НӨАТ-ын урамшууллын 2018 оны 11 дүгээр сарын сугалааны тохирол 12-р сарын 23-ны ням гарагт Боловсрол телевизээр орон даяар шууд явагдана.
Иргэн та 2018 оны 11-р сарын 01-нээс 11-р сарын 30-ны өдөр хүртэлх хугацаанд худалдан авалт хийсэн баримтаа 2018 оны 12-рсарын 22-ны өдрийн 23 цаг 59 минутаас өмнө Цахим төлбөрийн баримтын системд бүртгүүлснээр НӨАТ-ын урамшууллын сугалаанд хамрагдан азтан болох боломжтой.
.jpg?w=1000)
Компьюьерийн тоног төхөөрөмж, программ хангамжийн системийг бүтээн, үйлдвэрлэгч “Интел” компани өндөр хүчин чадалтай 6 цөмт 8 дахь үеийн бүтээн танилцуулсан. Тус чипийг зөөврийн компьютерт суурилагддаг хэлбэрээр ашиглах боломжтой гэж онцолжээ.
Шилдэг, шинэ, хамгийн сүүлийн үеийн технологийн үзүүлэлттэй энэ чип – Core i9-8950HK – “турбо хурдатгал” горимд 4.8 GHz хурдтай (суурь давтамж нь 2.9 GHz), энэ нь 6 тооцооллын цөм, 12 дамжуулалттай. Ийм өндөр чадалтай процессорын чип нь компьютер тоглоом болон графикчдын шаардлагыг хангаж чадахуйц технологи гэжээ. Тоглоомонд зориулагдсан Интелийн хамгийн шилдэг чип бол энэ хэмээн онцолсон. Өмнөх Intel 7 үеийн процессоруудтай харьцуулахад хурдыг 29 хувиар нэмэгдүүлсэн байна. Тоглоомын хувьд i9-8950HK-ийн гүйцэтгэл 41хувиар өндөр, 4K-видео суулгахад 59 хувь хүртэл нэмэгдсэн байна.
Монголбанкнаас санаачлан “Цахим эринд цахим төлбөр тооцоо” аяныг хоёр сарын хугацаанд хэрэгжүүллээ. Энэ хугацаанд санхүүгийн үйлчилгээг цахимжуулах, мэдээллийн технологийн хурдацтай хөгжилд түшиглэн төлбөр тооцоог хурдан шуурхай гүйцэтгэх, Монгол Улсын төлбөрийн системийн үйл ажиллагаа, эрх зүйн зохицуулалт, цаашдын хөгжлийн талаар олон нийтэд сурталчлан таниулах, иргэдийн санхүүгийн боловсролыг нэмэгдүүлэхэд чиглэсэн олон төрлийн ажлыг амжилттай зохион байгууллаа.
Санхүүгийн тогтвортой байдлын зөвлөлөөс 2016 онд баталсан “Монгол Улсын үндэсний төлбөрийн системийг хөгжүүлэх стратеги”-ийн томоохон зорилтын нэг нь “хууль, эрх зүйн орчныг сайжруулах” явдал байв. Тиймээс Монголбанкнаас боловсруулан Үндэсний төлбөрийн системийн тухай хуулийг батлуулж, 2018 оны 01 дүгээр сараас хэрэгжүүлж эхэлсэн бөгөөд аяны хүрээнд хуулийн дагалдах журам, дүрмийг шинэчлэн баталж, банкнаас бусад байгууллагад төлбөрийн системийн оролцогч болох бололцоог бий болголоо.
Аяны хүрээнд нэг талаас иргэд, харилцагч Монгол Улсын үндэсний төлбөрийн систем, финтекийн хөгжил, бэлэн бус төлбөрийн хэрэгсэл, цахим төлбөр тооцооны талаар нэгдсэн ойлголтод хүрэх, нөгөө талаас төлбөрийн системийн оролцогч хоорондын үйл ажиллагааг идэвхжүүлэх, хамтын ажиллагааг хөгжүүлэх, эрх зүйн орчинг таниулах, олон нийтийн сүлжээгээр иргэдийн санхүүгийн боловсролыг нэмэгдүүлэх арга хэмжээг авч хэрэгжүүлсэн нь санхүүгийн тогтвортой байдлыг хангахад дэмжлэг болсон гэж үзэж байна.
