Month: December 2018

Авто замын түгжрэлийг бууруулах, замын хөдөлгөөний аюулгүй байдлыг хангах зорилгоор зам талбайн хог, цас, мөсийг цэвэрлэх ажлыг нийтийн тээвэр, автомашины оргил цагийн хөдөлгөөнтэй уялдуулан хог хаягдлын үйлчилгээний байгууллагуудын өглөөний цагийн хуваарийг дөрөвдүгээр сарын 1-нээс аравдугаар сарын 1-ний өдөр хүртэлх хугацаанд 04:00-06:00 цаг; аравдугаар сарын 1-нээс 2019 оны дөрөвдүгээр сарын 1-ний өдрийг хүртэлх хугацаанд 05:00-07:00 цаг байх тухай Улаанбаатар хотын Ерөнхий Менежерийн А/261 тушаал батлагдсан. Уг тушаалын дагуу Хот тохижилтын газар ОНӨААТҮГ-аас энэхүү цагийн хуваарийг баримталж, өглөөний цагаар Баянхошуу, Чингэлтэй, Тахилт, Хужир булангийн чиглэлд том ажилчдын автобус гарган, 05:00 цагаас эхлэн цэвэрлэгээ үйлчилгээг гүйцэтгэж байна.

Мөн Хот тохижилтын газар ОНӨААТҮГ-аас Зам талбайн үйлчлэгчдийн ажлын ачааллыг бууруулах, цэвэрлэгээ үйлчилгээг шүргэн шуурхай хийх зорилгоор тусгай зориулалтын зам цэвэрлэгээний машинаар авто замын зорчих хэсгийн нуухан дахь хог хаягдал, цасыг соруулан тогтмол цэвэрлэж, гүүр, нүхэн гарц, авто замын зорчих хэсэгт давс, бодис цацан халтиргаа гулгаанаас сэргийлэн ажиллаж байна гэж нийслэлийн Хот тохижилтын газраас мэдээлэв.

Үндэсний их баяр наадмыг зохион байгуулах хорооны хурлаар Тулгар төрийн 2227, Их Монгол Улсын 812, Ардын хувьсгалын 97 жилийн ойн баяр наадмын Үндэсний бөхийн барилдаанд шөвгөрсөн 16 бөхийн сэргээшийн шинжилгээний дүгнэлттэй холбогдуулан авах арга хэмжээний талаар хэлэлцээд дараах шийдвэрийг гаргалаа.

Итгэмжлэгдсэн лабораторийн дүгнэлтээр сэргээш хэрэглэсэн нь тогтоогдсон улсын гарьд Н.Ганбаатар, улсын харцага А.Цацабшир, улсын начин Ц.Бямба-Очир нарын Үндэсний их баяр наадмын бөхийн барилдаанд тав давсныг хүчингүйд тооцлоо.

Улсын гарьд Н.Ганбаатар, улсын харцага А.Цацабшир нарт олгосон “Хурц шаламгай” чимгийг хурааж, улсын баяр наадамд барилдах эрхийг хоёр жилийн хугацаагаар хаслаа. Мөн улсын начин Ц.Бямба-Очирын улсын наадамд барилдах эрхийг хоёр жилээр хасав.

Эдгээр бөхөд тавын даваанд өвдөг шороодсон аймгийн арслан Б.Эрдэнэхүү, улсын начин Ч.Хөхчирэнгэр, улсын арслан Э.Оюунболд нарыг Үндэсний их баяр наадмын бөхийн барилдаанд тав давсанд тооцож, улсын арслан Э.Оюунболд, улсын начин Ч.Хөхчирэнгэр нарт “Өсөх идэр” чимэг олгохоор болов.

Ц.Бямба-Очирт олгосон улсын начин цолыг хасах, аймгийн арслан Б.Эрдэнэхүүд улсын начин шинээр цол олгох саналыг Монгол Улсын Ерөнхийлөгчид өргөн мэдүүлэхээр тогтлоо.

