Month: August 2018

Ардчилсан оюутны холбоо их, дээд сургуулиудын удирдлагуудад шаардлага хүргүүлжээ. Тодруулбал, тэд Монгол Улсын хэмжээнд үйл ажиллагаа явуулж буй 92 их, дээд сургуульд төлбөр нэмэх болсон шалтгаанаа тайлбарлах зургаан заалт бүхий шаардлага хүргүүлсэн байна. Тус шаардлагын хариуг долоо хоногийн хугацаанд ирүүлэхгүй бол бүх сургуулиудыг зарлаж олон нийтэд танилцуулах юм байна.

Яамны зүгээс сургалтын төлбөрийг нэмэгдүүлэхгүй байх бодлого баримталж ирсэн ч энэ жил их, дээд сургуулиудын сургалтын төлбөр нэмэх асуудалд хатуу бодлого баримтлахгүй байгаа аж. Үүний улмаас МУБИС 126-177, АШУҮИС 159-299, МУИС 200-386, ШУТИС 251-317 мянган төгрөгөөр нэмсэнд эсэргүүцлээ илэрхийлж буй юм байна.

Энэ талаар Ардчилсан оюутны холбооны ерөнхийлөгч Н.Лхагвадорж хэлэхдээ “Өнгөрсөн 14 жилийн хугацаанд их, дээд сургуулиуд 50-80 хувиар сургалтын төлбөрөө нэмсэн. Гэтэл төрийн албан хаагчдын цалингийн хэмжээ нэмэгдээгүй. Их, дээд сургуулиуд сургалтын төлбөрөө нэмдэг ч сургалтын чанар, багш нарын заах арга дээр анхаарлаа хандуулдаггүй. Тиймээс бид чухам яагаад, ямар учраас нэмсэн, юунд зарцуулах болсон талаар асууж шаардлага хүргүүлж байна” гэжээ.

Нийслэлийн Засаг даргын 2016-2020 оны үйл ажиллагааны хөтөлбөрт “Ухаалаг төлөвлөлт, ил тод газрын харилцаа” зорилт тусгагдсан. Иргэн, ААН-үүд эзэмшил газраа хуулийн хугацаанд ашиглаагүй болон эрх бүхий албан тушаалтан газар эзэмших эрх олгохдоо хууль тогтоомж зөрчсөн нь газрын наймаа дэлгэрэх, авилга, хээл хахуулийн үндэс болж байгааг хотын дарга анхааралдаа авч, хууль бус олгосон газруудыг цэгцлэх ажлыг шат дараатайгаар авч хэрэгжүүлж байгаа. Энэхүү зорилтын хүрээнд авч хэрэгжүүлсэн эхний алхам нь нийтийн зориулалттай орон сууцны хороолол дунд орон сууц, контейнер, барилга барих зориулалтаар газар шинээр олгохыг хориглосон захирамж гаргасан билээ. Хотын дарга нийслэлийн 29 болон 33 дугаар дунд сургуулийн хашаа, Богд хааны Ордон музейн хойд талд, “Өгөөж” ХХК-ийн урд талбай буюу унагатай хөшөөтэй ногоон байгууламж, хорооллуудын дундах нийтийн эзэмшлийн талбай гэх мэт хууль бусаар олгосон олон газар эзэмших зөвшөөрлүүдийг тус тус хүчингүй болгоод байгаа нь иргэдийн талархлыг хүлээгээд байгаа юм.

Өнөөдөр хотын дарга нийслэлийн Баянгол дүүргийн 6-р хорооны нутаг дэвсгэрт, Номин их дэлгүүрийн хойд талд иргэн С.Батсүхийн эзэмшиж байсан орон сууц, үйлчилгээний зориулалт бүхий 360м2 газар эзэмших гэрчилгээг хуулийн дагуу хүчингүй болголоо. Баянгол дүүргийн 6-р хорооны нутаг дэвсгэр нь барилгын нягтаршил ихтэй байдгаас үүдэн иргэдийн ая тухыг хангасан тоглоомын талбай, ногоон байгууламжийн хүртээмж муу байсаар өдий хүрчээ. Цаашид нийслэлийн зүгээс энэхүү газар дээр ногоон байгууламж, иргэдийн амрах талбайг барьж байгуулахаар төлөвлөж байгаа аж.