Орон даяар хэрэгжүүлсэн энэхүү аянд Монголын банкны холбооны нэгдсэн зохион байгуулалтаар арилжааны банкууд идэвх санаачлагатай оролцон хэрэглэгч, харилцагчдад зориулсан уулзалт өдөрлөг, сургалт, өдөрлөг, сурталчилгааг зохион байгуулж, цахим төлбөрийн хэрэгсэл, бүтээгдэхүүн, үйлчилгээний хөнгөлөлт урамшууллыг үзүүллээ.
Үүгээр “Цахим эринд цахим төлбөр тооцоо” аяныг хэрэгжүүлсэн нь төлбөрийн системийн оролцогчдод шинэ боломж бололцоо олгох, бизнесийн шинэ санаа өгөх, санхүүгийн хүртээмжийг нэмэгдүүлэх, цахим системд суурилсан хөгжлийг хурдасгахад нэн ач холбогдолтой боллоо.
Монгол Улсын Их Хурлын дэд дарга Л.Энх-Амгалан өчигдөр БНХАУ-ын БХАТИХ-ын Санхүү, эдийн засгийн байнгын хорооны дэд дарга Yin Zhongqing тэргүүтэй төлөөлөгчдийг хүлээн авч уулзав.
Сүүлийн жилүүдэд Монгол, Хятадын иж бүрэн стратегийн түншлэлийн харилцаа, хамтын ажиллагаа олон чиглэлээр гүнзгийрэн хөгжиж, хоёр талын өндөр, дээд түвшний харилцан айлчлалуудын давтамж хадгалагдаж байгаа. 2018 оны дөрөвдүгээр сард Монгол Улсын Ерөнхий сайд У.Хүрэлсүх БНХАУ-д албан ёсны айлчлал хийсэн. Монгол Улсын Ерөнхийлөгч Х.Баттулга зургаадугаар сард ШХАБ-ын дээд хэмжээний уулзалт, есдүгээр сард “Дорнын эдийн засгийн чуулга уулзалт”-д тус тус оролцож, БНХАУ-ын дарга Ши Жиньпинтэй уулзсан. Харин наймдугаар сард БНХАУ-ын Төрийн зөвлөлийн гишүүн бөгөөд Гадаад харилцааны сайд Ван И, аравдугаар сард ХКН-ын Төв хорооны Улс төрийн товчооны гишүүн, Тяньжин хотын Намын хорооны нарийн бичгийн дарга Ли Хунжун, ӨМӨЗО-ны Намын хорооны нарийн бичгийн дарга Ли Жихөн нар Монгол Улсад айлчилсан. Эдгээр айлчлалуудын хүрээнд олон чухал төсөл, хөтөлбөрийн талаар хэлэлцээр хийж, эхнээсээ бодит ажил хэрэг болох алхамууд тавигдаж байгаад баяртай байгаагаа УИХ-ын дэд дарга уулзалтын эхэнд онцоллоо.
Тэрбээр, Хоёр улсын харилцаа, хамтын ажиллагааг хөгжүүлэх нь Монгол Улсын гадаад бодлогын тэргүүлэх чиглэл бөгөөд хоёр талын хүчин чармайлтаар Монгол, Хятадын харилцааг шинэ агуулгаар баяжуулан хөгжүүлж байна. БНХАУ-ын Засгийн газраас хөрш орнуудтайгаа харилцах харилцаанд онцгой ач холбогдол өгч, найрсаг дотно, нээлттэй, хүртээмжтэй хандаж, хамтын ажиллагааны үр ашгийг хуваалцах бодлого баримталж байгаа нь хоёр талын харилцааг илүү өргөн хүрээнд хөгжүүлэх боломж олгож байгааг тэмдэглэсэн юм.
БНХАУ-ын БХАТИХ-ын Санхүү, эдийн засгийн байнгын хорооны дэд дарга Yin Zhongqing хоёр улсын хамтын ажиллагааг өргөжүүлэхэд хууль тогтоох байгууллагуудын харилцаа түүчээлэн байгааг үгийнхээ эхэнд цохон тэмдэглээд ирэх онд тохиох дипломат харилцаа тогтоосны түүхт 70 жилийн ойг угтаж, олон чухал ажлыг хамтран хийхээр холбогдох байгууллагууд төлөвлөгөө гарган ажиллаж байгааг дурдав.
