Month: January 2019

Нийслэлийн Засаг даргын Тамгын газар, Авлигатай тэмцэх газар хамтран төрийн байгууллага, албан тушаалтны хүнд сурталтай үйлчилгээ, авлига, ашиг сонирхлын зөрчил, авлигын гэмт хэргийн талаар гомдол, мэдээлэл хүлээн авах, эрх зүйн зөвлөгөө, мэдээлэл өгөх, сургалт сурталчилгаа явуулах зорилго бүхий “Иргэний хяналтын төв”-ийг нээж, өнөөдөр үйл ажиллагааг нь эхлүүллээ. Нээлтийн арга хэмжээнд Нийслэлийн Засаг дарга бөгөөд Улаанбаатар хотын Захирагчийн үүргийг түр орлон гүйцэтгэгч Ж.Батбаясгалан, НИТХ-ын Тэргүүлэгчдийн нарийн бичгийн дарга Б.Батбямба, НЗДТГ-ын дарга М.Отгонбаяр, Авлигатай тэмцэх үндэсний хөтөлбөрийг хэрэгжүүлэх ажлын албаны дарга Б.Дуламсүрэн, АТГ-ын Судалгаа шинжилгээний хэлтсийн дарга, ахлах комиссар Ц.Шинэбаяр болон бусад ажилтан албан хаагчид, иргэдийн төлөөлөл оролцов.

Иргэний хяналтын төвийг нийслэлийн үйлчилгээний нэгдсэн төвийн Драгон, Мишээл, Дүнжингарав, зургаан буудал дахь Оргил төвд нэгэн зэрэг нээж байгаа юм. Цаашид нийслэлийн есөн дүүрэгт нээн ажиллуулахаар бэлтгэл ажлыг нь хангаад байгаа аж.

“Авлигын эсрэг үндэсний хөтөлбөр, авлигатай тэмцэх хууль, тогтоомжуудыг биелүүлэх үүднээс энэ төвийг нээн ажиллуулж байна. Нийслэлийн үйлчилгээний нэгдсэн төвийн дөрвөн салбарт 28 байгууллагын 330 гаруй үйлчилгээг хүргэж байна. Иргэн, төр хоёрын хооронд ямар нэгэн ойлгомжгүй байдал үүсэхэд шууд эрх зүйн зөвлөгөө, мэдээлэл авах, авлига, ашиг сонирхлын зөрчил, авлигын гэмт хэргийн талаар гомдол, мэдээлэл өгөх боломжийг илүү ойртуулж өгч байна. Бид төрийн үйлчилгээг авлига, хувийн ашиг сонирхлоос ангид байлгахад иргэдийн оролцоо маш чухал” хэмээн Нийслэлийн Засаг дарга бөгөөд Улаанбаатар хотын Захирагчийн үүргийг түр орлон гүйцэтгэгч Ж.Батбаясгалан ярилаа.