Мөн Баянзүрх дүүгийн Засаг даргын 2016 оны А/443 тоот захирамжаар иргэн Д.Дагийрмаад хууль зөрчин олгосон, Баянзүрх дүүргийн 5 дугаар хорооны нутаг дэвсгэр, Монгол кино нэгтгэлийн хойд талд байрлах 107м2 газар эзэмших гэрчилгээг холбогдох хуулийн дагуу хүчингүй болголоо. Иргэн Д.Дагийрмаад хууль бусаар олгосон энэхүү газар нь ойр орчмын байрнуудын тоглоомын талбай төлөвлөгдсөн, ногоон байгууламж бүхий газар юм. Нийслэлийн зүгээс цаашид энэхүү газар дээр мөн тохижолт бүхий амралт, тоглоомын талбай байгуулна гэдгээ мэдэгдэлээ. Хотын дарга нийслэлийн нутаг дэвсгэрт газар эзэмшиж, ашиглаж буй иргэдэд тухайн газраа хуулийн дагуу, гэрээнд заасан эрх үүргээ биелүүлэн ажиллахыг уриалж, цаашид хууль бус газар олголт, газрын харилцаатай хатуу тэмцэнэ гэдгээ мэдэгдлээ.

Нэр бүхий иргэд Үндсэн хуулийн цэцэд хандаж “Монгол Улсын Их Хурлын сонгуулийн 42 дугаар тойрогт нөхөн сонгууль товлон зарлах, санал авах өдрийг тогтоох тухай” УИХ-ын 62 дугаар тогтоол нь Үндсэн хуулийн хэд хэдэн заалтад нийцээгүй байна гэсэн өргөдөл, мэдээлэл ирүүлсэн билээ.

Энэ тогтоолоор, Улсын Их Хурлын сонгуулийн 42 дугаар тойрогт нөхөн сонгууль товлон зарлах, санал авах өдрийг тогтоохдоо иргэний тэгш байдлын зарчмыг алдагдуулж, зарим иргэдийн сонгогдох эрхийг зөрчсөн хэмээн тэд үзжээ.

Энэхүү өргөдөл, мэдээллийн дагуу үүссэн маргааныг хянан хэлэлцэх Үндсэн хуулийн цэцийн дунд суудлын хуралдааныг 2018 оны 8 дугаар сарын 22-ны өдөр хийхээр товлов гэж Үндсэн хуулийн цэцийн хэвлэл, мэдээллийн төлөөлөгч мэдээлэв.

Нийслэлийн биеийн тамир спортын газар, Монголын хэт холын марафон гүйлтийн холбоо, Шри чинмойн марафон баг, Үндэсний цэцэрлэгт хүрээлэнгээс хамтран зохион байгуулдаг “Өөрийгөө Ялах“ 6-12-24 цагийн гүйлтийн залуучууд, насанд хүрэгчдийн улсын аварга шалгаруулах тэмцээнд Сүхбаатар аймгийн Онцгой байдлын газрын аврагч-гал сөнөөгч, дэд ахлагч Н.Баяржаргал 18-34 насны залуучуудын ангилалд нэгдүгээр байр эзэллээ.

Тэрбээр 12 цагийн төрөлд оролцсон 80 гаруй тамирчдаас 95 км гүйсэн амжилтаараа тэргүүлж, улсын хошой аварга болжээ. Тус тэмцээнд 18-34, 35-49, 50-аас дээш гэсэн насны ангиллаар нийт 98 гүйгч оролцож, аваргуудаа шалгаруулсан байна гэж ОБЕГ-аас мэдээллээ.

