Month: August 2018

2018 оны 8, 9 дүгээр саруудад бороо ус ихтэй байгаль, цаг уурын гэнэтийн гамшиг нийт нутгуудаар үргэлжлүүлэн тохиолдож байгаатай холбогдуулан энэ сарын 15-ны өдөр Улсын гуравдугаар төв эмнэлгийн дарга Ц.Төмөр-Очир тус эмнэлгийн захиргааны нийт албадын удирдах ажилтны ээлжит бус шуурхай хурал зохион байгуулж, тусламж үйлчилгээний бэлэн байдлыг эрчимжүүлэн ажиллах талаар үүрэг даалгавар өглөө.

Тус хурлаар байгаль, цаг уурын гэнэтийн гамшигт үзэгдэлд богино хугацаанд хариу арга хэмжээ авч ажиллах үйл ажиллагааг бэлтгэн зохион байгуулж, тус эмнэлгийн гамшиг онцгой байдлын үйл ажиллагааны төлөвлөгөөнд нэмэлт тодотгол хийж, нөөцийн бэлэн байдлыг ханган ажиллахыг холбогдох албан тушаалтнуудад үүрэг болголоо.

Мөн тусламж үйлчилгээний түргэн шуурхай, бэлэн байдлыг эрчимжүүлэх үйл ажиллагаатай холбогдуулан нийт эмч, эмнэлгийн мэргэжилтэн, ажилтан албан хаагчдын ажлын сахилга хариуцлага, ёс зүй, харилцаа хандлагын хэм хэмжээ, ажлын цагийн ирц, нягтралд тогтмол хуваарийн дагуу хяналт тавьж ажиллахыг үүрэг болгож, тусламж үйлчилгээний бэлэн байдлыг тогтмол хангуулан ажиллах үйл ажиллагааг эрчимжүүлэх зорилгоор 2018 оны 08-10 саруудад “Тусламж үйлчилгээний бэлэн байдлыг эрчимжүүлэн ажиллах” төлөвлөгөө гарган ажиллахыг захиргааны холбогдох албадын удирдлагуудад үүрэг болголоо.

Монгол Улсын Их Хурлын дарга М.Энхболд өнөөдөр (2017.08.16) БНСУ-ын Үндэсний ассамблейн гишүүн, Байгаль орчин, хөдөлмөрийн асуудал эрхэлсэн байнгын хорооны дарга Ким Хаг Юун тэргүүтэй төлөөлөгчдийг хүлээн авч уулзлаа. Хоёр орны парламент хоорондын нөхөрсөг харилцааг хөгжүүлэх зорилго бүхий арга хэмжээнд хүрэлцэн ирсэн Үндэсний ассамблейн гишүүдтэй уулзаж буйдаа сэтгэл хангалуун байгаагаа Улсын Их Хурлын дарга илэрхийлэв. Энэ өдрүүдэд БНСУ-д дэлхийн дулаарлаас үүдэлтэй, сүүлийн 100 гаруй жил тохиогоогүй их халуун болж, үйлдвэрлэл үйлчилгээ зогсон, зарим газар хүний амь нас эрсэдсэн харамсалтай зүйл тохиож байгаад Монгол Улсын Их Хурлын нэрийн өмнөөс болон хувиасаа БНСУ-ын ард түмэн, Засгийн газарт эмгэнэл илэрхийллээ. Улсын Их Хурлын дарга М.Энхболд “БНСУ-ын Ерөнхийлөгчийн удирдлага дор Засгийн газар тодорхой арга хэмжээ авч энэ хүнд нөхцөл байдлыг даван туулна гэдэгт эргэлзэхгүй байна” гэв.

