Month: December 2018

Өнгөрсөн мягмар гарагийн орой фэйсбүүк дэх “Medee.mn” хэмээх нэр бүхий хуудаст “Хотын дарга нар албан өрөөндөө зодоон хийж нэгнээ алах шахжээ” гэсэн гарчигтай мэдээ нийтлэгджээ. Нийслэлийн ИТХ-ын дарга С.Амарсайхан албан өрөөндөө архидан согтуурч, төлөөлөгч Н.Батсүмбэрэл нь НЗДТГ-ын Бодлого төлөвлөлтийн хэлтсийн дарга Г.Өлзийбаярыг зодож, бэртээсэн гэх агуулгатай байв, тус мэдээ. Улмаар нэр бүхий зарим цахим хэвлэл, “С1” телевиз үнэн, худлыг нягтлалгүй, нэг талын байр сууринаас хандаж тухайн мэдээллийг олон нийтэд түгээсэн юм.

Энэ талаар өнөөдөр НИТХ-ын Тэргүүлэгчдийн Нарийн бичгийн дарга бөгөөд Ажлын албаны дарга Б.Батбямба, НЗДТГ-ын дарга М.Отгонбаяр, НЗДТГ-ын Бодлого төлөвлөлтийн хэлтсийн дарга Г.Өлзийбаяр нар хэвлэлийн бага хурал хийж, гүтгэлгийн шинжтэй худал мэдээлэл тараасан хүнийг олж тогтоолгохоор цагдаагийн байгууллагад хандаж буйгаа хэллээ.

Нийслэлийн ИТХ-ын Тэргүүлэгчдийн Нарийн бичгийн дарга бөгөөд Ажлын албаны дарга Б.Батбямба “Өчигдрөөс хотын удирдлага, тухайлбал, НИТХ-ын дарга С.Амарсайханы өрөөнд хэсэг бүлэг хүн согтуурч, танхайрсан гэдэг мэдээлэл түглээ. Тус хэрэг болсон гэх өдөр хурлын даргын өрөөнд олныг хамарсан уулзалт болоогүй гэдгийг хурлын Нарийн бичгийн даргын хувьд хариуцлагатайгаар хэлье. Бусдын нэр хүндийг гутаан, доромжилж зориудаар хуурамч мэдээлэл түгээсэн хүмүүсийг олуулахаар бид хуулийн байгууллагад хандсан. Олж тогтоосны дараа олон нийтэд мэдээлэх болно” гэв.

НЗДТГ-ын дарга М.Отгонбаяр “НЗДТГ-ын байр төрийн тусгай хамгаалалттай обьект. Монгол Улсын Ерөнхий сайдын захирамжаар төр, захиргаа байранд согтууруулах ундаа, түүнийг хэрэглэсэн хүнийг оруулдаггүй. Цахим ертөнцөд түгж буй мэдээлэл ор үндэсгүй, тийм зүйл болоогүй” хэмээв.

Харин төлөөлөгч Н.Батсүмбэрэлд зодуулан, хүнд бэртсэн гэгдээд байгаа нийслэлийн ЗДТГ-ын Бодлого төлөвлөлтийн хэлтсийн дарга Г.Өлзийбаяр хэвлэлийн бага хурлын үеэр “Цахим хэвлэлээр явж байгаа мэдээлэл худал. Намайг зодуулж, хүнд бэртсэн гэсэн байна лээ. Миний бие өдгөө ямар нэгэн бэртэлгүй, эрүүл, албан үүргээ гүйцэтгэж явна” гэсэн юм.

Дашрамд дурдахад, www.Medee.mn вэбсайтын хамт олон фэйсбүүк дэх 1200 дагагчтай “Medee.mn” хуудсыг байгууллагынх нь нэр, логог ашигласан хуурамчаар үйлдсэн хуудас болохыг мэдэгдсэн юм.

Хуучин оноо үдэж, шинэ оноо угтах шинэ жилийн баярын арга хэмжээг зохион байгуулахдаа иргэд, аж ахуйн нэгж, байгууллагууд салют, бенгалын гал болон чанарын шаардлага хангаагүй пиротехникийн хэрэгслийг дур мэдэн хэрэглэдэг. Зөвшөөрөлгүй газраас худалдан авч, улмаар салют буудуулах, сүлд модыг чимэглэхдээ мэргэжлийн бус хүнээр хийлгэдгээс болж бэртэж гэмтэх тохиолдол гардаг юм. Тухайлбал 2010-2011 онд пиротехникийн хэрэгсэлд 11 хүн өртөж бие эрхтэнээ гэмтээж байжээ.