Боловсрол, соёл, шинжлэх ухаан, спортын сайдын шуурхай хурал зохион байгуулагдаж, холбогдох үүрэг даалгаварыг өглөө. Хурлын өмнө, аймаг, дүүрэгт ажилласан ажлын хэсэг сургууль, цэцэрлэгийн барилга, урсгал засварын явцыг танилцуулж, нийтлэг алдаа, цагийн хоцрогдолын талаар дэлгэрэнгүй мэдээлэл өгөв. Орон нутгийн удирдлагуудад сургууль, цэцэрлэг, спорт заалны барилга угсралт, засварын худалдан авалтыг зохион байгуулах эрх шилжүүлсэн хэдий ч хууль, журмын дагуу ажилаа зохион байгуулаагүй, улсад хохирол учруулсан байж болзошгүй хэд хэдэн зөрчил гарсан байгааг хууль хяналтын байгууллагаар шалгуулах үүрэг болгож, албан даалагавар хүргүүлэхээр боллоо. “Шат шатандаа сахилга хариуцлга, дэг журамыг сахиж ажиллах” шаардлагатай байгааг онцлов.

Сургууль, цэцэрлэгийн барилгын гүйцэтгэгчийн сонгон шалгаруулахдаа хамгийн бага үнийн дүн санал болгосон компанийг сонгодог уламжлалт арга барилыг шинэчлэх, арга зүйн өөрчлөлт хийхгүй бол чанаргүй барилга барьдаг, ердөө гуравхан жилийн дараа барьсан барилга нурдаг жишиг тогтсон байгааг нэн даруй өөрчлөх шаардлагатай байгааг дахин сануулж, улсад хохирол учруулж чанаргүй гүйцэтгэл үзүүлсэн компаниудын “Хар жагсаалт”-ийг яаралтай гаргах үүрэг даалгавар өгсөн юм.

Түүнчлэн, сургууль, цэцэрлэгийн захиралуудын ур чадвараас хамаарч хичээлийн шинэ жилийн бэлтгэл ажил, зохион байгуулалт, орчны аюулгүй байдал, ариун цэвэр харилцан адилгүй байгааг анхааран авч үзэхийг холбогдох удирдлагуудад үүрэг болгов. Хүүхдийн сурах орчны аюулгүй байдлыг цаашид үргэлжлүүлэн шалгаж, “аюулгүй” болох хүртэл өгөгдсөн үүрэг даалгаварыг шалгаж, тайлан мэдээг хүлээж авах даалгавар өглөө.

Өмнөд Солонгос улсын Боловсролын яам 2021 он гэхэд тус улсад үйл ажиллагаа явуулж буй хувийн тодотголтой 38 их, дээд сургуулийг хаах болсон тухай албан ёсоор мэдээллээ.

Хувийн их, дээд сургуулиудыг хаах болсон гол шалтгаан нь сүүлийн жилүүдэд сургуульд суралцах оюутан залуусын тоо ихээхэд буурч байгаатай холбоотой аж.

Тодруулбал, энэ хичээлийн жилд 480.000 оюутан их, дээд сургуульд элссэннь гурван жилийн дараа 56.000-аар буурах болно гэж дүгнэжээ. 2021 онд 424.000 болох ба дөрвөн жилийн сургалттай 333 сургуулийн 38 нь элсэх оюутангүй болох урьдчилсан тооцоо гарсан байна.

Тиймээс ирэх гурван жилийн хугацаанд тодорхой шалгуурын дагуу хувийн 38 их, дээд сургуулийг хааж, үйл ажиллагааг нь зогсоох болжээ.

