Month: January 2019

Өглөө бүр тантай хамт байдаг “Өдрийн сонин”-ы мягмар гаригийн дугаар 16 нүүрээр хэвлэгдэж, та бүхний гар дээр хүрч байна.

“Өдрийн сонин”-ы нийтлэлийн бодлогыг тодорхойлогч, ард түмний дуу хоолой болдог, баримт, үзэл бодлын гуравдугаар нүүрт “Монголын хамгийн дулаан “арал” Ханбогдод хот байгуулцгаая” хэмээн өгүүлжээ.

УИХ-ын гишүүн Ж.Бат-Эрдэнэ: Би Т.Аюурсайханд “Наад залуучуудаа зогсоо. Битгий давруулаад бай” гэж хэлсэн хэмээн “Улс төр” нүүрт ярив.

Гандантэгчинлэн хийдийн тэргүүн их хамба Д.Чойжамц: Гарч буй Шороон гахай жил бороо хур элбэгтэй, нялхас, хөгшдөд ээлтэй байна хэмээн “Хүмүүс” нүүрт ярилаа.

Монгол Улсын хөдөлмөрийн баатар Бавуугийн Лхагвасүрэн: Монгол гэдэг чинь дэлхийн ухааны их сав, тэнгэрийн хамгаалалттай ард түмэн хэмээн “Ардын цолтон” нүүрт ярив.

УИХ-ын гишүүн Л.Оюун-Эрдэнэ: Миний бланк дээр гарын үсэг цуглуулна хэмээн “Улс төр” нүүрт ярив.

С.Мөнхчулуун: Бид утаа, түгжрэл, ажлын байрыг бий болгох асуудлуудад түлхүү анхаарах ёстой хэмээн “Улс төр” нүүрт ярилаа.

М.Энхболдыг огцруулахаар жагссан иргэдийн жагсаалын гэрүүдээс хийсэн сурвалжлага

“Дөрвөн сая долларын талаар Д.Дорлигжавын ярьсан нь нотлогдоод эхэллээ” хэмээн “Баримт” нүүрт өгүүлжээ.

“Шилэн хийц” компани олон улсын хоёр стандарт нэвтрүүллээ хэмээн “Энэ тухай” нүүрт бичжээ.

“Улаанбаатар дулааны сүлжээ” ТӨХК-ийн гүйцэтгэх захирал асан Д.Бямба-Очир хувьдаа 87 байртай нь үнэн үү хэмээн “Баримт, үйл явдал” нүүрт өгүүлжээ.

Монгол Улсын гавьяат багш, зөвлөх агрономич, доктор А.Чойжамц: Монголын хөрс бордоогүй учраас эко ургац авдаг гэдэг нь худлаа хэмээн “Нийгэм” нүүрт ярив.

Анагаах ухааны магистр, клиникийн профессор З.Цэвэгмид: Хөвч таслах мэс ажилбарт ороогүй бол эхнэр нь умайн хүзүүний хорт хавдраар өвчлөх магадлал өндөр хэмээн “Эмч” нүүрт ярьсан байна.

“Давосын 49 дэх чуулган өнөөдөр эхэлнэ” хэмээн “Дэлхийн мэдээ” нүүрт бичив.

“Супер хүүхэдтэй болох хүсэлтэй аав, ээжүүдэд” хэмээн “Энэ өдөр” нүүрт өгүүлэв.

Дэлгэрэнгүй мэдээллүүдийг уншихыг хүсвэл дараах линкээр бүртгүүлж уншина уу. https://admin.dnn.mn/plugins/news/login/

Эдгээр болон бусад цаг үеийн мэдээ мэдээлэл, ярилцлага, сурвалжлагыг “Өдрийн сонин”-ы мягмар гаригийн дугаараас уншаарай.

Эрхэм уншигч та, манай сонины өнөөдрийн дугаарыг “Монгол шуудан” компанийн нийслэл Улаанбаатар дахь 35 салбар, “Түгээмэл” шуудангийн салбаруудаас болон сонин борлуулах цэгүүд, Хэвлэлийн биржээс худалдан авах боломжтой. Мөн “Мөнгөн завъяа” дахь сонин борлуулах цэг, Сансрын үйлчилгээний төв дэх сонин борлуулах цэг, Хан-Уул дүүргийн 19 дүгээр хорооллын үйлчилгээний төвд байрлах сонин борлуулах цэг, Саппорогийн “Миний дэлгүүр” дэх сонин борлуулах гол гол цэгүүдээс худалдан авч болохыг дуулгая. Түүнчлэн “Өдрийн сонин”-ы өөрийн байранд ирж худалдан авч болно.