Түүнчлэн пиротехникийн хэрэгслийг худалдан, борлуулахыг Нийслэлийн ИТХ-ын Тэргүүлэгчдийн 2011 оны 27 дугаар тогтоол, мөн Нийслэлийн засаг даргын 662 дугаар захирамжаар хориглосон байдаг юм. Тиймээс зөвшөөрөлгүйгээр салют, бенгалын гал зэрэг пиротехникийн хэрэгслийг иргэдийн гар дээрээс худалдаж авахгүй байх, эрх бүхий байгууллагаас худалдан авсан бол заавар санамжийг мөрдөх, сүлд модоо 12 волтын хүчдэлтэй гэрлэн чимэглэлээр чимж, цахилгааны утасны холболтыг дүрмийн дагуу хийх, цагаан бенгалын галыг хялбар шатах материалын ойролцоо цацруулахгүй байх, цацарч дууссаны дараа цаас, саа, хөвөн зэрэг шатамхай зүйл дээр хаяхгүй байх, оргилуурт гэрэл, тэсрэх бодис, динамидийг орон байр, сүлд модны ойролцоо хэрэглэхгүй байх, аж ахуйн нэгж, байгууллагууд сүлд модыг дүрмийн дагуу угсарч ашиглах, тухайн обьктын харуул хамгаалалтын сонор сэрэмжийг сайжруулж болзошгүй эрсдэлээс урьдчилан сэргийлэхийг Онцгой байдлын ерөнхий газраас анхааруулж байна.

Иргэний нисэхийн ерөнхий газрын Нисэхийн сургалтын төв Чанарын менежментийн тогтолцоог сайжруулан Олон улсын ISO 9001:2015/ MNS ISO 9001:2016 стандартад нийцүүлэн, магадлан аудит шалгалтад сайн үнэлгээ авсан.

Тиймээс энэ сарын 12-ны өдөр Стандарт, Хэмжил Зүйн Газраас Чанарын менежментийн тогтолцооны MNS ISO 9001:2016 стандартын гэрчилгээгээ авлаа.

НИТХ-ын Тэргүүлэгчдийн өчигдрийн хурлаар “Нийслэлийн нутаг дэвсгэрт мал аж ахуй эрхлэхийг хориглох бүсийн хил хязгаарыг нэмэгдүүлэх, энэ бүсэд мал, гахай, шувуу, нохой үржлийн аж ахуй эрхэлж буй иргэдийг нүүлгэн шилжүүлэх” асуудлыг хэлэлцэн дэмжиж, НИТХ-ын ээлжит хуралдаанаар хэлэлцүүлэхээр тогтлоо.

Нийслэлийн Засаг даргын захирамжаар байгуулагдсан хотын Ерөнхий менежерийн ахалсан ажлын хэсэг таван дүүргийн 45 хорооны 629 өрхийн 16798 буюу нийт малын 98.1 хувийг нүүлгэн шилжүүлж, 547 өрхийн малын хашаа саравчийг буулгаж ариутгал халдваргүйжүүлэлт хийж байна. Ариутгал, халдаргүйжүүлэлтийн ажил өнөөдрийн байдлаар 90 хувийн гүйцэтгэлтэй байна.

Эдгээр айл өрхийг шинээр суурьшуулсан газарт цахилгаан эрчим хүч, инженерийн есөн худгаар хангаж, нүүлгэн шилжүүлэх зардлыг даан, төрийн нийтлэг үйлчилгээгээр ханган ажиллаж байна гэж Улаанбаатар хотын Захирагчийн ажлын албанаас мэдээлэв.

