УИХ-ын гишүүн О.Баасанхүү мэдээлэл хийлээ. Тэрээр, “МАН-ын гишүүд бүгдээрээ шалгагдаж байгаа юм билээ. Хэн нь хэнийгээ түрүүлж хорих анги руу авч явах вэ гэдгийг л би харж байна. Шударга бусын хонгил гэж яриад байдаг, гэтэл хулгай хийсэн хүн нь хулгай хийсэн хүнээ барих гээд сууж байгааг ямар хонгил гэх вэ. Хууль хүн бүрт тэгш үйлчлэх эрхтэй. Надад ирсэн мэдээллээр, ЖДҮХС-ийн зээлийг эхнэр нь аваад, зориулалтын бусаар ашигласан бол ёс зүйн хариуцлага хүлээлгэх ёстой гэж бодож байгаа. Тойргийн иргэд болон найз нөхдөдөө ЖДҮХС-аас зээл авч өгөөд хувь хүртсэн УИХ-ын гишүүд ч байгаа. Мөн авсан зээлээ буруугаар ашигласан, тодорхой хувь авсан, гурван хувийн хүүтэй аваад 60 хувийн хүүтэйгээр зээл олгосон нь мөнгө угаасан хэрэгт холбогдож байгаа юм. Одоогоор гурван гишүүнийг мөнгө угаасан хэрэгт холбогдуулан шалгаж байгаа, түдгэлзүүлэх санал оруулахаар нийслэлийн прокурор дээр яллах дүгнэлт үйлдсэн байгаа гэдэг мэдээлэл ч тодорхой юм билээ. Ерөнхий прокурорын байгууллагаас лавлахад удахгүй энэ асуудлыг оруулна гэдэг мэдээлэл өгсөн. Хэрвээ гишүүдийг эргүүлэн татчихвал шүүрэн шанагаар гоожиж буй мэтээр бусад нь ч мөн дагаж асуудалд орно.” гэлээ.
Хуульч Д.Миеэгомботой ярилцлаа.
Сарын дараа Беверли Хиллсд болох Холливүүдийн томоохон наадам “Алтан бөмбөрцөг”-ийн шагнал гардуулах ёслолыг анх удаа Ази гаралтай жүжигчин хөтлөхөөр болсныг зохион байгуулагчид нь өчигдөр зарлалаа. Ирэх оны нэгдүгээр сарын 6-нд болох 76 дахь удаагийн арга хэмжээг 47 настай, солонгос гаралтай Канадын жүжигчин Сандра О хошин урлагийн жүжигчин Энди Сэмбергтэй хамтран хөтлөхөөр болжээ. Тэд өнгөрсөн есдүгээр сард энэ оны Эммийн шагналтны нэрийг зарлахаар хамтдаа тайзан дээр гарч ирж байв.Жүжигчин бүсгүйн эцэг эх нь Өмнөд Солонгосоос Канадын нийслэл Оттавад цагаачлан ирсэн хүмүүс юм. Сандра О бараг арван жил үргэлжилсэн “Grey’s Anatomy” цувралын дүрээрээ “Алтан бөмбөрцөг” хүртэж байсан юм. Одоо тэр BBC сувгийн “Killing Eve” цувралд дүр бүтээж байгаа. “Алтан бөмбөрцөг” шагналыг Ази гаралтай нийтдээ 12 хүн хүртэж байжээ. Телевиз, киноны салбарын шагналын энэ жилийн нэр дэвшигчдийг Улаанбаатарын цагаар өнөөдөр орой зарлах юм.
Онцгой байдлын ерөнхий газар, АНУ-ын Элчин сайдын яам, Энэтхэг, Номхон далайн цэргийн командлалтай хамтран жил бүр “Говийн чоно” олон улсын сургалт, дадлага сургуулийг зохион байгуулдаг уламжлалтай. “Говийн чоно-2019” олон улсын сургалт, дадлага сургуулийг Дорноговь аймагт 2019 оны 09 дүгээр сард зохион байгуулахаар болсон Үүнтэй холбогдуулан ОБЕГ-ЫН дэд дарга, хурандаа Б.Ууганбаяр өнөөдөр АНУ-ын Аляскийн Үндэсний гвардын нэгдсэн штабын дарга, хурандаа Кимберли Дироун тэргүүтэй төлөөлөгчдийг хүлээн авч уулзлаа. Уулзалтаар олон улсын сургалт, дадлага сургуулийн онцлог болоод Монгол, Америкийн аврагчдын хамтран хийх дадлага сургуулийн талаар хэлэлцэж, санал солилцлоо гэж Онцгой байдлын ерөнхий газраас мэдээллээ.
