УИХ, эрх баригч нам, улстөрчид маш хариуцлагагүй, амлалтаа биелүүлдэггүй, хууль зөрчдөг бөгөөд сонгогчид сонгосон гишүүндээ хариуцлага тооцох эрх зүйн зохицуулалтгүй явсаар ирсэн билээ. Түүнчлэн өнөөгийн улс төрд үүсээд буй нөхцөл байдал болон иргэдээс ирсэн санал гомдлыг үндэслэн УИХ-ын чуулганы дэгийн тухай хуульд нэмэлт өөрчлөлт оруулах хуулийн төслийг санаачилснаа УИХ-ын гишүүн, АН-ын дарга С.Эрдэнэ мэдээллээ.
Тодруулбал, тухайн тойргийн нийт сонгогчдын 1/3 нь санал гаргаж, гарын үсгээр баталгаажуулбал УИХ-ын гишүүнийг эгүүлэн татах хууль эрх зүйн боломжийг бүрдүүлж байгаа аж. Ингэхдээ Төрийн байгуулалтын байнгын хорооны дарга иргэдийн уг саналыг байнгын хороо болон УИХ-ын чуулганы хуралдаан дээр уншиж танилцуулснаар хууль хэрэгжиж эхлэх юм байна. Өөрөөр хэлбэл, сонгогчид УИХ-ын гишүүнийг эгүүлэн татах санаачилга гаргасан бол уг асуудлыг чуулганаар хэлэлцэж, гишүүдийн саналыг авч батлах шаардлагагүй ажээ.
Монгол Улсын Их хурлын тухай хуулийн
6.6-д гишүүний бүрэн эрх энэ хуулийн 6.3-т заасан хугацаанаас өмнө дуусгавар болно хэмээн заахдаа
- 6.6.1. нас барсан;
- 6.6.3. гишүүн өөр ажилд шилжих болон хүндэтгэн үзэх бусад шалтгаанаар чөлөөлөгдөх хүсэлтээ өөрөө гаргасныг Улсын Их Хурал хүлээн авсан;
- 6.6.4. хүндээр өвчилсний улмаас цаашид бүрэн эрхээ хэрэгжүүлэх боломжгүй болсон тухай эмнэлгийн дүгнэлт гаргасныг Улсын Их Хурал хүлээн авсан;
- 6.6.5. Үндсэн хуулийн цэц гишүүнийг эгүүлэн татах үндэслэлтэй гэсэн дүгнэлт гаргасныг Улсын Их Хурал хүлээн авсан;
- 6.6.6. гишүүн гэмт хэрэг үйлдсэн болох нь шүүхийн хүчин төгөлдөр шийтгэх тогтоолоор батлагдсан тохиолдолд хэмээн хуульчилсан байдаг ч Дэгийн тухай хуульд давхар тусгаагүй байдгийг С.Эрдэнэ дурдав.
Тиймээс УИХ-ын чуулганы дэгийн тухай хуулийн 45 дугаар зүйл буюу “Улсын Их Хуралд ажлаа шууд хариуцан тайлагнадаг байгууллагын удирдах албан тушаалтныг томилох, чөлөөлөх асуудлыг хэлэлцэх журам”-д “УИХ-ын гишүүнийг эгүүлэн татах тухай” нэмэлт заалт оруулахаар санаачилсан байна.
Ингэхдээ дээр дурдсан Монгол Улсын Их хурлын тухай хуулийн 6.6-р заалтуудад дурдсан үндэслэлүүдээс гадна сонгогчдын 1/3-ын гаргасан санал гарын үсгээр баталгаажвал УИХ-ын гишүүнийг эгүүлэн татах, Байнгын хорооны дарга УИХ-ын чуулганы хуралдаан дээр уншиж танилцуулснаар хүчин төгөлдөр мөрдөгдөж эхэлнэ зэрэг заалтуудыг оруулж байгаа аж.
