Month: January 2019

Халамжийн мөнгө авах гэсэн иргэдийн дарааллын талаар Төрийн банкнаас тайлбар гаргажээ.

Уг тайлбарт “2019 оны 1 дүгээр сарын Нийгмийн халамжийн санхүүжилт Төрийн банкинд орж ирээгүйгээс үүдэн салбар нэгжүүдэд халамжийн мөнгө хүлээсэн иргэд дараалал үүсгэж байна. Дээрх үүссэн нөхцөл байдал нь Төрийн банкнаас шалтгаалаагүй бөгөөд санхүүжилт орж ирсэн даруй иргэдийн халамжийн мөнгийг олгоход бэлэн байна. Мөн Капитал банк болон бусад банк халамжийн мөнгө олгохоос татгалзаж байгаа тул нийгмийн халамжийн санхүүжилтийг иргэдэд хүргэх үйлчилгээг Төрийн банк дангаараа үзүүлж байгаа нь ачаалал эрс нэмэгдэх шалтгаан болж байна. Иргэд та бүхнийг банкны салбарт удаан хүлээлгэхгүй байх зорилгоор Төрийн банкны www.statebank.mn цахим хуудас болон ЭНЭХҮҮ фэйсбүүк хуудас, Гялсбанкны аппликэйшнаар дамжуулан аль дүүрэгт, ямар төрлийн халамж орсон талаарх мэдээллийг тухай бүр нь хүргэж байх тул та бүхэн зөвөөр ойлгож соёлтой үйлчлүүлнэ үү” гэсэн байна.

Хоёр аймагт H1N1 вирусын халдварын улмаас өвчин нь хүндэрч хүн нас барсан тухай мэдээлэл гарсан.

Тэгвэл томуу, томуу төст өвчин нь одоогийн байдлаар нийт 10 аймагт халдвар өндөр байгаа юм байна. Үүнтэй холбоотойгоор сурагчдын амралтыг түр хугацаагаар хойшлуулах шийдвэр гаргаад байна. Боловсролын газраас салбарын сайдад хүсэлт илгээсний дагуу сургууль, цэцэрлэгүүд түр хугацаагаар амарсан. Тэдгээрт ажилладаг эмч нарыг Эрүүл мэндийн байгууллагуудад дайчлан ажиллуулж байгаа аж. Нөгөө талаас улсын хэмжээнд 10 аймгийн Боловсролын хэлтэс, Засаг даргаас ирүүлсэн хүсэлтийн дагуу энэ сарын 21-нд хичээллэж эхлэх байсан орон нутгийн сурагчдын амралтыг хоёрдугаар сарын 4-н хүртэл ийнхүү сунгалаа. Харин энэ хугацаанд хүүхдийн сурлагын хоцрогдлыг нөхөх үүргийг аймгийн Боловсролын хэлтсүүд хариуцах юм байна. БСШУСЯ-ны Ерөнхий боловсролын бодлогын газрын дарга Т.Ням-Очир “Тухайн аймгийн мэргэжлийн арга зүйч нар арга зүйгээр хангана. Ингэснээр энэ агуулгыг ингэж нөхнө, бие даалтаар хийнэ гээд бүхий л нарийвчилсан заавар, зөвлөгөө өгнө. Уг ажлыг ерөнхий боловсролын сургуулийн удирдлагууд гардан зохион байгуулна” гэв.

