Month: December 2018

Аргын тооллын арванхоёрдугаар сарын 6, Бархасбадь гариг. Билгийн тооллын 29, Онгоц одтой, хар бич өдөр. Өдрийн наран 8:23 цагт мандан, 17:07 цагт жаргана. Тухайн өдөр хулгана жилтнээ аливаа үйлийг хийхэд эерэг сайн ба үхэр, луу, хонь, нохой жилтнээ сөрөг муу нөлөөтэй тул элдэв үйлд хянамгай хандаж, биеэ энхрийлүүштэй. Эл өдөр хууль цааз гаргах, батлах, хэрэглэх, хулгай дээрмийг номхотгох, гэмтнийг шийтгэх, мал адгуус номхруулах, сан тавиулах, угаал үйлдэх, бүжиг наадам хийх, цэцэрлэг байгуулах, хур оруулах, дарханы үйлд сайн. Хувцас эсгэх, шинэ хувцас өмсөх, зөвлөгөө хийхэд муу. Өдрийн сайн цаг нь хулгана, үхэр, луу, могой, хонь, нохой болой. Хол газар яваар одогсод зүүн зүгт мөрөө гаргавал зохистой.

Үс шинээр үргээлгэх буюу засуулахад тохиромжгүй.

Жендэрээс үүдэлтэй хүчирхийлэл нь жендэрийн тэгш бус байдлаас бий болдог бөгөөд тэгш бус байдлыг улам дэвэргэж байдаг. Энэ нь хүний эрхийн зөрчил төдийгүй эрэгтэй, эмэгтэй хүмүүсийн дунд эрх мэдлийн тэгш бус байдлыг илэрхийлдэг. Гэхдээ өнөөдөр жендэрийн асуудлыг хоёрхон хүйст хамааруулж ойлгох, судлах, хэлэлцэх нь учир дутагдалтай болжээ. Бусад хүмүүсийн эрх үүнд хамааралтай хэмээн Хүний эрхийн Үндэсний Комиссын гишүүн П.Оюунчимэг илтгэлдээ дурдаж байлаа.

“Жендэрээс үүдэлтэй хүчирхийлэлтэй тэмцэх нь: Хууль сахиулах байгууллагуудын хамтын ажиллагаа” сэдэвт онол, практикийн бага хурлыг Хүний эрхийн Үндэсний Комисс Гадаад харилцааны яамтай хамтран зохион байгуулсан бөгөөд Цагдаагийн ерөнхий газар “Жендэрээс үүдэлтэй тэмцэх цагдаагийн байгууллагын үйл ажиллагаа”, Шүүхийн шийдвэр гүйцэтгэх ерөнхий газар “Шүүхийн шийдвэр гүйцэтгэх байгууллагын хохирол нөхөн төлүүлэх үйл ажиллагаа”, Улсын ерөнхий прокурорын газар “Гэр бүлийн хүчирхийлэл үйлдэх гэмт хэргийг шалгах шийдвэрлэх ажиллагаанд анхаарах асуудал”, Хууль сахиулах их сургууль “Гэр бүлийн хүчирхийлэл, өнөөгийн байдал”, “Жендэрээс үүдэлтэй холбоотой гэмт хэргээс урьдчилан сэргийлэх сургалтын тогтолцоо” зэрэг сэдвээр илтгэл тавьж оролцлоо. Хууль сахиулах байгууллагын түвшинд тулгамдаж буй бэрхшээл, шийдвэрлэх арга зам, сайн туршлагыг харилцан солилцож, хамтын ажиллагааг үргэлжлүүлэх, мэдээллийн нэгдсэн сүлжээтэй болох зэрэг асуудлыг хөндөн хэлэлцлээ.

