Нийгмийн бодлого, боловсрол, соёл, шинжлэх ухааны байнгын хороо хуралдлаа. Хуралдаанаар Ерөнхий боловсролын сургуулийн хоол үйлдвэрлэл, үйлчилгээний тухай хуулийн төсөл болон хамт өргөн мэдүүлсэн “Хууль хэрэгжүүлэх зарим арга хэмжээний тухай” тогтоолын төслийг хэлэлцэв. Хэлэлцэж байгаа асуудалтай холбогдуулан холбогдох яамдаас хүүхэд хамгаалалтай холбоотой асуудлаар хэрэгжүүлж байгаа ажлын талаар мэдээлэл хийлээ. Дараагаар нь гишүүд асуулт тавьж, хариулт авсан юм.
Хүүхэд хамгааллын талаар авч хэрэгжүүлж байгаа арга хэмжээнүүд цаасан дээр төлөвлөснөөс цаашгүй, хэрэгжилт хангалтгүй байгаа талаар зарим гишүүд шүүмжилж байлаа. Өнгөрсөн онд хүүхдийн эсрэг гэмт хэрэг өмнөх оныхоос өсчээ. Гэмт хэргийн улмаас хохирсон хүүхдийн тоо буурахгүй байгаад олон нийтийн оролцоог татан оролцуулах хэрэгтэй гэж үзэж байв. “Хүүхэд хамгаалагч” төсөл хэрэгжүүлснээр гэмт хэргийн тоо буурах хандлагатай болсон, эрсдлийг бууруулж байна гэж Ерөнхийлөгчийн зөвлөх Г.Уянга хэллээ. Ерөнхийлөгчийн зүгээс 2019 оныг Хүүхэд хамгааллын жил болгон зарлахаар төлөвлөж байгаа юм байна.
УИХ-ын гишүүн Ц.Цогзолмаа:
-Хүүхдийн асуудлыг хариуцаж байгаа төлөөллүүд салбар хоорондын уялдааг хангаж, эрэмбэлж харах зайлшгүй шаардлага байгаа. Хүүхэд эрүүл, боловсролтой, аюулгүй, ёсзүйтэй байх асуудлыг эрэмбэлж байна. Хий хоосон хайр яриад асуудал шийдэгдэхгүй. Өнөөдөр гэхэд би БСШУСЯ-ны сайдын зөвлөлийн хурлаа хийгээд, ЕБС-иудын эрсдлийн үнэлгээг хийлгэсэн. Асуудал гарахаар араас нь хөөж ажилладаг байж болохгүй. Тиймээс сургуулийн гадаад орчны стандартын асуудлаар шийдвэр гаргаад Стандарт хэмжилзүйн төвд хүргүүллээ. Хүүхдийн төлөө ажилладаг механизм, бүтцээ зөв болгох хэрэгтэй. Бид хүүхдийн гэмт хэргийг ирэх жил 30 хувь бууруулна гэдэг зорилтгүйгээр ажиллах бололцоо байхгүй. Эцэг эхүчүд бидэнтэй хамтарч ажиллах ёстой.
УИХ-ын гишүүн Б.Билэгт:
-Бид хойч ирээдүйгээ ёс суртахуунтай иргэн болгон хүмүүжүүлэхэд алдсан. Монгол улс хөгжих үндэс нь хойч ирээдүйгээ ёс суртахуунтай иргэн болгож төлөвшүүлэх юм. Тиймээс бид Монгол хойч ирээдүйгээ ёс суртахуунтай иргэн болгон төлөвшүүлэхийн төлөө явах ёстой гэлээ.
Ингээд Хүүхэд хамгаалал, хүүхдийн эрхийг хамгаалах тухай хуулийн хэрэгжилтийг хангах ажлын хүрээнд зарим арга хэмжээ авч хэрэгжүүлэх чиглэлийг Засгийн газарт хүргүүлэхээр тогтлоо. Үүнд, хүүхэд хамгаалах үүргээ хуульд заасны дагуу хэрэгжүүлэх, хүүхдийг эрсдлээс хамгаалах зорилгоор ажилтнуудыг илүү цагаар ажиллуулахгүй байх, шаардлагатай үед чөлөө олгодог байх. 2019 оныг Хүүхэд хамгааллын жил болгох, хүүхдийг гэмт халдлагаас хамгаалах төслийг 2019 онд хэрэгжүүлэх санхүүжилтийг олгох, цагдаагийн албан хаагчдын орон тоог нэмэгдүүлэх, төрийн болон төрийн бус байгууллага, иргэдийг хүүхэд хамгааллын ажилд татан оролцуулах, Хүүхдийн төлөө үндэсний төвийн үйл ажиллагааг тогтмолжуулах, хүүхдийн хөгжилд сөрөг нөлөөтэй контентийг цахим орчинд хаях зэргийг байнгнын хороо тогтоолдоо тусгасан байлаа.