“Авлигатай тэмцэх газар нь орон нутагт бүтцийн нэгжгүй байгууллага. Тиймээс улсын хэмжээнд ажиллахад зарим бэрхшээл, хүндрэл тулгардаг. Авлигатай тэмцэх үндэсний хөтөлбөр батлагдаснаас хойш энэ байдал арай өөрчлөгдсөн. Өөрөөр хэлбэл, авлигаас урьдчилан сэргийлэх үйл ажиллагаанд иргэний хяналтыг бий болгоно, иргэний нийгмийн байгууллагуудыг оролцоог нэмэгдүүлнэ гэсэн байгаа. Бүх яам, агентлаг, аймгуудын ГХУСАЗЗ-ийн дэргэд иргэний хяналтын зөвлөл ажиллаж байгаа. Зөвлөлийн үйл ажиллагааг улам өргөжүүлэх шаардлагатай гэдгийг өнгөрсөн хугацаанд харуулж байна. Тиймээс НЗДТГ-тай хамтраад нийслэлийн үйлчилгээний нэгдсэн төвийн дөрвөн салбарт “Иргэний хяналтын төв”-ийг нээж байна. Энэ төв дээр иргэн ААН, байгууллага ирээд төрийн байгууллага, албан тушаалтны хүнд сурталтай үйлчилгээ, авлига, ашиг сонирхлын зөрчил, авлигын гэмт хэргийн талаар гомдол, мэдээлэл өгөх, эрх зүйн зөвлөгөө авах боломжтой” гэж Авлигатай тэмцэх үндэсний хөтөлбөрийг хэрэгжүүлэх ажлын албаны дарга Б.Дуламсүрэн ярилаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Баянзүрх дүүргийн орон сууц хороолол дунд бичил цэцэрлэгт хүрээлэн, ойн төгөл байгуулах ажлын хэсэг хуралдлаа. Ажлын хэсгийн бүрэлдэхүүнд дүүргийн Дэд бүтэц хот төлөвлөлтийн асуудал хариуцсан төслийн удирдагч-Засаг даргын орлогч Т.Батцогт, Тохижилт нийтийн аж ахуй хэлтсийн дарга болон Дүүрэг хөгжлийн төвийн мэргэжилтэн болон бусад холбогдох албаны хүмүүс байгаа юм. Тус хуралд Захирагчийн ажлын албаны тохижилт, хог хаягдлын хэлтсийн ахлах мэргэжилтэн н.Гансэлэм оролцож СӨХ болон бусад холбогдох хүмүүст заавар, зөвлөгөө өглөө. Энэхүү хуралд дүүргийн нутаг дэвсгэрт үйл ажиллагаа явуулж, иргэдийн амьдрах орчинг таатай болгож буй сууц өмчлөгчдийн холбоодын төлөөлөл оролцсон байна.

Улаанбаатар хотын Ерөнхий менежерийн хотын нийтийн аж ахуйн ажил үйлчилгээг эрчимжүүлэх чиглэлээр албан даалгавар энэ долоо хоногт гарсан. Сар шинийн баярыг угтан энэ долоо хоногийн Бямба гарагт Нийслэлийн хэмжээнд Бүх нийтийн их цэвэрлэгээ зохион байгуулна. Энэ өдөр иргэд, аж ахуй нэгж байгууллагууд орчныхоо 50 метр газрыг цэвэрлэж, байгууллагынхаа цонх, хаалга, фасад, хаяг, хаягийн байгууламж, хайс хашлаганы тортгийг угааж, өнгө үзэмжээ сэргээн, байгууллага хамт олноороо идэвхтэй оролцохыг уриалж байна. Албан даалгавар гарсантай холбогдуулан хот нийтийн аж ахуйн чиглэлээр үйл ажиллагаа эрхэлдэг мэргэжлийн байгууллагууд, дүүргүүдийн удирдлагуудад дараах албан даалгаврыг өгсөн.

– Нийтийн эзэмшлийн гудамж зам талбайн цас мөс, хог хаягдал орчныг цэвэрлэх,

– Хайс, хашлага, хогийн сав, сандал, хөшөө, баримал,

зар сурталчилгааны болон хаяг, хаягийн байгууламж, гэрлийн шон, гэрлэн чимэглэл, нийтийн тээврийн автобус, хог тээврийн автомашины тоос тортгийг цэвэрлэх,

– Эвдэрч гэмтсэн хайс хашлагыг засварлаж нөхөх,

– Шатсан гэрэлтүүлэг, гэрлэн чимэглэлийг сольж, асалтыг сайжруулах

– Инженерийн шугам сүлжээний худгийн алдагдсан тагийг нөхөх

– Хөрсний уснаас үүдэж мөстсөн халиа дошинг цэвэрлэж, иргэдийн зорчих нөхцлийг бүрдүүлэх,

– Гудамж талбайд эзэнгүй явж байгаа золбин нохой муурыг устгах ажлыг эрчимжүүлэх

Албан даалгаварын хэрэгжилтийг 2019 оны нэгдүгээр сарын 22-оос хоёрдугаар сарын 01-ний хугацаанд шуурхай хангуулж ажиллах бөгөөд үүргээ биелүүлээгүй байгууллага, аж ахуйн нэгж, иргэдэд Нийслэлийн Мэргэжлийн хяналтын газраас хууль тогтоомжийн дагуу хариуцлага тооцож ажиллах юм гэж УБЗАА-наас мэдээлэв.

