Month: December 2018

ЭМЯ, ХӨСҮТ, НЭМГ хамтран өнөөдөр Томуу, томуу төст өвчний нөхцөл байдлын талаар мэдээлэл хийлээ.
1. Дэлхий дахинд:
Дэлхийн бөмбөрцгийн хойд хагасын сэрүүн бүсийн улс орнуудад томуугийн идэвхжил улирал хоорондын түвшинд байна. Өмнөд болон Зүүн Өмнөд Азийн улс орнуудад томуугийн идэвхжил нэмэгдэж байна. Дэлхий дахинд томуугийн А хүрээний вирус эргэлтэд байна.
2. Улсын хэмжээнд:
2018 оны 11 дүгээр сарын 26-аас 12 дугаар сарын 02-ыг дуустлах долоо хоногт улсын хэмжээнд амбулаторийн үзлэгийн 5.3 хувийг томуу, томуу төст өвчин эзэлж байгаа нь өмнөх долоо хоногоос 0.2 хувиар их, сүүлийн 3 жилийн дунджаас 0,9 хувиар бага байна.
Хүн амын дунд томуугийн вирус эргэлтэд ороогүй харин амьсгалын замын синцитиаль вирус, риновирус зонхилон давхар эргэлтэд байна.
3. Нийслэлийн хэмжээнд:
Нийслэлийн хэмжээнд амбулаторийн үзлэгийн 4.4 хувийг томуу, томуу төст өвчин эзэлж байгаа нь өмнөх долоо мөн үетэй ижил түвшинд, өнгөрсөн оны мөн үеэс 0.1 хувиар их, сүүлийн 3 жилийн дунджаас 2,8 хувиар бага байна.
Нийслэлийн харьяа эмнэлгүүдийн 977 хүүхдийн орон дээр нэмэлтээр 334 зөөврийн орыг нэмж зохицуулалт хийсэн ба одоогийн байдлаар 1311 хүүхэд (үүнээс 1059 нь амьсгалын замын халдварт өвчтэй) хэвтэн эмчлүүлж байна.

Томуугийн улирал эхэлсэнтэй холбогдуулан дараах арга хэмжээг хэрэгжүүлж байна.
Эрүүл мэндийн яам, Нийслэлийн эрүүл мэндийн газартай хамтран дүүргийн хүүхдийн нэгдсэн эмнэлгүүдэд 7 хоног тутам хуваарийн дагуу ажиллаж, тулгамдсан асуудлуудыг газар дээр нь шийдвэрлэж байна.
Хүүхдийн орны тоог нэмэхэд анхаарч нэмэлт ор дэлгэх, насанд хүрэгчдийн орыг шилжүүлэх зэргээр зохицуулалт хийх болон шаардагатай эм, эмнэлгийн хэрэгслийн бэлэн байдлыг хангаад байна. Мөн өрхийн эрүүл мэндийн төвүүдийг уртсгасан цагаар ажиллуулах, хүүхдийн эмнэлэг, хүүхдийн түргэний зөвлөгөө өгөх утсыг 24 цагаар ажиллуулж байна.
Улсын хэмжээнд 125,000 хүн тун томуугийн вакциныг татан авч нийслэлийн 160 цэцэрлэгийн 2-5 насны хүүхэд, жирэмсэн эмэгтэй, өндөр настан, эрүүл мэндийн ажилтныг дархлаажууллаа.
Томуу, томуу төст өвчний үүсгэгчийн онцлог, зонхилон илрэх шинж тэмдэг, урьдчилан сэргийлэх арга, эмчилгээний энгийн аргуудын талаар ЭМЯ, ХӨСҮТ, НЭМҮТ, Нийслэлийн эрүүл мэндийн газрын цахим хуудас, нийгмийн сүлжээний хуудсаас дэлгэрэнгүй мэдээллийг авч болно.

Монгол улсын төр, засгийн байгууллага, яам, агентлагт АНУ-ыг хариуцсан ажилтнуудын ээлжит зөвлөлдөх уулзалтыг ГХЯ-наас 2018 оны 12 дугаар сарын 03-нд зохион байгуулав. Уулзалтад УИХ, Засгийн газрын яамд, агентлаг, ЕТГ, ҮАБЗ зэрэг манай холбогдох 10 гаруй байгууллагын нийт 20 орчим төлөөлөгч оролцов. Арга хэмжээнд мөн АНУ-ын Түр хамаарагч М.Микаллер тэргүүтэй АНУ-ын ЭСЯ-ны дипломат ажилтнууд оролцов.