Монгол Улсын Их Хурлын Тамгын газар, Бүгд Найрамдахчуудын Олон Улсын Хүрээлэн, Конгрессын Төлөөлөгчдийн Танхимын Ардчиллын Түншлэл хамтран “Нийтийн сонсголыг үр дүнтэй зохион байгуулах нь” сэдэвт сургалтыг зохион байгуулж байна. Энэхүү сургалт хоёр өдрийн турш үргэлжлэх бөгөөд газрын ажилтнууд, улс төрийн нам, иргэний нийгэм, төрийн бус байгууллага, хэвлэл мэдээллийн байгууллагын төлөөлөл зэрэг 100 гаруй оролцогчдыг хамруулах юм байна. Өнөөдөр уг сургалтын нээлтийн үйл ажиллагаа боллоо.

УИХ-ын гишүүн, Төрийн байгуулалтын байнгын хорооны дарга Д.Лүндээжанцан сургалтыг нээж хэлсэн үгэндээ, “Нийтийн сонсгол бол төрийн шийдвэр гаргах түвшинд иргэдийн оролцоог хангах, ардчиллыг бэхжүүлэх төгөлдөржүүлэх, парламентын хяналтыг боловсронгуй болгох, ил тод байдлыг хангах үр дүнтэй арга хэрэгсэл. Монгол Улсын Их Хурлаас 2015 онд Нийтийн сонсголын тухай хууль болон тус хуулийг хэрэгжүүлэх процессыг зохицуулсан Нийтийн сонсгол зохион байгуулах журмыг баталсан. Ингэснээр нийтийн сонсгол зохион байгуулах эрх зүйн орчин бүрдсэн ч түүнийг хэрэгжүүлэхтэй холбоотой шийдлээ хүлээсэн олон асуудлууд байна. Сүүлийн үед нийтийн сонсгол явуулах талаар улс төрчид, иргэдийн зүгээс хүсэлт, шаардлагуудыг тавьж байгаа. Энэ сургалт семинар нийтийн сонсгол зохион байгуулах чиглэлээр УИХ-ын чадавхыг бэхжүүлэхэд чухал хувь нэмэр оруулж, Нийтийн сонсголын тухай хуулийг бодит байдал дээр хэрэгжүүлэхэд эерэг нөлөө үзүүлнэ гэдэгт итгэлтэй байна” гэв.

Сургалтын хүрээнд нийтийн сонсголын төрөл, зорилгыг тодорхойлохоос гадна сонсголыг үр дүнтэй зохион байгуулахтай холбоотой дүрэм журам, олон улсын жишиг, практик, иргэдийн оролцоог нэмэгдүүлэхэд нийтийн сонсголыг хэрхэн ашиглах талаар ярилцаж, туршлага солилцох юм.

“Нийтийн сонсголыг үр дүнтэй зохион байгуулах нь” сэдэвт сургалтыг Конгрессын Төлөөлөгчдийн Танхимын Ардчиллын Түншлэлийн сургагч багш, Конгрессын гишүүний ажлын албаны дарга асан Бред Смитт удирдан явууллаа. Тэрбээр, “Бүгд Найрамдахчуудын Олон Улсын Хүрээлэнгээс Конгрессын Төлөөлөгчдийн Танхимын Ардчиллын Түншлэлийн хүрээнд зохион байгуулж буй нийтийн сонсголын сургалт нь Монгол Улсад оролцоог хангасан ардчилсан засаглалыг бэхжүүлэхэд дэмжлэг үзүүлэх ач холбогдолтой. Бид өмнө нь Монгол Улсын Их Хуралтай хамтран хууль тогтоох байгууллагын хяналт, байнгын хороодын үйл ажиллагаа, судалгаа шинжилгээ, иргэдийн оролцоо, цахим засаглал зэрэг олон сэдвээр сургалтуудыг амжилттай хийсэн туршлагатай. Бүгд Найрамдахчуудын Олон Улсын Хүрээлэн болон Конгрессын Төлөөлөгчдийн Танхимын Ардчиллын Түншлэлийн зөвлөхийн шугамаар дэлхийн 25 улсын хууль тогтоогчид, парламентын ажилтнуудтай хамтран ажиллаж, өөрсдийн туршлагаас хуваалцдаг. Бусад олон улсын байгууллагаас ялгарах онцлог нь бид сонгож авсан улс орнуудтай хамтран ажиллаж, түншилдэг. Тухайн улс орныг сонгохдоо бид хамтран ажиллах чадавхтай эсэхэд анхаардаг. Ардчилсан институтыг бэхжүүлэхэд парламентын Тамгын газрын ажилтнууд УИХ-ын гишүүдээс дутахгүй үүрэг хариуцлагыг хүлээдэг. Байнгын хороод бол парламентаас гарах шийдвэрийг боловсруулан хэлэлцүүлдэг учраас хууль тогтоох “бэсрэг” байгууллага гэхэд хилсдэхгүй. Тиймээс байнгын хороодын ажилтнуудын үүрэг өндөр байдаг” хэмээн онцоллоо.