Мөн Сонгуулийн тухай хуульд холбогдох заалтыг оруулах юм байна. Тодруулбал, Сонгуулийн ерөнхий хороо УИХ-ын гишүүнийг эгүүлэн татахаар санал гаргаж, гарын үсэг зурсан иргэдийн жагсаалтыг хамгийн сүүлд болсон сонгуульд санал өгсөн иргэдийн нэрстэй тулгаж, 60 хоногийн дотор баталгаажуулж өгөх үүрэг хүлээх аж.
С.Эрдэнэ “Монгол Улсын Их хурлын 2016 оны сонгуульд сонгогдсон 76 гишүүний 65 нь МАН-аас сонгогдсон. Тэднээс нэг гишүүн нь хүчиндэх гэмт хэрэгт холбогдож, өөрийн хүсэлтээр чөлөөлөгдсөн. Үлдсэн 64 гишүүний 1/3 орчим хувь нь авлигын гэмт хэрэг буюу ЖДҮХС-гаас нэн хөнгөлөлттэй зээлийг албан тушаалаа урвуулан ашиглаж авсан асуудалд холбогдоод байгаа.
Монгол Улсын ерөнхий прокуророос албан тушаалаа урвуулан ашиглаж зээл авсан нэр бүхий таван гишүүний бүрэн эрхийг түдгэлзүүлж, шалгах хүсэлтээ УИХ-д оруулсан боловч уг саналыг хүлээн авахаас татгалзаад байгаа. Энэ нь УИХ-ын гишүүн бусад гишүүддээ шударга ёсны болон хууль зүйн хариуцлага хүлээлгэх чадамжгүй болоод буйн тод жишээ” гэдгийг онцолсон юм.
Энэхүү хуулийн төслийг боловсруулахдаа олон үндэслэлд тулгуурлаж, олон оронтой харьцуулсан судалгаанд үндэслэн боловсруулсан гэдгээ АН-ын дарга С.Эрдэнэ хэлсэн.
Тухайлбал, Канадад сонгуульд санал өгсөн иргэдийн 25 хувь нь гарын үсэг зурсан бол сонгогдсон төлөөлөгчийг эгүүлэн татаж болдог бол Их Британид 10, Австралид 10, БНХАУ-д 30, Беларусьт 20 хувь гэгчлэн хуульчилсан байдаг байна.
УИХ-ын гишүүн Л.Болд, Т.Аюурсайхан, Ж.Батзандан, Л.Оюун-Эрдэнэ нар цаг үеийн асуудлаар мэдээлэл хийлээ. 
Он гарсаар 491 удаагийн объектын гал түймэр бүртгэгдээд байна. Түймэрт зургаан том хүн, хоёр хүүхэд өртөж амиа алдсан бол дөрвөн том хүн, нэг хүүхэд түлэгдэж гэмтсэн байна.Өчигдөр хувийн өмчид гал гарсан тухай есөн дуудлага бүртгэгджээ. Нийслэлийн Сонгинохайрхан дүүргийн 15 хорооны 19-р байрны хогийн сувагт хог шатсан дуудлагын дагуу алба хаагчид ажиллалаа. Гал түймрийн утаажилтын бүсээс есөн хүүхэд, 18 том хүнийг гаргасан байна. Мөн тус дүүргийн 14-р хорооны 13-р байранд хогийн сувагт хог шатаж утаажилтын бүсээс 14 хүнийг гаргажээ.
2018 оны НӨАТ буцаан олголтыг 2019 оны нэгдүгээр сард багтаан олгох болсон талаар холбогдох албаныхан мэдээлсэн. Энэ дагуу Татварын ерөнхий газар мэдээлэл, судалгаагаа нэгтгээд Сангийн яаманд хүргүүлээд байгаа аж. Харин одоо Сангийн яам санхүүжилтээ Монголбанкинд шилжүүлчих ёстой юм. Ингэснээр НӨАТ-ын буцаан олголтыг иргэдийн дансанд шилжих боломж бүрдэх юм. Гэвч одоогоор Сангийн яам НӨАТ-ын буцаан олголтын санхүүжилтийг Монголбанкинд шилжүүлээгүй байгаа тухай албаны эх сурвалж мэдээллээ.
УИХ-ын Тамгын газраас эрхлэн гаргадаг Төрийн мэдээлэл эмхэтгэлийн шинэ дугаар гарчээ.