Монгол Улсын Ерөнхийлөгч Х.Баттулга “Шилдэг залуу эрдэм шинжилгээний ажилтан, судлаачдад шагнал олгох тухай” зарлиг гаргаж, өнөөдөр 2018 оны шилдэг судлаачдад Монгол Улсын Ерөнхийлөгчийн нэрэмжит шагналыг хүртээв.
MNBA Үндэсний лигийн үзүүштэй нэгэн тоглолт Өвөрхангай болон Дархан-Уул аймгийн багуудын хооронд өчигдөр боллоо. Тоглолтын эхнээс онооны харьцаа ойролцоо үргэлжилсээр эцсийн мөчид 78-78 харьцаатай тэнцсэн юм. Ингээд нэмэлт цагт Дархан баг бага зэрэг илүү байсан ч Т.Билгүүн онцгой тоглолтоо гаргаж 10 оноог ганцаараа авснаар 88-88 болгож тэнцүүлсэн юм. Улмаар хоёр дахь нэмэлт цагийг сунгаж эхний таван оноог Т.Батсүх авч Өмнөговь багт давуу талын үүсгэв. Ингээд хоёр дахь цаг дуусахад 35 секунд үлдээд байхад Дарханы баг сэргэж гурав дараалсан холын шидэлтийг амжилттай болгож онооны зөрүүг 2 болгож ойртуулсан юм. Улмаар тэдэнд хугацаа бага байсан тул Өмнөговь багийн лидер Т.Билгүүн дээр алдаа гаргасан. Дарханы багийн эцсийн найдварыг энэ тоглолтын гол баатар Т.Билгүүн үгүй хийж хоёр шидэлтээ амжилттай гүйцэтгэжээ. Т.Билгүүний хувьд 38 оноог авч гайхалтай байсан бөгөөд энэ MNBA Үндэсний лигийн энэ улирлын хамгийн өндөр оноог аваад байна.
Өмнөговь аймгийн Ханбогд сумын Хайрхан багт дээр бүх нийтийг хамруулсан эрүүл мэндийг үзлэг хийж байна.
Нийслэлийн Хангарьд ордонд шинэ жилийн баярын арга хэмжээтэй холбогдуулан иргэд, олон нийтэд болзошгүй эрсдлээс урьдчилан сэргийлэх тухай нийслэлийн Онцгой байдлын газар, нийслэлийн Мэргэжлийн хяналтын газар, нийслэлийн Цагдаагийн газраас өнөөдөр мэдээлэл хийлээ.
МУГТ Б.Сэр-Од “Хофү Ёмиүри марафон” олон улсын тэмцээнээс мөнгөн медаль хүртлээ. Япон улсын Хофү хотод Ёмиүри сонины газараас 49 дахь жилдээ зохион байгуулж байгаа ” ХОФҮ ЁМИҮРИ МАРАФОН” олон улсын тэмцээнд Монгол улсын гавъяат тамирчин Б.Сэр-Од 2 цаг 12 мин 12 сек гүйж, Мөнгөн медаль хүртлээ. Энэ тэмцээнд нийт 3000 гаруй тамирчид гүйсэн байна
Энэ сарын 9-нд Увс аймгийн Наранбулаг сумын малчны хотонд мал, амьтны халдварт галзуу өвчний шинж тэмдэгтэй үнэг орж иржээ. Үнэгийг устгаж, дээж авч Мал эмнэлгийн ариун цэврийн лабораторид шинжлүүлэхэд галзуу өвчин болох нь тогтоогдсон байна.
ОБЕГ-ын харьяа Үндэсний аврах бригад 2018 оны ажлаа дүгнэж, дэвшүүлсэн зорилтыг ханган, үндсэн үүргээ амжилттай биелүүлж, хамт олноо хошуучилж ажилласан тэргүүний алба хаагчдыг шагнаж урамшууллаа.
Монголын чөлөөт бөхийн холбооноос оны шилдгүүдээ шалгаруулж, ДАШТ-ээс медаль хүртсэн тамирчдаа мөнгөн шагналаар урамшуулсан байна.
Шүүхийн ёс зүйн хорооны нийт гишүүдийн хуралдаан энэ сарын 16-ны өдөр боллоо. Хуралдаанаар 13 шүүгчид холбогдох 11 гомдол хэлэлцсэнээс 3 шүүгчид 6 сар цалинг 30 хувь бууруулах сахилгын шийтгэл ногдуулав. Мөн 3 шүүгчид холбогдох 2 гомдолд сахилгын хэрэг үүсгэхээс татгалзсан тогтоолыг хэвээр баталж, 3 шүүгчид холбогдох 3 гомдлыг хойшлуулж, 3 шүүгчид холбогдох 2 гомдлын сахилгын хэргийг хэрэгсэхгүй болголоо. Харин 1 шүүгчид холбогдох 1 гомдлын сахилгын хэрэг үүсгэхээс татгалзсан тогтоолыг хүчингүй болгож дахин хэлэлцүүлэхээр буцааж шийдвэрлэсэн байна.