Уншигч та “Өдрийн сонин”-ыг захиалан уншихыг хүсвэл9911-2954, 8811-1375 дугаарт холбогдоно уу. Цахим хэлбэрээр нь захиалахыг хүсвэл 88085029 дугаарт холбогдож дэлгэрэнгүй мэдээллийг аваарай.

“Өдрийн сонин”-той холбоотой мэдээ мэдээллийг 19001987-гоос лавлана уу.

“ӨДРИЙН СОНИН” ӨГЛӨӨ БҮХЭН ТАНТАЙ ХАМТ

Зуун айл дахь төвлөрсөн барилгын материалын зах, худалдааны төвийг үе шаттай нүүлгэн шилжүүлэх ажлыг зохион байгуулах Ажлын хэсэг өнөөдөр (2019.01.21-ний өдөр) хуралдаж, тухайн хэсгийн авто замын болон Налайх дахь Барилгын материалын үйлдвэрлэл, технологийн паркийн бүтээн байгуулалтын талаарх мэдээллийг сонсов. Нийслэлийн Авто замын хөгжлийн газрын орлогч дарга Б.Индра Зуун айлын уулзвараас 32-ын тойрог хүртэлх 1.6 км авто замын бүтээн байгуулалтын ажлыг ирэх тавдугаар сараас эхлүүлж, долдугаар сард дуусгана гэв. Нийтдээ 3.4 тэрбум төгрөгийн өртгөөр барих II зэрэглэлийн эл замыг ашиглалтад оруулснаар орчны тохижилт болон авто замын техник ашиглалтын түвшин сайжирч, нэвтрүүлэх чадвар нэмэгдэх юм.

Дашрамд дурдахад, нийслэлийн арван цэгт авто замын огтлолцол салгах гүүр барихаар төлөвлөснөөс хоёрыг нь Зуун айл орчимд барих гэнэ. Зуун айлын барилгын материалын захыг нүүлгэх болсонтой холбогдуулан Налайх дүүргийн Барилгын материалын үйлдвэрлэл, технологийн паркийн бүтээн байгуулалтад шаардлагатай санхүүжилтийг хотын төсвөөс үе шаттай шийдвэрлэж буй. Ажлын хэсгийн хурлын үеэр тус паркынхан өнгөрсөн намар эхлүүлсэн авто замын бүтээн байгуулалтын бэлтгэл 80 хувьд хүрснийг мэдээлэв. Чойрын замаас эл парк хүртэлх авто замыг ирэх намар ашиглалтад оруулахаар ажиллаж байгаа гэнэ. Өдгөө тэнд хоёр үйлдвэр үйл ажиллагаагаа явуулж байгаа аж. Энэ онд паркын цахилгаан хангамжийн дэд бүтцийг сайжруулж, хоёр хэлхээ агаарын шугам, дэд станц барих юм байна.

Ийнхүү барилгын материалын худалдааг хотын төвөөс гаргаж, парк руу нүүлгэх ажлыг эрчимжүүлж буй ч зарим аж ахуйн нэгж өөрсдийн эрх ашгийг урьтал болгож, ажил гацааж буй талаар Гэр хорооллын дэд бүтцийн газрын Хяналт, шинжилгээ, үнэлгээний хэлтсийн дарга Т.Алтантөгс хэллээ. Зуун айл орчмын тохижилтыг сайжруулж, дахин төлөвлөлтийн төсөл хэрэгжүүлэн орон сууцны хороолол болгохоор Улаанбаатар хотын ерөнхий төлөвлөгөөнд тусгасан.