Бүгд Найрамдахчуудын Олон Улсын Хүрээлэн нь Монгол Улсад 27 дахь жилдээ үйл ажиллагаагаа явуулж байгаа бөгөөд парламентын тогтолцоог хөгжүүлэх, улс төрийн намуудыг чадавхжуулах, сонгуулийн тогтолцоог сайжруулах ажлын хүрээнд иргэний нийгмийн байгууллагууд, сонгуульт албан тушаалтнуудтай болон холбогдох төрийн байгууллагуудтай хамтран ажилладаг. Мөн тус байгууллага нь ардчиллын хөгжил, шийдвэр гаргах үйл явцад иргэдийн оролцоог дэмжихэд туслалцаа үзүүлэх зорилготой сургалт семинар, туршлага солилцох хөтөлбөрүүдийг хууль тогтоогчид болон хууль тогтоох байгууллагын ажилтнуудад зориулан зохион байгуулж иржээ.

Харин Конгрессын Төлөөлөгчдийн Танхимын Ардчиллын Түншлэл нь АНУ-ын Төлөөлөгчдийн танхим дахь 20 гишүүнээс бүрдэх нам бус комисс юм. Дэлхий даяар түнш орнуудын үр дүнтэй, хараат бус, хариуцлагатай хууль тогтоох байгууллагуудыг хөгжүүлэх чиглэлээр дэмжлэг үзүүлэн ажилладаг байна.

Уг сургалтын нээлтийн үйл ажиллагаанд УИХ-ын Тамгын газрын Хууль, эрх зүйн хэлтсийн дарга Э.Түвшинжаргал, Бүгд Найрамдахчуудын Олон Улсын Хүрээлэнгийн Монгол дахь Суурин төлөөлөгч Крэйг Кастанья, Конгрессын Төлөөлөгчдийн Танхимын Ардчиллын Түншлэлийн хөтөлбөр хариуцсан БНОУХ-гийн мэргэжилтэн Скотт Немет болон албаны бусад хүмүүс байлцав. Энэ удаагийн сургалтыг АНУ-ын Олон улсын хөгжлийн агентлагийн дэмжлэгтэйгээр хэрэгжүүлж байгаа ажээ гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

-БОЛСОН ЯВДЛЫГ ШАЛГАХ АЖЛЫН ХЭСЭГ БАЙГУУЛЖ, ЭЛЧИН САЙДААС ТАЙЛБАР АВЧ БАЙНА-

Болсон хэргийн талаар манай сайтад ар гэрийнхнийх нь зүгээс нотлох баримт болгож аудио бичлэг илгээсэн юм. Энэ сарын 12-ны өдөр БНЭУ-д суугаа онц бөгөөд бүрэн эрхт элчин сайд Г.Ганболд туслалцаа хүсэж очсон Монгол эмэгтэйн биед яамныхаа үүдэнд халдаж, ёс зүйгүй үйлдэл гаргасан гэх мэдээлэл олон нийтийн дургүйцлийг хүргээд байгаа юм. Хэрэг гарах үеэр Элчин сайд Г.Ганболдын эхнэр, жолооч, туслах болон Энэтхэгийн иргэд байсан бөгөөд уг үйлдэл нь ЭСЯ-ны камерт бичигдэн үлдсэн байна. Тухайн үед элчин сайдад зодуулсан хохирогч эмэгтэйн бие муудаж, эмнэлэгт хүргэгдсэн гэдгийг хохирогч гэх эмэгтэйн нөхөр мэдээлжээ. Болсон явдлыг тус эмэгтэй нөхөр нь гар утсаараа бичиж, баримтжуулан өөрийн фэйсбүүк хуудаснаа тавьсан аж. Мөн болсон явдлыг эхнээс нь бичсэн аудио бичлэг нотлох баримт болж үлджээ. Дээрх бичлэгт Элчин сайд Г.Ганболд эмэгтэйг доромжилж, бие нь халдаж байгаа нь бичигдсэн байх юм.

