Month: December 2018

Categories
мэдээ улс-төр

Ж.Мөнхбат: Засгийн газар өөрсдөө саналаа өгөөд огцор. Бидэнтэй, бидэнгүй Монгол төр шүү

УИХ-ын чуулганы нэгдсэн хуралдаанаар ХХААХҮ-ийн сайдыг томилох асуудлыг хэлэлцэхээр байлаа. Гэвч Ерөнхий сайд асуудлыг оруулж ирж, танилцуулаагүй байна. Нэр бүхий гишүүд УИХ-ын даргыг огцруулахыг шаардаж, чуулганы индэр дээр зогсож, шаардлага тавьсаар байна. Засгийн газрын гишүүд хуралдаандаа орж ирж суусан ч, картаа хийхгүй байгаа юм. Тиймээс гишүүд горимын санал хэллээ.

УИХ-ын гишүүн О.Баасанхүү:

-Өнөөдөр чуулганы хуралдаанаар зориуд, зохион байгуулалттай зүйл явж байгаад харамсаж байна. Би ямар буруутай юм. УИХ-аар хэлэлцэх асуудлаа ярих гэхээр намайг давхар хохироогоод байх юм. Хуралдааныг үргэлжлүүлмээр байна. Би Ч.Улаан сайдаас ичээд байна. Өөрийгөө томилох асуудлыг оруулж ирэхээр чуулганы хуралдаанд орж ирээд суунгуутаа, өөрийг нь дэмжихгүй ирцийг хараад картаа сугалчих юм.

Би аль ч талд нь ормооргүй байна. Би яагаад болих ёстой юм. Би хулгай хийгээгүй, ЖДҮ-дээгүй. Маргааш танай намын таван гишүүний асуудал маргааш орж ирэх юм билээ. Өөрсдөө нэрсээ татах биз.

УИХ-ын гишүүн Ж.Мөнхбат:

-Монголын төр эмгэнэлт драм руу орлоо. Засгийн газрын гишүүд командаар УИХ-ын үйл ажиллагааг бойктолж байна. Энэ Засгийн газарт Монголын ард түмний хамгийн гол салбар болсон ХХААХҮЯ хамаагүй болжээ. Л.Болд, Ж.Батзандан, Т.Аюурсайхан, Л.Оюун-Эрдэнэ гишүүн нар шударга ёсны төлөө явж байгаа юм бол УИХ-ыг тараах миний бланк дээр гарын үсгээ зур. Эрх барьж байгаа МАН төр, засгийг доромжилж болохгүй. Дарга, сайд нарын албан тушаалдаа ямар хайртай, үхэн хатан хамгаалдаг юм. Засгийн газар өөрсдөө саналаа өгөөд огцор. Бидэнтэй, бидэнгүй Монгол төр шүү. Амин хувийн эрх ашгаа эх орны дээр тавьж, битгий дарвалзаад байгаарай та нар.

УИХ-ын гишүүн Д.Тэрбишдагва:

-Засгийн газар огцорсон ч, эс огцорсон ч нийгэмд бугшсан асуудлаа сайн хэлэлцсэн гэж ойлгосон. Ард түмэн одоо ажлаа хурдан хий гээд байгаа. Нэгэнтээ олон өдөр хуралдаж хэрүүл уруул болсон Засгийн газраа шахаж, ажлыг нь хийлгээд явъя гэж байгаа. Өнөөдөр -30 хэм хүйтэн болсон. Хүнс, хөдөө аж ахуйн салбарыг удирдаж байсан хүний хувьд сайдыг нь томилох шаардлагатай.

Нээлттэй сонсгол хийлгэе гэсэн гишүүний нэг нь би. Гэхдээ 19 гишүүн л гарын үсэг зурсан. Хууль дүрэмтэйгээр хийх хэрэгтэй.

УИХ-ын гишүүн Б.Бат-Эрдэнэ:

-ХХААХҮ-ийн сайдыг томилох асуудлыг хэлэлцээд явмаар байна. Энэ салбар эзэнгүй хэцүүдлээ. Миний горимын саналаар санал хураалт явуулж өгнө үү.

Чуулганы үдээс өмнөх хуралдаан завсарлалаа.

