Month: November 2018

Үндсэн хуулийн цэцийн Их суудлын хуралдаан болж байна. Хуралдаанаар УИХ-ын сонгуулийн 42 дугаар тойрогт нөхөн сонгууль товлон зарлах, санал авах өдрийг тогтоох тухай УИХ-ын тогтоол Үндсэн хууль зөрчсөн эсэх маргааныг хяналтын журмаар дахин хянан үзэж, эцэслэн шийдвэрлэнэ. Хуралдаанд өргөдөл, мэдээлэл гаргасан иргэд, УИХ-ын итгэмжлэгдсэн төлөөлөгчөөр УИХ-ын гишүүн Д.Лүндээжанцан оролцож байна.

Их хурлын гишүүдийн гэр бүлийг баривчлаагүй гэж ЦЕГ-аас хариу ирүүлжээ

УИХ-ы гишүүн Л.Оюун-Эрдэнэ “М.Энхболд гэдэг хүнийг хамгаалах гэж, МАНАН гэх бүлэглэлийн томилгоо нурах гээд байгаа учраас өчигдрөөс бөөнөөрөө ажиллаж эхэлж байна. УИХ-ын гишүүдийн гэр бүлийг баривчлах ажиллагаа эхэлж байна” гэсэн сүржин мэдээллийг өчигдөр хийсэн билээ. Үүний УИХ-ын дарга М.Энхболд Монгол Улсын Ерөнхий прокурор болон ТЕГ, АТГ, ЦЕГ-т албан бичиг хүргүүлжээ. Уг албан бичигт “УИХ-ын гишүүн Л.Оюун-Эрдэнэ “МАНАН-гийн гэх бүлэглэлийн тоглоом нурах гээд байгаа тул хууль, хяналтын байгууллагууд М.Энхболдыг хамгаалахаар ажиллаж байна. УИХ-ын гишүүдийн гэр бүлийг баривчлах ажиллагаа явуулж, гишүүдийг дуудаж, Засгийн газрыг хамгаалбал хэрэгт холбогдуулж шалгана гэсэн мэдэгдэл хийсэн. Дээрх мэдэгдэл үнэн эсэх, УИХ-ын гишүүдийн гэр бүлийг баривчлах ажиллагаа явуулсан эсэх талаар шалгаж, хариу ирүүлнэ үү. Мөн олон нийтэд илтэд буруу мэдээлэл хүрсэн бол залруулж, албан ёсны мэдэгдэл хийнэ үү” гэсэн байна. Үүний хариуд ЦЕГ-аас хариу бичиг ирсэн бөгөөд “УИХ-ын гишүүдийн гэр бүл болон тэдгээртэй хамаарал бүхий иргэнийг баривчлах ямар нэгэн ажиллагаа явуулаагүй болохыг танилцуулъя” гэжээ. Мөн өчигдөр АТГ хэвлэлийн хурал хийх үеэрээ “УИХ гишүүн Л.Оюун-Эрдэнийн хамаарал бүхий компани ЖДҮХС-гаас зээл авсан асуудал шалгагдаж байна. Энэ хүний хамаарал бүхий этгээдүүдийг ч шалгаж байна. Түүнээс биш гишүүд, улс төрчдийн ар гэрийнхнийг байцаагаад, цагдан хорьсон зүйл байхгүй. Мөн ар гэрийнхнийг нь албадан барьсан ямар нэгэн асуудал байхгүй гэдгийг албан ёсоор хэлж байна” хэмээсэн юм.

УИХ-ын гишүүн Д.Оюун-Эрдэнэ ЖДҮ-ийн зээлтэй нэр холбогдоод ирэнгүүт өөрийгөө хамгаалах зорилгоор ийм худал мэдээлэл хийв үү, эсвэл байнга ийм худал зүйл ярьж явдаг хүн үү гэдэгт олон нийт эргэлзэж байна.

