Энэ амралтын өдрүүдэд ихэнх нутгаа цаг агаар тогтуун, өнөөдөр Хангай, Хөвсгөлийн уулсаар бага зэргийн цас орно гэж Ус цаг уур, орчны шинжилгээний хүрээлэнгээс мэдээллээ.
Энэ сарын 17, 19-нд баруун аймгуудын нутгийн зарим газраар, 18-нд баруун аймгуудын нутгийн зүүн хэсэг, төв болон говийн аймгуудын нутгийн зарим газраар бага зэргийн цас орж зөөлөн цасан шуурга шуурна. Салхи 16, 17-нд зарим газраар, 18-нд говь талын нутгаар секундэд 12-14 метр хүрч ширүүснэ. Дархадын хотгор, Завхан голын эх, Хүрэн бэлчир, Идэр, Тэс голын хөндийгөөр шөнөдөө 30-35 градус, өдөртөө 19-24 градус, Увс нуурын хотгор болон Хангай, Хөвсгөл, Хэнтэйн уулархаг нутаг, Орхон-Сэлэнгийн сав, Ерөө, Туул, Тэрэлж, Хэрлэн, Онон, Улз, Халх голын хөндийгөөр шөнөдөө 22-27 градус, өдөртөө 10-15 градус, говийн бүс нутгийн өмнөд хэсэг, цас багатай энгэр ээвэр газраар шөнөдөө 12-17 градус, өдөртөө 0-5 градус, бусад нутгаар шөнөдөө 17-22 градус, өдөртөө 6-11 градус хүйтэн байна.
УИХ-ын гишүүн Б.Ундармаагийн эзэмшлийн гэгдэх “Бишрэлт” группийн харьяа “Капитал” банкны төв байранд АТГ-ын Мөрдөн шалгах албаны бүрэлдэхүүн шалгалт оруулан битүүмжилсэн бололтой. Шалгалтын бүрэлдэхүүнд Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсийнхэн багтаж байгаа гэх мэдээлэл мөн байна. “Капитал” банкинд прокурорын зөвшөөрлөөр санхүүгийн шалгалт оруулсан гэж байгаа бөгөөд эх сурвалжийн мэдээлж буйгаар, УИХ-ын гишүүн Б.Ундармаа ЖДҮХС-аас зээл авч “Капитал” банкаар дамжуулан мөнгө угаасан байж болзошгүй гэх үндэслэлээр ийнхүү шалгалт оруулаад байгаа бололтой. Мөн зарим холбогдох албан тушаалтнуудыг түр саатуулж магадгүй гэнэ.
Төрийн албаны зөвлөлөөс төрийн албан хаагчдын шалгалтыг авдаг. Энэ удаа буюу 2018 оны арванхоёрдугаар сарын 12-ны өдөр төрийн жинхэнэ албан тушаалын сул орон тоонд өрсөлдөхөөр бүртгүүлсэн иргэдийн мэдээллийг цахим хуудсанд бүрэн шивж оруулах ёстой байсан ч амжаагүй байна. Тиймээс шалгалтын хуваарийг 2018 оны арванхоёрдугаар сарын 16-ны өдрийн 16.00 цагт цахим хуудсанда байршуулахаар болжээ. Шалгалтыг 2018 оны арванхоёрдугаар сарын 17-ны өдрөөс эхэлж авах юм байна
Сэтгүүлч Жамаль Хашоггийн амийг хөнөөсөн хэрэг гарсны хариуцлагыг Саудын Арабын угсаа залгамжлах хунтайж Мухаммед бен Сальман Аль Саудад хүлээлгэсэн тогтоолыг АНУ-ын Конгрессын Сенатын танхим өнгөрсөн пүрэв гарагт баталжээ. “Ройтерс” агентлагийн мэдээлснээр, тогтоолыг санал нэгтэй баталсан байна. Түүнчлэн тогтоолд сэтгүүлчийн амийг хөнөөсөн хэрэгтэй холбоотой бүх хүнийг хариуцлагад татан оролцуулахыг Саудын Арабын эрх баригчдад уриалжээ. Уг тогтоол нь тунхагийн шинжтэй бөгөөд түүний зүйл заалтуудыг заавал биелүүлэх шаардлагагүй аж.
Төв талбайн сүлд модыг засаж дуусжээ. Уламжлал ёсоор өнөөдөр гэрлийг нь асаах ёслол хийхээр тогтсон байсан юм. Энэ талаар НЗДТГ-ын хэвлэлийн албанаас тодруулахад “Төв талбайн сүлд модны гэрлийг асаах ёслолын үйл ажиллагаа цуцлагдсан. Гэрлийг нь асаасан байгаа. Д.Сүхбаатарын талбайд сүндэрлэх 22 метр өндөр сүлд модыг “Гэрэлтүүлэг чимэглэл” ХХК зассан. Сүлд модны гэрэлтүүлгийг арванхоёрдугаар сарын 5-нд асаасан. Энэ жил сүлд модны гэрэл асаах ёслол хийхгүй. 2018 оны арванхоёрдугаар сарын 31-нд “Улаанбаатарын мөнгөн үдэш” шинэ жилийн баярын цэнгүүн төв талбайд болно. Одоогоор хөтөлбөр батлагдаагүй байна” гэсэн тайлбарыг өглөө. Өнгөрсөн жил “Сүлд модны гэрэл асаах” ёслол хийж өвлийн өвгөн цасан охид, үлгэрийн баатруудын хамт хүрэлцэн ирж сонирхолтой циркийн үзүүлбэрийг төв талбайд цугласан олонд толилуулж байсан билээ.