Хоёр орны улс төрийн өндөр дээд хэмжээний айлчлал тогтмолжиж, парламент хоорондын хамтын ажиллагаа амжилттай өргөжин хөгжиж буйг уулзалтын үеэр тэмдэглээд Үндэсний ассамблейн шинээр сонгогдсон даргад баярын цахилгаан утас илгээн Монгол Улсад айлчлан ирэхийг урьсан гэв. Айлчлал ойрын үед хэрэгжинэ хэмээн найдаж буйгаа Улсын Их Хурлын дарга М.Энхболд илэрхийлээд “Эрхэм гишүүд та бүхэн энэ айлчлалыг хэрэгжүүлэхэд дэмжлэг үзүүлнэ гэдэгт итгэлтэй байна” гэлээ.

Монгол Улсын эдийн засгийн байдал сүүлийн хоёр жилийн хугацаанд сэргэж, эдийн засгийн өсөлт 6.3 хувьд хүрч, бүтээн байгуулалтын ажил өрнөж байгааг тэрбээр дурдаад “Монгол Улсын импортын тодорхой хувийг БНСУ-д үйлдвэрлэсэн бараа бүтээгдэхүүн эзэлж, хувь хэмжээ нь тогтмол өсөж байна. Энэ харилцааг илүү өргөжүүлэх, ямар нэг саад бэрхшээлгүй үргэлжлүүлэхэд хоёр орны парламент анхаарал тавьж ажиллах нь зүйтэй. Ийм эрх зүйн орчныг бүрдүүлж чадвал илүү олон салбар, олон иргэдийг хамарсан үр дүнтэй хамтын ажиллагаа, бүтээн байгуулалт, хөрөнгө оруулалтын ажлууд өрнөх боломж нэмэгдэх ач холбогдолтой” гэлээ.

Хоёр улсын орон нутаг хоорондын харилцаа, хамтын ажиллагаа өргөжиж байгааг мөн тэрбээр тэмдэглээд “Би 18 жилийн өмнө Улаанбаатар-Сөүл хотыг эгч дүүгийн харилцаатай болгох баримт бичигт гарын үсэг зурж байсан. Нийслэл хотууд эгч дүү хотын харилцаатай болсноос хойш хоёр орны олон аймаг, муж хамтын ажиллагаа өрнүүлж байгаа. Та бүхэн өөрийн сонгогдсон орон нутагтаа Монголын аль нэг аймаг, бүс нутагтай хамтын ажиллагааг хөгжүүлэх, өргөжүүлэхэд анхаарал тавьж ажиллана гэж найдаж байна. Монгол Улсын Их Хурлын гишүүд ч мөн энэ чиглэлээр ажиллана” гэв.

Зүүн хойд Азийн аюулгүй байдал, энх тайвнаар зэрэгцэн орших, яриа хэлэлцээрийн журмаар асуудлыг шийдвэрлэх байр суурийг Монгол Улс олон жил баримталж ирсэн гэдгийг Улсын Их Хурлын дарга тэмдэглээд сүүлийн жилүүдэд хоёр Солонгосын харилцаанд тодорхой түвшний яриа хэлэлцээрүүд явагдан, үр дүн гарч байгаад баяртай байгаагаа илэрхийлэв.

Ноён Ким Хаг Юун хүлээн авч уулзаж буйд нь Улсын Их Хурлын даргад талархал илэрхийлээд “Өнгөрсөн зургаадугаар сард Монгол Улсын Их Хурал “Төрөөс иргэний нисэхийн салбарт 2020 он хүртэл баримтлах бодлого батлах тухай” УИХ-ын тогтоолын хавсралтад өөрчлөлт оруулахаар шийдвэрлэсэн. Энэ хүрээнд хоёр орны бизнесийн хамтын ажиллагаа, иргэд хоорондын харилцаа илүү өргөжин хөгжих бололцоо бүрдэнэ гэдэгт итгэж байна” гэлээ.