ГХЯ-ны Төрийн нарийн бичгийн дарга Д.Даваасүрэн уулзалтыг нээж хэлсэн үгэндээ Монгол Улсын чухал гуравдагч хөрш АНУ-тай харилцаа, хамтын ажиллагаа идэвхтэй өрнөж ирснийг онцлов. Тухайлбал, 2018 онд талууд 2004 оноос хойш хөгжүүлж ирсэн Иж бүрэн түншлэлийн харилцааны шатыг ахиулж, Өргөтгөсөн иж бүрэн түншлэлийн түвшинд хүргэсэн, Ерөнхий сайд У.Хүрэлсүх АНУ-д айлчилсан, талууд Монгол Улс, Америкийн Нэгдсэн Улс хоорондын эдийн засгийн өргөтгөсөн түншлэлийн тухай замын зураглалаа харилцан тохиролцож, хамтран хэрэгжүүлэхээр болсон, 350 сая ам.долларын буцалтгүй тусламжийг олгох Монгол Улсын Засгийн газар, АНУ-ын МСК-ийн хоорондын Хоёр дахь компакт гэрээг байгуулсан зэрэг болон тоймтой бусад олон арга хэмжээ тохиосныг ТНБД-ын зүгээс тэмдэглэж, хамтран ажиллаж ирсэн нийт байгууллагад талархал илэрхийлэв. Тэрбээр мөн 2019 оны эхээр Вашингтон хотноо болох хоёр улсын улс төрийн ээлжит зөвлөлдөх уулзалтын бэлтгэлийг хангахад хамтран ажиллахыг уриалав.

Арга хэмжээний үеэр төлөөлөгчид Монгол, Америкийн харилцаанд 2018 онд болсон үйл явдал, арга хэмжээнд үнэлэлт, дүгнэлт өгч, ярилцаж, хоёр талын хамтын ажиллагааг өргөжүүлэх хүрээнд 2019 онд хэрэгжүүлэх ажил, арга хэмжээний талаар харилцан санал солилцов.

Эл арга хэмжээ нь монголын талаас АНУ-тай харилцахад манай төр, засгийн нийт байгууллагууд хоорондын уялдаа, холбоог хангах, гадаад бодлогыг нэг цонхоор хэрэгжүүлэх зорилготой юм.

Сүхбаатар аймгийн ИТХ-ын ээлжит долоодугаар хуралдаан 100 хувийн ирцтэй болж байна. Тус хуралдаанаар аймгийн засаг даргын 2018 оны үйл ажиллагааны тайланг хэлэлцэж, нийт төлөөлөгчдийн 87,8 хувийн саналаар хангалттай гэж дүгнэлээ.

Аймгийн засаг дарга үйл ажиллагааны тайлангаа танилцуулсны дараа ИТХ дахь МАН-ын бүлэг түүний ажлыг хангалттай сайн гэж үнэлсэн бол АН-ын бүлэг ажилласан хугацаа нь богино учир ажлыг нь дүгнэх шаардлагагүй гэсэн байр суурьтай байсан юм. Орон нутгийн засаг захиргаа нутаг дэвсгэрийн нэгж түүний удирдлагын тухай хуульд Засаг даргын үйл ажиллагааны тайлантай танилцсан л бол заавал дүгнэлт өгөх ёстой гэдэг саналыг Аудитын газрын дарга М.Нарантуяа хэлснээр төлөөлөгчдийн дунд санал хураалт явагдаж, улмаар засаг дарга бүрэн эрхээ хэрэгжүүлж эхэлснээс хойшхи үйл ажиллагааны тайланг дүгнэжээ.

Мөн АН-ын бүлгийн зүгээс 2020 онд МАН-ын мөрийн хөтөлбөр хэрэгжих боломжгүй гэдгийг албан ёсоор мэдэгдсэн юм. Харин аймгийн засаг даргын үйл ажиллагааны үндсэн чиглэлийг дэмжиж, цаашид хамтран ажиллана гэдгээ илэрхийлэв.

Дашрамд дурдахад Сүхбаатар аймгийн засаг дарга Ж.Эрдэнэбаатар нь 2018 оны зургадугаар сард ажлаа хүлээн авсан бөгөөд хагас жил ажиллаж байгаа билээ.