Монгол Улсын Шадар сайд, Үндэсний их баяр наадмыг зохион байгуулах хорооны дарга Ө.Энхтүвшин цаашид сэргээшийн талаарх зөвлөгөө, мэдээллийг нийт бөхчүүдэд таниулан сурталчилж, ийм байдал дахин давтагдахгүй байх нөхцөлийг бүрдүүлэхийн төлөө анхаарч ажиллахыг Бөхийн салбар хорооны дарга Г.Баясгаланд үүрэг болголоо.

Хиймэл дагуулын байнгын ажиллагаатай станцын тусламжтайгаар өндөр нарийвчлалтай Геодизын загварыг ашиглаж эхэллээ. Ингэснээр газрын гадаргын өндөржилт, хотгор, гүдгэрийг кадастрын зурагтай хослуулан боловсруулж, авто зам, инженерийн дэд бүтэц, хот төлөвлөлтийг алдаагүй, эрсдэлгүй хийх боломжийг олгохын зэрэгцээ иргэн, хуулийн этгээдийн төсөв, санхүү, цаг хугацааг хэмнэх боломжтой боллоо гэж нийслэлийн Газрын албанаас мэдээллээ.

Нийслэлд 2018 онд хийгдсэн бүтээн байгуулалтын ажлын хүрээнд нийслэлийн Газрын албанаас Сэлбэ болон Баянхошуу дэд төвүүд, авто зам, замын байгууламж, сургууль, цэцэрлэг, эмнэлэг, хорооны цогцолбор барих нийт 104 байршлын 1914 нэгж талбарын 234 га газарт газар чөлөөлөлтийн ажлыг бүрэн хийж дуусгалаа.

Сургууль, цэцэрлэг:

Нийслэлийн 2018 оны Газар зохион байгуулалтын төлөвлөгөөнд тусгагдсан 17 байршилд 10 сургууль, 21 цэцэрлэг, 5 сургууль, цэцэрлэгийн цогцолбор барих газарт нөхөх олговортойгоор газар чөлөөлөх ажлыг бүрэн хийлээ. Ингэснээр нийт 6640 хүүхэд сургуультай, 4175 хүүхэд цэцэрлэгт хамрагдах боломжтой боллоо.

Авто зам, замын байгууламж:

Нийслэлийн 2018 оны төсөвт тусгагдсан болон улс хоорондын Засгийн газрын хөнгөлөлттэй зээлийн хөрөнгөөр хэрэгжиж буй 37 байршилд нийт 27 км авто замын газар чөлөөлөлтийг бүрэн хийлээ.

Дэд төв:

“Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөр”-ийн хүрээнд Сэлбэ, Баянхошуу дэд төвийн авто замын, инженерийн шугам сүлжээ, цэцэрлэг, мэргэжил сургалт үйлдвэрлэлийн төвийн барилга байгууламжийн талбайд өртсөн газрыг чөлөөлж байна. Уг ажлын хүрээнд нийт 910 нэгж талбар өртсөн бөгөөд газар чөлөөлөлтийн ажил 93 хувьтай байна.

Гүүрэн байгууламж:

Яармагийн гүүрний олон түвшний уулзвар, Сонсголонгийн гүүр, Замын цагдаа орчмын олон түвшний огтлолцол бүхий уулзвар зэрэг нийт 4.2 км урттай гүүрэн байгууламжийн бүтээн байгуулалтын ажлын хүрээнд газар чөлөөлөлтийн ажлыг бүрэн хийж дууслаа гэж нийслэлийн Газрын албанаас мэдээллээ.

Орон сууцны хорооллын барилгуудын дунд болон сургууль, цэцэрлэгийн орчны газарт орон сууц, конторын барилга барих зориулалтаар газар эзэмших, ашиглах эрхийг нэмж олгохгүйгээр шийдэж энэ төрлийн үйл ажиллагааг 2016 оноос хойш бүрэн зогсоогоод байна.

Дээрх шийдвэр нь нийслэлийнхний эрүүл, аюулгүй орчинд амьдрах эрхийг хангах, хотын ногоон байгууламж, авто зогсоолын хүрэлцээ хангамжийг нэмэгдүүлэхэд чиглэсэн юм.

Хууль зөрчин олгогдсон өмнөх газруудын эрхийг цуцалж, нийтийн эдэлбэрт шилжүүлэх, эсвэл тухайн сургууль, цэцэрлэгт буцаан олгох ажлууд хийгдэж байна.