Мөн тэрбээр, Монгол, Хятадын эдийн засаг, худалдаа, хөрөнгө оруулалтын салбарын харилцааг улам идэвхжүүлэх шаардлагатай байна. Ингэхийн тулд аль аль талдаа хууль эрх зүйн орчныг сайжруулах нь зүйтэй. Иймд гадаадын хөрөнгө оруулагчдад таатай нөхцлийг бүрдүүлэх үүднээс энэ долоо хоногт БХАТИХ-аас гадаадын хөрөнгө оруулалтын тухай хуулиудаа шинэчлэн батлахаар ажиллаж байгааг дуулгав.
Уулзалтын үеэр талууд хоёр улсын эдийн засаг, хөрөнгө оруулалт, гадаад худалдаа, уул уурхай, эрчим хүч, орон нутгийн хамтын ажиллагааны талаар ярилцаж, санал солилцлоо.
Энэхүү уулзалтад УИХ-ын гишүүн, УИХ дахь Монгол-Хятадын парламентын бүлгийн дэд дарга С.Бямбацогт, УИХ-ын гишүүн Д.Оюунхорол, Б.Ундармаа, БНХАУ-ын БХАТИХ-ын Санхүү, эдийн засгийн байнгын хорооны гишүүн, ажлын албаныхан байлцав.
Малчид, тээвэрчид, иргэдийн анхааралд:
Өнөө маргаашдаа нутгийн зүүн хагаст бага зэргийн цас орж, цасан шуурга шуурч, ихэнх нутгаар хүйтрэхийг анхааруулж байна.
2018 оны арванхоёрдугаар сарын 22-ны 20 цаг хүртэлх цаг агаарын урьдчилсан мэдээ:
БАРУУН АЙМГУУДЫН НУТГААР: Солигдмол үүлтэй. Цас орохгүй. Салхи баруун хойноос секундэд 6-11 метр. Хүйтэрч Увс нуурын хотгор, Завхан голын эх, Хүрэн бэлчир орчим, Идэр, Тэс голын хөндийгөөр шөнөдөө 36-41 градус, өдөртөө 25-30 градус, Алтайн өвөр говиор шөнөдөө 16-21 градус, өдөртөө 8-13 градус, бусад нутгаар шөнөдөө 25-30 градус, өдөртөө 16-21 градус хүйтэн байна.
ТӨВИЙН АЙМГУУДЫН НУТГААР: Шөнөдөө үүлэрхэг, зарим газраар бага зэргийн цас орж, цасан шуурга шуурна. Өдөртөө үүл багасна, цас орохгүй. Салхи баруун хойноос секундэд 4-9 метр, зарим газраар секундэд 12-14 метр хүрч ширүүснэ. Хүйтэрч Дархадын хотгороор шөнөдөө 34-39 градус, өдөртөө 25-30 градус, Хангай, Хөвсгөл, Хэнтэйн уулархаг нутаг, Хараа, Ерөө, Орхон, Туул, Тэрэлж голын хөндийгөөр шөнөдөө 28-33 градус, өдөртөө 19-24 градус, бусад нутгаар шөнөдөө 23-28 градус, өдөртөө 15-20 градус хүйтэн байна.
ЗҮҮН АЙМГУУДЫН НУТГААР: Үүлшинэ. Шөнөдөө зарим газраар бага зэргийн цас, өдөртөө нутгийн зүүн хэсгээр ялимгүй цас орж, цасан шуурга шуурна. Салхи баруун хойноос секундэд 5-10 метр, зарим газраар секундэд 12-14 метр хүрч ширүүснэ. Хүйтэрч Хэнтий, Дорнодын хойд хэсгээр шөнөдөө 27-32 градус, өдөртөө 17-22 градус, бусад нутгаар шөнөдөө 19-24 градус, өдөртөө 13-18 градус хүйтэн байна.
ОТРЫН НУТАГ ХЭРЛЭНБАЯН-УЛААН ОРЧМООР: Солигдмол үүлтэй. Цас орохгүй. Салхи баруун хойноос секундэд 6-11 метр. Шөнөдөө 30-32 градус, өдөртөө 15-17 градус хүйтэн байна.