Ээлжит хуралдаанаар аймгийн засаг даргын үйл ажиллагааны тайлангаас гадна аймгийн Нийгэм эдийн засгийг 2018 онд хөгжүүлэх үндсэн чиглэлийн биелэлт, 2019 оны зорилт, аймгийн 2017 оны төсвийн гүйцэтгэл, 2019 оны төсвийн төсөл, Хар ямаатын байгалийн нөөц газрын менежментийн төлөвлөгөөний тайлан, 2019-2023 оны төлөвлөгөө зэрэг асуудлыг хэлэлцэнэ.

НҮБ-ын Ерөнхий Ассамблейгээс “Жендэрт суурилсан хүчирхийлэлтэй тэмцэх 16 хоногийн аян”-ыг олон улсын хэмжээнд жил бүр зохион байгуулахаар батламжлан уриалсан байдаг. Энэ өдрийг дэлхийн 180 гаруй орны 6000 гаруй байгууллага жил бүрийн 11 дүгээр сарын 25-наас 12 дугаар сарын 10-ны өдрүүдэд уг аяныг нэгдмэл зорилго, нэг уриан дор тэмдэглэн өнгөрүүлдэг. Монгол Улс 1998 оноос тус аянд нэгдсэн бөгөөд энэ жилийн аяныг “Эерэг болГоё. Харилцаа, хандлага, үйлдэл” уриан дор тэмдэглэн өнгөрүүлж байгаатай холбогдуулан Гадаад харилцааны яамны албан хаагчид уг аянд нэгдэж, манлайлан оролцож байна. Энэ хүрээнд яамны нийт албан хаагчид 2018 оны 12 дугаар сарын 05-ны өдөр “цагаан тууз” зүүж, хүн бүр хүчирхийллийн хажуугаар дуугүй өнгөрөхгүй байж, хуулиар хүлээсэн иргэний үүргээ биелүүлнэ гэдгээ илэрхийлэх арга хэмжээг зохион байгуулав.

Он гарсаар улсын хэмжээнд 11 дүгээр сарын байдлаар 3455 удаагийн объектын гал түймэр гарч, 15.8тэрбум төгрөгийн хохирол учирчээ. Харин түймрийн улмаас 66 хүн нас барж, 42 хүн түлэгдэж гэмтэн 289 толгой мал хорогдож, 1547 гэр орон сууц шатсан байна. Дээрх гал түймрийн аюулаас Онцгой байдлын байгууллагын алба хаагчид 847 хүний амь нас, төр, аж ахуйн нэгж, байгууллагын 40 тэрбум төгрөгийн өмч хөрөнгийг авран хамгааллаа. Объектод гарсан гал түймрийг өнгөрсөн оны мөн үетэй харьцуулахад гал түймрийн тоо 1.05 хувиар, учирсан хохирлын хэмжээ 42.3 хувиар тус тус өссөн үзүүлэлттэй байна.

Нийслэл хотод нийт 2288 удаагийн гал түймэр гарч, 4 тэрбум төгрөгийн хохирол, орон нутагт 1167 удаагийн гал түймэр гарч, 10.1 тэрбум төгрөгийн хохирол тус тус учирсан байна.

Хоёр. Урьдчилан сэргийлэх, хяналт шалгалтын талаар

Энэ хугацаанд 18934 байгууллага, аж ахуйн нэгж, 119218 айл өрхөд гал түймрийн хяналт шалгалт хийж, гал түймрийн хэрэг зөрчилд хүргэж болзошгүй 86319 зөрчил дутагдал илрүүлэн, 36937 зөрчлийг үзлэг шалгалтын явцад арилгуулан бусад зөрчлийг арилгуулахаар 5146 заавал биелүүлэх албан шаардлага, 5979 мэдэгдэл, 274 танилцуулга, 820 дүгнэлт бичиж, гал түймэр гарч болзошгүй 83 объектын үйл ажиллагааг хэсэгчлэн буюу түр хугацаагаар зогсоож, Галын аюулгүй байдлын тухай хууль тогтоомжийг зөрчсөн байгууллага, аж ахуйн нэгжийн холбогдох албан тушаалтан, иргэдийг 167.9 сая төгрөгөөр торгож, галын аюулаас урьдчилан сэргийлэх сургалт 2473 удаа, дадлага 1722 удаа зохион байгуулж, хэвлэл мэдээллийн хэрэгслээр 2587 удаа сэрэмжлүүлэг явуулсан.

