Month: January 2019

НӨАТ-ын урамшууллын сугалааны ээлжит тохирлыг нэгдүгээр сарын 20-ны ням гарагт “Боловсрол” телевизээр орон даяар шууд дамжуулна. Тиймээс иргэд 2018 оны 12-р сарын 1-31-нд худалдаа хийсэн баримтуудаа энэ сарын 19-ний өдрийн 23 цаг 59 минутаас өмнө буюу өнөөдөр Цахим төлбөрийн баримтын системд бүртгүүлснээр НӨАТ-ын урамшууллын сугалаанд хамрагдан, азтан болох боломжтой. Сугалааны тохирлыг сүүлийн орноос эхлэн тодруулж, иргэн таны баримтын сүүлийн найман орон тохирсон бол 50 сая төгрөг, долоон орон тохирсон бол 10 сая, зургаан орон тохирсон тохиолдолд 5 сая төгрөг, таван орон тохирсон бол нэг сая, дөрвөн орон тохирвол 200 мянга, гурван орон тохирвол 50 мянган төгрөг хожих юм. Супер азтан өмнөх тохиролд тодроогүй учир 25 сая төгрөг нэмэгдэж, нийтдээ 225 сая төгрөг хожих боломжтой болсон байна.

Нийслэлийн цэргийн бүртгэлийн ажлыг энэ сарын 4-21-ний өдрүүдэд засаг захиргааны анхан шатны нэгж буюу хороодын байранд зохион байгуулж байна. Цэргийн бүртгэлд 65 нас хүртэл Бэлтгэл офицерууд, 18-50 нас хүртэл цэргийн үүрэгтэн, 50 нас хүртэл цэрэгт бүртгэлтэй мэргэжил бүхий эмэгтэйчүүд хамрагддаг. Нийслэлийн хэмжээнд энэ сарын 17-ны өдрийн байдлаар цэргийн бүртгэлд бүртгүүлэх ёстой нийт иргэдийн 71.2 хувь нь хамрагдаад байгаа аж. Цэргийн бүртгэл дуусахад хоёр хоног үлдээд байна. Тиймээс иргэдийг идэвхитэй бүртгэлдээ хамрагдахыг уриалж байна. Хэрэв цэргийн бүртгэлд бүртгүүлээгүй тохиолдолд Зөрчлийн тухай хуульд зааснаар 100 нэгжээр торгох заалттай. Мөн байгууллага, ААН-үүд иргэнийг цэргийн бүртгэлдээ бүртгүүлэхэд саад учруулсан нь тогтоогдвол 1 сая төгрөгөөр торгох заалттай аж.

Монгол болон Солонгосын хооронд агаарын тээврийн үйлчилгээг 28 жилийн турш Монголын талаас МИАТ, БНСУ-ын талаас “Кореан эйр” гэсэн хоёрхон компани үзүүлж ирсэн. Тэгвэл 1991 оноос хойш үргэлжилсэн хоёр компанийн монопольчлол дуусч, Улаанбаатар-Сөүлийн чиглэлд иргэний агаарын тээврийн үйлчилгээ үзүүлдэг өөр компаниудыг оруулахаар болжээ. БНСУ-ын Газрын баялаг, дэд бүтэц, тээврийн яам, Монгол Улсын Агаарын тээвэр, бодлогын хэрэгжилтийг зохицуулах газрын төлөөлөгчид энэ сарын 16, 17-нд Сөүл хотноо уулзалт хэлэлцээ хийсэн бөгөөд Сөүл-Улаанбаатар, Улаанбаатар-Сөүлийн чиглэлд нислэгийн тоог нэмэгдүүлэхийг БНСУ-ын тал зөвшөөрсөн байна. Ингэснээр нислэгийн тоо 50 хувиар нэмэгдэж, өмнө нь долоо хоногт зургаан удаа нисдэг байсан бол есөн удаа нисдэг болох боломж бүрджээ. Ингэснээр хоёр улсын хооронд зорчих зорчигчийн суудлын тоо 1448-аар нэмэгдэх аж. Хэлэлцээрийн хамгийн гол үр дүн нь хоёр талаас МИАТ, “Кореан эйр” гэсэн хоёрхон компани нислэг үйлддэг байсныг болиулж, өөр хоёр авиа компанийг оруулж ирэхээр тохиролцсон явдал байв.

БНСУ-ын тал нэмэлт нислэг үйлдэх бэлтгэлийг ирэх сараас хангаж, зуны нислэгийн хуваарьт шилжих гуравдугаар сарын 31-ний өдрөөс хэрэгжүүлэхээр төлөвлөж байгаа гэж “Ёнхап” агентлаг мэдээлжээ.

Цагдаагийн ерөнхий газар, Нийслэлийн Цагдаагийн газар, Улаанбаатар хотын замын хөдөлгөөний удирдлагын төв, NEST ETT ХХК-тай хамтран хулгайлах гэмт хэрэг, зөрчлөөс урьдчилан сэргийлэх, илрүүлэх, таслан зогсоох, гаралтыг нь бууруулахад иргэд, аж ахуйн нэгж байгууллагын идэвх санаачлагыг дэмжих, техник, технологийн мэдлэгийг нь дээшлүүлэх зорилгоор “SECURITY EXPO-2019” өдөрлөгийг өчигдөр Буянт-Ухаа Спорт цогцолборт зохион байгууллаа.

Өдөрлөгийн үеэр олон нийтэд харилцаа холбоо, мэдээллийн технологийн хамгийн сүүлийн үеийн дэвшил, гэрээт харуул хамгаалалтын ололт амжилтыг бодитойгоор таниулан сурталчлах, дотоод, гадаадын хөрөнгө оруулагч иргэд, аж ахуйн нэгж байгууллагуудын хоорондын уялдаа холбоог сайжруулах олон арга хэмжээ зохион байгуулагдана. Энэхүү өдөрлөгт төрийн болон хувийн хэвшлийн 30 гаруй байгууллагууд оролцож, техник технологийн дэвшил, шинэ бүтээгдэхүүн, үйлчилгээг олон нийтэд танилцуулав.

Боловсрол, соёл, шинжлэх ухаан, спортын яамнаас Үндэсний их баяр наадмын соёл, урлагийн арга хэмжээг зохион байгуулах зорилгоор төслийн багтай гэрээ байгуулах гэж байна. Иймээс сонирхол бүхий хуулийн этгээд саналаа ирүүлэхийг урьжээ. Үүнд:

• Хүндэтгэлийн концерт -2019 оны 07 дугаар сарын 10-ны өдөр 2 удаа соёлын төв өргөөнд зохион байгуулагдах;
• Баяр наадмын нээлтийн үдшийн цэнгүүн -2019 оны 07 дугаар сарын 10-ны өдрийн үдэш цэнгэлдэх хүрээлэнд зохион байгуулах;
• Наадмын төрийн ёслол хүндэтгэлийн арга хэмжээний соёл урлагийн тоглолт -2019 оны 07 дугаар сарын 11-ний өдрийн нээлт, 2019 оны 07 дугаар сарын 12-ны өдрийн наадмын хаалт төв цэнгэлдэх хүрээлэнд зохион байгуулагдах;

Саналаа ирүүлж буй төслийн баг уг арга хэмжээг гүйцэтгэх чадвартайг нотлох мэдээллийг ирүүлэх бөгөөд төслийн бичиг баримт болон нэмэлт мэдээллийг ЗГХА, Соёл, урлагийн газрын 51-264946 утас болон www.culture.gov.mn сайтаас лавлах боломжтой.