ГОВИЙН АЙМГУУДЫН НУТГААР: Үүлшинэ. Шөнөдөө зарим газраар бага зэргийн цас орж, цасан шуурга шуурна. Өдөртөө цас орохгүй. Салхи баруун хойноос секундэд 7-12 метр, шөнөдөө зарим газраар түр зуур секундэд 16-18 метр хүрч ширүүснэ. Хүйтэрч Шөнөдөө Дундговийн нутгаар 23-28 градус, бусад нутгаар 18-23 градус, өдөртөө бүх нутгаар 13-18 градус хүйтэн байна.
УЛААНБААТАР ХОТ: Үүлшинэ. Шөнөдөө ялимгүй цас орно. Өдөртөө цас орохгүй. Салхи баруун хойноос секундэд 6-11 метр. Шөнөдөө Яармаг-Сонгины орчмоор 28-30 градус, бусад хэсгээр 25-27 градус, өдөртөө 18-20 градус хүйтэн байна.
ЕБС-ын хоёрдугаар ээлжийн амралт эхэлж байна. БСШУС-ын яамнаас агаарын бохирдол ихтэй өвлийн улиралд сурагчдыг урт хугацаагаар амруулахаар шийдвэрлэсэн бөгөөд Улаанбаатар хотын нэгээс тавдугаар ангийн сурагчид арванхоёрдугаар сарын 22-ноос эхлэн долоон долоо хоног амрах юм. Харин хөдөө орон нутгийн сургуулийн сурагчид таван долоо хоног амарна.
НӨАТ-ын урамшууллын 2018 оны арваннэгдүгээр сарын сугалааны тохирол 23-ны ням гаригт явагдана. Энэ удаагийн тохирлын супер шагнал 200 сая төгрөг юм. Иргэд 2018 оны арваннэгдүгээр сарын 1-нээс арваннэгдүгээр сарын 30-ны өдөр хүртэлх хугацаанд худалдан авалт хийсэн баримтаа өнөөдөр /2018.12.22/ 23.59 цагаас өмнө Цахим төлбөрийн баримтын системд бүртгүүлээрэй. Сугалааны тохирлыг арын оронгоос эхлэн тодруулах бөгөөд таны баримтын арын найман орон тохирсон бол та 50 сая төгрөг, долоон орон тохирсон бол 10 сая, зургаан орон тохирсон тохиолдолд таван сая төгрөг, таван орон тохирсон бол нэг сая, дөрвөн орон тохирвол 200 мянга, гурван орон тохирсон бол та 50 мянган төгрөг хожих юм. Харин Супер азтан өмнөх тохиролд тодроогүй учир 25 сая төгрөг нэмэгдэж, нийтдээ 200 сая төгрөг хожих боломж бүрдсэн байна.
БНСУ-ын Инчёны олон улсын нисэх онгоцны буудлаас өчигдөр /2018.12.21/ 13.20 минутад Улаанбаатар руу хөөрсөн МИАТ компанийн ОМ302 онгоц замынхаа дундаас буцаж, ослын буулт хийсэн гэх мэдээлэл байсан юм. Энэ талаар Засгийн газрын Хэвлэл мэдээллийн алба залруулга гаргажээ. Залруулгад “Нисэх үед онгоцны дугуйны хаалт дутуу хаагдсан гэрлэн дохио ассан тул буцаж буугаад сэлбэж янзалсан. Одоо 19.00 цагаас ниснэ. Утаа, угаар гараагүй. Ослын буулт хийгээгүй” гэсэн байна.
Монгол Улсын Их Хурлын дэд дарга, УИХ дахь Монгол-Хятадын парламентын бүлгийн дарга Я.Санжмятав өчигдөр БНХАУ-ын Түвдийн Өөртөө Засах Орны Ардын Төлөөлөгчдийн Их Хурлын байнгын хорооны дэд дарга Жю Жяньхау тэргүүтэй төлөөлөгчдийг хүлээн авч уулзлаа.
