Month: October 2018

Германы олон улсын хамтын ажиллагааны нийгэмлэг (GIZ)-ийн санхүүжилтээр Зориг Сан анх удаагаа оюутан залууст зориулсан БАЙГАЛЬД ЭЭЛТЭЙ ЗАЛУУС ХӨТӨЛБӨР-өө зарлалаа. Тус хөтөлбөрт нийгэмдээ хувь нэмрээ оруулах, байгаль орчны мэдлэгээ тэлэх, өөрийгөө хөгжүүлэх чин хүсэл эрмэлзэлтэй оюутан залуусыг оролцохыг урьж байна.

Тавигдах шаардлага:

18-23 насны оюутан байх,
Хөтөлбөрийн үйл ажиллагаанд 2 долоо хоногийн турш идэвхтэй оролцох боломжтой байх,
Өөрийгөө хөгжүүлж, байгаль орчинд тустай үйл хэрэгт өөрийн хувь нэмрээ оруулах хүсэлтэй байх,

Хөтөлбөрт хамрагдсанаар:

Монголын өнөөгийн байгаль орчны тулгамдаж буй асуудлуудыг судлан, эдгээрийг шийдвэрлэхэд иргэн бүрийн хувь нэмэр, оролцооны талаар мэдлэгтэй болох
Байгаль орчны салбарын туршлага бүхий манлайлагчидтай уулзаж санал бодлоо солилцох,
Нийгмийн оролцоо, манлайлал, хамтын ажиллагааны ур чадвараа сайжруулах боломжтой
Залуус өнөөгийн байгаль орчинд тулгамдаж буй асуудлын талаар хамтдаа хэлэлцэж, түүний хор уршиг болон хэрхэн шийдвэрлэх арга замыг хамтдаа эрэлхийлэх.
Мөн хөтөлбөрийн хугацаанд 5 багт хуваагдан сурч мэдсэн зүйлс дээрээ тулгуурлан байгаль орчинд тулгамдаж буй асуудлын шийдлийг олох юм.

Оролцохыг хүсэгчид доорх өргөдлийг онлайнаар https://form.jotform.me/zorigfoundation/yelp-2019 бөглөх бөгөөд 2018 оны 10-р сарын 31-ний 23:00 цаг хүртэл хүлээн авна.

Шалгаруулалт:
Урьдчилсан шалгаруулалтыг Эссэ болон цахим өргөдлийн маягтыг үндэслэн явуулна. Зөвхөн урьдчилсан шалгаруулалтанд тэнцсэн өргөдөл гаргагчтай утсаар болон имейлээр холбогдож ганцаарчилсан ярилцлаганд урих бөгөөд ярилцлагын үр дүнгээр эцсийн шалгаруулалтыг хийнэ.

Шалгаруулалтын хуваарь:

Онлайн өргөдөл хүлээж авах: 2018.10.18 – 2018.10.31
Эхний шатанд тэнцсэн өргөдөл гаргагчтай утсаар холбогдож 2-р шатны ярилцлагад дуудах: 2018.11.02-03
Ярилцлага болох: 2018.11.05-06
Хөтөлбөр эхлэх: 2018.11.09

Хөтөлбөрт 25 оролцогч шалгаран оролцоно.

ЖИЧ: Зориг сангаас зарлагддаг бүх хөтөлбөр төлбөр авдаггүй болно.

Хан-Уул дүүргийн Засаг даргын Тамгын Газраас уламжлал болгон зохион байгуулдаг Монгол Улсын иргэний андгай өргөх ёслол Нийслэлийн 379 жилийн ойг тохиолдуулан дүүргийн Соёлын ордонд боллоо. Хан-Уул дүүргийн 16 хорооны 16 насанд хүрч буй 120 залуучууд иргэний үнэмлэхээ гардан авч, иргэний андгайгаа өргөлөө.

Монгол Улсын иргэний андгай өргөх ёслолын зорилго нь иргэний хувьд эх оронч үзэлтэй, ёс суртахууны өндөр соёлтой, хөдөлмөрч, хууль, ёс заншлаа эрхэмлэн дээдэлдэг түүх соёлоороо бахархах үзлийг төлөвшүүлэхэд оршино.

