Валют арилжааны “Найман шарга” захад ченжүүд ам.долларыг 2637 төгрөгөөр худалдан авч, 2645 төгрөгөөр зарж байна. Өнгөрсөн долоо хоногийн баасан гаригт тус зах дээр ам.доллар 2650 төгрөгтэй тэнцэж байсан юм. Монголбанк өнөөдөр ам.долларын ханшийг 2.632.90 төгрөгөөр тэнцүүлжээ. Арилжааны банкнуудын валютын зах зээлд хэрхэн оролцож буйг хүснэгтээр үзүүлэв.
Кэмбриджийн их сургуулийн Монгол болон Өвөр Ази судлалын төвийн профессор Урадын Булагийг төрийн дээд шагнал “Алтангадас” одонгоор шагнажээ. Монгол Улсын Ерөнхийлөгчийн 2018 оны арваннэгдүгээр сарын 21-ний өдрийн 149 дүгээр зарлигаар Монгол Улсын түүх, өв соёлыг хилийн чанадад сурталчлан таниулах, Британи дахь монгол судлалыг хөгжүүлэх үйлсэд оруулсан хувь нэмрийг нь үнэлэн тус шагналыг хүртээсэн байна. Кэмбриджийн их сургуулийн Монгол болон Өвөр Ази судлалын төвийн судлаач Либби Пиччиг төрийн дээд шагнал “Найрамдал” медалиар шагнасныг Монгол Улсаас ИБУИНХУ-д суугаа Онц бөгөөд Бүрэн эрхт Элчин сайд Н.Тулга гардуулан өгсөн ажээ.
УУХҮЯ -аас “Шатахууны худалдаа эрхлэгч аж ахуйн нэгжүүдэд жижиглэнгээр борлуулж буй шатахууны үнийг эдийн засгийн зохистой түвшинд тогтвортой байлгах” заалтыг хэрэгжүүлэх, мөн шатахууны хилийн үнэ буурсан үед шатахууны жижиглэнгийн үнийг буулгаж байх чиглэл хүргүүлсэний дагуу өнөөдрөөс эхлэн шатахууны үнэ 100 төгрөгөөр буурлаа. Уг заалт Монгол Улсын Засгийн Газрын 2018 оны 59 дүгээр тогтоолоор батлагдсан “Газрын тосны бүтээгдэхүүний үнэ хангамж, үнийг тогтворжуулах зохион байгуулах, хяналт тавих үүрэг бүхий төр хувийн хэвшил иргэний нийгмийн байгууллагуудын хамтарсан зөвлөл”-ийн 2018 оны 1, 2, 3 дугаар хуралдаанаас гарсан Зөвлөмжид тусгагдсан байдаг. Цаашид шатахууны үнэ үе шаттайгаар буурахыг салбарын яамнаас мэдэгдлээ.
УИХ-ын чуулганы үдээс өмнөх хуралдаан ирц бүрдээгүйн улмаас хуралдсангүй. Үүнтэй холбогдуулан УИХ-ын дарга М.Энхболд УИХ-ын гишүүд, Засгийн газарт хандаж үг хэлэв.
Түүний хэлсэн үгийг бүрэн эхээр нь хүргэе.
“УИХ-ын гишүүд ээ, Арванхоёрдугаар дугаар сарын 06-ны үдээс хойших хуралдаан, 12 дугаар сарын 7-ны үдээс өмнөх хуралдаан гишүүдийн ирц хүрээгүйгээс, Засгийн газрын гишүүд хүрэлцэн ирээгүйгээс болоод хуралдаж чадсангүй.
Засгийн газраас Ашигт малтмалын тухай хуульд нэмэлт, өөрчлөлт оруулах тухай асуудлыг яаралтай хэлэлцүүлэх хүсэлт ирүүлсэн. Энэ дагуу УИХ-ын даргын захирамж гарч, хэлэлцэж эхэлсэн. Харамсалтай нь Уул уурхай, хүнд үйлдвэрийн сайд чуулганы хуралдаанд ирээгүйгээс гишүүд асуулт асууж чадахгүй болж, ирц бүрдээгүйгээс санал хураалт явуулж чадсангүй. Ингээд энэ асуудал хоёр өдрийн турш хэлэлцэгдсэнгүй.
