Аргын тооллын арванхоёрдугаар сарын 20, Бархасбадь гариг. Билгийн тооллын 13, Нэгэн эхийн зургаан хөвгүүн одтой, улаан нохой өдөр. Өдрийн наран 8:38 цагт мандан, 17:03 цагт жаргана. Тухайн өдөр бар, морь жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр буян номын үйлийг эхлэх, дээдсээс халамж хүсэх, лам хувраг болох, багш шавьд барилдах, номын абшиг авах, шинэ гэр ба байр авах, лус тахих, хүүхэд үрчлэн авах, тангаргаа буцаахад сайн. Нүүдэл суудал хийх, хэрүүл тэмцэл хийх, цөөрөм байгуулах, хүүхэд хөлд оруулахад муу. Өдрийн сайн цаг нь бар, луу, могой, бич, тахиа, гахай болой. Хол газар яваар одогсод баруун урагш мөрөө гаргавал зохистой.
Үс шинээр үргээлгэх буюу засуулбал жаргал ирнэ.
Өглөө бүр тантай хамт байдаг “Өдрийн сонин”-ы пүрэв гаригийн дугаар 16 нүүрээр хэвлэгдэж, та бүхний гар дээр хүрч байна.
Тусгаар тогтнолын ордонд МАН-ын XXVIII Их хурлын III Бага хурал үргэлжилж байна.
Тусгаар тогтнолын ордонд 11.00 цагт эхэлсэн МАН-ын 28 дугаар бага хуралдаан түр завсарлав.Завсарлагааны өмнө МАН-ын удирдлагууд болон Бага хурлын гишүүд өнөөгийн улс төрийн нөхцөл байдал болон намын шинэчлэлийн талаар үг хэлснийг тоймлон хүргэж байна.
Санхүүгийн зохицуулах хорооны ээлжит хуралдаанаар, “Минжпроперти” ХХК-ийн нийтэд санал болгон гаргах нэг жилийн хугацаатай 1.0 тэрбум төгрөгийн “Парк Таун” бондыг үнэт цаасны бүртгэлд бүртгэлээ. Тус компани Дархан-Уул аймагт хэрэгжүүлэх Парк Таун-2 төслийнхөө урсгал санхүүжилтийг энэхүү бондоор босгох бөгөөд ирэх онд бондын хоёр дахь хэсгийг хоёр жилийн хугацаатай 2.0 тэрбум төгрөгийн дүнтэйгээр гаргахаар бэлтгэж буй аж. “Парк Таун” бондын арилжааг “Монголын үнэт цаасны бирж” ХК эрхлэн гүйцэтгэх бөгөөд өрийн хэрэгслийн жилийн хүүг арилжааны банкуудын дундаж хадгаламжийн хүү болон Засгийн газрын үнэт цаасны хүүгээс өндрөөр санал болгохоор үнэт цаас гаргагчид төлөвлөжээ.
Маргаашнаас нээгдэх нийслэлийн цахим үйлчилгээний “E-service” порталыг ашиглан иргэд таван байгууллагын 50 орчим үйлчилгээг авах боломжтой болно. Үүнд зарим үйлчилгээний тусгай зөвшөөрөл авах, цооног өрөмдөх, худаг гаргах, жуулчин хүлээн авах тээврийн хэрэгсэл, архивын лавлагаа зэрэг иргэдийн дунд нэлээн эрэлттэй үйлчилгээнүүд орж байна. Энэ талаар Нийслэлийн Мэдээллийн технологийн газрын дарга О.Чинзоригоос тодруулахад, ““E-service” порталыг нээснээр иргэд нэр дурдсан олон төрлийн үйлчилгээг авахаас гадна хамгийн гол нь авахыг хүссэн үйлчилгээ тань хаана, ямар байгууллага, газрын албан тушаалтанд байгааг хянах боломжтойгоор давуу юм. Үйлчилгээ авах таны хүсэлт бүхий асуудлыг шийдээгүй удах юм бол тухайн албан тушаалтанд гомдол гаргаж мэдүүлж болно. Мөн эсрэгээр асуудлыг хурдан хугацаанд шийдсэн нөхцөлд бас тухайн албан тушаалтанд үнэлгээ өгөх боломжтой. Үүгээр манай цахим үйлчилгээний ач холбогдол оршиж байна” гэв. Дэлхийн томоохон хотууд иргэддээ үйлчилдэг тусгай порталтай байдаг. Энэ жишгээр манай нийслэл Улаанбаатар хот цахим портал бүхий хотуудын эгнээнд нэгдэж байна.