Month: August 2018

Монгол Улсын Шадар сайд Ө.Энхтүвшингээр ахлуулсан Улсын Онцгой комиссын ажлын хэсэг долоо, наймдугаар сард тохиолдсон үерийн хор уршгийг арилгах, сэргээн босгох үйл ажиллагаа өвөлжилтийн бэлтгэл ажлын явц, аймгуудын Онцгой комиссын үйл ажиллагаатай танилцаж, үүрэг чиглэл, заавар зөвлөмж өгч, нэгдсэн удирдлагаар хангах зорилгоор орон нутагт ажиллаж байна.

Ажлын хэсэг өнөөдөр Төв аймгийн Борнуур суманд ажиллалаа. Тус сумын нутаг дэвсгэрт өнгөрсөн долдугаар сарын 16-17-ны өдөр орсон усархаг борооны улмаас уруйн үер бууж, 100 айл өрхийн хашаа, байшин, 12 аж ахуйн нэгж, байгууллагын барилгын зоорийн давхар усанд автаж, 15 бог мал хорогдон, орон нутгийн чанартай “Шавартайн” гүүрийн тулгуур баганад суулт үүсч, сумын төвийн хатуу хучилттай 0.5 км зам эвдэрсэн байна. Энэ үеэр усанд автсан гурван айл, өрхийг нүүлгэн шилжүүлж, Улаанбаатар-Дархан чиглэлийн улсын чанартай автозам дээр үүссэн 45 тн лаг шороо, хог, чулууг цэвэрлэж, сэтэрсэн далан, эвдэрсэн замыг сэргээн засварлах ажлыг 100 гаруй хүн, 30 орчим техник хэрэгсэлтэйгээр гүйцэтгэжээ. Мөн “Шавартай гүүр”-ийг хаасантай холбогуудан Борнуур сумын чиглэлд түр зам барьж, тээврийн хэрэгслийн хөдөлгөөний аюулгүй байдлыг ханган ажилласан. Цаашид Борнуур сумын төвийн 0,520 га авто замыг сэргээн засварлах ажлын 286,2 сая төгрөг, Шавартайн гүүрийг шинээр барих 1540,0 сая төгрөгийг шийдвэрлэж өгөхийг Улсын Онцгой комиссоос хүслээ.

Харин өвөлжилтийн нөхцөл байдлын талаар энэ онд аймгийн аюулгүй нөөцөд 380 тн өвс, 150 тн тэжээл, сумын аюулгүй нөөцөд сум бүр 100 тн өвс, 50 тн тэжээл нөөцлөх төлөвлөгөөтэй ажиллаж байна. Мөн хадлангийн 39 салаа Сэлэнгэ аймгийн Орхонтуул, Дорнод, Хэнтий аймагт гарч эхэлсэн. Түүнчлэн аймгийн хэмжээнд гар тэжээл бэлтгэх ажлыг бүх нийтийн аян болгон өрнүүлээд байгаа гэдгийг аймгийн Онцгой комиссоос мэдээлсэн юм.

Шадар сайд Ө.Энхтүвшин аймаг, орон нутгийн удирдлагуудад, Борнуур сумын эвдэрсэн гүүрийг орон нутгийн аж, ахуйн нэгж, байгууллага хямд өртөгөөр барьж байгуулах санал байгаа бол түүний тооцоог нарийвчлан гаргаж, тухайн аж, ахуйн нэгж, байгууллагаар баталгаа гаргуулан хийлгэх боломжийг судлан Улсын онцгой комисст танилцуулах, тохиолдож буй гамшиг, ослын нөхцөл байдал, өвөлжилтийн бэлтгэлийг хангахтай холбогдуулан төлөвлөсөн найр, наадам, олон нийтийн арга хэмжээг хязгаарлах, албан хаагчдын ээлжийн амралтыг зохицуулан, шаардлагатай албан тушаалтныг ажилд нь оруулах, үер усны аюулын эрсдэл буураагүй тул үер, гол усны ослоос урьдчилан сэргийлэх талаар анхааруулга, сэрэмжлүүлэг, сургалт сурталчилгаа зохион байгуулах зэрэг үүрэг чиглэл өглөө.