Ёслолын ажиллагааг нээж Хан-Уул дүүргийн Засаг даргын Тамгын газрын дарга Б.Энхболд хэлэхдээ “Монгол Улсын иргэн болж үнэмлэхээ албан ёсоор гардан авна гэдэг бол нэр төрийн хэрэг. Мөн хуульд заасан тодорхой эрх эдэлж, үүрэг хариуцлага хүлээх юм. Тийм учраас өнөөдөр үнэмлэхээ хүлээн авч Монгол Улсын иргэн болж байгаа нийт залуучууддаа цаашдын сурлага хөдөлмөрт нь өндөр амжилт хүсээд улс эх орондоо хэрэгтэй, ихийг хийж бүтээсэн Монгол Улсынхаа нэрийг өндөрт өргөсөн хариуцлагатай иргэн болохыг хүсэн ерөөе” хэмээж Засаг даргаас дурсгасан ном болон дурсамж, иргэний үнэмлэхийг гардуулан өглөө.

Андгай өргөж буй залуучуудад Нийслэлийн Залуучуудын хөгжлийн газрын дарга С.Сүх-Очир, Оюуны төвийн захирал, лектор Г.Мөнгөн нар илтгэл тавьж залуучуудыг нийгэмдээ манлайлагч байхыг уриаллаа. Түүнчлэн залуу дуучин Ш.Хүрэлбаатар 16 насны дурсамжаа хуваалцан ая дуугаар мэндчилгээ дэвшүүллээ гэж Хан-Уул дүүргийн ЗДТГ-аас мэдээллээ.

“Эрдэнэс Тавантолгой” компанийн хувьцаа эзэмшигчдийн хурлаас ТУЗ-ийн 11 гишүүнийг албан ёсоор томилж, баталгаажуулсан билээ. ТУЗ-ийн гишүүдэд,

ТӨР ТӨЛӨӨЛСӨН ГИШҮҮД:

1.Сангийн яамны ТНБД С.Наранцогт,

2.Зам, тээврийн хөгжлийн яамны ТНБД-ын үүрэг гүйцэтгэгч Х.Мэргэн,

3.Уул уурхай, хүнд үйлдвэрийн яамны ТНБД Г.Нандинжаргал

4.“Эрдэнэс Тавантолгой” компанийн Гүйцэтгэх захирал Б.Ганхуяг,

5.Сангийн яамны Хуулийн хэлтсийн даргын үүргийг түр орлон гүйцэтгэгч Н.Баярчимэг,

6.ТӨБЗГ-ын Бодлого төлөвлөлт, удирдлагын хэлтсийн дарга Ц.Баяр-Эрдэнэ,

7.ЗГХЭГ-ын дэд дарга У.Бямбасүрэн

ХАРААТ БУС ГИШҮҮД:

1.“Монголросцветмет” нэгдлийн Ерөнхий захирал асан Х.Болор-Эрдэнэ

2.МАН-ын “Цэгцрэх Хөдөлгөөн”-ий ерөнхий зохион байгуулагч П.Өлзийнаран

3.Хүнс, хөдөө аж ахуйн сайд асан Р.Бурмаа

4.Цогийн Ганболд нарыг томилоод байсан юм.

Улмаар төр төлөөлсөн ТУЗ-ийн гишүүдийн бүрэлдэхүүнээс Сангийн яамны Хуулийн хэлтсийн даргын үүргийг түр орлон гүйцэтгэгч Н.Баярчимэгийг хасч, оронд нь Уул уурхай, хүнд үйлдвэрийн яамны Төрийн захиргааны удирдлагын газрын дарга М.Баярааг томилсон байна.

Мөн өмнө нь “Эрдэнэс Тавантолгой” компанийн ТУЗ-ийн дарга хийж байсан Уул уурхай, хүнд үйлдвэрийн яамны ТНБД Г.Нандинжаргалыг албан үүргээс нь чөлөөлж, Уул уурхай, хүнд үйлдвэрийн яамны Төрийн захиргааны удирдлагын газрын дарга М.Баярааг томилсон аж.

