахилгаан эрчим хүч хэрэглэгч 60 аж ахуй нэгж, 140 иргэн, 13 хүүхдийн тоглоомын талбай, зам талбайн гэрэлтүүлгийн цахилгааны аюулгүй байдлыг хангуулах, илэрсэн зөрчил дутагдлыг арилгуулахаар урьдчилан сэргийлэх хяналт хийж 10 заалт бүхий улсын байцаагчийн зөвлөмжийг хүргүүлсэн ба аймгийн төвийн 23 иргэн, аж ахуйн нэгж, 13 сургууль, цэцэрлэгийн эрхлэгч, дотоод хяналтын ажилтан, албан хаагчдад сургалт, мэдээлэл хийлээ. 2018 онд нийт эрчим хүчний хяналтын чиглэлээр ашиглалт, аюулгүй ажиллагааны шаадлага хангаагүй 93 зөрчил дутагдал илрүүлсэн бөгөөд 34 дутагдлыг газар дээр нь арилгуулж зөрчил гаргагч иргэн аж ахуй нэгж байгууллагад зөрчлийг арилгуулахаар 10 албан шаардлага, 4 зөвлөмж хүргүүлсэн байна. Хяналтын чиглэлээр зөвлөн тусалж, тандан судалж, зөвлөмж, сэрэмжлүүлэг байнга өгч ажилласны дүнд өмнөх оныхтой харьцуулахад зөрчлийн тоо 13.9 хувиар буурсан үзүүлэлттэй байна.

Сар шинэ баяр болох гэж буйтай холбогдуулан шунахайн сэдлээр малын хулгай гэмт хэрэг үйлдэгдэж байна.

СХД-21 дүгээр хороонд “Давааны зөрлөгийн задгайд суух Давааний гадна сэжиг бүхий 4 тооны адуу байсныг цагдаагийн алба хаагчид үүрэг гүйцэтгэж явах хугацаандаа шалгахад, ХУД-12 хороо оршин суух “У”-гийн 4 тооны адууг нэгдүгээр сарын 08-ны өдөр бэлчээр дээрээс Дундговь аймгийн Дэлгэрцогт сумын нутагт оршин суух хаягтай “Г” хулгайлсныг илрүүлэн Сонгинохайрхан дүүрэг дэх цагдаагийн нэгдүгээр хэлтэс шалгаж байна.

Иймд иргэд та бүхэн гарал үүсэлгүй мал худалдан авахгүй байхыг цагдаагийн байгууллагаас зөвлөж байна.

Монголын уламжлалт Сар шинийн баярыг угтаж замын хөдөлгөөний аюулгүй байдал болон олон нийтийн аюулгүй байдлыг хангах, гэмт хэрэг, зөрчлөөс урьдчилан сэргийлэх, таслан зогсоох зорилгоор зохион байгуулж буй “Сар шинэ-2019” нэгдсэн арга хэмжээний хүрээнд Тээврийн цагдаагийн албанаас нийслэл болон орон нутгийн авто замуудад хяналт шалгалтыг эрчимжүүлэн ажиллаж байгаа. Тээврийн цагдаагийн газраас хийж байгаа шалгалтаар өнөөдөр 12 тонн гарал үүслийн гэрчилгээгүй, хулгайн байж болзошгүй мах тээвэрлэн Улаанбаатар хот руу нэвтрүүлэх гэж байсныг илрүүлжээ.

Шалгалтын явцад эдгээр зөрчлүүдээс гадна согтууруулах ундаа хэрэглэсэн үедээ тээврийн хэрэгсэл жолоодсон жолооч нарыг саатуулан, холбогдох хуулийн дагуу арга хэмжээ авлаа. Био комбинат, Шувуун фабрик, Өлзийт хороолол зэрэг Хан-Уул дүүргийн алслагдсан бүх цэгүүдэд шалгалтыг зохион явуулж байгаа юм.

Үндсэн хуулийн 27 жилийн ойн баярт зориулсан улс аймгийн алдар цолтой хүчит 256 бөхийн барилдаанд Улсын харцага О.Хангай түрүүлж, Улсын шинэ залуу аварга Н.Батсуурь үзүүрлэсэн билээ. Энэ хоёр хүчтэний хүч шавхсан, бяр тэнхээ шалгасан барилдаанаас илүү Н.Батсуурь аваргын дөрвийн давааны барилдаан үзэгчдийн хувьд ихэд шүүмжлэл дагуулаад байгаа юм. Учир нь хүчит бөхийн барилдааны дөрвийн даваанд Улсын аварга Н.Батсуурь Өвөрхангай аймгийн арслан Б.Лхагвадоржтой оноолт таарч, араас нь өргөх мэх хийж өргөж давсан. Давах явцад Б.Лхагвадорж арслан биеэ суллаж, шилэн хүзүү буюу ар дагзаараа унасан. Энэ нь бөх сонирхогч түмэнд таалагдаагүй төдийгүй улсын аварга Н.Батсуурийг хэт аархаж барилдсан, ёс зүйгүй, увиагүй үйлдэл гаргасан гэх шүүмжлэлийг дагуулж, улмаар түүнийг заал танхим болон улсын наадамд барилдах эрхийг нь хасах ёстой гэсэн шүүмжлэлийг дагуулаад байна.