Баянзүрх дүүргийн Засаг даргын Тамгын газраас Сар шинийн баярыг угтан дүүргийн хэмжээнд бүх нийтийн их цэвэрлэгээг зохион байгуулах гэж байна. Тус цэвэрлэгээг 2019 оны 01 дүгээр сарын 26,27-ны өдрүүдэд зохион байгуулах бөгөөд дүүргийн нутаг дэвсгэрт үйл ажиллагаа явуулж байгаа аж ахуй нэгж байгууллагууд орчны 50 метр хүртэлх нийтийн эзэмшлийн зам талбайн цас мөсийг цэвэрлэж, иргэдийн ажиллаж, амьдрах таатай орчинг бүрдүүлэх юм. Цэвэрлэгээг хийхдээ аж ахуй нэгж байгууллага ойр орчны 50 метр газар, сууц өмчлөгчдийн холбоод орц болон хариуцсан газрын цас мөс, хог хаягдлыг цэвэрлэж, үерийн хамгаалалт, барилга байгууламж, ус хуримтлагддаг гуу жалга, ус нэвтрүүлэх хоолойд хуримтлагдсан ахуйн гаралтай хог хаягдлыг цэвэрлэх юм. Цэвэрлэгээнд дүүргийн Төрийн захиргааны удирдлагын хэлтэс, Мэргэжлийн хяналтын хэлтсээс хяналт тавьж ажиллах тул аж ахуйн нэгжүүдийг идэвхтэй хамрагдахыг тус дүүргээс уриалж байна.

Нийслэлийн хэмжээнд энэ сарын 21-ний байдлаар, амбулаторийн 75.775 үзлэг хийгдсэнээс томуу, томуу төст өвчтэй 5634 тохиолдол оношлогджээ. Энэ нь нийт үзлэгийн 7.4 хувийг эзэлж байгаа нь өнгөрсөн 7 хоногийн дундаж түвшнээс 0.8 хувиар бага, өнгөрсөн оны мөн үеэс 2.6 хувиар нэмэгдсэн байна. Нийт өвчлөгсдийн 30.9 хувийг 0-1 нас, 26.5 хувийг 2-4, 14.1 хувийг 5-9 насны хүүхдүүд эзэлж байгаа юм. Хүүхдийн түргэн тусламжийн 1421 дуудлага ирснээс 51.1 хувь нь томуу, томуу төст өвчний тусламж, үйлчилгээг авчээ. Дүүргүүдийн эрүүл мэндийн төвийн “Хүүхдийн кабинет” ажлын өдрүүдэд 17:00-22:00 цаг хүртэл, ням гарагт 10:00-16:00 цаг хүртэл, бямба гарагт Өрхийн эрүүл мэндийн төвүүд 08:30-19:00 цаг хүртэл ажиллаж байна. Мөн иргэд дүүргийн эрүүл мэндийн төвийн зөвлөгөө өгөх утсаар дамжуулан хүүхдийн мэргэжлийн эмчээс томуу, томуу төст өвчний зөвлөмж, мэдээллийг авах боломжтой юм.

Тусламж хэрэгтэй үедээ л тэднийг санаж, бусад үед нь мартдаг ч ажлаа хойш тавьж, шантардаггүй, нэг ч хором хариуцлага алдах эрхгүйгээр онцгой нөхцөлд ажилладаг хүмүүс бол Онгой байдлын аврах ангийнхан.

Бид энэ удаад 2012 удаагийн аюулт үзэгдэл, ослын дуудлагаар ажиллаж, 1035 хүний амь насыг аварч, мөн тооны гэр бүлийг элэг бүтэн амьдралтай нь үлдээж чадсан энэ цагийн эгэл нэгэн баатрыг танилцуулъя. Түүнийг Х.Цогбадрах гэдэг. Тэрээр Нийслэлийн аврах анги 105-д ажилладаг олон аврагчийн нэг. Ингээд түүнтэй ярилцсанаа хүргэж байна.

-Өнөөдрийг хүртэл ажиллахдаа 1000 орчим хүний амийг гал, уснаас авран хамгаалсан байна. Дуудлагаар ажиллаж байсан томоохон осол, гамшгуудаас дурдахгүй юу?

