Аргын тооллын арванхоёрдугаар сарын 19, Буд гариг. Билгийн тооллын 12, Гоё хүүхэн одтой, хөхөгчин тахиа өдөр. Өдрийн наран 8:37 цагт мандан, 17:03 цагт жаргана. Тухайн өдөр үхэр жилтнээ аливаа үйлийг хийхэд эерэг сайн ба могой, морь жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр элдэв үйлд хянуур хандах хэрэгтэй ба ан, адгуус муулах, лусыг тахих, хагалгаа хийлгэх, буг дарах, газрын ам бооход сайн. Мод суулгах, сэтгэлд сэвтэй газар очих, байшингийн суурь тавих, угаал үйлдэхэд муу. Өдрийн сайн цаг нь хулгана, бар, туулай, морь, хонь, тахиа болой. Хол газар яваар одогсод баруун зүгт мөрөө гаргавал зохистой.
Үс шинээр үргээлгэх буюу засуулахад тохиромжгүй.
Өглөө бүр тантай хамт байдаг “Өдрийн сонин”-ы лхагва гаригийн дугаар 20 нүүрээр хэвлэгдэж, та бүхний гар дээр хүрч байна.
Орой 22.40 цагийн орчимд Баянзүрх худалдааны төвд их хэмжээний гал гарчээ. Галын дуудлагаар цагдаа болон онцгой байдлын албан хаагчид шуурхай ажиллаж байна. 
Хөрөнгийн бирж өнөөдөр I, II, III ангиллын 20 хувьцаат компанийн 1,143,802,599 төгрөгийн үнийн дүн бүхий 1,236,253 ширхэг хувьцаа арилжигдсан байна. Үүнээс 6 хувьцаат компанийн хувьцааны ханш өсч, 10 компанийн хувьцааны ханш буурч 5 хувьцаат компанийн хувьцааны ханш тогтвортой байлаа. Үүнээс “Жинст Увс” ХК (JIV+10.72%) болон “Шарын Гол” ХК (SHG+4.41%) -ийн хувьцааны ханш хамгийн өндөр өсөлттэй байсан бол “Нако Түлш” ХК (NKT -12.07%) болон “АйТүүлс” ХК (ITLS -5.80%) -ийн хувьцаа хамгийн их уналттай байлаа. ЗГҮЦ-ны хоёрдогч зах зээлийн багцын арилжаагаар 7,710 ширхэг үнэт цаасыг 795.8 сая төгрөгөөр арилжаалагдсан байна. Энэ өдөр “TOP 20” индекс 0.19 хувиар өсч 20459.12 нэгжид хүрсэн бол зах зээлийн үнэлгээ 2,408,057,049,737.47 төгрөг боллоо.
Франц Улс дахь Монголын ЭСЯ, Булонь-Биянкур хотын захиргаатай хамтран энэ сарын 13-ны өдөр төгөлдөр хуурч С.Одгэрэлийн төгөлдөр хуурын тоглолтыг тус хотын соёлын төвд амжилттай болов.Тоглолтыг тус хотын захиргаа, хотын зөвлөлийн гишүүд, Франц Улсад суугаа Элчин сайд нар, Францын төрийн байгууллагуудын болон бизнесийн төлөөлөл, монгол судлаачид, хотын оршин суугчид зэрэг 400 орчим үзэгч сонирхов. Арга хэмжээнд Элчин сайд А.Баттөр оролцжээ. Тоглолтын хөтөлбөрт дэлхийн сонгодог бүтээл болон Монголын хөгжмийн зохиолчдын уран бүтээлүүдээс төгөлдөр хуур, морин хуур, хийл, виолончель хөгжмийн хосолсон тоглолтыг толилуулав. Монголын сонгодог урлагийн хөгжил, өвөрмөц байдлыг үзүүлсэн энэхүү тоглолт францын үзэгчдэд Монгол Улсыг шинэ өнцгөөс нээн харуулсан арга хэмжээ болж чадсан хэмээн үнэлжээ. Мөн тоглолтын дараа 400 хүний хүлээн авалт хийж, монгол хоолоороо дайлсан байна. 
АТГ-аас өнөөдөр УИХ-ын нэр бүхий гишүүдээс мэдүүлэг авсан байна. Жижиг, дунд үйлдвэрлэлийг хөгжүүлэх сангаас УИХ, Засгийн газрын гишүүд болон төрийн өндөр албан тушаалтнууд зээл авсан асуудлыг АТГ-аас шалгаж байгаа. Үүнтэй холбогдуулан нэг сарын өмнөөс УИХ-ын гишүүд болон тэдний хамаарал бүхий хүмүүс, найз, нөхөд ойрын хүрээний хүмүүсээс мэдүүлэг, байцаалт авч эхлээд буй. Өчигдөр УИХ-ын гишүүн Б.Ундармааг дуудаж мэдүүлэг авсан. Харин өнөөдөр УИХ-ын нэр бүхий хэд, хэдэн гишүүнийг дуудаж байцаалт, мэдүүлгийг авчээ. 
Энэ сарын 17-ны өдөр Баянгол дүүргийн 18-р хорооны нутаг дэвсгэрт байрлах “Зочин” зоогийн газарт ажиллаж байсан нийт есөн хүн угаартаж эмнэлэгт хүргэгджээ. Тодруулбал, тухайн өдрийн 00:54 цагт цагдаагийн байгууллагад “угаартлаа” гэх дуудлага мэдээлэл иржээ. Мэдээллийн дагуу цагдаагийн бие бүрэлдэхүүн тус газарт очиход ажилчин 19-47 насны есөн хүн утаанд хордож угаартсан байдалтай байсан аж. Дээрх ажилчид түргэн тусламжийн машинаар яаралтай Цэргийн төв эмнэлэгт хүргэгдсэн байна. Одоогоор тус газрыг МХЕГ, ОБЕГ-ын холбогдох мэргэжилтнүүд нөхөн үзлэг хийж байгаа бөгөөд Баянгол дүүргийн цагдаагийн нэгдүгээрт хэлтэст хэрэг үүсгэн шалгаж эхэлжээ.
Эдийн засгийн байнгын хорооны хуралдаанаар Зам, тээврийн хөгжлийн сайдыг үүрэгт ажлаас нь чөлөөлөх тухай асуудал, Хөрөнгө оруулалтын банкны тухай хуулийн төсөл болон хамт өргөн мэдүүлсэн хуулийн төслүүд, Ашигт малтмалын тухай, Газрын тосны тухай, Газрын тосны бүтээгдэхүүний тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд зэргийг хэлэлцэхээр байсан ч ирц бүрдээгүйгээс хуралдаан хойшиллоо. УИХ-ын нэр бүхий 38 гишүүн УИХ-ын дарга М.Энхболдыг огцрох хүртэл байнгын хороо, чуулганы хуралдаанд суухгүй гэж мэдэгдэн бойкот зарласан. Үүнээс үүдэн УИХ-ын үйл ажиллагаа дөрвөн долоо хоногийн хугацаанд гацаанд ороод байна.