УИХ-ыг ард түмэн сонгодог. Ард түмэн Та биднийг улс эх орныг удирдан чиглүүлэх бодлого, чиглэлийг тогтоо, хууль эрх зүйн орчныг бүрдүүлж өг гэж сонгосон. Парламентын үйл ажиллагааг тасралтгүй явуулж, улс орны өмнө тулгамдсан асуудлыг шийдвэрлэхийн тулд ямар шийдвэр гаргах ёстой байна, түүнийг цаг алдалгүй гаргаж бай гэж сонгосон.
Засгийн газрыг УИХ томилдог. Ингэхдээ УИХ-ын гаргасан бодлогыг хэрэгжүүлж, тогтоосон хууль тогтоомжийн хүрээнд бодлого шийдвэрээ гарган хэрэгжүүлж, УИХ-д асуудлаа танилцуулж, тайлагнаж ажилла гэж томилсон.
Засгийн газар, түүний Тэргүүн Үндсэн хуульд заасны дагуу хууль тогтоомжийн хэрэгжилтийг УИХ-ын өмнө бүрэн хариуцаж, УИХ-д ажлаа тайлагнах хуультай. Гэтэл Улсын УИХ-ын үйл ажиллагааг Засгийн газрын гишүүд, сайд нар явуулахгүй, хоёр өдрийн турш бойкотлож байна.
Бид бензин шатахууны үнийн нэмэгдэл, валютын ханшны өсөлтийн асуудлыг Засгийн газраас асуугаад дөрөв дэх долоо хоног руугаа орж байна. Нэр дэвшүүлж, өргөн барьсан сайдыг нь томилж өгөх гээд гурав дахь долоо хоног руугаа орлоо. Засгийн газрын өмнө тулгамдсан асуудлыг шийдвэрлэхэд УИХ бэлэн байна. Өнгөрсөн долоо хоногт Засгийн газартай хариуцлага тооцох асуудлыг хэлэлцээд, УИХ-ын гишүүдийн олонх итгэл үзүүлж, ажлаа үргэлжлүүлж хий гэсэн шийдвэрийг гаргасан. Одоо улстөржилтөө зогсоож, Засгийн газар ажлаа хийх ёстой. Засгийн газар нь УИХ-ын үйл ажиллагааг тасалдуулж байдаг цаг одоо биш ээ.
Цаг агаарын байдал хүндэрч, өвөлжилтийн байдал ч амаргүй байх шинжтэй боллоо. Улс орны хэмжээнд уламжлалт мал тооллогын ажил эхэллээ. Энэ мэт олон ажил, арга хэмжээг Засгийн газар зохион байгуулах үүрэгтэй. Улаанбаатар хотын агаарын бохирдолттой холбоотой асуудлаар ямар ямар арга хэмжээ авах гэж байгаагаа УИХ-д танилцуулж ажиллах ёстой.
Тийм учраас Засгийн газрыг ажлаа шуурхай хийж, УИХ-ын үйл ажиллагааг таслалдуулахгүй явуулахыг би шаардаж байна. Төр тогтвортой байх ёстой. Үүний төлөө би ажиллана. Төр тогтвортой байж гэмээнэ түмэн олон тайван амгалан ажиллаж, амьдрах үндэс бүрдэнэ.
Сүүлийн үед Үндсэн хуулийн бус аргаар төр засгийн эрх мэдлийг авах гэсэн оролдлогуудыг эрээ цээргүй хийж байна. Үүнтэй бид хатуу тэмцэх ёстой. Олон түмнийг тэмцэлд уриалах, тэмцлийн хатуу хэлбэрт шилжинэ хэмээн олон түмнийг цочирдуулах уриалга лоозонг УИХ-ын гишүүд ярьж байна. Энэ бол Үндсэн хууль, бусад хууль зөрчсөн асуудал гэж үзэж байна.
Түүнчлэн “60 тэрбумын” гэх хэргээр ЖДҮХС-гийн хөрөнгийг зүй бусаар тараасан асуудлыг дарах оролдлого, сурталчилгааг ихээр хийх боллоо. Үүнийг зогсоох ёстой гэж үзэж байна.