Объектын түймрийн шалтгааныг авч үзвэл:

Ил задгай гал, асгасан үнс нурмаас 988 гал 28.6 буюу хувь,

Пийшин, зуух, яндангийн цонолтоос 708 гал буюу 20.4 хувь,

Цахилгаанаас 644 гал буюу 18.6 хувь,

Лаа, дэн, тамхи, шүдэнзний галаас 357 гал буюу 10.3 хувь,

Машин техникийн гэмтэл ашиглалт буруугаас 204 гал буюу 5.9 хувь,

Шалтгаан тогтоогдоогүй 200 гал буюу 5.7 хувь,

Бусад шалтгаанаас 185 гал буюу 5.3 хувь,

Хүүхдийн болгоомжгүй үйл ажиллагаанаас 70 гал буюу 2.02 хувь

Гагнуур, паялник, бамбараас 30 гал буюу 0.86 хувь

Архидан согтуурснаас 21 гал буюу 0.6 хувь,

Машин, техникийн яндангийн цонолт, оч болон цахилгааны очноос 15 гал буюу 0.43 хувь

Санаатай үйлдлээр 15 гал буюу 0.43 хувь,

Байгалийн үзэгдлээс 6 гал буюу 0.17 хувь,

Тэсрэлт дэлбэрэлт ослоос 5 гал буюу0.14 хувь,

Технологийн горим зөрчсөнөөс 4 гал буюу 0.11 хувь,

Газрын тосны бүтээгдэхүүний ашиглалтын буруугаас 2 гал буюу 0.05 хувийг эзэлж байна.

ОНЦГОЙ БАЙДЛЫН ЕРӨНХИЙ ГАЗАР

Онцгой байдлын ерөнхий газар, Азийн хөгжлийн банктай хамтран Ядуурлыг бууруулах Япон сангийн санхүүжилтээр хэрэгжүүлж буй “Зуд болон ой, хээрийн түймэртэй тэмцэх олон нийтийн чадавхыг бэхжүүлэх” төслийн хүрээнд “Олон нийтийн оролцоотой гамшгийн эрсдэлийг бууруулах нь” сэдэвт сургалтыг энэ сарын 04-05-ны өдрүүдэд зохион байгууллаа.

Сургалтанд ОБЕГ, НОБГ, дүүргийн Онцгой байдлын хэлтэс, Булган, Төв, Говь-Алтай, Дорноговь, Завхан, Өвөрхангай аймгийн ОБГ-ын сургалт, сурталчилгаа, урьдчилан сэргийлэх асуудал хариуцсан мэргэжилтнүүд хамрагдсан бөгөөд сургалтын төгсгөлд эдгээр алба хаагчдад гэрчилгээ гардуулсан юм.

Сургалтыг төслийн олон улсын зөвлөх доктор Иан Фернис Вайлдерспин удирдан явуулсан бөгөөд Гамшиг болон олон нийтийн оролцоотой гамшгийн эрсдэлийн удирдлага болон эрсдэлийн үнэлгээ,гамшгийн эрсдэлийг бууруулах арга зам, олон нийтийн гамшгийн эрсдэлийг бууруулах олон улсын жишиг зэрэг сэдвээр хичээл зааж, гамшгийн эрсдэлийг бууруулахад олон нийтийн мэдлэгийг дээшлүүлэх туршлагаасаа хуваалцлаа.

Мөн сургалтад хамрагдсан алба хаагчид гамшгийн эрсдэлийг бууруулах чиглэлээр эрсдэлийн үнэлгээ хийж тухайн орон нутагт гамшиг осол тохиолдсон үед хэрхэн ажиллах талаар дадлага сургуулиудыг хийсэн юм гэж Онцгой байдлын ерөнхий газраас мэдээллээ.

Нэг жилийн өмнө Баянгол дүүргийн IX хороонд байрлах “Саstle” баарны үүдэнд хэсэг залуус зодолдож танхайрч, нэг нь сэлэм эргүүлж бусдын амь нас, эрүүл мэндэд халдахыг завдсан хэрэг гарсан. Сэлэм эргүүлж танхайрсан С.Бямбацогтыг цагдаагийн хэлтэст шалгаж, ЭХ-ийн 20.7.1, 20.16.2.1-д зааснаар эрүүгийн хэрэг үүсгэн прокурорт шилжүүлсэн юм. Харин прокуророос хэргийг хянаж дуусаад харьяа дүүргийн шүүхэд шилжүүлжээ. Ийнхүү сэлэм эргүүлж бусдыг айлгаж сүрдүүлсэн, иргэн С.Бямбацогтод холбогдох хэргийг шүүх удахгүй товлох нь.