Буддын шашин нь монголчуудын ахуй амьдралд бүрнээ нийцсэнээс гадна буддизм нь онол, арга зүйн хувьд төрийн хэргийг эрхлэн явуулахад эерэг нөлөө үзүүлснийг өнөөдөр болсон “Монгол дахь буддын судлал ба нийгэм-улс төрийн сэтгэлгээний түүхийн асуудалд” сэдэвт эрдэм шинжилгээний бага хурлын үеэр судлаачид онцлов. Тус хурлыг доктор, профессор Г.Лхагвасүрэнгийн мэндэлсний 60 жилийн ойд зориулсан “ШУА-ийн Философийн хүрээлэн, МУИС-ийн Философи, шашин судлалын тэнхим, Удирдлагын академи, “Гүржавын Лхагвасүрэн” сан хамтран зохион байгууллаа. Доктор, профессор Г.Лхагвасүрэн нь буддын йогачара философи, Ноён хутагт Данзанравжаагийн гүн ухааны үзлийг системтэй судалж, эрдэм шинжилгээний олон бүтээл туурвисан нь өнөө хэр судлаач, суралцагчдын ширээний ном, гол эх сурвалж болсоор байна. Хурлыг ШУА-ийн Тэргүүн дэд ерөнхийлөгч, академич Г.Чулуунбаатар, Монгол Улсын Ерөнхийлөгчийн Соёл, шашны бодлогын зөвлөх Ц.Хулан, МУИС-ийн ШУС-ийн захирал доктор (Ph.D.), профессор Г.Эрдэнэбаяр, Удирдлагын академийн захирал доктор (Ph.D.), профессор С.Зүльфикар нар нээж үг хэлэв. Уг хурлыг “Монголын буддын судлалд”, “Монголчуудын нийгэм-улс төрийн сэтгэлгээний түүх судлалд”, “Ноён хутагт Данзанравжаа судлалд”, “Сэтгэлийн тухай буддын сургаалын судлалд” гэсэн салбар хуралдааны хүрээнд зохион байгуулж, салбарын нэр хүндтэй эрдэмтэд илтгэлээ танилцуулж бүтээлч хэлэлцүүлэг өрнүүлсэн юм. Тухайлбал, доктор (Sc.D.), профессор, шинжлэх ухааны гавъяат зүтгэлтэн Л.Тэрбиш “Жанжаа хутагт Ролбийдорж төгс зохионгуйн товч”, доктор профессор С.Янжинсүрэн, доктор профессор Б.Дагзмаа нар “Монголын нийгэм-улс төрийн сэтгэлгээний түүх интердисциплинар сургалтын хөтөлбөр хэрэгжүүлэх хэрэгцээ, шаардлага”, доктор профессор Б.Тунгалаг “Г.Лхагвасүрэнгийн “Ноён хутагт Данзанравжаа” бүтээл дэх нийгэм-зан суртахууны орчин үеийн ач холбогдол”, доктор профессор Т.Булган “Буддын Йогачара философийн зарим категориудыг авч үзэх нь”, доктор профессор М.Гантуяа “Сэтгэлийн чанар ба гүн ухааны мэтгэлцээн” сэдэвт илтгэлээ танилцуулав. Нийт 17 эрдэмтэн, судлаач илтгэл тавьж хэлэлцүүллээ.
Сонгуулийн тухай хуулийн 137 дугаар зүйлийн 137.1 дэх хэсэгт “Улсын Их Хурлын гишүүний орон гарсан бол нөхөн сонгууль явуулна” гэж, мөн хуулийн 20 дугаар зүйлийн 20.1 дэх хэсэгт “Нөхөн сонгуулийн санал авах өдөр нь жил бүрийн зургадугаар сарын сүүлийн Ням гараг болон аравдугаар сарын эхний Ням гараг байх ба улс даяар нэгдсэн журмаар явагдана” гэж заасан. Иймд Улсын Их Хурлын сонгуулийн 42 дугаар тойрогт явагдах нөхөн сонгуулийг товлон зарлаж, санал авах өдрийг тогтоох, сонгуулийн зардлын хэмжээг тогтоох тухай шийдвэр гаргуулах саналаа Сонгуулийн ерөнхий хорооноос Улсын Их Хуралд хүргүүллээ.
