Month: January 2019

Дархан сум, Шарын гол сумын нутаг дэвсгэрт байрлах мах, махан бүтээгдэхүүний цех, хүнсний үйлдвэр, худалдаа үйлчилгээний газрууд, “Цагаан сар” үзэсгэлэн худалдаанд худалдаа үйлчилгээ эрхлэгч, нийт 44 аж ахуй нэгж байгууллага, 213 иргэний үйл ажиллагаанд Дархан-Уул аймгийн Мэргэжлийн хяналтын газраас урьдчилан сэргийлэх хяналт шалгалт хийлээ.

Энэ үеэр хүнсний бүтээгдэхүүний хадгалалт, чанар аюулгүй байдалтай холбоотой нийт 136 зөрчил илрүүлж 89-ийг нь газар дээр нь арилгуулан 165 иргэнд мэргэжил арга зүйн зөвлөгөө өгч, зөвлөмж тараасан байна.

Мөн “Тээвэр Дархан” ХК-ийн хүнсний зах, “Номинтав трейд” ХХК, “Цагаан сар” үзэсгэлэн худалдаанд худалдаа эрхлэгч иргэд, мах, махан бүтээгдэхүүний цех, нийт 14 цэгээс агаарын 7, арчдасны 164, хүнсний бүтээгдэхүүний 18, цагаан будааны 20, хүнсний ногооны 8, мах, махан бүтээгдэхүүн, сүү, сүүн бүтээгдэхүүн, зөгийн балны 75, нийт 121 дээж авч Мэргэжлийн хяналтын газрын итгэмжлэгдсэн лаборатори, Мал эмнэлгийн газрын итгэмжлэгдсэн лабораторид шинжлүүлэхэд хүнсний бүтээгдэхүүний эрүүл ахуй, чанар аюулгүй үзүүлэлтийн шаардлага хангаж байв.

Увс аймгийн Мэргэжлийн хяналтын газраас цагаан сарын баярын өмнөх урьдчилан сэргийлэх хяналт шалгалтаар хадгалах, хэрэглэх хугацаа хэтэрсэн, хаяг шошгын зөрчилтэй гурван нэр төрлийн хүнсний бүтээгдэхүүнийг хураан устгаж, 18 нэр төрлийн хүнсний бүтээгдэхүүнийг буцаан татан авалт хийлгүүлжээ.

Говьсүмбэр аймгийн Хөдөлмөр, нийгмийн зөвшлийн гурван талт 2017-2018 оны хамтын хэлэлцээрийг дүгнэх уулзалтанд Мэргэжлийн хяналтын байгууллагын зүгээс авч хэрэгжүүлсэн арга хэмжээнийхээ талаар тайлагнаж оролцлоо.

Мэргэжлийн хяналтын байгууллагаас бүх аж ахуйн нэгж, байгууллагад хөдөлмөрийн аюулгүй байдал, эрүүл ахуйн болон үйлдвэрлэлийн осол, хурц хордлого, мэргэжлээс шалтгаалах өвчнөөс урьдчилан сэргийлэх талаар гарсан хууль тогтоомжийн хэрэгжилтийг ханган ажиллах гэсэн зорилтын хүрээнд Хөдөлмөрийн аюулгүй байдал, эрүүл ахуйн тухай”, “Хөдөлмөрийн тухай” хууль, эдгээртэй нийцүүлэн гаргасан дүрэм журам, стандартын билэлтийг хангуулахаар нийт 27 удаагийн хяналт шалгалт, таван удаагийн салбарын сургалт зохион байгуулсан байна.

Хяналт шалгалтаар илэрсэн зөрчил дутагдлыг арилгуулж, үйлдвэрлэлийн ослоос урьдчилан сэргийлэх, холбогдох хууль тогтоомжийн хэрэгжилтийг хангуулахаар 21 ААНБ-д нийт 11 албан шаардлага, 10 зөвлөмж хүргүүлэн ажилласан.

Мөн ажилтнуудад олгогдоогүй байгаа цалин хөлс, олговор, тусгай зориулалтын санд төвлөрүүлээгүй төлбөр зэрэг нийт 23861.6 мянган төгрөгийг нөхөн олгуулахаар улсын байцаагчийн акт долоон удаа тогтоосон байна.