Ажлын хэсгийн бүрэлдэхүүнд ЗТХЯ, ОБЕГ, МХЕГ, МЭЕГ-ын холбогдох мэргэжилтнүүд багтан ажиллаж байгаа бөгөөд наймдугаар сарын 16-20-ны өдрүүдэд Сэлэнгэ, Орхон, Булган, Хөвсгөл, Архангай, Өвөрхангай аймгуудад ажиллана гэж Онцгой байдлын ерөнхий газраас мэдээллээ.

НҮБ-ын Эдийн засаг, нийгмийн хамтын ажиллагааны байгууллагаас Кени Улсын нийслэл Найроби хотод наймдугаар сарын 7-9-ны өдрүүдэд “Тогтвортой хөгжилд хоршоологчдын оруулах үүрэг оролцоо” сэдэвт олон улсын хурал боллоо. Хуралд 10 гаруй орны Засгийн газар, хоршоологчдын төлөөлөл оролцсон. Олон улсын хурал бүхэлдээ НҮБ-ын Тогтвортой хөгжлийн зорилтын хүрээнд тогтвортой хөгжил, эдийн засгийн өсөлт, нийгмийн хөгжилд хоршоо, хоршоологчдын оруулж буй хувь нэмэр, нийгмийн хөгжилд хоршоологчдын үзүүлэх нөлөө зэрэг асуудалд төвлөрлөө.

Гадаад харилцааны яамны Төрийн нарийн бичгийн дарга Д.Даваасүрэн Бүгд Найрамдах Польш Улсаас Монгол Улсад суугаа Онц бөгөөд Бүрэн эрхт Элчин сайд Михайл Лабэндаг эх орондоо бүр мөсөн буцаж буйтай нь холбогдуулан хүлээн авч уулзав.Уулзалтын үеэр Төрийн нарийн бичгийн дарга Д.Даваасүрэн Монгол, Польшийн харилцаа, хамтын ажиллагааг боловсрол, батлан хамгаалах, нийгмийн хамгаалал, худалдаа, эдийн засгийн салбарт өргөжүүлэн хөгжүүлэхэд хувь нэмэр оруулсанд Элчин сайдад талархал илэрхийлж, цаашдын ажилд нь амжилт хүсэв.

Багануур дүүргийн Онцгой байдлын хэлтсийн Гал түймэр унтраах, аврах 64 дүгээр ангийн алба хаагчид, дүүргийн “Улаан Загалмайн хороо”-той хамтран объектын гал түймэр болон үер, усны аюулаас урьдчилан сэргийлэх тактикийн сургуулийг “Багануур” ХК-ны Уурхайн Уулын нэгдүгээр хэсэгт зохион байгууллаа.

Ховд аймгийн Жаргалант суманд малын гоц халдварт “Боом” өвчин гарчээ. Тодруулбал, тус сумын Буянт багт нутаглаж буй малчин Б.А-ын хотонд “Боом” өвчний шинж тэмдэг илэрч, аймгийн мал эмнэлэг, ариун цэврийн лабораторийн шинжилгээгээр батлагдсан байна. Иймд сумын Засаг даргын 2018 оны наймдугаар сарын 15-ны өдрийн А/193 дугаар захирамжаар хорио цээрийн дэглэм тогтоожээ.

Үүнтэй холбогдуулан тус суманд 24 цагийн ажиллагаатай байнгын постыг ажиллуулж, Ховд хотын төвөөр дамжин өнгөрөх тээврийн хэрэгсэлд ариутгал халдваргүйжүүлэлт хийж байгаа аж. Түүнчлэн малын шилжилт хөдөлгөөн, мал, тэдгээрийн гаралтай түүхий эд бүтээгдэхүүнд хяналт тавихаар болсон байна.