“Эрдэнэс Тавантолгой” компанийн ТУЗ-ийн даргаар томилогдсон М.Баяраа нь,

-2000 оноос УИХ-ын тамгын газарт мэргэжилтэн,

-2006 оноос Японы олон улсын Жайка төсөл хөтөлбөр хариуцсан мэргэжилтэн,

-2009 “Эм Ти Си Партнерс” ХХК-ийн гүйцэтгэх захирал

-2011 Хөгжлийн банк ахлах мэргэжилтэн,

-2016 СХД-ийн боловсролын газрын дарга,

-2016 СХД-ийн ЗДТГ-ын дарга,

2017 оноос УУХҮЯ-ны Төрийн захиргаа удирдлагын газрын даргаар ажиллаж байгаа нэгэн аж.

-МАНАЙ УЛСААС БНХАУ, БНСУ, ЯПОН ЗЭРЭГ ОРНУУД СЭРГЭЭГДЭХ ЭРЧИМ ХҮЧ АВАХ БОЛОМЖ НЭЭГДЖЭЭ-

Энэ сарын 31, арваннэгдүгээр сарын 1-ны өдрүүдэд “Зүүн Хойд Азийн цахилгаан эрчим хүчний нэгдсэн сүлжээ, хамтын ажиллагааны 2018 форум” манай улсад зохиогдох гэж байна. Уг форумыг НҮБ-ын Ази, Номхон далайн бүс нутгийн Эдийн засаг, нийгмийн комисс (UNESCAP)Улаанбаатар хотод зохион байгуулах аж. Форумд Зүүн Хойд Азийн орнууд буюу Монгол, БНХАУ, БНСУ, Япон, ОХУ-ын Эрчим хүчний яам болон холбогдох байгууллагуудын төлөөлөл оролцох аж. Зүүн Хойд Азийн орнуудыг сэргээгдэх эрчим хүчээр хангах боломжтой ганц улс нь Монгол гэж тус улсууд үздэг байна. Учир нь манай орон нь нар, салхи, ус гэх мэт сэргээгдэх эрчим хүчний арвин баялаг нөөцтэй. Энэ их нөөцийг ашиглаж чадвал тус бүс нутгийн орнуудыг цахилгаан, эрчим хүчээр хангах боломж нээгдэнэ хэмээн тус салбарынхан үзэж байгаа юм байна.

Зүүн Хойд Азийн бүс нутаг нь одоогоор эрчим хүчний нэгдсэн сүлжээгээр холбогдоогүй цорын ганц бүс нутаг болоод байгаа аж. Манай улс энэ байдлыг өөрсдөдөө ашигтайгаар ашиглаж чадвал ирээдүйд эрчим хүчний хил дамнасан худалдааг бий болгож чадах юм. Энэ бүс нутагт ДНБ-ний 25 хувь, нийт хүн амын 22 хувь, эрчим хүчний хэрэглээний 25 хувь нь төвлөрч байгаа нь манай орны хувьд өргөн уудам нутгийнхаа нөөцөө ашиглан сэргээгдэх эрчим хүчний экспортлогч орон болох алтан боломж гэж салбарынхан үзэж байгаа юм.

Монгол улсын оролцоог хангах боломж, давуу талууд гэвэл,

Эрчим хүчний баялаг нөөц

Харьцангуй бага хэрэглээ

Өргөн уудам газар нутаг нь том чадлын эрчим хүчний эх үүсвэр, дамжуулах шугам барихад таатай

Газарзүйн байршил.

Эрчим хүчний нөөц ихтэй ОХУ болон БНХАУ-ын баруун хойд, хойд мужтай харьцуулахад хэрэгцээт зах зээлдээ харьцангуй ойр, эдийн засгийн үр ашиг өндөр. Иймээс энэ долоо хоногийн лхагва, пүрэв гаригт болох НҮБ-ын комиссын хуралдаан нь Монгол Улсын сэргээгдэх эрчим хүчний салбарт дэвшил авчрах, эдийн засгийн үр өгөөжийг нэмэгдүүлнэ гэж үзэж болох юм.

Хөвсгөл аймгийн Алаг-Эрдэнэ сумын Хатгал тосгоноос сураггүй алга болсон БНХАУ-ын хоёр иргэнийг хүч нэмэгдүүлэн хайж байна.

