Month: August 2018

Бөөрний хорт хавдар үүсэх эрсдэл байгаа эсэхийг тогтооход тусалдаг илрүүлэгч молекул хүний цусанд байдаг болохыг илрүүлсэн тухай Их Британийн хавдар судлалын хүрээлэнгээс даваа гарагт нийтэлсэн судалгаанд тэмдэглэснийг “Синьхуа” агентлаг уламжлав.

Хүний цусан дахь “КИМ-1” гэдэг уургийн молекулын түвшинг хэмжиж, тухайн хүний биед ирэх 5 жилд бөөрний хорт хавдар үүсэх магадлал байгаа эсэхийг тогтоох боломжтой болохыг судалгааны багийнхан олж илрүүлсэн байна.

“КИМ-1” молекулын нягтрал өндөр байх тусам бөөрний хорт хавдар үүсэх магадлал нэмэгдэнэ гэж дээрх судалгаанд дурдсан байна. Үүний зэрэгцээ, хорт хавдар хэдийнээ үүссэн өвчтнүүдийн хувьд тэдний цусан дахь “КИМ-1” молекулын нягтрал өндөр байх тусам эдгэрэх магадлал бага гэсэн дүгнэлтэд хүрсэн гэж эрдэмтэд мэдэгджээ.

“Хүний цусан дахь “КИМ-1” молекулын нягтралыг тогтоосноор хавдрыг эрт үед нь илрүүлэх хийгээд өвчтөний эмчилгээний үр дүнг сайжруулах боломжтой боллоо” гэж дээрх судалгааг явуулсан эрдэмтдийн нэг Девид Мюллер тэмдэглэсэн байна.

Бөөрний хорт хавдар нь Их Британид өндөр тархацтай хорт хавдруудын долдугаарт багтдаг ба өвчтнүүдийн тоо улам нэмэгдсээр байгаа аж.

ЗТХЯ-нд гарсан хүн амины онц ноцтой хэргийн улмаас хариуцлага алдсан олон албан хаагч ажлаасаа чөлөөлөгдлөө.

Тодруулбал, ЗТХ-ийн сайд Ж.Бат-Эрдэнэ, дэд сайд Б.Цогтгэрэл, ТНБД Ж.Бат-Эрдэнэ болон газрын дарга нарын нийт долоон албан хаагчийг үүрэгт ажлаас нь чөлөөлөх шийдвэрийг өнгөрсөн ням гарагт Засгийн газрын ээлжит бус хуралдаанаас гаргаж, шийдвэрлэсэн билээ.

Харин өчигдөр Төрийн тусгай хамгаалалтын газрынханд хариуцлага тооцсон байна.

Тодруулбал, Тагнуулын Ерөнхий газрын дарга Д.Гэрэлийн тушаалаар Төрийн тусгай хамгаалалтын газрын орлогч, хамгаалалтын хэлтсийн дарга дэд хурандаа Г.Баярмагнайг ажлаас нь чөлөөлсөн, орлогч дарга Д.Батбаатарын хамгаалалтын нэмэгдэл хасах, хошууч З.Ууганбаярт сануулах арга хэмжээ авах, ахлах ахлагч Л.Түмэнжаргалын цалингийн 20 хувийг гурван сарын хугацаанд хасах сахилгын шийтгэл ногдуулжээ.

Иргэд ашиг олох зорилгоор хууль бусаар нэн ховордсон ан амьтан агнах, тэдний эд эрхтэнг хил давуулан худалдах зэрэг тохиолдол гарсаар байна.

Тэгвэл хууль бусаар хүрэн баавгайн саварыг их хэмжээгээр тээвэрлэж, бусдад худалдах гэж байсан этгээдийг цагдаагийн байгууллагаас илрүүлэн шалгаж дуусаад шүүхийн байгууллагаас хэргийг шийдвэрлэжээ.

Тодруулбал, хууль бусаар хүрэн баавгайн савар тээвэрлэсэн иргэн И-г Баянзүрх дүүргийн шүүхээс 13 сая төгрөгийн төлбөр, хоёр жилийн хорих ялаар шийтгэсэн байна. Тиймээс нэн ховор, ховор амьтан ургамлын зүйл худалдах, худалдан авах, тээвэрлэхээс болгоомжилно уу.

Нийслэлийн хэмжээнд долдугаар сарын 16-аас эхлэн үргэлжлэн орсон аадар борооны улмаас дүүргийн 27 дугаар хороо Дарь-Эх орчмын Булагийн ус авто зам руу их хэмжээгээр урсаж орсноос болж зам эвдэрч иргэд зорчиход хүндрэлтэй болсон. Иймд дүүргийн Тохижилт нийтийн аж ахуйн хэлтэс, НҮГ-1 ОНӨААТҮГазар болон 27 дугаар хороо хамтран Булгийн усны урсацыг Сэлбэ гол руу чиглүүлэх ажил өнөөдөр эхэллээ.