Categories
мэдээ нийгэм

“Сэлбэ голын эх” парк иргэдэд нээлттэй боллоо

Нийслэлийн анхны хамтарсан менежменттэй “Сэлбэ голын эх” парк иргэдэд нээлттэй боллоо. Нийслэл хотын байгаль орчин, экосистемд чухал ач холбогдол бүхий ус, намаг, ой, ховор ургамал, амьтад бүхий 2,071.5 га нутаг дэвсгэрийг “Сэлбэ голын эх” нэрээр 2012 онд орон нутгийн хамгаалалтад авсан. Энд нийслэл хотын “Хоймор” буюу хамгийн хойд цэг, Баруун Сэлбэ голын эх, эмчилгээний чанараараа олонд алдаршсан Борын рашаан зэрэг газрууд бий. Уг нутгийг нийслэлийн Байгаль орчны газраас иргэдийн амралт чөлөөт цагаа өнгөрүүлэх нөхцөлийг бүрдүүлэх. Мөн хүүхэд залууст экологийн боловсрол олгох түшиц газар болгохоор төлөвлөн тохижилтын ажлыг 2018 оны есдүгээр сараас эхлүүлжээ.

“Сэлбэ голын эх” ОНХГ нь бие даасан байгаль хамгаалагчтай, тусгай горимыг мөрддөг, тохижуулсан аяллын замтай, байгаль орчны төслүүдийг жишиг байдлаар хөгжүүлж байгаа аж. Өчигдөр нээлтээ хийсэн Цохиот хад, Борын рашаан чиглэлийн замыг “МСМ” групп нийгмийн хариуцлагынхаа хүрээнд тохижуулсан бол Улаанбаатар аялал жуулчлалын холбооны зүгээс олон улсын мэргэжилтнүүдийг урин ажиллуулж, тайлбар, танилцуулга, дэглэмийг боловсруулжээ.

Categories
гадаад мэдээ

АНУ-ын сөнөөгч, бөмбөгдөгч онгоц цэнэглэгч онгоцтой мөргөлджээ

Image result for F/A-18 KS-130

АНУ-ын сөнөөгч, бөмбөгдөгч F/A-18 онгоц, цэнэглэгч Боинг KС-130 онгоцтой Япон тэнгисийн эрэг орчимд мөргөлдсөн тухай Америкийн тэнгисийн цэргийн корпусын мэдэгдэлд дурджээ. Энэ осол орон нутгийн цагаар 02:00 цагт болсон байна. Хоёр онгоц АНУ-ын Тэнгисийн явган цэргийн баазаас хөөрч, хуваарьт сургалтын нислэг үйлдэж байсан бөгөөд онгоцонд хичнээн хүн байсан талаар одоогоор тодорхой мэдээлэл байхгүй байна. “CBS” сувгийн сэтгүүлч Мэри Уолш КС-130 онгоцонд таван хүн, F/A-18-д хоёр нисгэгч байсан гэж твиттертээ бичжээ. Эрэн хайх, аврах ажиллагаа явагдаж байгаа аж. “ABC” телевизийн мэдээлснээр, аврах ажиллагаанд Японы өөрийгөө хамгаалах хүчний баг бүрэлдэхүүн оролцож буй юм байна.

Categories
мэдээ улс-төр

Б.Ганбат ажлаа хүлээн авлаа

Засгийн газрын 373 дугаар тогтоолоор Төрийн өмчийн бодлого, зохицуулалтын газрын даргын үүргийг түр орлон гүйцэтгэгчээр Б.Ганбатыг томилсон. Тэрбээр өнөөдөр Төрийн өмчийн бодлого, зохицуулалтын газрын дарга асан Ц.Ням-Осороос тамгаа хүлээн авч үүрэгт ажилдаа орлоо.

Б.Ганбат нь хуульч мэргэжилтэй. ОХУ-ын Дотоод явдлын яамны академи, Лондонгийн их сургуулийн хуулийн коллеж төгссөн. 1990-1995 онд Дорноговь аймаг, Баянгол дүүргийн цагдаагийн хэлтэст төлөөлөгч, мөрдөн байцаагч, 1995-2013 онд Сангийн яамны хуулийн хэлтэст мэргэжилтэн, ахлах мэргэжилтэн, хэлтсийн дарга, орлогч дарга, газрын дарга, 2013-2014 онд Дэлхийн банкны төсөлд шинжээч, 2014-2016 онд өмгөөлөгч, 2016 онд Засгийн газрын Хэрэг эрхлэх газрын Хяналт, шинжилгээ, үнэлгээ, дотоод аудитын газрын дарга, мөн оны наймдугаар сараас Монголбанкны Хууль, эрх зүйн газрын захирлаар ажиллаж байв.

