Month: January 2019

УИХ-ын чуулганы нэгдсэн хуралдаанаар ЖДҮХС-гийн зээл олголттой холбоотой асуудлыг шалган судалж, санал боловсруулах, дүнг нэгдсэн хуралдаанд танилцуулах чиг үүрэг бүхий “Түр хороо байгуулах тухай” тогтоолыг хэлэлцэж эхэллээ.

Уг тогтоолыг Н.Номтойбаяр, Н.Амарзаяа, Ж.Бат-Эрдэнэ, Д.Ганболд, Д.Оюунхорол, О.Содбилэг, А.Ундраа гишүүн санаачлан өнгөрсөн оны арваннэгдүгээр сарын 21-нд УИХ-ын даргад өргөн мэдүүлсэн. Нийгмийн зорилтот бүлэг, тэр дундаа жижиг, дунд үйлдвэр эрхлэгчийн үйл ажиллагааг дэмжих зорилгоор уян хатан, хөнгөлөлттэй нөхцөлөөр олгодог ЖДҮХС-гийн зээлээс УИХ, Засгийн газрын гишүүд, төрийн өндөр албан тушаалтнуудын хамаарал бүхий компаниуд их хэмжээний зээл авсан нь нийтэд ил болсон. Тиймээс уг асуудлыг нарийвчлан шалгах, хууль зөрчсөн этгээдүүдэд хариуцлага тооцох, нийтэд үнэн бодит мэдээлэл хүргэх зорилгоор Түр хороо байгуулах тогтоолын төсөл боловсруулснаа Н.Номтойбаяр гишүүн танилууллаа.

Тогтоолын төслийг боловсруулахдаа УИХ-ын Жижиг, дунд үйлдвэрлэлийг дэмжих дэд хорооноос санал аваагүй гэдгийг Ж.Ганбаатар гишүүн дурьдлаа. Мөн уг тогтоолын төслийг УИХ-ын Эдийн засгийн байнгын хороогоор хэлэлцүүлэх шаардлагатай гэдгийг дурьдсан юм.

Харин төсөл санаачлагч Н.Номтойбаяр гишүүн, “ЖДҮХС-тай холбоотой асуудал яригдаад олон сар өнгөрч байхад дэд хороо тодорхой алхам хийсэнгүй. Энэ тогтоолоор байгуулагдсан түр хороо санхүүгийн шалгалт хийх тул зөвхөн Төсвийн байнгын хороогоор хэлэлцүүлсэн” гэсэн тайлбар өглөө.

Мөн үеэр Ж.Батзандан гишүүн тогтоолын төслийг дэмжиж буйгаа илэрхийлээд Түр хороонд ашиг сонирхлын зөрчилгүй гишүүн томилох хэрэгтэй хэмээв.

Ийнхүү 13.00 цаг болсон тул тогтоолын төслийг үдээс хойш буюу 15.00 цагаас үргэлжлүүлэн хэлэлцэхээр шийдвэрлэв.

УИХ-ын чуулганы өнөөдрийн хуралдаанаар Сонгуулийн тухай хуульд өөрчлөлт оруулах тухай хуулийг батлав.

УИХ-ын 42 дугаар тойрогт нөхөн сонгууль товлон зарлах, санал авах өдрийг тогтоох тухай тогтоол нь төрийн албан хаагч нэр дэвших боломжийг хязгаарласан хэмээн Үндсэн хуулийн цэц дүгнэж, хүчингүй болгож, холбогдох хуульд өөрчлөлт оруулахыг УИХ-д уламжилсан юм. Тиймээс дээрх тогтоолтой холбогдож буй Сонгуулийн тухай хуулийг Үндсэн хуульд нийцүүлэх үүднээс өөрчлөлт оруулж буй юм. Тодруулбал, уг хуульд, “Төрийн жинхэнэ албан хаагч болон төрийн үйлчилгээний албаны удирдах албан тушаалтан, төрийн болон орон нутгийн өмчит хуулийн этгээдийн дарга, дэд дарга, захирал, дэд захирал нь Ерөнхийлөгчийн болон УИХ-ын гишүүн, орон нутгийн ИТХ-ын төлөөлөгчийн ээлжит бус сонгуульд нэр дэвших бол тухайн сонгууль болохоос 60 хоногийн өмнө, нөхөн болон дахин сонгуульд нэр дэвших бол тухайн сонгууль болохоос 30 хоногийн өмнө үүрэгт ажлаасаа чөлөөлөгдөх өргөдлөө өгнө” гэсэн өөрчлөлт оруулахаар хуулийн төсөлд тусгасан байна.

Хэлэлцүүлгийн үеэр Т.Аюурсайхан гишүүн, “Сонгуульд нэр дэвшигч үүрэгт ажлаа хүлээлгэн өгөх өргөдлөө өгсөн тохиолдолд заавал чөлөөлөхөөр хуульчлах хэрэгтэй. Өмнө нь сонгуульд өрсөлдөх гээд өргөдөл өгөхөд удирдлагууд нь чөлөөлөөгүй тохиолдол бүртгэгдэж байсан” гэлээ.

Ийнхүү санал хураахад хуралдаанд оролцсон гишүүдийн олонх дэмжиж, батлав.

УИХ-ын Нийгмийн бодлого, боловсрол, соёл, шинжлэх ухааны байнгын хорооны дарга Ё.Баатарбилэг тэргүүтэй төлөөлөгчид 2019 оны нэгдүгээр сарын 14-17-ны өдрүүдэд Камбожийн Хаант Улсын Сиэм Рэп хотноо чуулж буй Ази, Номхон далайн орнуудын парламентын 27 чуулганы “Улс төр, аюулгүй байдал”, “Эдийн засаг ба худалдаа”, “Бүс нутгийн хамтын ажиллагаа” сэдэвт салбар хуралдаануудад оролцов.