Энэ талаарх мэдээлэл, дүрс бичлэгийг УИХ-ын дарга М.Энхболдын файсбүүк хаяг руу Энэтхэг улсад суугаа иргэн арга хэмжээ авч өгөхийг хүсэж илгээжээ. Харин бичлэгийг энэ сарын 12-ны өдөр М.Энхболд өөрийн твиттер хуудсандаа нийтэлж, Гадаад харилцааны яамны сайд Д.Цогтбаатарт хандаж, арга хэмжээ авахыг хүссэн нь олон нийтийн анхааралд хүрээд байгаа юм.

Уг хэрэгтэй холбогдуулаад Гадаад харилцааны сайд Д.Цогтбаатар өөрийн твиттер хуудаснаа “Тухайн Монгол эмэгтэйн биед халдсан гэх Элчин сайдаас тайлбар аваад байна. Холбогдох байгууллагуудтай хамтарсан ажлын хэсэг даруй байгуулж, асуудлыг нь шалгана. Үнэн гэдэг нь тогтоогдвол Элчин сайдыг татаад зогсохгүй, хүний эрхэнд халдсан хэргээр цагдаагийн байгууллага ч шалгах шаардлага гарна” хэмээн мэдэгдээд буй.

БНЭУ-д суугаа Элчин сайдаас туслалцаа хүссэн эмэгтэй Г.Оюун гэр бүлийн хүний хамтаар хоёр сартай бяцхан охиноо зүрхний хүнд хэлбэрийн хагалгаанд оруулахаар тус улсад очсон. Тэд энэ оны найман сараас эхлэн Энэтхэг улсад дөрвөн сарын турш охиноо эмчлүүлж байгаа аж. Энэ хугацаанд багагүй асуудал гарч, тус улсад Монголоос төлөөлөн суугаа элчин сайдын яам руу очсон байгаа юм. Ийнхүү үүсээд байгаа нөхцөл байдлаа тайлбарлан тусламж хүссэн боловч Элчид сайдад өшиглүүлж, замын боржур мөргөж унасан аж. Элчин сайд Г.Ганбаяр хохирогч Г.Оюуныг учир байдлаа тайлбарлан хэлэхэд “Чи ер нь яах гээд байгаа юм бэ?, Би чамд яаж туслах юм, Хулгайч гэх мэтээр хэлж, машиндаа суухдаа хэвлий хэсэгт хөшиглөж унагаагаад эргэж ч харахгүй явсан байна.

-ОХИНЫ ХАГАЛГАА АМЖИЛТТАЙ БОЛСОН Ч ДӨРВӨН САР СЭХЭЭНД БАЙГАА ГЭВ-

Хохирогч гэх эмэгтэй Г.Оюун нь нөхөр Б.Батчулууны хамтаар Монголд байх хугацаандаа хандивын аян өрнүүлэн хоёр сартай охиноо зүрхний хагалгаанд оруулах боломжтой болж улмаар Энэтхэг улсыг зорьжээ. Эхнэр нөхөр хоёулаа Зэвсэгт хүчний жанжин штабт алба хаадаг ахлах дэслэгч цолтой бөгөөд ажлын газраас нь хагалгаанд зориулж мөнгөн туслалцаа үзүүлсэн хэмээн мэдээлэв.

Тэдний бяцхан охин зүрхний төрөлхийн хавсарсан гажигтай, ховол хоорондын таславчийн цоорхойтой гэж оношлогдсон аж. Энэ өвчнийг Монголд эмчлэх боломжгүй тул 2018 оны наймдугаар сарын 10-нд Энэтхэг улсыг зорьжээ. Гэтэл Энэтхэгт улсад очоод эмчилгээ хийлгэж байхдаа охин нь зүрхний хавсарсан гажгаас гадна уушгины дутуу хөгжилтэй, хоолойн нарийсал буюу мэмбрамтай гэсэн давхар онош гарчээ. Охины хагалгаа амжилттай болсон ч хагалгааны дараах хүндрэлүүд гарч охин эрчимт эмчилгээний тасагт хэвтэн эмчлүүлж байгаа юм байна. Эрчимт эмчилгээний өдрийн төлбөр 1.5-1.8 сая төгрөг болж байгаа бөгөөд тэд өдгөө 170 гаруй сая төгрөгийн өртэй болсон. Иймд тэд аргагүй эрхэнд хүний нутагт элэг нэгтнээ зорин бага ч болов туслахыг уйлаад гуйсны хариуд ийнхүү цохиулсанд ихээхэн гомдолтой байгаа юм.