Дахин төлөвлөлийн төслийн хүрээнд яндангийн тоог цөөрөөлж, орон сууцны хэд хэдэн барилга ашиглалтад оруулаад байгаа билээ. Гэвч зарим иргэн гэр бүлийн хэрэгцээний зориулалт бүхий газарт дур мэдэн барилга барьж, үйлдвэрлэл эрхэлж байгаа гэнэ. Өөрөөр хэлбэл, арван айлын газарт орон сууц барьж, агаарын бохирдлыг бууруулж байгаа боловч нэр бүхий аж ахуйн нэгжүүд түүнээс хэд дахин их утаа “үйлдвэрлэх” халаалтын зуух нэмж байна гэсэн үг. Тиймээс Зуун айл дахь төвлөрсөн барилгын материалын зах, худалдааны төвийг үе шаттай нүүлгэн шилжүүлэх ажлыг зохион байгуулах Ажлын хэсгийн ахлагч, нийслэлийн ИТХ-ын төлөөлөгч Ч.Гантулга холбогдох албаныханд тэдгээр үйлдвэрийн үйл ажиллагааг даруй зогсоохыг үүрэг болгов. Мөн Зуун айлд байнгын ажиллагаатай цэг байгуулж, барилгын захыг нүүлгэн шилжүүлэх ажлын явц, үр дүн, авто замын болон Налайхын паркийн бүтээн байгуулалт болон тухайн хэсгийн дахин төлөвлөлтийн талаарх мэдээллийг иргэдэд нээлттэй хүргэж байхыг үүрэгдлээ. Үүнээс гадна сар шинийн баяраас өмнө Ажлын хэсгийнхнийг худалдаа эрхлэгчидтэй уулзах үүрэг өгсөн юм.

ОБЕГ-ын дарга, хошууч генерал Т.Бадралаар ахлуулсан ажлын хэсэг өнгөрсөн амралтын өдрүүдэд Баян-Өлгий, Увс аймагт ажилллаж, өвөлжилтийн нөхцөл байдал болоод Онцгой байдлын газруудын үйл ажиллагаатай танилцлаа.

Баян-Өлгий аймгийн хувьд Засгийн газрын 2018 оны 218 дугаар тогтоолоор аймаг, сумдын аюулгүйн нөөцөд 392,0 тн өвс, 127,6 тн тэжээлийг бэлтгэсэн. Аймгийн ихэнх нутгаар цас орж, хүйтний эрч чангарсны улмаас Алтай, Алтанцөгц, Баяннуур, Булган, Дэлүүн, Толбо Сагсай, Улаанхус, Цэнгэл сумдад өвөлжилт хүндрээд байгаа аж. Энэ үеэр хошууч генерал Т.Бадрал, Энэ оноос эхлэн аймаг, орон нутгийн хэмжээнд өвс, тэжээлээ бэлтгэнэ. Тийм учраас 2019-2020 онд өвөлжилтийн нөхцөл, байдлыг сайтар хангаж, өвс, тэжээлийн нөөцөө сайтар бэлтгэхийг анхаарууллаа.

Баян-Өлгий аймагт ажиллах үеэрээ тус аймгийн Цэнгэл сумын Гал түймэр унтраах, аврах 71 дүгээр анги, Дэлүүн сумын Эрэн хайх, аврах бүлгийн барилгын явцтай танилцаж, шуурхайн албанд ашиглагдах автомашиныг шийдвэрлэж өгөхөөр боллоо.

Засгийн газрын 2018 оны 114 дүгээр тогтоолоор байгуулагдаж буй Дэлүүн сумын Эрэн хайх, аврах бүлгийн байрыг орон, нутгийн зүгээс шийдвэрлэн, өмнө нь хүн эмнэлэгийн эхчүүдийн амрах байрны зориулалтаар ашиглаж байсан байрт засвар хийж, энэ онд багтаан үйл ажиллагааг нь эхлүүлэхээр ажиллаж байна. Дэлүүн сум нь аймгийн Алтай, Толбо, Булган сумдуудтай, Ховд аймгийн Ховд, Дуут сумдууд болон баруун талаараа БНХАУ-тай хиллэдэг томоохон сум юм.

Харин Увс аймгийн хувьд аймгийн аюулгүйн нөөцөнд 40 тонн өвс, 87.5 тонн тэжээл, сумуудын аюулгүйн нөөцөнд 670,9 тонн өвс, 246,7 тонн тэжээлийг тус тус бэлтгээд байна. Өнөөдрийн байдлаар аймгийн 80 орчим хувьд цасан бүрхүүлтэй. Цас ихтэй нутгуудаар мал бэлчээрлэхэд хүндрэлтэй, нутгийн баруун хэсгээр цас багатай ч малын идэш тэжээл муу өвөлжилт, хаваржилт хүндрэх төлөвтэй байна.