-Онцгой байдлын байгууллагад 15 дахь жилдээ ажиллаж байна. Энэ хугацаанд 2012 удаагийн аюулт үзэгдэл, ослын дуудлагаар ажиллаж, 1035 хүний амь насыг аварч, 275 хүнд эмнэлгийн анхан шатны тусламж үзүүлэн, 119 иргэнийг эмнэлгийн байгууллагад хүлээлгэн өгч, иргэд, аж ахуйн нэгж, байгууллагын 60 сая төгрөгийн өмч хөрөнгийг авран хамгаалжээ. Тухайлбал, Сэлэнгэ аймагт гарсан ой, хээрийн түймэрт нийт 86 хоног үүрэг гүйцэтгэж 1800 орчим га талбайн гал түймрийг унтраасан бол нийслэлийн хэмжээнд гарсан томоохон түймэр болох ХУД-ийн “Анун” төв, БЗД-ийн “Нарантуул худалдааны төв”, “Говь” ХХК-д гарсан түймрийн голомтод үүрэг гүйцэтгэсэн. Мөн СХД-ийн 16,17,20,21, БЗД-ийн 20, ХУД-ийн 13 дугаар хороонд болсон үерийн дуудлагаар тус тус ажиллаж, ард иргэдийн амь нас, эд хөрөнгийг авран хамгаалсан. Хөвсгөл далайд 30 хүртэлх метрт шумбаж ажиллаж байсан.

–Олон хүний амийг аварсан. Тэр дундаас өнөөдрийг хүртэл таны сэтгэлд тод үлдсэн дурсамж байдаг байх. Тэр тухайгаа хуваалцахгүй юу?

-Олон жилийн өмнө өглөөний 6.00 цагийн орчимд Туул голд хүн живлээ гэх дуудлагыг хүлээж аваад очлоо. Дөрвөн найз төрсөн өдөр тэмдэглэж яваад нэг нь усанд ороод гарч ирээгүй хэмээн тэвдсэн байдалтай биднийг угтлаа. Хэд хэдэн удаагийн шумбалт хийж эрэл явуулсан ч олдсонгүй. Ингээд багаа хоёр хэсэг болгон хуваагаад эрлийг үргэлжлүүллээ. Би голын урд хэсгээр нэлээд хол 800 орчим метрт явж байтал модны мөчир дээр тохогдсон хүн байгааг олж харлаа. Яаран гүйж очоод мөрөн дээрээ хэвлийгээр нь тохоод голын эрэг дээр гаргалаа. Учир нь хэвлийн хэсгээр мөрлөөд үүрэх юм бол хамар амаар орсон ус буцаж гардаг юм. Эрлийн багийнхнаас нэлээд зайтай тул үүрч явахаас өөр аргагүй байлаа. Ямартай ч голын эрэг дээр гараад анхны тусламж үзүүллээ. Амьд гарах найдвар тун ховор тул ямартай ч эмнэлгийн тусламжинд аваачих нь зүйтэй гэж бодоод тэвдэж байтал гар нь хөдөлж байна. Бөөн баяр болоод нөгөө охиноо үүрээд л гүйчихсэн. Тэгээд хэсэг явсны дараа бүр ухаан ороод “намайг буулгаач” гээд л нэлээд айсан шинжтэй орилж байна. Аварсан хүн маань айгаад орилж байхад би тэрийг нь сонсохгүй баярлаад гүйж байсан үе одоог хүртэл сэтгэлээс гардаггүй юм. Ер нь тийм хол урсчихсан, усанд удаан байсан хүн амьд гарах магадлал тун ховор л доо. Нэмээд хэдэн секунд алдсан бол тэгээд л амиа алдах байсан. Тэр их азтай охин. Тэгээд хэдэн сарын дараа над руу утсаар яриад баярласнаа хэлж байсан.

Монгол Улсын Үндэсний аюулгүй байдлын зөвлөлийн Нарийн бичгийн даргын 2011 оны 03 дугаар сарын 21-ний өдрийн 08 дугаар захирамжаар хүн нэг бүрийн анхан шатны тусламжийн үүргэвчинд байвал зохих зүйлсийн жагсаалтыг баталсан байдаг. Тиймээс гамшгийн үед хэрэглэх хүн нэг бүрийн үүргэвчинд байвал зохих зүйлсийн жагсаалтыг хүргэж байна.