Нэгтгэсэн дүнгээр сургууль, цэцэрлэг болон орон сууцны хороолол дунд байрлах, 2 жил ашиглаагүй болон зориулалтын бусаар газраа ашигласан 606280 м2 газар буюу 60.6 га газрыг хүчингүй болгож, сургууль, цэцэрлэг болон нийтийн эзэмшилд буцаан шилжүүллээ гэж нийслэлийн Газрын албанаас мэдээллээ.

Улаанбаатар хотын Ерөнхий менежерийн их цэвэрлэгээ зохион байгуулах тушаалын дагуу энэ оны 12 дугаар сарын 10-ны өдөр Баянзүрх дүүргийн хэмжээнд бүх нийтийн их цэвэрлэгээг зохион байгууллаа.

Тус цэвэрлэгээнд дүүргийн Нийтлэг үйлчилгээний газар-2,3,4 ОНӨААТҮГ-ын зам талбайн ажилтан, албан хаагчид хамрагдсанбөгөөд дүүргийн 13, 14 дүгээр хорооны нутаг дэвсгэрт үүссэн үүсмэл хогийн цэг болон 17 дугаар хорооны нутаг дэвсгэрт байрлахЭмнэлгийн 13-ын жалга, Холбоо толгойн даланд үүссэн хогийг цэвэрлэсэн байна. Түүнчлэн дүүргийн 12 хорооны нутаг дэвсгэрт үүссэн хур хогийг цэвэрлэж, айл өрхийн хог хаягдлыг ачиж тээвэрлэсэн байна.

Цэвэрлэгээнд дүүргийн нутаг дэвсгэрт үйл ажиллагаа явуулж буй нийт 312 аж ахуйн нэгж байгууллагын 821 албан хаагчид оролцсон бөгөөд нийт 34,900 м.кв талбайн 323.66 тонн хаягдлыг цэвэрлэжээ хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.

Хүний эрхийн түгээмэл тунхаглал батлагдсаны 70 жилийн ойн хүрээнд Монгол Улсын Хүний эрхийн Үндэсний Комиссоос цогц аяныг зохион байгуулж, сургалт, сурталчилгаа, нөлөөллийн ажиллагааг 2018 оны турш явуулж байгаа тухай мэдээлсээр байгаа билээ. 2018 оны 12 дугаар сарын 10-ны өдөр буюу Хүний эрхийн түгээмэл тунхаглал батлагдсан ойн өдөр “Монгол Улсын Хүний эрхийн Үндэсний Комисс ба Иргэний нийгмийн түншлэл” 16 дахь ээлжит уулзалтыг зохион байгууллаа. Уулзалтад нийгэмд үйлчлэх төрийн бус байгууллагууд болон бусад иргэний нийгмийн байгууллагуудын төлөөлөл оролцож “Хүний эрхийн түгээмэл тунхаглал 70 жилийн ой: ололт, амжилт, сорилт, бэрхшээл”, “ХЭҮК-ын 2018 оны үйл ажиллагааны талаарх товч мэдээлэл, 2019 оны төлөвлөгөөний төсөл”, “Иргэний нийгмийн байгууллагууд 2018 оны үйл ажиллагааны талаарх товч мэдээлэл, 2019 онд анхаарч ажиллах чиглэл”, “Хүний эрхийн түгээмэл тунхаглалыг Монгол хэлнээ буулган түгээн дэлгэрүүлсэн нь” зэрэг сэдвээр мэдээлэл сонсч, хэлэлцүүлэг өрнүүллээ.