Хүний биеийн гадаргуу дээр өвчин үүсгэгч 4-5 төрлийн вирус байдаг. Тиймээс сар шинийн баяраар золгохдоо бага насны хүүхдийн эрүүл мэндийн эрсдэлийг тооцоолж үнсэлгүй зөвхөн духан дээр нь үнэрлэхийг НЭМҮТ-өөс зөвлөж байна. Учир нь томуугийн вирус амны хөндийгөөр дамжиж уушги гуурсан хоолой руу ордог. 
ОХУ-ын алдарт бөх Иван Ярыгины нэрэмжит 30 дахь удаагийн чөлөөт бөхийн Гран при тэмцээн ОХУ-ын Красноярск хотод энэ сарын 24-27-нд болсон бөгөөд эрэгтэйчүүдийн 65 кг-д ОУХМ Батчулууны Батмагнай хүрэл медаль хүртлээ. Азийн АШТ-ий хүрэл медальт, “Алдар” спорт хорооны тамирчин Б.Батмагнай, өсвөр үеийн Азийн аварга, “Хүч” спорт хороо, “Арслан” клубын тамирчин ОУХМ Төмөр-Очирын Тулга нар хүрэл медалийн төлөө барилдаж насаар ах, туршлагаар илүү Б.Батмагнай 4:2-оор яллаа. 30 дахь удаагийн тэмцээнд эрэгтэйчүүдийн зургаа, эмэгтэйчүүдийн найман жингийн барилдаан болоход Монголын бөхчүүд хоёр алт, хоёр мөнгө, найман хүрэл медаль хүртсэн байна.
АТГ-аас төрийн байгууллага, албан тушаалтны хүнд суртал, авлигын гэмт хэргийн талаар иргэдээс гомдол авах, мэдээлэл, сурталчилгаа өгөх “Иргэний хяналтын төв”-ийн дөрвөн салбарыг өнгөрсөн баасан гарагт нээлээ. Дүнжингарав худалдааны төв, Драгон, Мишээл экспо, 6 буудал дахь Нийслэлийн үйлчилгээний нэгдсэн төвүүдэд үйл ажиллагаагаа явуулах тус хяналтын төвүүдийг Нийслэлийн Гэмт хэргээс урьдчилан сэргийлэх ажлыг зохицуулах зөвлөл, нийслэлийн Засаг даргын Тамгын газартай хамтран нээсэн байна. Нээлтэд АТГ-ын Авлигатай тэмцэх үндэсний хөтөлбөрийг хэрэгжүүлэх ажлын албаны дарга, эрхэлсэн комиссар Д.Дуламсүрэн, АТГ-ын Судалгаа шинжилгээний албаны дарга, ахлах комиссар Ц.Шинэбаяр, Нийслэлийн Засаг дарга бөгөөд Улаанбаатар хотын Захирагчийн үүргийг түр орлон гүйцэтгэгч Ж.Батбаясгалан, Нийслэлийн ИТХ-ын Тэргүүлэгчдийн нарийн бичгийн дарга Б.Батбямба, НЗДТГ-ын дарга М.Отгонбаяр болон бусад албаны хүмүүс, иргэдийн төлөөлөл оролцов. Иргэний хяналтын төв нь Авлига, ашиг сонирхлын зөрчлийн улмаас иргэдэд учирч буй хүндрэл, бэрхшээлийг газар дээр нь шийдвэрлэхээс гадна зөвлөгөө мэдээлэл өгч, гэмт хэргийн шинжтэй өргөдөл, гомдлыг АТГ-т түргэн шуурхай шилжүүлэх, шийдвэрлэх арга хэмжээ авах юм. Цаашид Нийслэлийн есөн дүүрэг, Хангарди ордны нэг цэг, Улаанбаатар хотын гаалийн бүрдүүлэлт, 1, 2, 3 дугаар эмнэлэг, ХӨСҮТ, ЭХЭМҮТ, ГССҮТ зэрэг гуравдугаар шатлалын эмнэлгүүд, АТҮТ-ийн нэг цэгт байгуулахаар төлөвлөж байна.