Харин Увс аймгийн Онцгой байдлын газар нь 2018 онд дэвшүүлсэн гурван зорилтын хүрээнд хоёр үндсэн зорилт, 104 хэрэгжүүлэх арга хэмжээг төлөвлөн хэрэгжүүлэн ажилласан. Алба хаагчдыг сургаж хөгжүүлэх, алдар гавьяаг нь мөнхжүүлэх зорилгоор “Ахлагчийн зөвлөл” -ийг байгуулахын зэрэгцээ алба сурталчлах түүхэн музейтэй болоод байна гэж Онцгой байдлын ерөнхий газраас мэдээллээ.

Хавдар судлалын үндэсний төвийн мэдээгээр Монгол Улсад умайн хүзүүний хорт хавдрын өвчлөл тасралтгүй нэмэгдэх хандлагатай байгаа талаар мэдээлэв. Умайн хүзүүний хорт хавдар эмэгтэйчүүдэд зонхилон тохиолдох хавдрын хоёрдугаарт, нийт хорт хавдрын шинэ тохиолдлоор гуравдугаарт эрэмбэлэгдэж байна. Иймд умайн хүзүүний хорт хавдраас урьдчилан сэргийлэхийн тулд эсийн шинжилгээндээ хамрагдахыг эрүүл мэндийн байгууллагууд уриалжээ. 2019 онд умайн хүзүүний эсийн шинжилгээний урьдчилан сэргийлэх үзлэгт дараах насны хүмүүс хамрагдах юм. Тиймээс харьяа өрх, дүүргийнхээ эмнэлэгт шинжилгээнд хамрагдаарай.

Нийслэлийн удирдах ажилтны шуурхай хуралдаанд дүүргүүд хийж хэрэгжүүлсэн ажил болон цаг үеийн асуудлаар мэдээлэл хийдэг билээ. Өнөөдрийн хуралдаан Хан-Уул дүүргийн Засаг дарга Ж.Алдаржавхлан мэдээлэл хийлээ.

Тэрбээр танилцуулгынхаа эхэнд дүүргийнхээ хүн амын өсөлтийг тоон дүнгээр танилцууллаа. Тус дүүргийн хүн ам өнгөрсөн онд 9 мянгаар, өрхийн тоо 2 мянгаар нэмэгдсэн бол ерөнхий боловсролын сургууль 2, цэцэрлэг 6 шинээр ашиглалтад орсон байна. Өнгөрсөн онд “Эко дүүрэг” болох зорилт тавьсан тэдний ажлыг ДИТХ-аас “Бүрэн хангалттай” хэмээн дүгнэжээ. Дүүргийн нэгдүгээр хороонд 1600 ам метр талбайг цэцэрлэгжүүлж, усалгааны систем байрлуулсан байна. Мөн 13 дугаар хороонд “Янгирт” цэцэрлэгт хүрээлэн байгуулж, усан оргилуур шинээр байгуулан 3600 ам метр талбайд ногоон байгууламж зүлэгжүүлэлт хийж, 10 төрлийн 65 ширхэг амьтны баримал хийж байршуулжээ. Энэ онд 4 байршил цэцэрлэгт хүрээлэн байгуулахаар төлөвлөсөн байна.

Дүүрэгт шинээр 434 гэрэлтүүлэг, 1052 ширхэг камер суурилуулсан байна. Мөн хог хаягдал ангилан ялгах ажлыг санаачлан УБ хотын ЗАА-ны дэмжлэгтэйгээр хэрэгжүүлж үр дүнд хүрээд байгаа аж. Эхний шат буюу сургууль цэцэрлэгүүд хог хаягдлаа ангилан ялгаж хэвшсэн байна. Одоо удаах шат буюу дүүргийн аж ахуйн нэгжүүдэд хэрэгжүүлж эхлээд байгаа аж.

Хан-Уул дүүрэг төрийн үйлчилгээ сайжруулах ажлын хүрээнд “CALL CENTER” буюу дуудлага мэдээллийн 77771965 утас ажиллуулжээ. Өнгөрсөн онд 16 мянган дуудлага хүлээн авч хариу өгсөн байна.