Уулзалтын эхэнд УИХ-ын дэд дарга Я.Санжмятав хоёр улсын ирээдүйн хамтын ажиллагааны хөгжлийг шат ахиулахаар айлчилж байгаад УИХ-ын нэрийн өмнөөс болон хувиасаа талархал илэрхийлэв. Олон зууны түүх, соёлын хэлхээ холбоотой Түвдийн төлөөлөгчид парламентын шугамаар Монголд дахин айлчилж буйд УИХ-ын дэд дарга Я.Санжмятав баяр хүргээд хоёр орны харилцаа төр, нийгэм, соёл, иргэд хоорондын гээд бүхий л салбарт амжилттай хөгжиж байна гэв.
Түүнчлэн хөрш зэргэлдээ БНХАУ-тай харилцах харилцааг манай улс гадаад бодлогын тэргүүлэх чиглэлээ гэж үздэг. Хоёр орны харилцаа бүхий л түвшинд нэн амжилттай хөгжиж буйд сэтгэл хангалуун байдаг. Амжилттай хөгжиж буй харилцааны нэг гол салбар нь парламент хоорондын хамтын ажиллагаа бөгөөд 2016 оноос харилцаа илүү шинэ хэлбэр буюу байнгын механизм бий болгох чиглэлд шилжиж байна гэдгийг тэмдэглэлээ. Тэрбээр “Та бүхний Монгол Улсад хийж буй айлчлал хоёр улсын парламент хоорондын болон бүс нутгийн хамтын ажиллагааны хөгжилд чухал түлхэц болно гэдэгт итгэлтэй байна. Мөн хоёр орны харилцаанд орон нутгийн, иргэд хоорондын хамтын ажиллагаа чухал үүрэгтэй” хэмээв.
БНХАУ-ын Түвдийн Өөртөө Засах Орны Ардын Төлөөлөгчдийн Их Хурлын байнгын хорооны дэд дарга Жю Жяньхау найрсаг дотноор хүлээн авч уулзаж байгаад талархал илэрхийлээд ТӨЗО-ны АТИХ-ын төлөөлөгч, Түвдийн Өөртөө Засах Орны дэд дарга Бямбадашийн мэндчилгээг уламжилж, Түвдэд зочлохыг урив. Мөн тэрбээр, Монгол Улс “Түвд бол БНХАУ-ын салшгүй нэгэн хэсэг” гэсэн зарчмын байр суурийг байнга нотолдогт талархалтай байдаг. Манай хоёр орон мал аж ахуй, газар тариалан, аялал жуучлал, соёл, арьс шир боловсруулах чиглэлээр хамтран ажиллах бүрэн боломжтой гэдгийг уулзалт үеэр онцлон тэмдэглэлээ.
УИХ-ын дэд дарга Я.Санжмятав “Түвдийг БНХАУ-ын нэгэн хэсэг гэж үздэг манай улсын гадаад бодлогын уламжлалт чанар хэвээр хадгалагдаж байгаа. Түвдийн өөртөө засах орныг эрчимтэй хөгжлийн замаар замнуулах зорилт тань биелнэ гэдэгт итгэж байна” гээд төлөөлөгчдийг Монгол Улсад тавтай зочлохыг хүсэв
МҮОХ-ны “Бөртэ Чоно-2018” тэргүүн дээд шагнал гардуулах ёслол болж шилдгүүдээ тодрууллаа. Энэ жилийн “Бөртэ Чоно-2018”-ын шилжин явах цомын эзнээр боксчин М.Нандинцэцэг тодорлоо.
Ингээд “Бөртэ чоно 2018” наадмын шилдэг баг, тамирчинг танилцуулъя.
2018 оны шилдэг эрэгтэй тамирчин: Ө.Дүүрэнбаяр /жүдо бөх/
2018 оны шилдэгийн шилдэг эрэгтэй тамирчин: Л.Отгонбаатар /жүдо бөх/
2018 оны шилдэг эрэгтэй тамирчин: Э.Цэндбаатар /бокс/
2018 оны шилдэгийн шилдэг эмэгтэй тамирчин: М.Нандинцэцэг /бокс/
2018 оны шилдэг эмэгтэй тамирчин: О.Насанбурмаа /чөлөөт бөх/
2018 оны шилдэг эмэгтэй тамирчин: Г.Нандинзаяа /буудлага/
2018 оны шилдэг баг: Монголын мөсний хоккейн шигшээ баг