“60 тэрбумын” гэх хэргээр Төрийн байгуулалтын байнгын хорооны дарга ирэх 7 хоногт хэлэлцүүлгээ хий. Ёс зүйн дэд хороо ЖДҮХС-гийн асуудалтай нэр холбогдсон гишүүдийнхээ ёс зүйтэй холбоотой асуудлыг хэлэлц, дэд хороогоо хуралдуул. Хэрвээ дэд хорооны чинь ирц бүрддэггүй юм бол хуралд ирэхгүй байгаа хүмүүсээ чөлөөлж, өөр хүмүүсийг оруулж, үйл ажиллагаагаа явуулах нь зүйтэй. УИХ-ын даргын хувьд үүнийг үүрэг болгож байна.
Намайг огцруулъя гэж байгаа бол хуулийн дагуу шаардлага, саналаа бичгээр, албан ёсоор тавь. Хэвлэл мэдээллийн PR болгож битгий ашигла. Төрийн ажил хуулийн дагуу явагдах учиртай. Бид хуульд нийцсэн үйл ажиллагаа л явуулах ёстой.
Засгийн газар УИХ-ын өмнө хүлээсэн үүргээ бүрэн дүүрэн биелүүлж чадахгүй байгаагаас болоод УИХ-ын хоёр өдрийн чуулганы нэгдсэн хуралдаан хуралдаж чадаагүйд би ард иргэдээсээ уучлалт хүсье” гэв.
Монгол Улс, БНАСАУ-ын хооронд дипломат харилцаа тогтоосны 70 жилийн ой ирэх онд тохионо. Ойн хүрээнд БНАСАУ-ын Гадаад хэргийн сайд Ри Ён Хо 2018 оны арванхоёрдугаар сарын 8-9-нд Монгол Улсад айлчлал хийхээр болжээ. Айлчлалын хүрээнд Гадаад харилцааны сайд Д.Цогтбаатар БНАСАУ-ын Гадаад хэргийн сайд Ри Ён Хо-той албан ёсны хэлэлцээ хийж, хоёр талын харилцаа, хамтын ажиллагааг өргөжүүлэх, олон улс, бүс нутгийн харилцан сонирхсон асуудлуудаар санал солилцох аж.
Үүсээд буй нөхцөл байдалтай холбогдуулан Монгол Улсын Их Хурлаас Монгол Улсын Ерөнхий сайд У.Хүрэлсүхэд шаардлага хүргүүллээ. “Шаардлага хүргүүлэх тухай” албан бичгийг УИХ-ын дэд дарга Л.Энх-Амгалан хэвлэл мэдээллийнхэнд танилцуулав. Шаардлагыг бүрэн эхээр нь толилуулъя.
МОНГОЛ УЛСЫН ИХ ХУРЛААС МОНГОЛ УЛСЫН ЕРӨНХИЙ САЙД УХНААГИЙН ХҮРЭЛСҮХЭД ХҮРГҮҮЛЭХ ШААРДЛАГА
Монгол Улсын Их Хурлын даргын дэргэдэх Зөвлөлийн 2018 оны 12 дугаар сарын 03-ны өдрийн хурлаар баталсан хуваарийн дагуу Улсын Их Хурлын чуулганы 2018 оны 12 дугаар сарын 06-ны өдрийн нэгдсэн хуралдаанаар Монгол Улсын Засгийн газрын гишүүн-Хүнс, хөдөө аж ахуй, хөнгөн үйлдвэрийн сайдыг томилуулах санал, Засгийн газраас нэн яаралтай хэлэлцүүлж өгөх Таны хүсэлт зэрэг улс орны өмнө тулгамдаж байгаа нэн чухал асуудлыг хэлэлцэхээр төлөвлөсөн байсан.
Гэтэл Монгол Улсын Ерөнхий сайд Та Засгийн газрын гишүүн-Хүнс, хөдөө аж ахуй, хөнгөн үйлдвэрийн сайдыг томилуулах саналаа танилцуулаагүйгээс уг асуудлыг гишүүдийн олонхын саналаар хойшлуулсан. Засгийн газраас нэн яаралтай горимоор хэлэлцүүлэхээр Монгол Улсын Их Хуралд өргөн мэдүүлсэн улс орны эдийн засаг, төсөв санхүүтэй холбоотой чухал асуудлыг хэлэлцэж байгаа хуралдааныг Засгийн газрын хэд хэдэн гишүүн орхиж гарсны улмаас хэлэлцэх боломжгүй болсон.