Жендэрээс үүдэлтэй хүчирхийлэл нь хүний эрх, эрүүл мэнд, үндэсний хөгжилд өргөн хүрээнд нөлөөлсөн нийгмийн тулгамдсан асуудлын нэг болоод байна. хамгийн түгээмэл тохиолддог ч, цөөн мэдээлэгддэг хүний эрхийн зөрчил юм. Хүчирхийлэлд өртөгсдийн олонх нь хүчирхийллийг мэдээлэхгүй байгаа нь тэдэнд үзүүлдэг тусламж үйлчилгээний хувилбар, боломж хязгаарлагдмал, хүчирхийлэл үйлдэгчийг бус хохирогчийг буруутгах хандлага бүхий нийгэм, соёлын хэм хэмжээ давамгайлж байгаатай холбоотой хэмээн оролцогчид үзэж байна.

Хурлын нээлтэд Хүний эрхийн Үндэсний Комиссын дарга Ж.Бямбадорж, УИХ-ын гишүүн, Хүний эрхийн дэд хорооны дарга Н.Оюундарь, Монгол Улсын Ерөнхий сайдын зөвлөх Н.Хүрэлбаатар нар оролцож үг хэллээ.

Гэр бүлийн хүчирхийллийн улмаас үйлдэгдсэн гэмт хэрэг, зөрчил 2018 оны эхний 10 сарын байдлаар 32 878 бүртгэгджээ. Энэ нь нийт гэмт хэргийн дуудлага, мэдээллийн 3.8-6.8 хувийг эзэлж байна. Зарим тохиолдолд гэр бүлийн хүчирхийлэлд өртсөн хохирогч хүчирхийлэл үйлдэгчийг шүүх, цагдаагийн байгууллагад өгөхөөс илүү, хүчирхийлэгчийн зан үйлийг засч авахыг хүсдэг тул албадан болон сайн дурын сургалтыг зохион байгуулах, хамтарсан багаар ажиллаж төлөвшүүлэх зан үйлд сургах хэрэгцээ шаардлага байгааг Цагдаагийн байгууллагын төлөөлөл хэлж байв. Хохирогчийг хамгаалах түр байрны хүртээмж, сэтгэл зүйн зөвлөгөө өгөх үйлчилгээ, хууль сахиулах байгууллагын ажилтнуудыг мэргэшүүлэх сургалтад хамруулах, иргэд, төрийн байгууллага хамтарсан баг, бүлэг байгуулан ажиллах, хүчирхийллийг цаг алдалгүй мэдээлэх боломжийг бүрдүүлэх, мэдээллийн нэгдсэн сүлжээг бий болгох, олон нийтийг татан оролцуулах, хүмүүсийн хандлагыг өөрчлөх зэрэг олон санал дэвшүүллээ.

Дорноговь аймгийн Алтанширээ сумын нутагт баригдаж байгаа Нефть боловсруулах үйлдвэрийн төмөр замын эхний 1,5 км замыг барих ажлыг өнөөдөр эхлүүлжээ. Уг ажлыг УБТЗ-ын Зам засварын машинт станцын хамт олон, Замын 4-р ангийн замчид хамтран гүйцэтгэх юм байна. Төмөр бетон дэр, Р-65 зам төмөр, Английн пандрол бэхэлгээтэй уг төмөр замыг хугацаанаас нь өмнө ашиглалтад өгөхөөр төлөвлөжээ. Уг төмөр замын ерөнхий гүйцэтгэгчээр УБТЗ ажиллаж байгаа бөгөөд туслан гүйцэтгэгчээр үндэсний хэд хэдэн компани сонгогдсон юм байна. Одоогоор төмөр замын далангийн ажил 94 хувийн гүйцэтгэлтэй байгаа гэнэ.