Хан-Уул дүүргийн Засаг дарга Ж.Алдаржавхлан өнгөрсөн онд хэрэгжүүлсэн томоохон бүтээн байгуулалтын ажлаа танилцуулснаас гадна шийдвэрлүүлэх ажлаа танилцуулсан юм. Тус дүүрэгт хүн амын тоо, нягтаршил, байршил, газарзүйн зохион байгуулалт зэрэгтэй уялдуулан хороо хуваах, шинэчлэн зохион байгуулах шаардлагтай байгаа аж. Дүүргийн иргэдийн Төлөөлөгчдийн Хурлаас энэхүү саналыг дэмжсэн байна гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

Нийслэлийн удирдах ажилтны ээлжит шуурхай зөвлөгөөн өнөөдөр боллоо. Хуралдааны эхэнд нийслэлийн Засаг даргын үүргийг түр орлон гүйцэтгэгч Ж.Батбаясгалан холбогдох байгууллагын удирдлагуудад гахайн мялзан өвчин гарсантай холбогдуулан хэрхэн ажилласан болон өнгөрсөн 14 хоногийн хугацаанд хийж хэрэгжүүлсэн ажлаа танилцуул гэв.

Нийслэлийн онцгой байдлын газрын дарга, хурандаа Ж.Чүлтэмсүрэн “Ойрын өдрүүдэд агаарын температур шөнөдөө 18-21, өдөртөө 6-9 хэм хүйтэн, салхины хурд 06-08 м/с байх төлөвтэй байна. Улсын мал эмнэлэг ариун цэврийн төв лабораторийн шинжилгээний хариугаар гахайн африк мялзан өвчин илэрсэн нь анх удаа Монгол Улсад бүртгэгдлээ. Улсын Онцгой комисс 1 удаа, Улсын Онцгой комиссын ажлын хэсэг 1 удаа, Нийслэлийн Онцгой комисс 1 удаа, Улаанбаатар хотын Ерөнхий менежер, Захирагчийн ажлын албаны даргаар ахлуулсан ажлыг хэсэг 10 удаа тус тус хуралдаж, хурлаас гарсан шийдвэрүүдийг хэрэгжүүлэх ажлыг зохион байгуулан ажиллалаа. Холбогдох байгууллагуудтай хийсэн хяналт шалгалтад нийт 775 иргэн, аж ахуйн нэгж, байгууллага хамрагдсан. Гахайн африкийн мялзан өвчин илэрч, үхсэн болон сэжигтэй гахай болон гахайн махыг зохих зааврын дагуу устгаж, ариутгал халдваргүйжүүлэлт хийсэн” гэж танилцууллаа.

Цагдаагийн ерөнхий газрын дэд дарга бөгөөд Нийслэлийн цагдаагийн газрын дарга, цагдаагийн хурандаа Д.Ядамдорж “Өнгөрсөн 14 хоногийн хугацаанд гэмт хэрэг, зөрчил, зам тээврийн ослын шинжтэй 20685 дуудлага, мэдээлэл хүлээн авсан нь өмнөх 14 хоногтой харьцуулахад 19 хувиар буурсан үзүүлэлттэй байна” гэсэн бол Тээврийн цагдаагийн албаны Замын цагдаагийн газрын дарга, Цагдаагийн хурандаа Д.Дашдорж “Сар шинийн баяртай холбоотой томоохон зах, худалдааны төвийг чиглэсэн замын хөдөлгөөн эрс нэмэгдэж байгаа. Тээврийн цагдаагийн албаны алба хаагчид уртгасан цагаар үүргээ гүйцэтгэж байна” хэмээн танилцуулав.

“Манай газраас сар шинийн баяр болохтой холбогдуулан хийсэн хяналт шалгалтаар нийт 1062 иргэн, аж ахуй нэгжийг хамруулж, 515 зөрчил илрүүлснээс 283 нь газар дээр нь арилгуулж, илэрсэн зөрчлийн дагуу 71 зөрчлийн хэрэг үүсгэж 41.8 сая төгрөгийн торгууль шийтгэвэрийг ногдуулаад байна. Иргэд маань аливаа бүтээгдэхүүний гарал үүслийн гэрчилгээ болон хугацааг сайтар нягталж, баталгаатай хүнсний бүтээгдэхүүн авч хэрэглэхэд анхаарах хэрэгтэй байна. Өнгөрсөн хоногуудад Налайх дүүрэгт ноцтой осол гарч хүний амь эрсэдлээ. Иргэд амь бие, эрүүл мэндээ үл хайхран цооногт ажиллаж байна. Дүүргийн удирдлагууд энэ асуудалд онцгой анхаарал хандуулан ажиллах шаардлагатай байна” хэмээн Нийслэлийн Мэргэжлийн хяналтын газрын дарга Л.Эрдэнэчулуун ярилаа.