Та болон асуудал хэлэлцүүлэх ёстой Засгийн газрын 13 гишүүн чуулганы нэгдсэн хуралдаанд зориуд оролцохгүй байгаагаас валютын ханш болон нефть шатахууны үнийн өсөлт, Улаанбаатар хотын агаар, орчны бохирдол, утааны асуудал зэрэг ард иргэдийн амьдрал ахуй, эрүүл мэндтэй холбоотой, иргэдийн өмнө тулгамдаж байгаа даруй шийдвэрлэвэл зохих асуудлаар хийгддэг Ерөнхий сайдын мэдээлэл, гишүүний асуулгын хариуг Улсын Их Хурлаар сонсох ажиллагаа 4 удаа хойшилсоор өнөөдрийг хүрлээ.
Монгол Улсын Ерөнхий сайд Та Улсын Их Хурлын чуулганы өнөөдрийн үдээс хойших хуралдаанд оролцож Мал аж ахуйн салбарыг хөгжүүлэх талаар төрөөс баримталж буй бодлогын хэрэгжилт, өвөлжилтийн бэлтгэл ажлын талаар мэдээлэл хийх ёстой.
Монгол Улсын Ерөнхий сайд Үндсэн хуулийн дагуу танхимаа бүрдүүлэх байтал өөрөө өргөн мэдүүлсэн Засгийн газрын гишүүн-Хүнс, хөдөө аж ахуй, хөнгөн үйлдвэрийн сайдыг томилуулах асуудлыг гурван долоо хоногийн турш хэлэлцүүлэхгүй байх хууль бус үйлдэл хийж байгаагаас мал тооллогын хугацаа тулсан, өвөлжилт хүндэрч байгаа энэ цаг үед салбар нь эзгүйрч, улс орны стратегийн хүнс болох улаан буудайн нөөц бүрдүүлэх, тариаланчид улаан буудайгаа борлуулах асуудал тодорхойгүй болсон. Нийт аж ахуй эрхлэгчдийн гуравны хоёрыг эзэлж байгаа жижиг, дунд үйлдвэрийн салбарт гарсан алдаа завхралыг цаг алдалгүй засаж, залруулах шаардлагатай байна.
Өмнө нь Монгол Улсын Ерөнхийлөгчөөс 2019 оны төсвийн тухай хуульд бүхэлд нь тавьсан хоригийг хэлэлцэхээр төлөвлөсөн Хууль зүйн байнгын хорооны 11 дүгээр сарын 16-ны өдрийн хуралдааны ирцийг Засгийн газрын гишүүд зохион байгуулалттайгаар хүргэхгүй, хуралд оролцохгүй байх арга хэмжээ авснаар 3 удаа хуралдаж чадаагүй. Түүнчлэн, Байнгын хороо хуралдаагүй тул Ерөнхийлөгчийн хоригийг Улсын Их Хурлын чуулганы 11 дүгээр сарын 17-ны өдрийн нэгдсэн хуралдаанаар хэлэлцэж чадаагүй, 11 дүгээр сарын 22-ны өдөр хэлэлцэхээр төлөвлөсөн боловч Ерөнхий сайд Та болон Шадар сайд Ө.Энхтүвшин, Монгол Улсын сайд, Засгийн газрын Хэрэг эрхлэх газрын дарга Г.Занданшатар, Сангийн сайд Ч.Хүрэлбаатар нарын аль аль нь орж ирэхгүй зохион байгуулалттайгаар Улсын Их Хурлын үйл ажиллагааг тасалдуулж байсан.