Дүүргийн Дэд бүтэц хот төлөвлөлт хариуцсан төслийн удирдагч-Засаг даргын орлогч Т.Батцогт газар дээр ажиллан зааварчилгаа өгч, бэлтгэл ажлыг яаравчлахыг үүрэг болголоо.

Бид Хүнс, хөдөө аж ахуй, хөнгөн үйлдвэрийн салбарын бүсийн зөвлөгөөний үеэр төвийн бүсийн аймгуудын хөгжлийн загварын талаар сурвалжиллаа. Улирлын онцлог, байгаль цаг уурын эрсдэлд өртөмтгий тус салбараас хэт хамааралтай байх нь эргээд орон нутгийн иргэдийн аж амьдралд хүндрэл учруулдаг. Тиймээс ч эдийн засгаа төрөлжүүлэх, мал аж ахуйн салбарын эрсдэлийг бууруулах шаардлагатай болж байна. Энэ удаад Өвөрхангай, Сэлэнгэ аймгийг жишээлэн хэрхэн хөгжиж байгааг хүргэе.

ӨВӨРХАНГАЙ АЙМАГ ЭДИЙН ЗАСГАА ТӨРӨЛЖҮҮЛЭН ХӨГЖҮҮЛНЭ

2018 оны эхний байдлаар Өвөрхангай аймгийн хэмжээнд малаа таван төрөл дээр нь өсгөж, 5.7 сая толгой мал тоолуулж, малынхаа тоогоор сүүлийн 3 жил дараалан улсад тэргүүлж, мянгаас дээш малтай өрхийн тоо 941-д хүрчээ. Тоо толгойн өсөлт тийм ч чухал үзүүлэлт биш гэж үзсэн аймгийнхан хонь, ямаа, үхэр сүргийн ашиг шимийн түвшинг тогтоож, бусад үүлдэр, омгийн малтай харьцуулсан судалгаа хийж байна. Олон малыг тэжээхэд тэр хэмжээний өвс, тэжээл хэрэгтэй учраас хадлангийн талбай асуудал болоод байна. Тиймээс аймгийн удирдлагууд мал аж ахуйн хамаарлаа бууруулж, үйлдвэрт түшиглэн хөгжих бодлого барьж байгаагаа Өвөрхангай аймгийн Засаг дарга Г.Ганболд ярилаа.

21 аймагт 100 хөнгөн үйлдвэр байгуулах зорилт бүхий Үйлдвэржилт 21:100 хөтөлбөрийн хүрээнд Өвөрхангай аймагт жилд 3600 тонн дулааны аргаар боловсруулсан мах экспортлох хүчин чадалтай мах, махан бүтээгдэхүүний үйлдвэр, жилд 30 тонн органик бордоо үйлдвэрлэх бордооны үйлдвэр, хоногт нэг тонн хатааж, нөөшилсөн хүнсний ногоо үйлдвэрлэх хүчин чадалтай үйлдвэр, хоногт 1500 литр хуурай сүү үйлдвэрлэх хүчин чадалтай үйлдвэр байгуулахаар болсон. Эдгээр үйлдвэр ашиглалтад орсноор 200 орчим ажлын байр шинээр бий болж, аймгийн эдийн засгийг төрөлжүүлэн хөгжүүлэхэд багагүй хувь нэмэр болно гэж үзэж байна.

СЭЛЭНГЭ АЙМАГТ ГАЗАР ТАРИАЛАН, ЭРЧИМЖСЭН МАЛ АЖ ХОСЛОН ХӨГЖИНӨ

Сэлэнгэ аймаг нь газар тариалангийн салбарт улсын хэрэгцээт үр тарианы 60 хувь, төмсний 28 хувь, хүнсний ногооны 36 хувь, байгалийн хадлангийн 20 хувийг үйлдвэрлэж, үр тариа, хадлангаар улсдаа тэргүүлдэг. Энэ нь сайн үзүүлэлт мэт боловч мөн л нэг салбараас хараат байдалд оруулж байна. Тиймээс аймгийн 2000 гаруй малчдын 60 гаруй хувь нь эрчимжсэн мал аж ахуй, газар тариаланг хослон эрхлэх стратегийн бүс болохыг зөвшөөрснөөр малчид, тариаланчид зөрчилдөх бус хамтран хөгжих шийдэлд хүрсэн. Иргэдийн энэхүү санаачилга, орон нутгийн удирдлагуудын саналаар Засгийн газар Сэлэнгэ тэргүүтэй 7 аймгийг газар тариалангийн бүс нутгаар тогтоосон юм.