Categories
мэдээ спорт

Харүмафүжид зодуулсан гэх Таканоива А.Баасандорж залуу бөхийг зоджээ

Image result for Таканоива

Өнгөрсөн оны X сард ёкозуна Харумафүжид зодуулсан гэж шуугиан тарьсан Таканоива буюу сумоч Адъяагийн Баасандорж өөрийн дэвжээний залуу бөх болох туслахаа зодсоныг Японы Сумо бөхийн холбооноос мэдээлжээ. Тэрбээр орон нутагт болж буй тэмцээний үеэр байрлаж байсан зочид буудалдаа өөрийн туслахыг ямар нэгэн зүйл авчрахаа мартсанд нь буруутган нүүрэнд нь цохисон байна. Японы Сумо бөхийн холбооны Олон нийттэй харилцах албаны мэдээлж буйгаар туслах бөх хүнд бэртээгүй ч гэлээ нүүрэндээ 4-5 удаа цохиулсан тул хавдаж, хөхөрсөн гэжээ. Таканоива өөрийн бурууг хүлээж, уучлалт гуйсан бөгөөд түүнийг Фүкүокад болох өвлийн тойргийн тэмцээнээс хасчээ.

Categories
онцлох-нийтлэл туслах-ангилал

“Өргөө” амаржих газраас алга болсон аппаратуудыг Нярайн тасгийн эрхлэгч нь хувийн эмнэлэгтээ ашиглаж байжээ

“Өргөө” амаржих газраас нярайн зарим тоног төхөөрөмж алга болсон талаар бид өмнө нь мэдээлсэн. Хэргийн сэжигтэн гэгдэх “Өргөө” амаржих газрын Нярайн тасгийн эрхлэгчээр ажиллаж байсан А.Оюунцэцэгийг Эрүүгийн хуулийн 17.4.1 дэх заалтыг үндэслэн шалгаж байна.

“Өргөө” амаржих газрын нярайн аппаратуудыг хувийн эмнэлэгтээ ашиглаж байжээ

Хэргийн талаар НЦГ-ын хэвлэл мэдээллийн төвийн мэргэжилтэн М.Мөнхшүрээс тодруулахад “Арваннэгдүгээр сарын 7-нд “Өргөө” амаржих газрын дарга иргэн Б гэх хүн Сүхбаатар дүүргийн цагдаагийн нэгдүгээр хэлтэст манай нярайн тасгийн зарим тоног төхөөрөмж дутаж алга боллоо гэсэн өргөдөл өгсөн. Үүний дагуу Сүхбаатар дүүргийн цагдаагийн нэгдүгээр хэлтсээс шалгалтын ажиллагааг үргэлжлүүлж байна” гэсэн тайлбарыг өглөө.

“Өргөө” амаржих газрын нярайн аппаратуудыг хувийн эмнэлэгтээ ашиглаж байжээ

Тус амаржих газар энэ оны аравдугаар сард тоног төхөөрөмжийнхөө ээлжит тооллогыг хийхэд нярайн фото аппарат, шарлагын аппарат, тэргэнцэр зэрэг хэд хэдэн төхөөрөмж Нярайн тасгаас дутсан байна. Уг нь дээрх тооллогыг өмнө нь зургаадугаар сард хийхэд алга болсон гэгдэх төхөөрөмжүүд бүгд бүрэн байжээ. Улмаар эмнэлгийн захиргааны хурлаар асуудлыг оруулахад “Өргөө” амаржих газрын Нярайн тасгийн эрхлэгч А.Оюунцэцэг өөрийн эзэмшдэг “Бурам-Оюу” хувийн эмнэлэгтээ алга болсон төхөөрөмжүүдийг ашиглаж байснаа хүлээж, шарлагын аппаратыг буцаан авчирсан байна. Түүнд удирдлагын зүгээс сахилгын арга хэмжээ тооцож түүний цалинг гурван сарын хугацаатай бууруулан Нярайн тасгийн эрхлэгчээс чөлөөлжээ. Гэхдээ энэхүү арга хэмжээ бол зөвхөн түүнийг Нярайн тасгийн эрхлэгчээр ажиллаж байх үед үүссэн хэргүүдэд нь оногдуулсан байгууллагын сахилгын шийтгэл юм. Одоогоор түүнд дээрх үйлдэлд нь Эрүүгийн хэрэг үүсгэн цагдаагийн байгууллагад шалгаж байна.