Шүүмжлэл, эргэлзээ, магтаал сайшаал давхацсан уулзалт идэвхтэй өрнөж, тэр дундаа Хүний эрхийн түгээмэл тунхаглалыг анх удаа Монгол хэлнээ буулгасан орчуулагч, сэтгүүлч Ц.Цэрэн, түүнийг нь шүүн тунгаасан тухайн үеийн Энхтайван найрамдлын хорооны дарга, Онц бөгөөд бүрэн эрхэт Элчин сайд асан Д.Цахилгаан, “Үнэн” сонинд 30 зүйл бүхий тунхаглалыг бүрэн бүтнээр нь нийтлүүлж чадсан тухайн үеийн Гадаад харилцааны яамны төлөөлөл, тэргүүн шадар Ш.Шагдарсүрэн нарын яриа олны анхаарлыг татаж байлаа. Орчуулагч, сэтгүүлч Ц.Цэрэн 1982 онд Хүний эрхийн түгээмэл тунхаглалыг орос хэлээр олж уншаад эх хэлнээ буулгах санаа төрж, орчуулжээ. Харин түүнийгээ хэвлүүлэх гэтэл зөвшөөрөл авах шаардлагатай болж, албаны хүмүүст хандаж, Хүний эрхийн тунхаглалыг ном болгон 3000 ш хэвлүүлж түгээсэн байна. Харин бүр сүүлд 1989 оны 2 дугаар сард дээрх хүмүүсийн хичээл зүтгэл дэмжлэгтэйгээр “Үнэн” сонинд нийтлүүлсэн нь тухайн үедээ үзэл санааны томоохон тэсрэлт, дэвшлийг авчирсан тухай дурсан ярьцгааж байлаа. Хүний эрхийн Олон Улсын Өдрөөр Хүний эрхийн түгээмэл тунхаглалыг анх эх хэлээрээ орчуулан түгээсэн орчуулагч, сэтгүүлч Ц.Цэрэнд “Хүний эрхийн төлөө” тэмдэг олгосныг Монгол Улсын Хүний эрхийн Үндэсний Комиссын дарга Ж.Бямбадорж танилцуулж, шагналыг гардууллаа. Мөн энэ өдөр ХЭҮК-ын дэргэдэх Орон тооны бус зөвлөлийн гишүүн, “Чинагийн Галсан” сангийн тэргүүн Г.Галтайхүү, МУИС-ийн ХЗС-ийн багш, доктор С.Мөнхсайхан нарыг “Хүний эрхийн төлөө” тэмдгээр, “Хүний эрх” сэтгүүлийн редактор, Удирдлагын академийн багш, доктор, профессор А.Алтанзул, Хүчирхийллийн эсрэг үндэсний төвийн “Эрх зүйн шинэчлэл” хөтөлбөрийн зохицуулагч, өмгөөлөгч Н.Арвинтариа, “Хүний эрхийн төлөө сэтгүүлчид” клубын гишүүн, “Өдрийн сонин”-ы сэтгүүлч Б.Янжмаа, “Хүний эрхийн төлөө сэтгүүлчид” клубын гишүүн, Монголын Үндэсний олон нийтийн радиогийн редактор Д.Даваадулам, “Zaluu.com” сайтын сэтгүүлч Т.Болормаа нарыг Хүний эрхийн Жуух бичгээр тус тус шагнууллаа.

Хүний эрхийн Түгээмэл тунхаглал батлагдсаны 70 жилийн ойг тохиолдуулан Бүгд Найрамдах Франц Улсын Монгол Улс дахь Элчин Сайдын Яам нь Монгол Улсын Хүний эрхийн Үндэсний Комисс, Улаанбаатар хот дахь франц хэл, соёлын “Аллианс Франсэз” төвтэй хамтран 2018 оны 12-р сарын 10-ны өдөр хүний эрхийн чиглэлээр үйл ажиллагаа явуулдаг иргэний нийгмийн төлөөллийг хүлээн авч, дээрх ажиллагаанд дэмжлэг үзүүллээ. Тус ЭСЯ-ны төлөөлөл “Парис хот дахь Шайо-гийн ордонд 1948 онд НҮБ-ын Ерөнхий Ассамблэйгаас баталсан Хүний эрхийн түгээмэл тунхаглал нь хүн бүртэй адил тэгш хандах нэгэн зорилгын хүрээнд хүмүүн төрөлхтөн нэгдэн оршихыг бататгаж өгсөн билээ. Дэлхийн олон оронд хувь хүний болон олон нийтийн эрх чөлөөг хязгаарлах явдал ихсэж байгаа тул олон улсын түвшинд хүний эрхийн зарчмыг хамгаалах нэн шаардлагатай байгааг энэхүү тэмдэглэлт ойгоор сануулах болно. Өнгөрсөн 10 дугаар сард Парис хотноо болсон Хүний эрхийн хамгаалагчдын дээд хэмжээний уулзалт зэрэг энэхүү түүхт ой тохиож буй жилийн туршид зохион байгуулагдсан арга хэмжээтэй нийцүүлэн энэхүү хүлээн авалтыг манай ЭСЯ зохион байгуулж байна” хэмээсэн юм. Мөн уг арга хэмжээний үеэр франц судлалын чиглэлээр суралцдаг оюутнууд Хүний эрхийн түгээмэл тунхаглал болон хүний эрхийн сэдэвт өгүүллэг эсээг франц хэлнээс буулгаснаа уншиж танилцууллаа.