Хэнтий аймгийн Өмнөдэлгэр суманд өнгөрсөн долдугаар сарын 13-нд үл таних этгээд хоёр залуугийн бие рүү шатахуун асгаж шатаасан харамсалтай хэрэг гарсан билээ. Хохирогч болох хоёр эрэгтэй 34, 37 настай, эгч дүүсийн хүүхдүүд бөгөөд нэг нь түлэнхийн шархаа даалгүй нас барсан бол нөгөө нь түлэнхий гүн соривтой болж хоцорсон юм. Хэрэг явдын тухайд гэвэл, тэр үед ах дүү хоёр дэлгүүрт байхдаа үл таних хүнтэй маргалдсан байна. Тэднийг дэлгүүрээс гарч ирэхэд тухайн маргасан этгээд ах руу нь таван литрийн савтай бензин цацаж галдан шатаахад дүү нь ахыгаа хамгаалан дээрээс нь дарахад мөн түүний дээрээс шатахуунаасаа асган шатаасан онц хэрцгий жигшүүрт хэргийг үйлдсэн байдаг. Тэгвэл энэхүү аймшигт хэргийг үйлдсэн этгээдийг шүүх хурал Хэнтий аймгийн шүүхэд болж байгаа ажээ. Шүүх хурлын шийдвэрийн талаар эргэн мэдээлнэ.
Нийслэлийн Эрүүл мэндийн газраас Чингэлтэй дүүргийн төрийн өмчит бүх цэцэрлэгийн багш нарт “Амны хөндийн эрүүл мэнд” сургалтыг зохион байгуулахаар болжээ. Энэ удаагийн сургалтад Чингэлтэй дүүргийн төрийн өмчит бүх цэцэрлэгийн эрхлэгч, арга зүйч, дүүргийн болон өрхийн эмнэлгийн эмч, нийгмийн ажилтан, дүүргийн Засаг даргын тамгын газрын эрүүл мэнд, боловсрол хариуцсан мэргэжилтэн, хүүхэд, гэр бүл хөгжлийн мэргэжилтэн нарыг хамруулах юм байна. Сургалтад хамрагдсан сургагч багшаар дамжуулан цэцэрлэгийн багш нарт “Амны хөндийн эрүүл мэнд” сэдвээр мэдлэг олгох ажээ. Сүүлийн жилүүдэд сургуулийн өмнөх насныхан болон ЕБС-ийн сурагчдын дунд шүдний цоорол өвчин эрс нэмэгдэх болсон. Шүдний цоорол нь чих, хамар хоолойн үрэвсэлт өвчнөөс гадна 200 гаруй төрлийн өвчний шууд шалтгаан болоод зогсохгүй, хүүхдийн суурь өвчин, амьсгалын замын өвчлөлийн дам шалтгаан болж байна. Тодруулбал, АШУҮИС-ийн Нүүр ам судлалын сургуулийн 2017 онд хийсэн судалгаагаар, бага насны хүүхдийн 86 хувь нь шүдний цооролтой, 14 хувь нь эрүүл гарчээ. Шүд цоорох өвчний тархалт сургуулийн өмнөх насны хүүхдийн дунд 86.2 хувь, сургуулийн насныханы дунд 86.1 хувьтай байсан аж. Бага насны хүүхдийн дунд шүд цоорох өвчний тархалт өндөр байгаа нь иргэдийн дунд амны хөндийн эрүүл ахуйн мэдлэг хангалтгүй, шүдээ зөв арчлах дадал заншил бүрэн төлөвшөөгүйтэй шууд холбоотойг холбогдох албаныхан хэлж байна. Үүний улмаас шүдний өвчин хүндрэх, шүдгүйдэлд хүрэх, зажлах, хоол боловсруулах эрхтний үйл ажиллагаа хямрах, төдийгүй нийгэмд харилцах өдөр тутмын идэвх алдагдаж, амьдралын чанар буурахад хүргэж байгааг онцолжээ.