Энэ хэргийн талаар Энэтхэгийн Цагдаагийн байгууллагаас тухайн хэрэг гарах үед газар дээр нь байсан Энэтхэг иргэдээс мэдүүлэг авсан тухай мэдэгджээ.

Энэ талаар нөхөр нь хэлэхдээ: “Бид хоёр энд ирээд дөрвөн сар болж байна. Хүүхдээ эмчлүүлээд эх орон руугаа буцах гэсэн чинь баахан асуудал тулгараад, үнэхээр аргагүйдсэн. Би охиноо сахиж үлдээд эхнэрээ нааш нь явуулсан чинь Г.Ганболд гарч ирээд эхнэрийн маань цээж ходоод саван тус газар руу нь өшиглөсөн байна. Бид яах ёстой вэ?” хэмээн ярьж, бичлэг хийн нийтийн сүлжээнд тавьсан байна.

Бид энэ хэрэгт Гадаад хэргийн яамны зүгээс ямар арга хэмжээ авсан талаар асуух гэсэн боловч холбогдож чадаагүй, ямар нэгэн мэдээлэл өгөөгүй юм.

Түүнчлэн Монголд байгаа ар гэрийнхэнтэй нь утсаар холбогдож одоогийн нөхцөл байдлын талаар тодруулах гэсэн боловч тэд ч мөн адил хоёр хоног холбоо барьж чадаагүй. Одоо биеийн байдал нь ямархуу байгааг нь хэлж мэдэхгүй байна. Санаа зовоод байж байна. Ямар нэгэн мэдээлэл өгөх эсэхээ сайн мэдэхгүй байна хэмээн учирлав.

-Г.ОЮУНЫ БИЕД ХАЛДСАН ЗҮЙЛ ОГТ БАЙХГҮЙ ХЭМЭЭН МЭДЭГДЭЛ ХИЙВ-

Дээрх мэдээлэл цахим орчин болон хэвлэл мэдээллийн хуудаснаа дэлгэгдэж эхэлсэн даруйд Энэтхэг улсад суугаа Элчин сайд Г.Ганболд мэдэгдэл хийсэн юм. Тэрээр мэдэгдэлдээ: Иргэн Оюуны биед нь халдсан зүйл байхгүй. Бүх талаар тусалж, дэмжсэн. “Иргэн Б.Батчулуун, Г.Оюун нар 12 дугаар сарын 7-нд тус ЭСЯ-д ирж, “Шинэ Дели хотын “BLK” эмнэлэгт цаашид охиноо эмчлүүлэхгүй, санал болгож байгаа эмчилгээг нь хийлгэхгүй, даруйхан нутаг буцахаар шийдлээ. Энэтхэгт байх визний хугацаа хэтэрсэн, торгуулийн хэмжээ их болоод байгааг хөнгөлүүлж, хилээр гарах зөвшөөрөл олгож тусална уу” гэж хүссэн. Үүнийг ЭСЯ-ны гуравдугаар нарийн бичгийн дарга, консулын ажилтан Л.Батсуурьт даалгаснаар асуудал шийдэгдсэн. “AIR CHINA” компани охины биеийн байдал тун хүнд байгаа тул замд нэмж муудахаас болгоомжлон тээвэрлэхгүй гэж мэдэгдсэн тул “Korean air” компанид бид хандахаар болсон. Б.Батчулуун “”BLK” эмнэлэгт төлөх мөнгө байхгүй тул эмнэлгийн төлбөрөөс хөнгөлүүлж өгнө үү” гэж дахин хүссэний дагуу эмнэлэгтэй нь ярьж 3 сая энэтхэг рупи буюу 42.857 ам.долларын төлбөр, визний хугацаа хэтэрсний 300 ам.долларын торгуулийг чөлөөлүүлсэн. Б.Батчулуун 12 дугаар сарын 8-ны Бямба гаригт надтай уртсаар ярьж энэ тухай дурдаж, “эхнэр маань ухаан алдаад уначихлаа, шөл хийж ирэхийг консул Л.Батсуурьт хэлж өгнө үү” гэж байсан тул Консулын асуудал эрхэлсэн Л.Батсуурийг явуулж туслуулсан бөгөөд манай ажилтантай хүндэтгэлтэй харьцахыг захиж зөвлөсөн. Г.Оюун 12 дугаар сарын 10-ны өглөө ЭСЯ-нд ирж “Элчин сайд яг одоо эмнэлэгт очиж хүүхэдтэй минь уулз” гэж шаардсан бөгөөд товлосон уулзалтад очсоны дараа түүний хамт эмнэлэгт очиж, Солонгос нисэхийн компанитай ч уулзъя гэж хэлснийг зөвшөөрөлгүй хамт явна гэж хэлээд автомашины араар тойрч зам хаасан тул түүнийг консулын ажилтан Л.Батсуурийн хамт дагуулж албаны уулзалтдаа очсон. Уулзалтын дараа эмнэлэг рүү явах гэтэл тэр эмнэлгийнхээ хаягийг хэлж мэдэхгүй байсан тул би консул Л.Батсуурьт эмнэлэгтэй ярих үүрэг өгч, өөрөө Дели дэх БНСУ-ын ЭСЯ, “Кorean air” компанийн менежерт байдлыг тайлбарлаж ярьсан.