Билгийн тооллын XVII жарны шороон гахай жилийн сар шинийн баярыг угтан нийслэлийн Засаг даргын Тамгын газраас өндөр насны тэтгэвэртээ гарсан ахмадуудаа хүлээн авч хүндэтгэл үзүүллээ. Хүндэтгэлийн арга хэмжээнд Нийслэлийн Засаг дарга бөгөөд Улаанбаатар хотын Захирагчийн үүргийг түр орлон гүйцэтгэгч Ж.Батбаясгалан, нийслэлийн Засаг даргын орлогч П.Баярхүү, нийслэлийн Засаг даргын орлогч Ш.Анхмаа, Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр, НЗДТГ-ын дарга М.Отгонбаяр нар оролцов.

Нийслэлийн Засаг дарга бөгөөд Улаанбаатар хотын Захирагчийн үүргийг түр орлон гүйцэтгэгч Ж.Батбаясгалан хүндэтгэлийн арга хэмжээний үеэр нийслэлээс хийж, хэрэгжүүлж буй томоохон ажлуудаа танилцуулаад “Нийслэлийн Засаг даргын Тамгын газрын Ахмадын зөвлөлөөс гаргасан санал хүсэлтийг судлан та бүхний эрүүл урт удаан наслах, хөдөлгөөний дутагдлаас сэргийлэх, өөр хоорондоо мэдээлэл солилцох боломжийг бүрдүүлэн ажиллаж байгааг хэлэхэд таатай байна. Мөн өнгөрсөн онд улсын гуравдугаар төв эмнэлэг, ЧД-ийн Эрүүл мэндийн төвийн нарийн мэргэжлийн эмч нарын хамтарсан үзлэг, шинжилгээ, оношлогоог зохион байгуулж та бүхнийхээ эрүүл мэндэд анхааран ажиллаж байгааг дурдахад таатай байна. Цаашид та бүхнээс гаргасан санал санаачлагыг дэмжин ажиллана” хэмээж байв.

Ахмадуудаа хүлээн авах хүндэтгэлийн арга хэмжээний үеэр НЗДТГ-ын Ахмадын холбооноос нийслэлийн хөгжилд өөрсдийн санал санаачлалгыг хүргэхэд идэвх санаачлага гарган ажилласан нийслэлийн Засаг даргын Тамгын газрын Төрийн захиргааны удирдлагын хэлтсийн дарга Ү.Ганболдод “Бидний төлөө” шагналыг гардуулан өглөө гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

Нийслэлийн онцгой байдлын газраас нийслэлийн нутаг дэвсгэрт үйл ажиллагаа явуулж байгаа шингэрүүлсэн шатдаг хийн баллонт тоног төхөөрөмж хэрэглэгч нийт 146 объектод хяналт, шалгалтыг зохион байгууллаа. Шалгалтаар дээрх байгууллагуудаас 381 зөрчил илрүүлж, шалгалтын явцад газар дээр нь 61 зөрчил буюу 16.6 хувийг арилгуулан, бусад үлдсэн зөрчлийг арилгуулахаар Гал түймрийн улсын хяналтын байцаагчийн заавал биелүүлэх албан бичиг хүргүүлсэн байна. Түүнчлэн шалгалтын үеэр ноцтой зөрчил гаргасан хоёр газрын үйл ажиллагааг прокурорын тогтоолоор зогсоож, Галын аюулгүй байдлын тухай хууль тогтоомж зөрчсөн нийт 15 субъектэд шийтгэлийн арга хэмжээг оногдуулжээ. Хяналт, шалгалтыг Нийслэлийн Онцгой байдлын газраас нийслэлийн Прокурорын газар, Мэргэжлийн хяналтын газартай хамтран энэ сарын 14-21-ний өдрүүдэд зохион байгуулсан юм.