2018 оны Нэмэгдсэн өртгийн албан татварын буцаан олголтыг ирэх долоо хоногийн эхээр иргэдийн дансанд шилжүүлэх юм байна. Энэ жил 808000 иргэнд 121 орчим тэрбум төгрөгийн буцаан олголтыг олгох аж.

Сангийн яамнаас тодруулахад “Татварын Ерөнхий газраас энэ долоо хоногтоо багтан НӨАТ-ын буцаан олголт авах иргэдийн мэдээллийг нягталж, шалгаад бүх тооцооллоо цэгцэлж Сангийн яаманд ирүүлнэ. Үүний дараа буюу ирэх долоо хоногийн эхнээс НӨАТ-ын буцаан олголтын мөнгийг иргэдийн данс руу шилжүүлэхээр ажиллаж байна” гэлээ. НӨАТ-ын баримтыг бүртгүүлэх сүүлийн хугацаа өнгөрснөөс хойш Татварын ерөнхий газар мэдээлэл, судалгаагаа нэгтгээд нэгдүгээр сарын 25-ны дотор Сангийн яаманд хүргүүлдэг. Сангийн яам санхүүжилтээ шийдээд Монголбанкинд шилжүүлснээр НӨАТ-ын буцаан олголтыг иргэдийн дансанд шилжүүлдэг юм байна.

Иргэд хувийн мэдээллээ нягталж, үнэн зөвийг шалгах хэрэгтэй.

-Овог нэрийн эхний үсэг, регистрийн дугаарын эхний 2 үсгийг томоор, кирилл үсгээр бичнэ.

-Регистрийн дугаарыг бичихдээ зай авахгүй;

-Өөрийн нэр дээр бүртгэлтэй утасны дугаар байх;

Бүртгүүлсэн дансны хувьд

-Нэр дугаар зөрөхгүй байх;

-Хамтран эзэмшигчтэй данс биш байх;

-Идэвхитэй данс байх;

-Картын дугаар оруулахгүй байх;

-Дансны дугаарыг оруулахдаа зай авахгүй байх

Гүйлгээ буцаагдсан иргэд дансны мэдээллээ шалган засварласан тохиолдолд урамшуулал олгогдоно.

Засгийн газрын хэрэгжүүлэгч агентлаг Соёл урлагийн газар, Монголын номын сангуудын консорциумтай хамтран зохион байгуулсан “Мэдээллийн технологи ба номын сан” сэдэвт сургалтын хаалтын ажиллагаа Соёл, урлагийн газрын хурлын танхимд боллоо. Хаалтын ажиллагаанд Соёл, урлагийн газрын дарга Г.Эрдэнэбат, Соёл, соёлын өвийн хэлтсийн дарга Н.Мөнхзул нар сургалтад хамрагдсан номын санчдад сертификат гардуулав. Энэхүү 14 хоногийн сургалтыг онлайн болон танхим хосолсон хэлбэрээр “Номын сан дахь мэдээллийн технологийн чиг хандлага”, “Интернет дэх мэдээллийн эрэлт хайлт”, “Цахим мэдээллийн бүрдүүлэлт, зохион байгуулалт, хадгалалт”, “Цахим мэдээллийн түгээлт” гэсэн үндсэн агуулга, сэдвийн хүрээнд зохион байгуулжээ. Оролцогчдын түвшинг тогтоох, онлайнаар олгосон шинэ мэдлэг, мэдээллийг танхимын сургалтаар бататгаж, хамтран ярилцах, хэлэлцүүлэг хийх, багаар ажиллах зэргээр сургалтын олон хэлбэрийг ашиглаж ажилласнаар номын санчдын идэвх, оролцоо нэмэгдсэн практик ач холбогдолтой болсныг зохион байгуулагчид хэлж байна. Мөн номын санчдад нөөц бололцоогоо ашиглан бие даан суралцах, номын сангууд харилцан туршлага солилцох, суралцах боломжийг бүрдүүлсэн гэж оролцогч, номын санчид санал сэтгэгдлээ хэлж, талархал илэрхийллээ.