Консул Л.Батсуурь мөн өдрийн орой тэднийг нисэх буудалд хүргэж охинд шаардлагатай хүчилтөрөгчийн төлбөр 900 ам.долларыг бэлнээр өгсөн бөгөөд онгоцонд суулгасан. Гэтэл нислэгийг хоёр цаг хэртэй саатуулсны дараа тэднийг нисэхийн дүрэм зөрчсөн, удаа дараа анхааруулж сануулгыг үл тоосон хэмээн онгоцноос буулгасан юм байна. Г.Оюун энэ сарын 11-ний өглөө ЭСЯ-ны байранд дахин ирж “Элчин сайд одоо эмнэлэгт явж оч” гэж шаардсан. Хэлж тайлбарласныг огт ойлгохгүй хөдөлж байгаа автомашины хажуугаас зүүгдсэн тул гарыг нь автомашинаас тавиулахаар буухад тэр хаалганд шүргүүлж гэдрэг нэг алхам ухарч газарт суусан. Миний зүгээс түүний биед нь халдсан зүйл байхгүй. Сэтгэл санаа нь цочирдож, хямарсан тэрээр ямар ч тайлбар сонсохгүй хашгирч харааж зүхсэн. Миний бие ЭСЯ-ны ажилтан Л.Энхболд, Батсуурь нарт эмнэлэгтэй холбоо барих, хамгийн ойрын нислэгээр буцаахаар ажиллах үүрэг өгч, өөрөө урьдаас товлосон уулзалтуудад явсан. Зөөврийн хүчилтөрөгчийн үнэ 900 ам.долларыг эргүүлж өгсөн байсныг уулзалт арга хэмжээнүүдийн дундуур дахин төлөх, “Fortis Escort” эмнэлэгтэй ярьж тэнд хоносны болон эмнэлгийн тусламж үйлчилгээний төлбөр 2400 ам.долларын төлбөрийн баталгааг гарган өгч, тэднийг эмнэлгээс гаргах, онгоцоор зорчихыг зөвшөөрүүлсэн.

Тэд нислэгийн цаг тулсан хэмээн нисэх буудал явалгүй дараагийн нислэгийг хүлээхээр шийдсэн. Б.Бат-Очир, Г.Оюун нарын охин болон Б.Номин-Эрдэнэ тэднийг авахаар ирсэн Цэргийн госпиталийн их эмч Уламбаярын хамт нэмэгдэл зардлыг төлж, дараагийн нислэгт багтаахаар ажиллаж байна. Бий болсон нөхцөл байдлыг зүй зохистой шийдэх арга замын хамтдаа ярьж зөвлөх гэж чармайхгүй, “хөлөө хүрэх газарт явна, та нарын мууг үзнэ, ЭСЯ мөнгө гаргаж бүх зардлыг төлөх үүрэгтэй, одоохон нутаг буцаа, та нарын ярьсныг бичлэг хийж хадгалсан” гэх зэргээр бухимдан орилж байсан болно. Тэд энэтхэг эмчийг хөлсөөр авч, охиныг Монголд хүргэхийг шаардаж байна. Энэ тохиолдолд өмнө гаргасан 3300 ам.доллар дээр нэмж 10 мянган орчим ам.доллар шаардагдахаар байгаа юм.