Нийт 17 зөрчлийг хяналт шалгалтын явцад, албан шаардлага, зөвлөмжөөр 103 зөрчлийг арилгуулж, хөгжлийн бэрхшээлтэй иргэн ажиллуулаагүй орон тоо тутамд төлөх төлбөр 11880.0 мянган төгрөгийг хөдөлмөр эрхлэлтийг дэмжих санд төвлөрүүлэх боломжийг бүрдүүлэн, 25 ажилтанд 11981.6 мянган төгрөгийн ээлжийн амралтын олговор олгуулжээ.

Төлөвлөгөөт шалгалтаар хөдөлмөрийн аюулгүй байдал, эрүүл ахуйн тухай хууль тогтоомжийн хэрэгжилт 77,3 хувь байсныг 81,1 хувь, Хөдөлмөрийн тухай хууль тогтоомжийн хэрэгжилт 92,9 хувь байсныг 95,5 хувьд хүргэсэн байна.

Хөдөлмөрийн тухай хуулийн зөрчилгүй байгууллага хамт олон болгохын төлөө аян зохион байгуулж, иргэд, хөдөлмөрчид, төрийн албан хаагчдын Хөдөлмөрийн тухай хууль тогтоомжийн мэдлэгийг дээшлүүлэх гэсэн зорилтын хүрээнд төрийн болон төрийн бус байгууллагуудтай хоёр удаагийн сарын аяныг зохион байгуулж нийт 15 ажил төлөвлөснөөс 15 ажлыг 100 хувийн гүйцэтгэлтэй зохион байгуулсан байна.

Төв аймгийн Мэргэжлийн хяналтын газраас Баянчандмань, Баянцогт, Борнуур, Зуунмод, Жаргалант сумдын хүнсний үйлдвэрлэл, худалдаа, үйлчилгээ эрхлэгчдэд урьдчилан сэргийлэх хяналт шалгалт хийв.

Шалгалтаар хадгалалтын хугацаа дууссан 240 нэр төрлийн 30,1 кг, 4584 ширхэг, хүнсний бүтээгдэхүүнийг хураан авч сумын Засаг даргын дэргэдэх орон тооны бус зөвлөлд шилжүүлэн, холбогдох хууль тогтоомжийн дагуу хариуцлага тооцож гурван удаагийн сургалт зохион байгуулан мэргэжил арга зүйн зөвлөгөө өгчээ.

Ховд аймгийн Мэргэжлийн хяналтын газраас шинжилгээнд хамрагдаагүй, хөгцөрч муудсан хүнсний түүхий эд, бүтээгдэхүүнээр үйлдвэрлэл явуулж байсан зөрчлийг илрүүлэн тус аж ахуйн нэгжийн үйл ажиллагааг түр зогсоож, холбогдох хуулийн дагуу арга хэмжээ авав.

Мөн Булган суманд тариалсан гэх чацарганыг эрүүл ахуй, стандартын шаардлага хангаагүй нөхцөлд, барилгын агуулахад боловсруулан савлаж байсан зөрчлийг илрүүлэн, таслан зогсоожээ.

Ховд аймгийн Мэргэжлийн хяналтын газраас цагаан сарын баярыг угтаж урьдчилан сэргийлэх хяналт шалгалтыг явуулж байгаа бөгөөд 67 зөрчил илрүүлэн, 28-ыг газар дээр нь арилгуулсан байна.

Малын чанар, үүлдэрлэг байдлыг сайжруулах, нэг малаас авах ашиг шимийг нэмэгдүүлэх, гарал үүслийг тодорхойлох ажлын үндэс нь малыг ялган тэмдэглэх, бүртгэх, мэдээллийн сан бий болгох гэж салбарын мэргэжилтнүүд үздэг. Тиймээс ч малын бүртгэл, мэдээллийн нэгдсэн системийг туршин суурилуулах, нэвтрүүлэх ажлыг 2011 оноос 21 аймгийн 330 суманд эхлүүлжээ.

Монгол Улсад малыг бүртгэлжүүлэх, мэдээллийн сан бий болгох ажлыг Хүнс, хөдөө аж ахуй, хөнгөн үйлдвэрийн яам хариуцаж байна. Одоогийн байдлаар 16 аймгийн 53 сумын 369 мянган толгой малд үзлэг, ангилалт хийснээс 150 мянган малыг ялган тэмдэглэж, ээмэгжүүлээд байгаа юм. Найман жилийн өмнөөс хэрэгжүүлж эхэлсэн энэ ажлыг эрчимжүүлэх зорилгоор салбарын яам, Францын мал аж ахуйн хүрээлэнтэй хамтран туршилтын төсөл хэрэгжүүлэхээр болжээ.