З. МӨНХСУВД

Их хэмжээний үер усны улмаас галт тэрэг замаасаа гарч төмөр зам эвдэрсэн ослын хохирлыг бүрэн арилгаснаар Улаанбаатар-Сайншандын чиглэлийн галт тэрэгний хөдөлгөөн өчигдөр орой буюу наймдугаар сарын 13-ны 22.18 цагт нээгдэж хэвийн үйл ажиллагаанд ороод байна.
Байгалийн давагдашгүй хүчин зүйлийн улмаас учирсан хохирлыг арилгаж зүтгүүр, вагон, төмөр замыг сэргээн босгохын төлөө төмөр замчид өдөр шөнөгүй нийт 40 шахам цагийн турш зогсолтгүй шаргуу ажилласны хүчинд ийнхүү урд чиглэлийн төмөр зам хэвийн ажиллагаанд орж орон нутгийн болон олон улсын, суудлын болон ачаа, транзит тээврийн галт тэрэгнүүд явж эхлээд байна.
Дорноговь аймгийн Айраг сумын нутаг дэвсгэрт наймдугаар сарын 12-ны өдрийн 01:35 цагаас эхлэн усархаг аадар бороо орсны улмаас үер бууж Улаанбаатар-Сайншанд чиглэлийн 747 дахь км (Цомог-Айраг өртөө хооронд)-т төмөр замын суурь бүтэц үерийн усанд автсаны улмаас 286 дугаартай галт тэрэгний хоёр зүтгүүр, зорчигчийн гурав, тээшийн нэг галт тэрэг осолдсоноос тухайн чиглэлийн галт тэрэгний хөдөлгөөнийг тодорхойгүй хугацаагаар хаагаад байсан юм. Осолдсон галт тэргэнд нийт 329 зорчигч явснаас 146 хүнд эмнэлгийн анхны тусламж үзүүлэн, гэмтэл бэртэл авсан 56 хүнээс хүнд гэмтэлтэй хоёр, хүндэвтэр гэмтэлтэй гурван хүнийг эмнэлгийн байгууллагад шилжүүлсэн юм. Гамшгийн хор уршгийг арилгаж, хойшлуулшгүй сэргээн босгох үйл ажиллагаанд төмөр замчид, онцгой байдал, цэрэг болон эмнэлгийн албан хаагч нийт 480 хүн, 106 автомашин, техник хэрэгсэлтэй оролцон ажиллалаа. Мөн төмөр зам болон осолдсон зүтгүүр, вагоныг босгож сэргээх ажилд ОХУ-аас ирсэн сэргээн босголтын галт тэрэгний цуваа, аврах ангийн техник хэрэгсэл, хүнд машин механизмыг ашигласнаар төмөр замын холболтын ажил өчигдөр 16.00 цагийн байдлаар дуусч зүтгүүрийг өргөх ажиллагаа явагдсанаар төмөр замаа чөлөөлсөн байна.

Нийслэлийн шуурхай зөвлөгөөн өнөөдөр болж, энэ үеэр Нийслэлийн Засаг дарга бөгөөд Улаанбаатар хотын дарга С.Батболд “Ажлын байрандаа архидан согтуурвал ажлаас нь чөлөөлөх хүртэл арга хэмжээ авч, хуулийн хариуцлага хүлээлгэх болно” гэдгийг мэдэгдлээ. Энэ нь нийслэлийн харьяа агентлаг, орон нутгийн өмчит үйлдвэрийн газруудад бүгдэд нь мөрдөх аж. Харин уг шийдвэрийн зөрчвөл шууд ажлаас нь чөлөөлөх гэнэ.

З.МӨНХСУВД

Сүхбаатар дүүрэг “Шарилжгүй Улаанбаатар-3” аяны хүрээнд хөл газрын ургамал цэвэрлэх ажлыг өнгөрөгч бямба гаригт зохион байгууллаа.

Цэвэрлэгээнд дүүргийн нутаг дэвсгэрийн 880 аж ахуйн нэгж байгууллага, 2400 гаруй иргэн оролцож, байгууллага, хашааныхаа ой орчмын зэрлэг ургамал, шарилж, луулийг түүж цэвэрлэсэн байна.

Мөн иргэдийн бүлэг 152 хүний бүрэлдэхүүнтэйгээр дүүргийн эзэмшлийн 97841м2 талбайн шарилж, луулийг цэвэрлэсэн байна. Аж ахуйн нэгж байгууллага, иргэдийн түүж цэвэрлэсэн шарилж, луулийг дүүргийн хог тээврийн цэвэрлэгээ, үйлчилгээ эрхлэгч байгууллагын нийт 21 хог тээврийн машин, 45 рейс буюу 758м3 зэрлэг ургамлыг зориулалтын цэгт тээвэрлэжээ.