Эдгээр иргэдийг эмнэлэгт эргэж, хоол унд зөөх зэргээр ЭСЯ-ны ажилтнууд халуун сэтгэлээр хандсаар байтал нийтийн дунд буруу зөрүү ойлголт төрүүлэхээр бодитой бус мэдээлэл түгээсэнд харамсч байна. Түүнчлэн ЭСЯ-ны хяналтын камерын бичлэг, нутгийн иргэдийн мэдүүлэг гэх мэтээр оргүй зүйл дурдсан байна. Гачигдал зовлон бэрхшээл хэнд ч, хэзээ ч тохиож болно. Харин хүн чанараа гээлгүй дээдэлж явахыг эрхэм нөхөд санууштай байна. Тэдний зүй зохисгүй үг хэл, үйлдлийг энд нуршихыг үл хүслээ. ЭСЯ-ны ажилтнууд нөхцөл байдлыг дүгнэж хэлэлцээд энэ гэр бүлийг яаралтай буцаах нь зүйтэй гэж үзэв. Ажилтнууд өөр өөрдсийн тайлбарыг бичиж хүргүүлэх биз ээ” гэжээ.

Эх сурвалж. Medee.mn

Монгол Улсын сайд, Засгийн газрын Хэрэг эрхлэх газрын дарга Г.Занданшатар Сонгинохайрхан дүүргийн долдугаар хороо буюу Баянхошуунд ажиллалаа.

Засгийн газар ирэх оны тавдугаар сарын 15-наас Улаанбаатар хотод ахуйн зориулалтаар түүхий нүүрс оруулахыг хориглосон. Иргэд түүхий нүүрс биш сайжруулсан шахмал түлш хэрэглэхийг уриалж буй юм.

”Эрдэнэс Тавантолгой” ХК-ийн дэргэд “Тавантолгой түлш” ХХК байгуулж, сайжруулсан, шахмал түлшний үйлдвэрийг саяхан байгуулсан юм. Үйлдвэрийн хүчин чадлыг ирэх онд 600 мянган тн сайжруулсан түлш үйлдвэрлэж, 220 мянган өрхийг 100 хувь хангах боломжтой болно.

Монгол Улсын сайд, Засгийн газрын Хэрэг эрхлэх газрын дарга Г.Занданшатар утаанаас салах төгс шийдэл бол орон сууцжуулах. Богино хугацаанд утааг багасгах шийдэл нь сайжруулсан шахмал түлш хэрэглэх юм. Сайжруулсан шахмал түлшийг Сонгинохайрхан дүүргийн найман хороонд туршиж байна. Нийслэлийн 220 мянган өрх жилд нэг сая 200 мянган тн түүхий нүүрс түлдэг байсан бол сайжруулсан шахмал түлш 600 мянган тн-ыг түлнэ. Тоон харьцуулалтаас харахад ч агаарын бохирдол 50 орчим хувиар багасахаар байгаа юм гэлээ.

Улсын төсвөөс олгох болон банкуудын санхүүжилтийн эх үүсвэрийг ипотекийн зээлд татан оруулахаар болов. Энэ нь хөнгөлөлттэй зээлийг агаар, орчны бохирдлыг бууруулахад чиглүүлэх зорилготой юм. Ингэснээр ипотекийн найман хувийн зээлийн санхүүжилтэд жилд зарцуулдаг байсан 300 тэрбум төгрөг 500 тэрбум болж нэмэгдэж байна.БНСУ, БНХАУ-ын зээл, тусламжийг иргэдийг орон сууцжуулахад зарцуулна. Мөн дагуул хотуудыг бий болгох зэрэг ажлын талаар тэрбээр танилцууллаа гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.