Улсын Их Хурлын зарим гишүүд болон иргэд, олон нийт, төрийн бус байгууллагаас тавьсан шаардлага, нийгэмд шударга ёс, хуулийн өмнө эрх тэгш байх зарчмыг хангаж Жижиг, дунд үйлдвэрийг хөгжүүлэх сангаас өөрийн болон өөрийн хамаарал бүхий компанид зээл авсан асуудалд холбогдсон Засгийн газрын нэр бүхий гишүүдэд ёс зүйн хариуцлага тооцох асуудлыг Ёс зүйн дэд хороогоор 11 дүгээр сарын 29-ний өдөр хэлэлцэхээр зарласан боловч тус дэд хороонд харьяалагддаг Засгийн газрын гишүүн Х.Баделхан, Д.Сарангэрэл болон Улсын Их Хурал дахь МАН-ын бүлгийн дарга Д.Тогтохсүрэн нар дэд хорооны хуралд оролцохгүй, зориуд санаатайгаар ирц бүрдүүлээгүй. Жижиг, дунд үйлдвэрийг хөгжүүлэх сангаас өөрийн болон өөрийн хамаарал бүхий компанид зээл авсан асуудалд холбогдсон Засгийн газрын нэр бүхий гишүүдэд ёс зүйн хариуцлага тооцох асуудлыг өнөөдрийг хүртэл авч хэлэлцэж чадахгүй байна.
Мөн танай Засгийн газар Улсын Их Хурлын ирцийг бүрдүүлэхгүй байх хууль бус арга хэмжээ авч, хуралдаанд оролцохгүй байгаагаас Жижиг, дунд үйлдвэрийг хөгжүүлэх сантай холбоотой үүссэн асуудлыг шалгаж, санал, дүгнэлт гаргах түр хороо байгуулах тогтоолын төсөл буюу иргэд олон түмний хүсэн хүлээж, шаардаж байгаа асуудлыг хэлэлцэх боломжгүй болж, хойшилж байна.
Монгол Улсын Их Хурлын чуулганы хуралдааны дэгийн тухай хуулийн 4 дүгээр зүйлийн 4.9 дэх хэсэгт “Гишүүн өвчтэй байсан буюу өвчтэй хүн асарсан, гадаад, дотоод томилолтоор явсан, түүнчлэн хурал, семинарт зайлшгүй оролцох шаардлагатай байсан бол хүндэтгэх шалтгаантай гэж үзэх бөгөөд эдгээр шалтгаан байхгүй бол хуралдаан тасалсанд тооцно.”, мөн зүйлийн 4.10 дахь хэсэгт “Монгол Улсын Үндсэн хуулийн тодорхой заалтыг илтэд зөрчсөн асуудал хэлэлцсэн, эсхүл Монгол Улсын Үндсэн хуульд нэмэлт, өөрчлөлт оруулахыг эсэргүүцэхээс бусад шалтгаанаар гишүүн, нам, эвслийн бүлэг хуралдаанд оролцохгүй байх буюу түүнийг орхиж гарахыг хориглоно” гэж заасан тул хуульд заагаагүй үндэслэлээр Улсын Их Хурлын гишүүн бөгөөд Засгийн газрын гишүүн чуулганы хуралдаанд оролцохгүй байх үндэслэл байхгүй.
Монгол Улсын Үндсэн хуулиар Засгийн газар бол Улсын Их Хурлаас томилогдсон Ерөнхий сайд, гишүүдээс бүрддэг бөгөөд Үндсэн хууль, төрийн хууль биелүүлэх үндсэн чиг үүрэгтэй, үйл ажиллагаагаа Улсын Их Хуралд тайлагнах ёстой байгууллага. Засгийн газар Монгол Улсын Үндсэн хуульд заасан хууль дээдлэх төрийн үйл ажиллагааны үндсэн зарчмыг зөрчих, төрийн эрх барих дээд байгууллагын үйл ажиллагааг тасалдуулах гэсэн хууль бус, зохион байгуулалттай арга хэмжээ авах ёсгүй.
Иймд Монгол Улсын Ерөнхий сайд Таныг болон Засгийн газрын гишүүдийг Монгол Улсын Үндсэн хууль, Монгол Улсын Их Хурлын тухай хууль, Монгол Улсын Их Хурлын чуулганы хуралдааны дэгийн тухай хуулиар хүлээсэн үүргээ биелүүлж, төрийн эрх барих, хууль тогтоох дээд байгууллагын үйл ажиллагааг хууль бусаар тасалдуулах гэсэн үйл ажиллагаагаа 2018 оны 12 дугаар сарын 07-ны өдрийн дотор зогсоож, Байнгын, дэд, түр хорооны болон чуулганы нэгдсэн хуралдаанд оролцохыг шаардаж байна.