Монгол Улсын Засгийн газар, Бүгд найрамдах Франц Улсын Засгийн газар хоорондын хамтын ажиллагааны санамж бичгийн хүрээнд Монгол Улсын малыг ялган тэмдэглэж, бүртгэлжүүлэх ажлыг хэрэгжүүлэхээр харилцан тохиролцсон. Энэ дагуу туршилтын төслийг Францын мал аж ахуйн хүрээлэнтэй хамтран боловсруулж, Дэлхийн худалдааны байгууллагын төслийн сонгон шалгаруулалтад тэнцэн, улмаар техник туслалцааны дэмжлэг авахаар болсон нь энэ юм.

Туршилтын төслийг Өвөрхангай аймгийн гурван суманд хэрэгжүүлнэ. Нийт 170 мянган малыг ялган тэмдэглэх, бүртгэлжүүлэх ажлыг зохион байгуулж, 2 махны үйлдвэртэй хамтран ажиллана. Төсөл 2019 оны 1 дүгээр сараас 2020 оны 2 дугаар сар хүртэл үргэлжилнэ гэж ХХААХҮЯ-ны Малын үржил, бүртгэлийн бодлогын хэрэгжилтийг зохицуулах газрын дарга Д.Батсүрэн мэдээлэв.

Төслийн явцад хэрэгжүүлэх ажлыг тодруулбал, малын үндэсний бүртгэл мэдээллийн нэгдсэн санг шинэчлэх хүрээнд мэдээлэл дамжуулах зориулалттай уншигч төхөөрөмжийг ашиглах, малын шилжилт хөдөлгөөнийг онлайнаар хянах боломжийг бүрдүүлэх юм.Ийнхүү нэгэнт бий болсон системийг шинэчилснээр мал үржлийн ажил шинэ шатанд гарч, малын ашиг шим, үүлдэр угсаа сайжирна. Малын шилжилт хөдөлгөөнийг хянаснаар малын хулгай буурна. Малын гарал үүслийг тодорхойлж, мөрдөн мөшгидөг болсноор түүхий эдийн чанар сайжрах зэрэг олон үр дүн гарна гэж Францын Мал аж ахуйн хүрээлэнгийн ажилтан Эрик Рехбентайлбарлаж байна.

“Монгол Улсын малыг ялган тэмдэглэх, бүртгэлжүүлэх системийг шинэчлэх” туршилтын төсөл нэг жилийн хугацаанд хэрэгжиж, үр дүнд хүрч чадвал цаашид Монгол Улсын бүх аймаг, суманд хэрэгжүүлэхээр төлөвлөжээ.

Нийслэлийн иргэдийн төлөөлөгчдийн 21 дүгээр хуралдаанаар “Улаанбаатар хотын цэцэрлэгжүүлэлтийн мастер төлөвлөгөө”-г өргөн барьж батлууллаа. Монгол улсын иргэн бүр эрүүл аюулгүй орчинд амьдрах эрхтэй. Монгол улсын хүн амын 50 гаруй хувь нь амьдарч байгаа Нийслэлийн иргэд эрүүл аюулгүй орчинд сайжруулахын тулд “Өөрийн онцлогтой цэцэрлэгт ногоон хотыг хамтаараа байгуулна” гэсэн зорилгын доор нэгдэж ногоон байгууламжийн дунд хугацаанд баримтлах /10-12 жилд/ бодлогын баримт бичигтэй боллоо.

Хотын агаар, хөрсний бохирдолтыг бууруулж нэг хүнд оногдох ногоон байгууламжийн хэмжээг нэмэгдүүлэх хүрээнд 4 стратегийн чиглэлийг тодорхойллоо. Цаашид ногоон байгууламж, цэцэрлэгжүүлэлтийн ажлыг өргөжүүлэхэд салбарын эрдэм шинжилгээний байгууллага, төрийн байгууллагын уялдаа холбоог сайжруулж, иргэд, аж ахуй нэгж байгууллагын үүрэг хариуцлагыг нэмэгдүүлэн 724 төсөл хөтөлбөрийг танилцуулж хэрэгжүүлэх арга зам, хөрөнгө оруулалт эх үүсвэрийн хэрхэн бүрдүүлэх талаар танилцууллаа.