Зөвлөгөөний төгсгөлд Нийслэлийн Засаг даргын үүргийг түр орлон гүйцэтгэгч Ж.Батбаясгалан “Сар шинийн баяр болж буйтай холбогдуулан Нийслэлийн иргэдийн амгалан тайван байдлыг хангах, хулгайн болон бусад гэмт хэрэг зөрчлөөс урьдчилан сэргийлэх, хэв журмыг сахиулж ажиллах, Замын хөдөлгөөний аюулгүй байдлыг хангаж, замын хөдөлгөөний ачаалал ихтэй уулзваруудад зохицуулагч ажиллуулах, Нийслэлийн иргэд, аж ахуйн нэгж, байгууллагуудад гал түймрийн аюул болон техникийн холбогдолтой осол гэмтлээс урьдчилан сэргийлэх, Томоохон захуудад болон худалдааны төвүүдэд хүнсний аюулгүй байдлыг хангаж, хяналт тавьж ажиллах, Инженерийн шугам сүлжээний хэвийн, найдвартай ажиллагааг хангаж, ус, дулаан, цахилгаан хангамжаар байгууллага, иргэдийг тасалдуулахгүй, гэнэтийн гэмтэл, саатал гарахаас урьдчилан сэргийлэх. Шуурхай ажиллагааны бригад, жижүүрийн хуваарийг гарган, хяналт тавьж, болзошгүй осол, аливаа эрсдэлээс урьдчилан сэргийлэх, Баярын өдрүүдэд бага насны хүүхдийн эрүүл мэндэд онцгой анхаарч, ханиад томуу болон агаар дуслын замаар халдварладаг өвчнүүдээс урьдчилан сэргийлэх арга хэмжээ шуурхай зохион байгуулж ажиллах, 2019 онд Төсвийн ерөнхийлөн захирагч, төсвийн шууд захирагчтай байгуулах Гүйцэтгэл, төлөвлөгөөний гэрээний бэлтгэл ажлыг хангах, Нийтийн эзэмшлийн гудамж, зам талбайн гэрэлтүүлэгийн асалт болон хайс хашлагыг эвдэж гэмтээсэн тухай, нийтийн эзэмшлийн гудамж, зам талбайн өнгө үзэмжинд сөргөөр нөлөөлж байгаа асуудлууд, цаашид хэрэгжүүлэх арга хэмжээний саналыг боловсруулан Нийслэлийн Засаг даргын Зөвлөлийн хуралд танилцуулах”-ыг холбогдох албан тушаалтнуудад үүрэг болгов гэж НЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Амралтын өдрүүдэд Тээврийн цагдаагийн албаны Жижүүрийн шуурхай удирдлагын хэлтэс нийт 460 дуудлага, мэдээ мэдээлэл хүлээн авснаас зам тээврийн ослын шинжтэй 326 дуудлагыг хүлээн авч шалгажээ. Бүртгэгдсэн зам тээврийн ослын улмаас орон нутагт 2 хүний амь нас хохирч, нийслэлд 14 хүн бэртэл гэмтэл авсан ба эдгээрийг хэлбэрээр нь авч үзвэл явган зорчигч мөргөж гэмтээсэн осол 7, мөргөлдөх хэлбэрээр 10, онхолдох хэлбэрээр 1 осол тус тус бүртгэгдсэнийг шалгаж байна. Нийт гэмтсэн хүний 3 нь бага насны хүүхэд байсан бөгөөд 2 нь явган зорчигч хэлбэрээр хөдөлгөөнд оролцож байх үедээ осолд өртжээ. Мөн цагдаагийн байгууллагаас гудамж замд хийсэн хяналт шалгалтаар согтуугаар тээврийн хэрэгсэл жолоодсон 72 зөрчлийг илрүүлэн саатуулж ажилласан ба “Сар шинэ” арга хэмжээний хүрээнд 7 гэмт хэргийг илрүүлжээ.

Эх сурвалж: Тээврийн цагдаагийн алба