Улсын Дээд шүүхийн хяналтын шатны эрүүгийн хэргийн шүүх хуралдаанаар Х.Хайвд холбогдох эрүүгийн хэргийг шүүгдэгч болон түүний өмгөөлөгчдийн гаргасан гомдлын дагуу 2018 оны 12 дугаар сарын 7-ны өдөр хянан хэлэлцлээ.

Х.Хайв нь Баян-Өлгий аймгийн Бугат сумын Засаг даргаар ажиллаж байхдаа иргэн С-ыг захиргааны хэргийн шүүхийн шийдвэрийн дагуу урьд эрхэлж байсан Засаг даргын Тамгын газрын Санхүүгийн албаны даргын албан тушаалд эгүүлэн томилж, уг албаны даргын үүргийг түр орлон гүйцэтгэж байсан Ж-ыг ажлаас чөлөөлөх тухай захирамж гаргасан хэдий ч дээрх захирамжийг С-д мэдэгдэж танилцуулахгүйгээр нуун дарагдуулж байгаад түүнийг шалтгаангүйгээр 16 хоног ажил тасалж сахилгын ноцтой зөрчил гаргасан гэсэн үндэслэлээр ажлаас халах сахилгын шийтгэл оногдуулсан захирамж гарган шүүхийн шийдвэрийг дүр эсгэн биелүүлж, шүүхийн шийдвэр гүйцэтгэх ажиллагаанд саад учруулсан гэмт хэрэгт холбогджээ.

Баян-Өлгий аймаг дахь Сум дундын Эрүүгийн хэргийн анхан шатны шүүх дээрх хэргийг 2018 оны 8 дугаар сарын 1-ний өдөр хянан хэлэлцээд Х.Хайвыг шүүхийн шийдвэр гүйцэтгэх ажиллагаанд санаатай саад учруулсан, зайлсхийсэн гэмт хэрэг үйлдсэн гэм буруутайд тооцож, Эрүүгийн хуулийн 21.7 дугаар зүйлийн 1 дэх хэсэгт зааснаар 3 сая төгрөгөөр торгох ял оногдуулсныг давж заалдах шатны шүүх хэвээр үлдээсэн юм.

Улсын Дээд шүүхийн хяналтын шатны эрүүгийн хэргийн шүүх хуралдаанар уг хэргийг хянан хэлэлцээд анхан болон давж заалдах шатны шүүхийн шийдвэрийг хэвээр үлдээж шийдвэрлэв.

“Corporate Convention center”-т “Ногоон гэрэл-Цагаан шугам 2018” тэмцээн болж байна. Энэ хүү тэмцээн нь хүүхдийг зам тээврийн орчноос урьдчилан сэргийлэх, замын хөдөлгөөний дүрмийн мэдлэг дадал олгох зорилгоор зохион байгуулагддаг юм. Энэ жил 37 дохь удаагаа “Ногоон гэрэл-цагаан шугам” тэмцээн амжилттай болж байгаа юм. Өнөөдрийн тэмцээнд улсын шилдэг найман багийн 96 сурагч 22 багш 20 эцэг эхийн төлөөлөл өрсөлдөж байгаа аж. Уг тэмцээн нь өнөөдөр 17 цагт нэгдсэн дүнгээ гаргаж, шилдгээ шалгаруулах юм.