УИХ-ын чуулганы нэгдсэн хуралдаан 94.7 хувийн ирцтэй эхэллээ. Хуралдааныг УИХ-ын дэд дарга Л.Энх-Амгалан даргалж байна. Өнөөдрийн чуулганы хуралдаанаар Ерөнхий сайдыг огцруулах асуудлыг хэлэлцэнэ. Хэлэлцэх асуудлыг танилцуулсны дараагаар гишүүд горимын санал гаргалаа. Гишүүн О.Баасанхүү “Ерөнхий сайдыг огцруулах бичигт гарын үсэг зурсан хүн хурал даргалах нь ашиг сонирхлын зөрчил үүснэ. Тиймээс дэд сайд Я.Санжмятаваар даргалуулъя гэлээ.

УИХ-ын гишүүн Ц.Нямдорж:

-Дээрээ ард түмэнтэй, дэргэдээ сөрөг хүчинтэй гэдгээ хэзээ ч битгий мартаарай гэж хэлсэн. Харамсалтай нь эс тоолоо. Харамсалтай санагдаж байна. Өнөөдөр энэ МАН-ын асуудал биш. Монголын төр ямар байдалд хүрснийг, бизнес сүлжээ Монголын төрийг ялзруулсаны гор гарч байна. Ашиг сонирхлын зөрчил гэдгийг дэндүү өргөнөөр нь харуулж байна. Энэ УИХ дотор ашиг сонирхлын зөрчилгүй хүн байгаа юм уу.

Өнөөдөр У.Хүрэлсүх гэдэг Ерөнхий сайдыг огцруулах асуудал ярьж байна. У.Хүрэлсүх гэдэг хүн УИХ-ын гишүүн биш. Үүний дараагаар ҮАБЗ-ийн гурван гишүүн уулз. Та нарыг төрийг тайван байлга гэснээс төрийг бусниул гэж томилоогүй.

УИХ-ын гишүүн Н.Номтойбаяр:

Ерөнхий сайдыг огцруулах үндэслэл нь ЖДҮХС-гаас зохион байгуулалттай зээл олгосон. Тиймээс зээл авсан гишүүд энэ асуудлыг хэлэлцэхэд хуралдаанд оролцвол ашиг сонирхлын зөрчил үүснэ. Тиймээс хуралдааны танхимаас гаргая.

УИХ-ын гишүүн, АН-ын дарга С.Эрдэнэ:

Бид энэ хуралдааныг хуульзүйн талаас нь харж, хууль зөрчихгүй байх ёстой. Ашиг сонирхлын зөрчилтэй гишүүд энэ хуралдаанд оролцохгүй байх зүйтэй. Өөрсдөө мэдэж байгаа. Энэ асуудлыг хуралдаан дээр шийдвэрлэх нь зүйтэй. АН-ын улс төрийн зөвлөлийн шийдвэр гаргасан. АН өнөөдөр Монгол Улсын Засгийн газрыг огцруулах нь зүйтэй гэсэн шийдвэр гаргасан. Бүрэн эрхийнхээ хүрээнд асуудлыг зохицуулаад явах нь зүйтэй юм.

УИХ-ын гишүүн Ж.Энхбаяр:

-Бүх ард түмний нүдэн дээр бодит байдлыг ил хэлж байж шийдвэр гаргасан. Сүүлийн хэдэн сар нийгмийг бужигнуулсан үйл явцаас хэн нь хэн бэ гэдгийг таньж авсан байх. Зарим нь шүүхийн өмнөөс шийдвэр гаргах гээд байна. Хуулийн байгууллага шалгаж байна. Хуулийн байгууллагад улс төрийн нөлөөлөө битгий татан оролцуулаач ээ.

УИХ-ын гишүүн Л.Болд:

-АН-аас Засгийн газрыг огцруулах нь зүйтэй гэсэн шийдвэр гаргаж байгаа. Эрх баригч намын бүх Засгийн газрыг АН огцруулах байр суурьтай байна. Танай байгуулсан аль ч Засгийн газар оршин тогтох эрхгүй. Яагаад гэвэл амлалт, мөрийн хөтөлбөрөөсөө буцсан.