Цэргийн алба хаагч амиа алдсан хэргийн мөрөөр Дорноговь аймагт ажилласан ажлын хэсэг мэдээлэл хийлээ.

Зэвсэгт хүчний хуурай цэргийн командлагч, бригадын генерал Б.Амгаланбаатар: Хэргийн мөрдөн байцаалтын ажиллагаа явж байгаа учир би ямар нэгэн хүний нэр ус хэлэх, процессийг тайлбарлах боломжгүйг хэлье. Энэ хэрэг явдал 2019 оны нэгдүгээр сарын 22-ны өдрийн 14:30-16:00 цагийн хооронд болсон. Энэ хугацаанд ангийн захирагчийн тогтоосон дэг журмын дагуу цагийн хуваарь, өдөр тутмын үйл ажиллагааны 5-6 дугаар цагийн хичээл орж байх үе байсан юм. Хэрэг явдал яагаад гарсан бэ гэвэл тухайн салбар уг өдөр харуулаас буусан байгаа юм. Энэ үед салбарын захирагчийн өгсөн үүргийн дагуу салбарын байранд үзлэг хийсэн. Үзлэгийн явцад эмх замбараагүй хадгалсан эд зүйлс, гар утас зэрэг зүйл салбарын байрнаас олдсон. Салбарын захирагч дотоод журмыг зөрчиж, гар утас ашигласан байна гээд нийт алба хаагчдад арга хэмжээ авах үүргийг ахлагчид өгсөн. Ахлагч цэргүүдийг биеийн тамирын талбай дээр гүйлгэсэн. Гүйж байх явцад талийгаач дотор эвгүйрхээд би гүйж чадахгүй нь гэсэн тайлбарыг өгчээ. Энэ үед салаан захирагч нар өөр салаан захирагчийн хамт очин гүйж байсан явцыг зогсоосон. Ингээд салбарын цэргүүдийг байранд нь оруулсан байгаа. Байранд оруулах явцад талийгаач байлдагчийн бие дахин муудаж, оронд нь оруулж хэвтүүлсэн. Дэргэд нь байсан ахлагч нар гар хөлөнд нь массаж хийж, эмнэлгийн анхан шатны тусламж үзүүлэх гэж оролдсон байгаа юм. Энэ хооронд цэргийн алба хаагчид дараагийн хичээлд орсон тэр хооронд талийгаач таталт өгсөн. Тэгээд эмч дуудсан. Ангийн эмчийг ирэхэд талийгаач ухаан алдсан байдалтай, таталт өгснийг сувилагч эмчдээ хэлээд Зүүнбаянгийн багийн эмнэлэг рүү авч явах шийдвэр гаргаад багийн эмнэлэгт очих замдаа нас барсан. Багийн эмч үзээд энэ хүн нас барсан зүрх нь зогссон гэдгийг тогтоосон. Үүний дагуу Зүүнбаянгийн цагдаагийн хэлтэст мэдэгдсэн. Багийн цагдаагийн хэсэг мөн Дорноговь аймгийн цагдаагийн хэлтсээс ажлын бүрэлдэхүүн дуудсан байгаа. Ажлын бүрэлдэхүүн газар дээр нь очиж ажилласан. Манай зүгээс ар гэртээ нь холбоо барьж ийм хэрэг боллоо гэдгийг дуулгасан. Нэгдүгээр сарын 23-ны өглөө 05:40 минутад ар гэрийнхэн нь Зүүнбаян багт очсон. Ар гэрийнхэн тэнд ажиллаж байсан байгууллага цэргийн удирдлагуудтай уулзсан. Энэ хэргийг шалгах ажлын хэсгийг хуурай замын цэргийн командлагчийн хувьд томилоод өнгөрсөн хоёр өдөр Зүүнбаян баг 336 дугаар анги дээр ажиллаад ирлээ. Ажлын хэсгийн дүгнэлтээр энд хэд хэдэн зөрчил дутагдал байжээ гэж үзэж байгаа.