“Өргөө” амаржих газрын нярайн аппаратуудыг хувийн эмнэлэгтээ ашиглаж байжээ

“Өргөө” амаржих газрын дарга Г.Баясгалангийн гаргасан гомдлыг Сүхбаатар дүүргийн Цагдаагийн нэгдүгээр хэлтэс хуулийн дагуу ажлын тав хоногийн хугацаанд шалгаж үзээд хэрэг үүсгэх үндэслэлтэй гэж үзэн Хэрэг бүртгэлийн хэрэг нээсэн, одоо шалгаж байгаа аж. Ингэхдээ Эрүүгийн тухай хуулийн Хөрөнгө завших зүйл буюу Бусдын итгэмжлэн хариуцуулсан эд хөрөнгө, эд хөрөнгийн эрхийг завшсан гэх заалтаар хэрэг үүсгэжээ. Энэ заалтыг зөрчсөн нь цагдаагийн мөрдөн шалгах ажиллагаагаар тогтоогдвол хуулийн хариуцлага нь

“Өргөө” амаржих газрын нярайн аппаратуудыг хувийн эмнэлэгтээ ашиглаж байжээ

Хүүхдийн тэргүүлэх зэргийн эмч А.Оюунцэцэг одоо “Өргөө” амаржих газарт ажиллаж байгаа. 2008 онд байгуулсан “Бурам-Оюу” хувийн эмнэлэгтээ ашиглаж байсан аппаратуудаа амаржих газарт буцаан авчирсан хэдий ч нярайн шарлагын бас нэгэн аппарат цох дутсан хэвээр байгаа талаар эх сурвалж мэдээллээ.

Categories
мэдээ нийгэм

“Эрсдэлгүй, аюулгүй цус сэлбэлтийн талаар хэн сайн мэдэх вэ” тэмцээн боллоо

2018 оны 12 дугаар сарын 04-ний өдөр Улсын гуравдугаар төв эмнэлгийн Цус сэлбэлтийг зохицуулах салбар зөвлөлөөс цус цусан бүтээгдэхүүн сэлбэх эмчилгээний шийдвэр гаргадаг, гардан хийдэг эмч, сувилагч, эмнэлгийн мэргэжилтнүүдийн дунд мэдлэг ур чадварыг дээшлүүлэх, цус цусан бүтээгдэхүүний зөв, зохистой хэрэглээг төлөвшүүлэх, эмнэл зүйн зөв дадал олгох зорилгоор “Эрсдэлгүй, аюулгүй цус сэлбэлтийн талаар хэн сайн мэдэх вэ” тэмцээн зохион байгууллаа.
Тэмцээнд тус эмнэлгийн 21 тасаг, албадын долоон баг оролцсон ба тэмцээнийг багуудын мэндчилгээ, багийн ба ахлагч нар, хөгжөөн дэмжигчдийн дундах асуулт, хариулт, гэрийн даалгавар гэсэн үе шатуудтай зохион байгуулсан.

Тэмцээний тэргүүн байранд Гемодиализ эмчилгээний тасаг, Яаралтай тусламжийн тасаг, Монголын уламжлалт эмчилгээний тасгийн “Трансфузолования” баг, дэд байранд Хоол боловсруулах эрхтэн судлалын тасаг, Эмнэлзүйн эмгэг судлалын лабораторийн нэгдсэн тасаг, Эрчимт эмчилгээний нэгдсэн тасгийн “Дусалхан”баг, гутгаар байранд Мэдээгүйжүүлэг эрчимт эмчилгээний нэгдсэн тасаг, Харвалтын тасаг, Дотрын 11 дүгээр тасгийн “Дусал цус” багууд шалгарч өргөмжлөл, шагналын эзэд боллоо.
Цус судлалын сэлбэлтийн үндэсний төвийн мэргэжилтэнг шүүгчээр урьж оролцуулсан нь мэргэжил арга зүйн хувьд өндөр ач холбодолтой байлаа.

Categories
мэдээ улс-төр

УИХ-ыг чуулган эхэллээ

УИХ-ын чуулганы хуралдаанаар Үндсэн хуулийн цэцийн 2018 оны 14 дүгээр дүгнэлтийг Улсын Их Хурал хүлээн зөвшөөрсөнтэй холбогдуулан боловсруулсан Сонгуулийн тухай хуулийн зарим зүйл, заалтыг хүчингүй болгох тухай хуулийн төслийг хэлэлцэж байна.