Хуралдаанд оролцогчид тус бүсэд болсон хоёр Солонгосын болон АНУ, БНАСАУ-ын удирдагчдын дээд хэмжээний түүхэн уулзалтууд нь Ази төдийгүй дэлхий нийтийн энх тайван, аюулгүй байдалд ихээхэн ач холбогдолтой үйл явдал болсныг дурдаад, Ази, Номхон далайн бүсийн дэлхийн эдийн засагт дарах жин ч мөн жил ирэх тутам нэмэгдсэн хэвээр байгааг онцолсон.

Эерэг үр дүнгийн хажуугаар зөрчил, мөргөлдөөн, терроризм, хар тамхи, хүний наймаа, мөнгө угаах болон үндэстэн дамнасан гэмт хэргүүдээс үүдсэн аюул заналхийлэл ч мөн оршсоор байгааг, эдгээрт даяаршил, мэдээллийн технологи, олон нийтийн мэдээллийн хэрэгслийн тархалт ихээхэн нөлөөлж байгааг анхааруулав. Асуудлыг шийдвэрлэхэд парламентууд салбар хоорондын уялдааг хангасан нэгдсэн, цогц бүсийн хэмжээний төсөл, хөтөлбөр баталж, хэрэгжүүлбэл илүү үр дүнд хүрэх дээр талууд санал нэгдсэн.

Орон нутагт ажлын байр нэмэгдэж, гадаадад цагаачлах явдал буурахад эерэг нөлөөтэй Жижиг, дунд үйлдвэрлэлийн чадавхыг бэхжүүлж, өрсөлдөх чадварыг нь дээшлүүлэх асуудалд парламентууд онцгой анхаарч, холбогдох хууль тогтоомжийг сайжруулахыг мөн зөвлөмжилсөн.

УИХ-ын Нийгмийн бодлого, боловсрол, соёл, шинжлэх ухааны байнгын хорооны дарга Ё.Баатарбилэг Улс төр, аюулгүй байдлын салбар хуралдаанаар хөндсөн цахим аюулгүй байдлын асуудлаар үг хэлсэн. Тэрбээр үгэндээ цахим орчин дахь хүүхдийн аюулгүй байдлын асуудлаар баримталж буй Монгол Улсын бодлого, шинэчлэгдсэн хууль тогтоомж, авч хэрэгжүүлж буй арга хэмжээ, тухайлбал парламентад байгуулагдсан Цахим бодлогын түр хороо, цахим орчны зүй зохистой агуулгыг дэмжих, цахим орчинд хүүхэд хамгааллын асуудлыг тэргүүлэх чиглэл болгох зорилгоор Фэйсбүүк компанитай байгуулсан гэрээ гэх мэтийн талаар онцолж, цаашид хийхээр төлөвлөж буй ажлуудаас мөн танилцуулав.

УИХ-ын чуулганы өнөөдрийн нэгдсэн хуралдаанаар УИХ-ын чуулганы хуралдааны дэгийн тухай, УИХ-ын тухай хуулийн төслийн анхны хэлэлцүүлгийг хийлээ.

Ерөнхийлөгч Х.Баттулгын өргөн мэдүүлсэн уг хуулийн төсөлд “УИХ-ын гишүүдийн олонх УИХ-ын даргыг үүрэгт ажлаас нь чөлөөлөх саналыг албан ёсоор гаргаж, тогтоолын төсөл өргөн мэдүүлснийг чуулганаар баталсан тохиолдолд чөлөөлнө” гэсэн заалт тусгасан байна. Мөн УИХ-ын даргыг үүрэгт ажлаас чөлөөлөх тогтоолыг нэн яаралтай дэгээр хэлэлцэхээр тусгасан байна. Уг хуулийн төслийн анхны хэлэлцүүлгийг УИХ-ын Төрийн байгуулалтын байнгын хороо энэ сарын 11-нд хэлэлцсэн гэдгийг Ж.Батзандан гишүүн чуулганд танилцууллаа.

Хэлэлцэж буй асуудалтай холбогдуулан О.Баасанхүү, Ж.Эрдэнэбат гишүүн асуулт асууж, саналаа хэллээ. Гишүүд уг хуулийн төслийг баталснаар УИХ-ын дархлаа сулрах магадлалтай гэдгийг гишүүд дурьдлаа. Мөн УИХ-ын даргыг огцруулсны дараа энэ хуулийг хүчингүй болгох хэрэгтэй хэмээсэн юм.

Харин Л.Оюун-Эрдэнэ гишүүн өнөөгийн УИХ-ын дарга өөрийн хүсэлтээр үүрэгт ажлаа хүлээлгэн өгөх хүсэлтээ гаргасан бол Ерөнхийлөгчид хууль санаачлах шаардлагагүй байсан гэлээ.

Мөн хуралдааны үеэр хуулийн төсөлтэй холбогдуулан гишүүдийн гаргасан зарчмын зөрүүтэй санал тус бүрээр санал хураалт явуулав. Тухайлбал, Ж.Мөнхбат гишүүний гаргасан “УИХ-ын даргыг нийт гишүүдийн 66 хувь буюу 3/2-ийн саналаар чөлөөлнө” гэсэн заалт оруулах саналыг олонх дэмжсэнгүй.

Ийнхүү хуулийн төслийг эцсийн хэлэлцүүлэгт бэлтгүүлэхээр Төрийн байгуулалтын байнгын хороонд шилжүүлэв. Төрийн байгуулалтын байнгын хороо өнөөдөр 18.00 цагт хуралдаж, уг асуудлыг хэлэлцэхээр товлосон байна.