Тэрбээр хоёр орны парламентын гишүүд хоорондын нөхөрсөг харилцааг хөгжүүлэх арга хэмжээ үр дүнтэй болж, БНСУ-ын Үндэсний ассамблей, Монгол Улсын Их Хурлын гишүүд цаашид илүү нөхөрсөг харилцаатайгаар хамтран ажиллана гэж найдаж байна. Олон улсын тавцанд ч БНСУ-ыг дэмждэг Монгол Улсын төр засагт талархал илэрхийлье. Цаашид БНСУ-ын зүгээс Монгол Улсыг байнга дэмжиж хамтран ажиллахдаа баяртай байх болно гэж тэмдэглэв. Уулзалтад БНСУ-ын Үндэсний ассамблейн гишүүд, Улсын Их Хурлын гишүүн, Нийгмийн бодлого, боловсрол, соёл, шинжлэх ухааны байнгын хорооны дарга Ё.Баатарбилэг, Улсын Их Хурлын гишүүн Г.Тэмүүлэн болон албаны бусад хүмүүс байлцлаа.

Ховд аймгийн Жаргалант сумын нутаг дэвсгэрт буюу Цэргийн ангийн ойн бүсэд нутаглаж буй Буянт багийн малчин Б.А-ын хотонд малын гоц халдварт “Боом” өвчний шинж тэмдэг илэрч аймгийн мал эмнэлэг, ариун цэврийн лабораторийн энэ оны 8 дугаар сарын 15-ны өдөр гарсан шинжилгээний хариугаар батлагдсан байна.
Үүнтэй холбогдуулан аймаг, сумын Онцгой комисс удаа дараа шуурхай хуралдаж, зохих арга хэмжээг авч хэрэгжүүлэн ажиллаж байна. Юуны түрүүнд хорио цээрийн бүсийг тогтоож, мэргэжлийн байгууллагуудын алба хаагчдаас бүрдсэн бүрэлдэхүүнийг томилон 24 цагийн хяналтын пост ажиллуулж байна. Энэ хүрээнд малын шилжилт хөдөлгөөн, мал, тэдгээрийн гаралтай түүхий эд бүтээгдэхүүнд хяналт тавьж, голомтын бүсээс мал тэдгээрийн гаралттай түүхий эдийг гадагш гаргуулахгүй байх, бусад бүсээс орж ирж буй мал, тэдгээрийн гаралтай түүхий эдийг гарал үүслийн бичигтэйгээр бүртгэлжүүлэн оруулах зэрэг ажлуудыг холбогдох мэргэжлийн байгууллагууд үе шаттайгаар хийж гүйцэтгэж байгаа ажээ. Мөн ард иргэдэд малын гоц халдварт “Боом” өвчнөөс урьдчилан сэргийлэх зөвлөмжийг хүргэж, малын түүхий эд, мах, сүү зэрэг бүтээгдэхүүнийг бүрэн боловсруулж хэрэглэх, Буянт голын хөвөөнд боомоор өвчилсөн мал үхсэн тул усанд орохгүй байхыг анхаарууллаа. Мөн иргэдийг мал, амьтны шилжилт хөдөлгөөн хийхгүй байхыг санууллаа.

Нийслэлийн Налайх дүүргийн хоёрдугаар хороонд өчигдөр 19:30 цагт ахуйн хэрэглээний шингэрүүлсэн хий дэлбэрсэн хэрэг гарчээ. Тодруулбал, 220 граммын савлагаатай ахуйн хэрэглээний шингэрүүлсэн хий дэлбэрч 23-29 насны гурван эрэгтэй, хоёр настай охин түлэгджээ.

Нийслэлийн онцгой байдлын алба хаагчид ослын газарт ажиллаж түлэгдсэн хүмүүст эмнэлгийн анхан шатны тусламж үзүүлэн эмнэлэгт хүргэсэн байна. Мөн ослын улмаас цонхны шил, байрны гадаа байсан иргэн Т-гийн “Приус 20” загварын суудлын автомашины шил хагарсан аж. Эл хэргийг цагдаагийн байгууллага үргэлжлүүлэн шалгаж байгаа юм байна.