Чуулганы хуралдаан үргэлжилж байна.

МОНГОЛ АРДЫН НАМЫН ГИШҮҮД, ДЭМЖИГЧДЭД ИЛГЭЭХ

ИЛ ЗАХИДАЛ

Сайн байцгаана уу?

Улсын Их Хурлын бидний 27 гишүүн Монгол Улсын Ерөнхий сайд У.Хүрэлсүхийг огцруулах санал гаргаснаа намын гишүүд, дэмжигчид Та бүхэндээ тайлбарлах нь зүйд нийцнэ хэмээн үзэж, энэхүү ил захидлыг илгээж байна.

Сонгуулиас хойшхи хоёр гаруйхан жилийн хугацаанд нэг Засгийн газар сольж, дараагийн Засгийн газрыг огцруулах асуудлыг өргөн барьж, хоорондоо талцан мэрэлцэж, төрийн ажлыг ч, намын үйл хэргийг ч хөсөрдүүлж суух Улсын Их Хурал дахь намын бүлгийн гишүүд та нар минь даанч яав даа хэмээн халаглан харамсаж, харууслын үгээ хэлж суугаа намын гишүүд, дэмжигчдээсээ түмэн хүлцэл өчиж, бидний 27 гишүүн төрд өргөсөн тангарагтаа захирагдаж, намын дүрмээ чандлан сахиж, Үндсэн хуулиар олгогдсон үүргээ биелүүлж Ерөнхий сайд У.Хүрэлсүхийг огцруулах гарцаагүй үндэслэл, шаардлага байгааг учирлан тайлбарлая.

Засгийн газар тогтвортой ажиллах нь чухал. Гэхдээ аливаа Засгийн газрын тогтвортой ажиллах үндэс суурь нь тухайн Засгийн газрын гишүүд төрийн хуулийг ягштал биелүүлж, ёс зүй, ашиг сонирхлын зөрчлөөс ангид байж, алдаа гаргавал хариуцлагаа хүлээдэг, тэдгээрт хариуцлага хүлээлгэдэг байх явдал юм. Ерөнхий сайд У.Хүрэлсүхийн тэргүүлсэн Засгийн газрын гишүүд Жижиг, дунд үйлдвэрийг хөгжүүлэх сангийн хөрөнгийг албан тушаалаа урвуулан ашиглаж, өөрсдийн болон хамаарал бүхий аж ахуйн нэгжүүдэд хууль тогтоомж зөрчин тэрбум тэрбумаар тараасан нь нэгэнт тогтоогдлоо. Намын зарим удирдах албан тушаалтнууд ч нэр холбогдож байна. Албан тушаал, эрх мэдлээ урвуулан ашиглаж ёс зүйн алдаа, магадгүй эрүүгийн гэмт хэрэг үйлдсэн байж болох Засгийн газрын гишүүддээ ёс зүйн болон улс төрийн хариуцлага тооцох тухай УИХ-ын гишүүд бидний шаардлагад Ерөнхий сайд У.Хүрэлсүх одоо болтол хариу өгөөгүй байна.

Шударга ёс, тэгш байдал, хууль дээдлэх нь төрийн үйл ажиллагааны үндсэн зарчим мөн гэсэн Үндсэн хуулийн суурь заалт, шударга ёсыг дээдэлж, хариуцлагаа ухамсарлах нь Монгол Ардын Намын үйл ажиллагааны нэн чухал зарчим мөн гэсэн намын Мөрийн хөтөлбөрийн заалтыг зөрчсөн энэ бусармаг үйлдлийг эсэргүүцэж, мөн энэ үйлдлийг таслан зогсоож, урьдчилан сэргийлж, хариуцлага тооцож чадаагүйд нь Ерөнхий сайд У.Хүрэлсүхийг буруутгаж бид асуудлыг өргөн барьсан юм.