Үндсэн хуулийн цэц 2018 оны арваннэгдүгээр сарын 14-ний өдөр дунд суудлын хуралдаанаараа Улсын Их Хурлаас 2015 оны арван хоёрдугаар сарын 25-ны өдөр баталсан Сонгуулийн тухай хуулийн 159 дүгээр зүйлийн 159.4 дэх хэсэгт “Орон нутгийн хурлын төлөөлөгчийн бүрэн эрх нь хүлээн зөвшөөрөгдсөний дараа орон нутгийн хурлын төлөөлөгчийг нэр дэвшигчийнх хувьд нэрийн жагсаалтаас хасах тухай сонгуулийн хорооны шийдвэр гарсан бол тухайн төлөөлөгчийн мандат нь хүчингүй болж, бүрэн эрх нь дуусгавар болно” гэж хуульчилсан нь Үндсэн хуулийн холбогдох заалтыг зөрчсөн гэсэн дүгнэлт гаргасан. Уг дүгнэлтийг Төрийн байгуулалтын болон Хууль зүйн байнгын хороод хуралдаанаараа хэлэлцээд хүлээн зөвшөөрөх нь зүйтэй гэж үзсэнийг Улсын Их Хурлын 2018 оны арваннэгдүгээр сарын 22-ны өдрийн нэгдсэн хуралдаанаар хэлэлцэн дэмжиж, тогтоол баталсан юм.

Categories
мэдээ нийгэм

Эрүүл мэндийн яамны харьяа 16 байгууллагын удирдлагуудын хурал Сэтгэцийн эрүүл мэндийн үндэсний төвд боллоо

2018 оны 11 дүгээр сарын 29-ны өдөр Сэтгэцийн эрүүл мэндийн үндэсний төвийн Эрдмийн өргөөнд Эрүүл мэндийн яамны ээлжит хурал боллоо. Хурлыг тус яамны Төрийн нарийн бичгийн дарга Э.Содномжамц удирдан Эмнэлгийн тусламжийн газрын дарга М.Баттүвшин, Бодлогын хэрэгжилтийг зохицуулах газрын дарга Р.Оюунханд, Эрүүл мэндийн яамны харьяа 16 Төв эмнэлэг, тусгай мэргэжлийн төвүүдийн дарга, захирал, СЭМҮТ-ийн Удирдлагын зөвлөлийн гишүүд нар оролцсон хурал болов.

СЭМҮТ-ийн Ерөнхий захирал АУ-ны доктор, дэд профессор Л.Насанцэнгэл Сэтгэцийн эрүүл мэндийн үндэсний төвийн үйл ажиллагааны тайланг 10 минутанд танилцууллаа. Дараа нь хуралд оролцогчид СЭМҮТ-ийн зарим тасаг, клиник, брендбүүкийн үйл ажиллагаатай танилцав.

Төрийн нарийн бичгийн дарга Э.Содномжамц, Бодлогын хэрэгжилтийг зохицуулах газрын дарга Р.Оюунханд нар СЭМҮТ-ийн III клиникийн сүүлийн 37 жил засвар хийгээгүйн улмаас сантехник, барилгын дотор хийц ашиглахад хэцүү, нэн яаралтай засвар хийх шаардлагатай байгаа талаар газар дээр нь танилцав.
СЭМҮТ–ийн Зайлшгүй шаардлагатай эмийн найм дахь жагсаалтанд шинээр 41 эмийг оруулан эмчилгээ үйлчилгээнд хэрэглэж байгаа болон үйлчлүүлэгчдэд тав тухтай орчин үүсгэн ажиллаж байгааг сайшаалаа.

Categories
мэдээ улс-төр

Элчин сайд З.Чинтүшиг итгэмжлэх жуух бичгээ гардууллаа

Монгол Улсаас Арабын Нэгдсэн Эмират Улсад хавсран суух Онц бөгөөд Бүрэн эрхт Элчин сайд З.Чинтүшиг АНЭУ-ын Дэд Ерөнхийлөгч бөгөөд Ерөнхий сайд, Дубайн захирагч Эрхэм дээд Шейх Мохаммед бин Рашид Аль-Мактуумд Итгэмжлэх жуух бичгээ гардууллаа. Энэ үеэр Элчин сайд З.Чинтүшиг Шейх Мохаммед бин Рашид Аль-Мактуумд Үндэсний баярын өдрийг нь тохиолдуулан Монгол Улсын Ерөнхийлөгч Х.Баттулгаас мэндчилгээ дэвшүүлснийг уламжлаад хоёр улсын харилцаа, хамтын ажиллагааг хөгжүүлэхийн төлөө идэвхтэй ажиллахаа илэрхийлэв. Монгол Улс, АНЭУ-ын хооронд 1996 онд дипломат харилцаа тогтоосноос хойш харилцаа, хамтын ажиллагаа бүх салбарт идэвхтэй хөгжиж байгаа бөгөөд тус улсад 2020 онд зохион байгуулагдах Экспо-2020 Дубай арга хэмжээнд Монгол Улс оролцохоор төлөвлөж байгаа аж.