Ховд аймаг дахь БОЭТөвийн нэр бүхий эмч нар санаачлан “Хөдөлгөөн-эрүүл мэнд” уриан дор дугуйн аялал зохион байгуулахаар нэг жилийн өмнөөс төлөвлөн, бэлтгэснээ ажил хэрэг болгож энэ сарын 16-нд замд гарлаа.
БОЭТ-ийн Мэдрэлийн их эмч Ц.Гэрэлт-од, Мэс заслын их эмч Г.Шижир, Мэс засал, гэмтлийн их эмч Д.Мөнхбат, Эрчимт эмчилгээ, мэдээгүйжүүлгийн их эмч М.Эрдэнэбаяр нар аймгийн төвөөс Булган сум хүртэл нийтдээ 500 гаруй км замыг гурав хоногийн хугацаанд дугуйгаар туулахаар БОЭТ-ийн үүднээс хамт олныхоо төлөөллөөр үдүүлэн аян замд гарлаа.
Тэд аялалын зам дагуух сумын иргэдэд эрүүл мэндийн тусламж үйлчилгээ үзүүлж, мэдлэг, мэдээлэл өгөх юм. Мэдээлэл сурталчилгааны материал, тэдний хоол хүнс, бусад ачаа барааг БОЭТ-ийн Хүлээн авах, яаралтай түргэн тусламжийн тасгийн жолооч Я.Баатарцогт тээвэрлэн явж байна. Орчин үед ажил амьдралын аливаа нөхцөл үйлдэл техникжиж, хүн өөрийн биеийн хүчээр бүгдийг хийж гүйцэтгэдэг байсан зан үйл өөрчлөгдсөөр байна. Энэ нь хэдийгээр цаг хугацааг хэмнэх боловч нөгөө талаас хүнд байгаль эхээс заяагдсан “хөдөлгөөн” багасч улмаар өвчлөлийн нэг гол шалтгаан болж байна. Хөдөлгөөний хомсдолоос үүдэн жингийн нэмэгдэл, геморрой- буюу цагаан мах гарах, чихрийн шижин, артерийн даралт ихсэлт улмаар зүрх судасны эмгэгт хүрэх зэрэг өвчин эмгэг үүсдэг байна. Тийм учраас хүн өөрийгөө эрүүл саруул байлгахын тулд дасгал хөдөлгөөн хийж, биеэ эрүүлжүүлэх асуудалд түлхүү анхаардаг болоод байгаагийн нэгэн жишээг Ховд аймаг дахь БОЭТ-ийн залуу эмч нар энэхүү дугуйн аяллаараа харуулж, үлгэрлэж байна.

Баян-Өлгий аймагт хэрэглээний бараа үйлчилгээний ерөнхий индекс эхний долоон сарын байдлаар өнгөрсөн оны жилийн эцсийнхтэй харьцуулахад 4.9 хувиар, 2017 оны мөн үетэй харьцуулахад 7.1 хувиар өссөн байна.

Энэ нь суурь он буюу 2015 онтой харьцуулахад 11.1 хувиар нэмэгдсэн үзүүлэлт аж.

Түүний дотор хүнсний бараа, согтууруулах бус ундааны төрөл 15.1 хувиар өсжээ. Харин өвөлжилт, хаваржилт хүндхэн болсонтой холбоотой бүх төрлийн махны үнэ хамгийн ихээр буюу 26,3-53,9 хувь хүртэл өсөж хомсдол бий болжээ.

Хүнсний бараа бүтээгдэхүүний үнийн өсөлтөд инфляци 7,1 хувиар өссөн, шатахууны үнэ 7,1-13,5 хувиар нэмэгдсэн, нийлүүлэлт багассан зэрэг хүчин зүйлс нөлөөлснийг мэргэжлийн хүмүүс онцолж байна.