Энэ талаар Улсын аварга Н.Батсуурь:“Барилдааны явц, давахад л тийм зүйл болсон. Би санаатай тийм зүйл хийгээгүй. Дүү хүү унахдаа биеэ хэт сулласан юм билээ. Дараа нь зүгээр босоод тахимаа өгсөн. Барилдааны үйл явц, хөндлөнгөөс харах хоёр чинь тэс өөр зүйл. Бэртээж, гэмтээхээр чанга унагаагүй. Аархсан, илүүрхсэн зүйл огт байхгүй. Зөөлөн унагасан. Барилдах, барилдаан үзээд шүүмжлэх хоёр чинь тэс ондоон зүйл. Босоод тахимаа өгөхдөө зүгээр байсан. Шинэ гарч ирж байгаа, ирээдүйтэй залуусын нэг. Юу боллоо гэж түүнийг албаар, тэгж унагах вэ дээ…Ёс зүйгүй үйлдэл гаргасан гэж бодохгүй байна. Би уучлал гуйхгүй. Дүү хүүгийн бие зүгээр байгаа. Тэглээч унагасан бөхөөсөө уучлал гуйгаад явна гэж юу байхав дээ”.

Онцгой байдлын ерөнхий газрын дарга, хошууч генерал Т.Бадрал өнөөдөр тус газрын бүтцийн нэгжийн дарга нарын 2019 оны гүйцэтгэлийн төлөвлөгөөг баталлаа.

Энэ үеэр нийт удирдлагуудад хандан, төрийн албаны тухай хууль тогтоомж, стандарт, ёс зүйн хэм хэмжээг чанд сахих, цэргийн сахилга, ёс зүй, хариуцлагыг албан хэмжээнд өндөржүүлж, Онцгой байдлын байгууллагын хэмжээнд дэвшүүлсэн зорилтыг биелүүлэн ажиллахыг үүрэг болгоод ажлын амжилтыг хүссэн юм.

Онцгой байдлын байгууллага 2019 онд

• Цэргийн албыг хэвшүүлж, алба хаагчдын мэргэжлийн ур чадвар, нийгмийн баталгааг дээшлүүлэх,
• Гамшгаас хамгаалах бодлого, хөтөлбөрийн хэрэгжилтийг хангах гэсэн хоёр зорилтыг дэвшүүлэн ажиллаж байна гэж Онцгой байдлын ерөнхий газраас мэдээллээ.

Монгол Улсын хэмжээнд Булган, Төв, Дундговь зэрэг дөрвөн аймагт гахайн мялзан өвчин илэрч хурдацтайгаар тархаж байгаа тул энэ өвчний аюул хор хөнөөлөөс урьдчилан сэргийлэх зорилгоор Баянхонгор аймгийн онцгой комисс яаралтай хуралдлаа. Тус өвчин илрэхдээ гахайн биеэр нь хөх өнгийн толбо гарах, өндөр халуурах зэрэг шинж тэмдэг анхлан илэрдэг ба гахайнаас гахайнд халдварладаг. Ингэхдээ хүн тээгч болж өвчнийг халдаах боломжтой байдаг байна. Баянхонгор аймгийн хэмжээнд гахайн аж ахуй эрхэлдэг 4 нэгж байдаг байна. Онцгой комиссын хуралдаанаар аймаг орон нутагтруу гахай болон гахайн мах махан бүтээгдэхүүн нэвтрүүлэхгүй байх,

Дэлгүүр үйлчилгээний төвүүд хагас болон түүхий гахайн мах махан бүтээгдэхүүн зүйлсийг худалдаалахыг хориглох,

Гахайн мах, махан бүтээгдэхүүнийг аливаа хоол хүнсний үйлдвэрлэлд ашиглахгүй байх,

Гахайн аж ахуй эрхлэгчдийн үйл ажиллагаанд тавих хяналтыг холбогдох байгууллагууд өндөрсгөж тогтмол шинжилгээ хяналтанд байлгах,

Иргэд гадагш дотогш зорчихдоо гахайн мах махан бүтээгдэхүүн хэрэглэхгүй, худалдан авахгүй байх,

Зэрлэг гахай бүхий бүс нутгийн Засаг дарга нарт зэрлэг гахайтай газар нутагт тандалтыг нарийвчлан явуулж байх онцгой комиссын шийдвэр гарлаа.

Тус шийдвэрийг өнөөдрөөс эхлэн Баянхонгор аймгийн хэмжээнд мөрдүүлж ажиллахыг аймгийн Засаг даргын орлогч Б.Батсуурь холбогдох байгууллагуудын удирдлагууд буюу онцгой комиссын гишүүдэд үүрэг болгов.

Баянзүрх дүүргийн Иргэдийн төлөөлөгчдийн хурлаас дүүргийн 2019 оны газар зохион байгуулалтын төлөвлөгөөний төсөл болон Газрын үнэлгээний зэрэглэл (бүс)-ийн газрын төлбөр тооцох итгэлцүүрийн тоон утга, түүнийг хэрэглэх зааг, хязгаарыг тогтоох тухай асуудлуудаар иргэд, дүүргийн иргэдийн Төлөөлөгчдийн Хурлын Төлөөлөгчид, төрийн болон холбогдох бусад байгууллагуудаас санал авч төлөвлөгөөнд тусгуулахаар нээлттэй хэлэлцүүлгийг өнөөдөр амжилттай зохион байгууллаа.

Тодруулбал дээрх асуудлуудаар дүүргийн Иргэдийн төлөөлөгчдийн хурлаас энэ оны эхэнд ажлын хэсэг байгуулсан бөгөөд ажлын хэсэг дүүргийн 4200 орчим иргэнээс санал авч нэгтгэсэн дүнгээ өнөөдөр танилцуулаа.

Баянзүрх дүүрэг энэхүү салбар болон нэгдсэн хэлэлцүүлгүүдийг үе шаттай зохион байгуулснаар энэ оны газар зохион байгуулалтын төлөвлөгөөнд иргэдийн саналыг тусгаж улмаар ИТХ-аар газар зохион байгуулалтын төлөвлөгөөг батлах юм.