Ийнхүү газар тариаланг түшиглэн эрчимжсэн мал аж ахуйг хөгжүүлэхээр шийдсэн Сэлэнгэ аймаг мах, сүүний үхэр, махны чиглэлийн үхэр, сүүний чиглэлийн ямаа, гахай, шувуу, зөгийн аж ахуй эрхэлж байна. Тодруулбал, мах, сүүний өндөр ашиг шимт Казахийн цагаан толгойт, Сэлэнгэ, Халимаг, Симменталь, Лимузин, Ангус, Грефорд үүлдрийн үхрийн аж ахуй, Англи, Будеон үүлдрийн адуу, нарийн нарийвтар ноост Хангай, Орхон, Ерөө, Суффолк үүлдрийн хонийг өсгөн үржүүлж байгаа юм. Нөгөөтэйгүүр газар тариалан эрхлэгчид талбайнхаа 30 хувьд малын тэжээл тариалж, аймгийнхаа малчин өрхөд хөнгөлөлттэй үнээр олгох зохицуулалт хийж байна

БНХАУ-ын ӨМӨЗО-ны Засгийн газар, ОХУ-ын Бүгд Найрамдах Буриад Улсын Засгийн газар, Эрхүү мужийн Засгийн газар болон Улаанбаатар хотын Засаг даргын Тамгын газар, Дорноговь аймгийн Засаг даргын Тамгын газар хамтран 10 дахь удаагаа “Монгол, Хятад, Оросын эдийн засаг, худалдааны хамтын ажиллагааны чуулга уулзалт”-ыг 2018 оны 08 дугаар сарын 17-19-ний өдрүүдэд БНХАУ-ын Эрээн хотноо зохион байгуулах гэж байна.

Тус арга хэмжээний хүрээнд хүнс, хөнгөн, жижиг, дунд үйлдвэр эрхлэгчид талбайн түрээсийн төлбөргүйгээр үзэсгэлэн худалдаанд оролцох, мөн гадаадын хөрөнгө оруулалтыг татах, хамтран ажиллах төслүүдээ танилцуулах боломжтой тул оролцох хүсэлтэй аж ахуйн нэгжүүдийг Монголын Үндэсний Худалдаа Аж Үйлдвэрийн Танхимд /утас:11-312371/ бүртгэж байна.

Байгалийн давагдашгүй хүчин зүйл болох гэнэтийн хүчтэй аадар борооноос үүссэн үерийн улмаас Улаанбаатар-Сайншандын чиглэлд аялж явсан суудлын 286-р галт тэрэг 2018 оны 8 дугаар сарын 12-ны өглөө замаас гарч осолдсонтой холбогдуулан осол болох үед тус галт тэргэнд зорчиж явсан нийт зорчигчид, цуваанд ажил үүргээ гүйцэтгэж явсан төмөр замын болон бусад холбогдох байгууллагын ажиллагсад тус бүрт 300.0 /гурван зуу/ мянган төгрөгийн нэг удаагийн тусламж олгохоор “Ган зам даатгал” ХХК шийдвэрлэсэн болно.

Тусламжийг УБТЗ-ын мэдээлийн санд бүртгэгдсэн зорчигчдын жагсаалтыг үндэслэж олгох тул тус галт тэргэнд сууж явсан нийт зорчигчид өөрийн зорчих эрхийн тасалбар, иргэний үнэмлэх, албан үүргээ гүйцэтгэж явсан хүмүүс албан байгууллагынхаа тодорохойлолт, ажлын үнэмлэхийн хамт “Ган зам даатгал” ХХК-д хандана уу.

Хаяг: Баянгол дүүрэг, Сөүлийн гудамж 45/3, “Одод” цогцолбор-201 тоотХолбоо барих утас: (21) 242667, (21) 242668 И-мэйл: daatgal@gzd.mn

Осол гарсан өдөр гэмтэл бэртэл авч, төв, орон нутгийн эмнэлэгт хүргэгдэн хэвтэн эмчлүүлж байгаа хүмүүст дээрх 300.0 /гурван зуу/ мянган төгрөгийн тусламжийг газар дээр нь бэлнээр шуурхай олгоод байна. Үүнээс гадна, энэ ослоос гэмтэл бэртэл авсан зорчигчийн гэнэтийн ослын даатгалын нөхөн төлбөрийг холбогдох материалыг үндэслэн хөдөлмөрийн чадвараа алдсан хугацаа, хувь хэмжээгээр тооцон олгоно.

Осолдсон галт тэрэгний замыг сэргээн засч дуусчээ. Тодруулбал, өчигдөр 18.00 цагаас нээнэ хэмээн төлөвлөсний дагуу нээж, өчигдөр анхны зүтгүүр нь орж ирсэн байна. Зам сэргээн засварлах ажилд 200 гаруй төмөр замчид ажиллаж, Зэвсэгт хүчний дугаар ангиас Т-55 танк ажиллуулсан юм.

Сануулахад, Улаанбаатараас Сайншандыг зорин явсан галт тэрэг өнгөрсөн ням гаригийн үүрээр онхолдож, дөрвөн вагон замаасаа гарсан харамсалтай хэрэг гарсан. Ослын шалтгаан нь хүчтэй аадар бороо орсоноос болсон гэж дүгнэж байгаа юм. Тиймээс байгалийн давагдашгүй хүчний хор хохирлыг арилгахаар төмөр замчид шаргуу ажиллаж байж ийнхүү осолдсон галт тэрэгний замыг сэргээн завсарлаж дууссан байна.