Таны тэргүүлж буй Засгийн газрын гишүүд Монгол Улсын Үндсэн хууль, Монгол Улсын Их Хурлын тухай болон Монгол Улсын Их Хурлын чуулганы хуралдааны дэгийн тухай хуулиар хүлээсэн үүргээ биелүүлээгүйн улмаас Монгол Улсын Үндсэн хууль болон бусад хууль тогтоомж зөрчсөн асуудлаас үүдэн гарах аливаа хариуцлагыг Танай Засгийн газар болон Улсын Их Хурлын гишүүний албан тушаалыг давхар хашиж байгаа Засгийн газрын гишүүн сайд нар хүлээх болно гэдгийг хатуу анхааруулж байна.
МОНГОЛ УЛСЫН ИХ ХУРАЛ
Засгийн газрын сайд нар чуулганы хуралдаанд суухгүй бойкот зарласан билээ. Үүнээс үүдэн УИХ-ын чуулганы ирц бүрдэхгүй хуралдаж чадахгүй байна. Тиймээс УИХ-аас Ерөнхий сайд У.Хүрэлсүхэд албан ёсоор шаардлага хүргүүллээ.
Энэ талаар УИХ-ын дэд дарга Л.Энх-Амгалан шаардлагыг танилцууллаа. Шаардлагад “ Та болон таны танхимын УИХ-ын 13 гишүүн чуулганы нэгдэн хуралдаанд оролцохгүй байгаагаас нийгмийн асуудал орхигдож байна. Та өнөөдөр үдээс хойшхи хуралдаанаар мэдээлэл хийх ёстой. Ерөнхий сайд У.Хүрэлсүх ХХААХҮ-ийн сайдын томилгоог танилцуулахгүй улмаас хэлэлцэж чадалгүй хойшлуулсан. Өнөөдөр ХХААХҮ-ийн сайдаа томилж чадахгүй байгаагаас анх удаа Мал тооллогын ажлыг салбарын сайдгүйгээр эхлүүлж байна. Ерөнхийлөгчийн хоригийг хэлэлцэх үед Ерөнхий сайд, Шадар сайд, Сангийн сайд хүрэлцэн ирээгүйгээс хэд хэдэн удаа хойшлуулж байсан. Засгийн газраас нэн яаралтай хэлэлцүүлэхээр УИХ-д өргөн мэдүүлсэн улс орны эдийн засаг, төсөв санхүүтэй холбоотой хэдэн, хэдэн асуудлыг хэлэлцэх гэхэд Засгийн газрын гишүүд орхиж гарснаар хэлэлцэх боломжгүй болсон. Та болон таны Засгийн газрын 13 сайд нар хуралдаа суухгүй байгаа учраас валютын ханшийн өсөлт, нефть, шатахууны үнийн өсөлт, утааны асуудал зэрэг иргэдийн өмнө тулгамдаж буй асуудалтай холбоотой Ерөнхий сайдын мэдээлэл УИХ дээр дөрвөн удаа хойшиллоо. Ерөнхий сайд У.Хүрэлсүх өнөөдөр өвөлжилтийн бэлтгэл ажлын талаар мэдээлэл хийх ёстой. Ерөнхийлөгчийн 2019 оны төсвийн төсөлд тавьсан хоригийг байнгын хороогоор хэлэлцэхэд санаатайгаар гурван удаа хойшлуулсан. Засгийн газрын гишүүд зохион байгуулалттайгаар УИХ-ын үйл ажиллагааг гацааж байна. Танай Засгийн газар УИХ-ын ирцийг бүрдүүлэхгүй байх хууль бус арга хэмжээ авч хуралдаанд оролцохгүй байгаагаас болж ЖДҮХС-аас зээл авсан гишүүдийг шалгах түр хороо байгуулах талаар хэлэлцэж чадахгүй байна. Хуульд заагаагүй үндэслэлээр УИХ-ын гишүүн болон Засгийн газрын гишүүн УИХ-д суухгүй байх шалтгаан болохгүй. Засгийн газар УИХ-аас бүрддэг. иймээс Ерөнхий сайд У.Хүрэлсүх таныг холбогдох хуулийн дагуу хүлээсэн үүргээ биелүүлэхийг шаардаж байна. Үүнээс болж үүдэн гарах аливаа хариуцлагыг танай Засгийн газрын сайд нар хүлээх болно.Засгийн газар хууль бус ажиллагаа явуулах эрхгүй. Хуулийн дагуу ажиллаж хуралд суух үүрэгтэй байгууллага. ЖДҮХС-гаас өөрийн хамаарал бүхий компанидаа зээл авсан сайд нартаа ёс зүйн арга хэмжээг өнөөдрийг хүртэл авч чадахгүй байна. УИХ-ын чуулганы Дэгийн тухай хуулиар УИХ-ын гишүүд хүндэтгэх шалтгаангүйгээр хуралдаандаа оролцохгүй байна. Ерөнхий сайд таны тэргүүлсэн Засгийн газар УИХ-д үйл ажиллагаагаа танилцуулах үүрэгтэй. Түүнээс бус УИХ-ын үйл ажиллагааг хууль бусаар тасалдуулах үүрэг байхгүй. Тиймээс Үндсэн хуулийн зөрчилтэй тулж байна. УИХ-ын үйл ажиллагааг хэвийн явуулах хугацаатай шаардлага хүргүүлж байна” гэжээ.