БНХАУ-ын харьяат иргэн 25 настай эрэгтэй М, 28 настай эмэгтэй иргэн Г нар 10 сарын 18-ны өдөр ууланд гурав хоног аялаад ирнэ гэж яваад сураггүй алга болжээ. Тус аймгийн Онцгой байдлын газрын Гал түймэр унтраах, аврах 69 дүгээр ангийн 6 алба хаагч, Тагнуулын газрын 1 алба хаагч, Цагдаагийн газрын 13 алба хаагч, орон нутгийн 15 иргэн, ар гэрийнх нь 2 хүн, нийт 36 хүн, 5 автомашин, 5 морь, 1 нохойтой 3 бүлэгт хуваагдаж, 10 сарын 28-ны өдөр 1 дүгээр бүлэг Алаг-Эрдэнэ сумын сумын 6 дугаар багийн Ар голын-Эх гэдэг газраас Байцын хад гэдэг газар хүртэл 60 км-т, 2 дугаар бүлэг Нуурт хөндий гэдэг газар хүртэл 40-км-т, 3 дугаар бүлэг Рэнчинлхүмбэ сумын Ёлт багийн Шимийн-Агь гэдэг газар хүртэл 40 км-т тус тус эрэн хайх ажиллагааг зохион байгуулсан боловч үр дүн хүрээгүй харанхуй болсон учраас 20 цаг 30 минутад түр зогсоосон байна. Эрэн хайх ажиллагаа өнөөдөр өглөөний 8 цагт дахин эхэллээ. Тус аймгийн Онцгой байдлын газрын Эрэн хайх, аврах салбарын 6 алба хаагч, 1 автомашинтай хүч нэмэгдүүлэн ажиллахаар Хатгал тосгоныг зорьжээ.

Нийслэлийн өдрийг угтан нийслэлийн Тээврийн газраас нийтийн тээврийн үйлчилгээ эрхлэгч аж ахуй нэгж, байгууллагын дунд болзолт уралдаан зарласан билээ. Уг уралдаантай холбогдуулан нийтийн тээврийн үйлчилгээ эрхлэгч аж ахуй нэгж, байгууллагын дунд 2018 оны аравдугаар сарын 26-ны өдөр их цэвэрлэгээ болон эцсийн зогсоолын U money карт борлуулах цэгүүдэд хяналт, шалгалтыг зохион байгуулсан юм. Цэвэрлэгээнд нийтийн тээврийн үйлчилгээ эрхлэгч 18 аж ахуй нэгж байгууллага болон Улаанбаатар смарт карт ХХК-ийн нийт 394 ажилтан, 51953,5 м2 талбайг цэвэрлэн, 179 шуудай хогийг хогийн машинд тээвэрлэн ажиллаа.

Тус газрын 35 албан хаагчид цэвэрлэгээний хуваарийг гарган, U money цэгүүдэд хяналт тавин ажиллаа. Энэхүү цэвэрлэгээний ажилд идэвхитэй оролцсон аж ахуй нэгж байгууллагууддаа талархсанаа илэрхийлье.

“Монголын яаралтай тусламжийн мэргэжилтнүүдийн үндэсний чуулган-2018” –ыг Монголын яаралтай тусламжийн нийгэмлэгээс санаачлан энэ сарын 26- ны өдөр зохион байгууллаа.

Тус нийгэмлэгээс жил бүр зохион байгуулдаг энэхүү чуулганы үдээс өмнөх хуралдаанаар эрүүл мэндийн байгууллагын яаралтай тусламжид ажиллаж буй эмч мэргэжилтнүүдийн сүүлийн үед хийсэн шинэ судалгааны ажлууд, шинэ технологийг танилцууллаа.
Үдээс хойшхи хуралдаанаар шинэчлэн боловсруулж буй яаралтай, тусламж, түргэн тусламжийн журмын төсөл дээр бүлэг болон ажиллаж, санал дүгнэлт өглөө. Цаашид энэхүү журмуудын төслийн хүрээнд дахин жижиг бүлгээр хуралдаж, эцэслэн хэлэлцэхээр шийдвэрлэлээ.