Голомтын бүсээс мал тэдгээрийн гаралттай түүхий эдийг гадагш гаргуулахгүй байх, бусад бүсээс орж ирж буй мал, тэдгээрийн гаралтай түүхий эдийг гарал үүслийн бичигтэйгээр бүртгэлжүүлэн оруулж ажиллахыг холбогдох мэргэжлийн байгууллагуудын удирдлагуудад даалгасан ажээ.

Эрүүгийн цагдаагийн албаны Кибер гэмт хэрэгтэй тэмцэх хэлтсийн алба хаагчид 2018 оны наймдугаар сарын 15-ны өдөр Фэйсбүүк орчинд хуурамч хаягаар олон тооны насанд хүрээгүй охидтой харилцаж, хуурч мэхлэх замаар нүцгэн зургийг нь авдаг этгээдийг илрүүлжээ.

Уг этгээд нь фэйсбүүкийн “10-16насныхан”, “Хосоо олъё”, “Зугаатай залуус” гэх мэт олон гишүүнтэй группуудэд нэвтэрч, өөр хүний зураг, нэрийг ашиглан өөрийгөө 16 настай гэж бусдад танилцуулж 13-14 насны 300 орчим хүүхэдтэй тогтмол мессэж бичиж, харилцаж байсан ба дөрвөн хүүхдээс цээж нүцгэн зургийг нь авсан талаараа урьдчилсан байдлаар мэдүүлсэн байна.

Хэрэгт холбогдон шалгагдаж байгаа этгээд нь Сүхбаатар дүүргийн 14 дүгээр хороонд оршин суух хаягтай тодорхой эрхэлсэн ажил мэргэжилгүй 21 настай эрэгтэй байгаа аж.

Шалгалтын ажиллагаа үргэлжилж байна гэж цагдаагийн байгууллагаас мэдээллээ.

УИХ-ын гишүүн асан Д.Гантулгад холбогдох шүүх хурлын урьдчилсан хэлэлцүүлэг энэ сарын 17-нд буюу маргааш болно. Баянзүрх дүүргийн Эрүүгийн хэргийн анхан шатны шүүхэд 10.00 цагаас товлогдоод байгаа урьдчилсан хэлэлцүүлэгт шүүгчээр Б.Ариунхишиг, улсын яллагчаар Н.Амарсанаа, шүүгдэгч, хохирогчдын өмгөөлөгчөөр Г.Батбаяр, Н.Отгонбаяр, Б.Бат-Ерөөлт, Э.Хишигчулуун нар оролцоно. Харин хохирогчоор Ч.Наранзаяа, гэрчээр Ч.Саранзаяа нар оролцох аж.

УИХ-ын гишүүн асан Д.Гантулгыг Эрүүгийн хуулийн тусгай ангийн 12.1.1-т зааснаар буруутгаж буй. Тус зүйл ангид хохирогчийн хүсэл зоригийн эсрэг хүч хэрэглэж, хүч хэрэглэхээр заналхийлж, эсхүл сэтгэцийн өвчтэй, согтуурсан, мансуурсан, сэтгэцийн үйл ажиллагаа нь түр сарнисан, бусад өвчний улмаас биеэ хамгаалах, эсэргүүцэл үзүүлэх чадваргүй, эсхүл эд хөрөнгө, албан тушаал, бусад нөхцөл байдлын улмаас эрхшээлдээ байгааг далимдуулан хүчээр бэлгийн харьцаанд орсон, эсхүл бэлгийн харьцааны шинжтэй хүч хэрэглэсэн үйлдэл хийсэн бол нэг жилээс таван жил хүртэл хугацаагаар хорих ял шийтгэнэ хэмээн заажээ.

Эргэн сануулахад, УИХ-ын гишүүн асан Д.Гантулга уг асуудлаас болж, өнгөрсөн зургадугаар сард гишүүнээсээ чөлөөлөгдөх хүсэлтээ өгч, УИХ-ын чуулганы нэгдсэн хуралдаанаар түүнийг чөлөөлсөн юм.