Уулын баяжуулах “Эрдэнэт” үйлдвэрийн 51 хувийг барьцаанд тавьж, Өмнөд Африкийн “Стандарт” банкнаас их хэмжээний зээл авсан гэх хэрэгт “Жаст”-ын Ш.Батхүү нарыг яллагдагчаар татан шалгаад олон жил болжээ. Хуулийнхан эдийн засгийн гэмт хэрэг болохоор их цаг хугацаа орж байгаа гэж тайлбарладаг. Харин өнөөдөр АТГ-аас хийсэн хэвлэлийн хурлын үеэр Мөрдөн шалгах хэлтсийн дарга Э.Идэрцог “Ш.Батхүү нарт холбогдох хэргийг шалгаж дууссан. Ойрын хугацаанд шүүхэд шилжүүлнэ” гэх мэдээллийг өгөв.
Чуулган өнөөдөр 10.00 цагт товлогдсон ч ирц хүрэхгүй байсаар хуралдааныг УИХ-ын дарга завсарлалуулаа. Тэрбээр хурлыг хаахыг өмнө “УИХ-ын чуулганы хуралдаан сүүлийн хоёр өдөр хуралдах боломжгүй боллоо. Тиймээс ард иргэдээсээ уучлал хүсч, өнөөдрийн чуулганы хуралдааныг хаасныг мэдэгдэж байна. УИХ-ын нэр бүхий гишүүд асуудал тавьж, намайг огцруулах гэж байгаа бол хуулийн дагуу асуудалд хандана уу. 60 тэрбумын асуудлаар ирэх долоо хоногт нээлттэй хэлэлцүүлэг зохион байгуул. Мөн Ёс зүйн дэд хорооны дарга ирцээ бүрдүүлж, ЖДҮ-тэй холбогдсон гишүүдийнхээ асуудлыг ач хэлэлц. Хэрэв ирц хүрэхгүй бол ёс зүйн дэд хорооны гишүүнийг хасч, өөр гишүүдийг сонго, УИХ-ын даргын хувьд би үүрэг болгож байна.” гэв.
Жил бүрийн арванхоёрдугаар сарын 07-17-ны хооронд Монгол Улсын жилийн эцсийн мал тооллогыг улс даяар зохион байгуулдаг. Үүний дагуу 2018 оны мал тооллого өнөөдөр орон даяар эхэллээ. Сүүлийн 10 жилийн мал тооллогын нэгдсэн дүнгээс харахад малын тоо толгой 2010 оноос хойш тогтмол өсчээ. Тухайлбал, 2010 онд 32.7 сая мал тоологдсон бол 2012 онд 40.9 сая, 2014 онд 51.9 сая, 2016 онд 61.5 сая болж хоёр жил тутамд арван саяар нэмэгдсэн үзүүлэлт гарчээ. Малын тоо энэ жилд тав орчим саяар өссөн дундаж үзүүлэлтээр тооцох юм бол 2018 онд улсын хэмжээнд 70 орчим сая мал тоологдох магадлалтай юм байна.