1 Ангийн удирдлагаас өдөр тутмын ажиллагаанд тавих хяналт сул.

2 Салбарын захирагч шийдвэр гаргахдаа цэргийн сахилгын дүрмийг зөрчсөн.

3 Эмнэлгийн анхны тусламжийг хожимдож үзүүлсэн байна гэсэн ийм үндэслэлүүд тогтоогдсон. Энэ дүгнэлтийг би салбарын сайд болон холбогдох албан тушаалтнуудад танилцуулсан. Одоо Зүүнбаян багт Дорноговь аймгийн цагдаагийн мөрдөн шалгах алба, Дорноговь аймгийн тагнуулын газар хэргийн газар дээр ажиллаж байна. үйл ажиллагаанд тавигдах хяналт сл цэргийн дүрэм зөрчигдөх асуудал байгаа учраас бид холбогдох шат шатны удирдлагад арга хэмжээ тооцох саналаа Батлан хамгаалахын сайдтай ярьсан байгаа.

Дашрамд хэлэхэд харамсалтай хэрэг гарсан явдалд гүнээ эмгэнэж байгаагаа талийгаачийн ар гэр, хамаатан садан, найз нөхөд бүгдэд нь эмгэнэл илэрхийлж байгааг албан ёсоор дамжуулж хэлье.

ЗХЖШ-ын нэрийн өмнөөс хуурамч веб хуудас нээн эмгэнэлийн бичиг тавьж, сошиалаар явсан асуудал гарлаа. Энэ чиглэлээр кибер аюулгүй байдалтай тэмцэх алба, Тагнуулын ерөнхий газартай хамтран ажиллаад веб хаяг нээж эмгэнэл илэрхийлсэн хүнийг олж тогтоосон. Энэ бол Зэвсэгт хүчний албан ёсны байр суурь биш гэдгийг албан ёсоор мэдэгдэж байна.

Нийслэлийн Соёл, урлагийн газраас санаачлан 2017 оны нэгдүгээр сараас эхэлж “Номоо солилцъё” өдөрлөгийг сар бүр Д.Сүхбаатарын талбайд тогтмол зохион байгуулж ирсэн. Энэхүү арга хэмжээг улам өргөжүүлж, үйлчилгээний хүртээмжийг нэмэгдүүлэх зорилгоор энэ оны нэгдүгээр сараас ”Номоо солилцъё” бичил номын сангийн үйл ажиллагааг НИТХ, НЗДТГ, Нийслэлийн Соёл, урлагийн газар, Нийслэлийн Боловсролын газар, Д.Нацагдоржийн нэрэмжит хотын төв номын сан, JCI Grand зэрэг байгууллагуудтай хамтран хэрэгжүүлэхээр ажиллаж байгаа бөгөөд төслийн нээлтийг өнөөдөр Нийслэлийн Хангарьд ордонд зохион байгууллаа.

Тээврийн цагдаагийн алба, дүүрэг дэх Замын цагдаагийн хэлтсээс сар шинийн баярын өмнөх амралтын өдрүүдийн замын хөдөлгөөний ачааллыг багасгах ажлын хүрээнд дараах зохицуулалтыг хийсэн байна. Тодруулбал, Дэнжийн 1000, Баянхошуу, Нарангийн гол, Орбит, Сэлбэ амралт, ХМК, Чингэлтэй, Шархад, Нисэх болон Яармагаас Нарантуул худалдааны төв рүү 10:00, 12:30, 15:00 цагуудад тогтмол нийтийн тээврийн автобус үйлчлэхээр болсон байна. Иймд дүүрэг дэх Замын цагдаагийн хэлтсээс иргэдийг Нийтийн тээврийн үйлчилгээг сонгон үйлчлүүлэхийг уриаллаа.