Намын эв нэгдэл чухал. Гэхдээ намын эв нэгдэл нь ардчилсан ёс, үндэсний эв нэгдлийг хангах, хууль дээдлэх зарчимд суурилах ёстой. Үндсэн хууль, парламентын засаглалыг үгүйсгэж, Монголын ард түмний эв нэгдлийг бусниулах гэсэн Ерөнхийлөгч Х.Баттулгын хууль бус үйлдлийг хазаарлан зогсоох үүрэгтэй Ерөнхий сайд түүнтэй үгсэн нийлж, Үндсэн хуулийн хүрээнд ажиллах боломжгүй болсноо өөрөө Улсын Их Хурлын индэр дээрээс мэдэгдэж, ард иргэдээ жагсаал цуглаанд уриалсан уулзалт зохион байгуулж Монгол төрийн тогтвортой байдал, нийгмийн дэг журмыг алдагдуулахад хүргэж болзошгүй хариуцлагагүй үйлдэл хийснийг нь бид буруушааж, огцруулах саналыг оруулсан юм.

Монголчууд бидэнд тусгаар тогтнол, бүрэн эрхт байдлаас илүү үнэт зүйлс үгүй. Үүнийг хамгаалж, аливаа халдлагаас урьдчилан сэргийлэх нь Ерөнхий сайдын нэн тэргүүний үүрэг мөн. Гэтэл гадаад гүрний тусгай албад Монгол Улсын нутаг дэвсгэр дээр хүн хулгайлах хууль бус үйл ажиллагаа явуулж, Монгол Улсын тусгаар тогтнол, бүрэн эрхт байдалд ноцтой аюул учрууллаа. Гадаад гүрний албаны хүмүүс энэ үйл ажиллагааг Монголын талтай зөвшилцөж явуулсан гэдгийг албан ёсоор удаа дараа мэдэгдсэн. Энэ хууль бус үйлдлийг зөвшөөрсөн, эсхүл урьдчилан сэргийлж, таслан зогсоож чадаагүй, холбогдох төрийн албан хаагчдад одоо болтол хуулийн дагуу хатуу арга хэмжээ аваагүй Ерөнхий сайд У.Хүрэлсүхэд улс төрийн хариуцлага тооцох ёстой гэж бид үзэж байгаа юм. “Ард түмнийхээ эрх чөлөө, улс орныхоо тусгаар тогтнолын төлөөх үзэл санаа нь манай намын уугуул өв, үнэт зүйл мөн” гэсэн Монгол Ардын Намын мөрийн хөтөлбөрийн нэгдүгээр заалт ч биднийг ийм алхам хийхийг шаардаж байгаа юм.

“Хамтын удирдлага, эв нэгдэл, дотоод ардчилалтай байх зарчмыг баримтлан” ажиллах тухай намын Дүрмийн 1.5 дахь заалтыг У.Хүрэлсүх умартаж, Ерөнхий сайдын болон намын даргын нэр сүрээр далайлгах, шүүмжлэлийг үл ойшоох, үг сөрсөн гишүүн бүрийг айлган сүрдүүлэх, аливаа асуудлыг тушаан захиргаадах аргаар шийдвэрлэх гэж оролдох нь хэрээс хэтэрч, намын ажлаас хальж төрийн үйл ажиллагаанд саад тотгор учруулах хэмжээнд хүрлээ гэж бид үзэж, түүнийг огцруулах асуудлыг өргөн барьсан юм.

Та бүхэн мэргэн оюундаа тунгааж болгооно уу. Зарчим, шударга үнэн ямагт ялан дийлэх хүчтэй билээ.

Та бүхэндээ сайн сайхныг хүсэн ерөөе.

МОНГОЛ ЭХ ОРОН МИНЬ ҮҮРД МАНДАН БАДРАГ.