‘’Бүх нийтийн эрх зүйн боловсролыг дээшлүүлэх’’ үндэсний хөтөлбөрийн хүрээнд Баянзүрх дүүргийн Засаг даргын Тамгын газраас дүүргийн 28 хороог нутаг дэвсгэрийн байршлаар 4 бүсэд хуваан эрх зүйн сургалт, сурталчилгааны өдөрлөгийг шат дараатай зохион байгуулдаг. Өнөөдрийн сургалтад дүүргийн 8,10,11,12,20,23,28 дугаар хорооны 100 гаруй зохион байгуулагч, хэсгийн ахлагч нар хамрагдсан байна. Сургалтаар Монгол улсын Засгийн газрын 2017 оны 01 дүгээр албан даалгавар, Нийслэлийн Засаг даргын 2018 оны А/01 дүгээр захирамж, Баянзүрх дүүргийн Засаг даргын Тамгын газрын даргын А/07 дугаар тушаалыг тус тус танилцууллаа.

Сургалтаар дүүргийн Тамгын газрын эрх зүйн мэргэжилтнүүд Төрийн албаны тухай хуулийн /шинэчилсэн найруулга/, Гэр бүлийн хүчирхийлэлтэй тэмцэх тухай хуулийн онцлог зохицуулалт болон түүнтэй холбоотой видео шторкыг албан хаагчдад үзүүлсэн байна.

Түүнчлэн албан хаагчдад газар олголт, хөдөлмөр эрхлэлт, өв залгамжлал, гэрлэлт цуцлахтай холбоотой асуудлаар холбогдох хуулиудын зохицуулалтыг тайл таниулсан байна.

Нийслэлд Томуу, томуу, төст өвчний улиралд Нэгдсэн эмнэлгийн хүүхдийн орны ачаалал аравдугаар сараас гуравдугаар сард дээд хэмжээнд хүрдэг. Иймээс ЭМС-ын тушаал, НЗД-ын захирамжаар батлагдсан “Томуу, томуу төст өвчнөөс урьдчилан сэргийлэх, бэлэн байдлыг хангах, идэвхжил, дэгдэлтийн үед хэрэгжүүлэх үйл ажиллагааны календарьчилсан төлөвлөгөө”-г тус тус хэрэгжүүлэн ажиллаж байна. 2017 онд Баянгол дүүргийн эрүүл мэндийн төвд 60 ортой, Налайх дүүргийн эрүүл мэндийн төвд 50 ортой хүүхдийн эмнэлэг, 2018 онд Баянзүрх нэгдсэн эмнэлэгт 100 ортой эмнэлгийг тус тус шинээр барьж, ашиглалтад оруулсны үр дүнд нийслэлд хэвийн үед хүүхдийн 977 орыг ажиллуулж байна. 2018-2019 оны Томуугийн улиралд нийслэлийн хэмжээнд болон Дүүргийн эрүүл мэндийн төв, Нэгдсэн эмнэлгийн ор зохицуулах нэгдсэн төлөвлөгөөг боловсруулсан бөгөөд нөөц орон зайг ашиглаж нэмэгдүүлэх 354 ор, хүүхдийн оронд шилжүүлэх насанд хүрэгсдийн 496 ор нийт 850 орыг нэмэлтээр дэлгэхээр төлөвлөснөөр 1827 орон дээр тусламж, үйлчилгээг үзүүлэх боломжтой болсон. Энэхүү төлөвлөгөөний дагуу нэмэлтээр оруудыг үе шаттайгаар дэлгэн 12-р сарын 04-ний байдлаар 1311 хүүхдийн орон дээр Томуу, томуу төст өвчтэй хүүхдийг хэвтүүлэн эмчилж байна. Өнөөдрийн байдлаар Нийслэлийн хэмжээнд амбулаторийн 64350 үзлэг хийгдснээс томуу, томуу төст өвчтэй 2811 тохиолдол оношилогдсон буюу нийт үзлэгийн 4.4%-ийг эзэлж байна. Энэ нь өнгөрсөн 7 хоногийн дундаж түвшингөөс өөрчлөлтгүй, өнгөрсөн оны мөн үеэс 0.2%-иар бага байна. Нийт өвчлөгсдийн 41.6%-ийг 0-1 нас, 25.4%-ийг 2-4, 13.8%-ийг 5-9 насны хүүхдүүд эзэлж байна гэж НЭМГ-аас мэдээллээ.