Month: August 2018

“Оюутан цэрэг” хөтөлбөр амжилттай хэрэгжиж дууслаа. Тав дахь жилдээ зохион байгуулагдаж байгаа тус сургалтад нийт 4500 мянган оюутан залуус хамрагдаад байгаа юм.

Цэргийн албаны тухай Монгол Улсын хуулийн долдугаар зүйлийн 7.6, 7.7, 7.8, 7.9 дэх заалт, Монгол Улсын Засгийн газрын 2017 оны 32 дугаар тогтоолоор батлагдсан журам, Батлан Хамгаалахын сайдын энэ оны А/10 дугаар тушаал, Нийслэлийн Засаг даргын энэ оны А/103, дүүргийн Засаг даргын энэ оны А/107 дугаар захирамжийн дагуу дүүргийн нутаг дэвсгэрт үйл ажиллагаа явуулж байгаа магадлан итгэмжлэгдсэн таван их дээд сургуулиас хүсэлт гаргаж, болзол, шаардлага хангасан оюутнууд эрүүл мэнд, бие бялдрын шалгалтад тэнцэж, “Оюутан-цэрэг” цэргийн мэргэжил олгох сургалтад хамрагддаг.

Оюутан цэргүүд дөрөвдүгээр сарын 01-нээс онолын сургалтад, зургадугаар сарын 15-наас цэргийн ерөнхий бэлтгэлийн сургалтуудад хамрагдаж, сургалтуудын хөтөлбөрийг бүрэн хангаснаар Үндэсний Батлан Хамгаалахын их сургуулийн хээрийн сургалтын төвд цэргийн тангараг өргөжээ.

Цэргийн тангараг өргөх ёслолын ажиллагаанд УИХ-ын гишүүн, Батлан хамгаалахын сайд Н.Энхболд, Боловсрол, соёл, шинжлэх ухаан, спортын сайд Ц.Цогзолмаа, ЗХЖШ-ын дэд дарга хошууч генерал Р.Сүхбат, Нийслэл дүүргийн Засаг даргын Тамгын газрын Цэргийн штабын дарга нар болон их дээд сургуулиудын захирлууд оролцсон байна.

Оюутан цэрэг” сургалт цэргийн 11 төрлийн бага мэргэжил эзэмшүүлж, эрчимжүүлсэн вакум сургалтыг “Цэргийн ерөнхий бэлтгэл”, ”Цэргийн мэргэжлийн бэлтгэл” хичээлийг дасгал дадлагын аргаар дахин давтан сургадаг сургалтын шинэ арга зүйтэй сургалт юм.

Хэнтий аймгийн Баянхутаг сумаас иргэн М, М нар нь бүлэглэн тээврийн хэрэгсэл ашиглаж зургаан тооны адууг бэлчээрт нь шулж хулгайлсан хэрэг үйлджээ. Уг хэргийг тус аймгийн цагдаагийн газрын эрүүгийн ахлах мөрдөгч, цагдаагийн хошууч Ж.Батжаргалаар ахлуулсан ажлын хэсэг халуун мөрөөр нь илрүүлэн шалгалтын ажиллагаа явагдаж байна. Мөн Гал шар суманд Сири улсын иргэн I, A, R нар зохих зөвшөөрөлгүй шонхор шувуу барьсан хэргийг илрүүлэн шалгаж байгаа аж.

БХБ-ын сайд Х.Баделхан Төв цэвэрлэх байгууламжийн бүтээн байгуулалтын ажлын явцтай танилцлаа. Төв цэвэрлэх байгууламж дээр цэвэрлэх байгууламжийн тунгаагуурыг иж бүрнээр барьж дуусгах, цэвэрлэх байгууламжийн лагийг цэвэрлэж, үнэргүйжүүлэх ажил хийгдэж байна. БХБ-ын сайд Х.Баделхан энэ үеэр сэтгүүлчдэд мэдээлэлдээ:

-Үнэр бууруулах ажил дөрөвдүгээр сараас эхлэн хийгдэж байгаа. Улсын түүхэнд өмнө нь ийм ажил хийгдэж байгаа. 60 жилийн туршид хуримтлагдсан 900 мянган шоо метр лаг байгаа. Эндээс үнэр гарч байгаа юм. Төв цэвэрлэх байгууламжийн бохирын үнэр гурван эх үүсвэрээс гарч байгаа. Нэгдүгээр шингэн лаг хотоос ирдгийг өглөө оройдоо шахаж гаргадаг. Үнэрийг бид бордож, хучилт хийх замаар дарсан.

Шинэ цэвэрлэх байгууламжийг барих санхүүжилтийн асуудлыг БНХАУ-ын хөнгөлөлттэй зээлээр шийдсэн. Баригдаагүй байсан гол шалтгаан нь хөрөнгийн эх үүсвэр шийдэгдээгүй. ТЭЗҮ нь хийгдсэн байсан. Энэ удаад хөрөнгийн эх үүсвэр нь шийдэгдсэн. Францын компанийн хийсэн ТЭЗҮ-ээр, Хятадын Засгийн газрын хөнгөлөлттэй зээлээр барихаар шийдсэн.

Гурван компани шалгаруулаад удахгүй нэр ирүүлнэ. Тэр гурван компани дотроосоо шалгаруулж, удахгүй ажил нь эхэлнэ гэж үзэж байгаа. Сонгон шалгаруулалтын хугацаа нэг сар. Нэг сарын дараа ажил эхэлнэ. Сонгосон компанидаа 2020 оноос өмнө дуусгах шаардлагыг тавиад ажиллаж байгаа гэлээ.

Он гарсаар улсын хэмжээнд 12 аймаг, 39 сумд малын гоц халдварт шүлхий өвчин дэгдсэн. Үүнтэй холбогдуулан Улаанбаатар хот болон бусад аймгуудаас мал амьтан авах, шилжүүлэн ирэх, тээвэрлэх, мал туух, аймгаас өөр аймаг, нийслэл рүү мал амьтны шилжилт хийхийг хориглоод байсан юм. Түүнчлэн мал, мах худалдан авч буй иргэдийг борлуулагчаас гарал үүсэл, холбогдох баримт бичгийг шалгаж байхыг сануулсан.

Намрын улирал эхэлж байгаатай холбогдуулан малчид мал худалдан борлуулах нь эрс нэмэгддэг. Иймд мал, амьтны гоц халдварт өвчний голомт болон сэжигтэй бүс нутгаас мал тээвэрлэх явдал гарч болзошгүй тул Говь-Алтай аймгийн Мэргэжлийн хяналтын газраас малчид, мал бүхий иргэд, аж ахуйн нэгжийг хууль эрх зүйн болон мэргэжил арга зүйн зөвлөгөө авч худалдан борлуулахыг анхаарууллаа.