Дорнод аймгийн Хэрлэн сумын иргэн Д /13 настай, эрэгтэй/ “Хэрлэн” голд живсэн тухай дуудлага наймдугаар сарын 15-ны өдрийн 18:20 цагт Онгой байдлын газарт иржээ . Аймгийн Онцгой байдлын газрын Эрэн хайх, аврах ангийн 12 алба хаагч, 5 техник хэрэгсэлтэйгээр гурван бүлэгт хуваагдан Хэрлэн сумын 9 дүгээр багийн “Найрамдал” цэцэрлэгт хүрээлэнгээс Баянтүмэн сумын “Улаан-Эрэг” гэдэг газар хүртэл нийт 30 км-т “Хэрлэн” голын эрэг дагуу эрэн хайх ажиллагааг зохион байгуулж, дөрвөн удаагийн шумбалт хийсэн боловч үр дүнд хүрээгүй тул 20:30 цагт түр зогсоож, өнөө өглөөний 06:00 цагт дахин эрэн хайх ажиллагааг эхлүүлээд байна.

Он гарсаар уснаас эрэн хайх, аврах ажиллагаа 17 аймгийн 40 сум, нийслэлийн 5 дүүрэгт нийт 56 удаа тохиолдсон.

Мөн цаг уурын байгууллагаас ирүүлсэн мэдээллээр наймдугаар сарын 18-нд баруун аймгуудын нутгийн хойд хэсгээр, 19-нд төвийн аймгуудын ихэнх нутаг, зүүн аймгуудын нутгийн хойд хэсгээр, 20-нд баруун болон зүүн аймгуудын нутгийн зарим газраар, 21-нд төвийн аймгуудын нутгийн зарим газраар бага зэргийн бороо орох тул болзошгүй үер, усны аюулаас урьдчилан сэргийлэхийг анхааруулж байна.

Иймд ард иргэд амралт аялал, зугаалгаар явахдаа гол усны ойролцоо амарч зугаалахгүй, сонор сэрэмжтэй байх, нэгдсэн зохион байгуулалттай явах, бага насны хүүхдийг гол усны эрэг дагуу явуулж, тоглуулахгүй байх, хүүхдэд тавих хараа хяналтаа дээшлүүлэх, баталгаатай гүүр, гарам, гарцтай газраар автомашинтай зорчиж аюулгүй байдлаа хангахыг Онцгой байдлын ерөнхий газраас онцгойлон анхааруулж байна.

Нийслэлийн Газрын кадастрын мэдээллийн санг өндөр, тусгагийн нэгдсэн тогтолцоонд шилжүүлж, засварлан, улсын кадастрын нэгдсэн мэдээллийн системд холбож, үйлчилгээнд нэвтрүүлэх төслийн нээлтийн арга хэмжээ нийслэлийн иргэний танхимд боллоо.

Нээлтийн арга хэмжээнд Барилга хот байгуулалтын сайд Х.Баделхан, Газар зохион байгуулалт, геодези зураг зүйн газрын /ГЗБГЗЗГ/ дарга Ц.Ганхүү, Нийслэлийн засаг даргын дэд бүтэц, гэр хорооллын асуудал хариуцсан орлогч дарга П.Баярхүү нар оролцож, хамтран ажиллах санамж бичигт гарын үсэг зурсан юм.

Энэхүү төсөл хэрэгжсэнээр иргэн аж ахуйн нэгж байгууллагуудад газартай холбоотой үзүүлж буй үйлчилгээг цахимаар дамжуулан нээлттэй ил тод хүргэх боломж бүрдээд зогсохгүй цаг хугацаа орон зайнаас үүссэн үйлчилгээний хоцрогдол арилах бүрэн боломжтой болно.

Мөн энэхүү системийг нэвтрүүлснээр улсын хэмжээний мэдээллийн санг бусад төрлийн байгууллагуудын үүсгэсэн олон төрлийн мэдээллийн сангуудтай холбож мэдээлэл солилцох боломжийг бий болгох, иргэн аж ахуйн нэгжүүд газрын төлбөр, татвар төлөлтийг цахим болон гар утас ашиглан төлөх, хянах боломжийг бүрдүүлэх, нотариат банк санхүүгийн байгууллага болон бусад эрх бүхий байгууллагуудтай агшны мэдээлэл солилцох боломж бүрдэнэ.

Дээрх төслийг ирэх оны арванхоёрдугаар сард хэрэгжүүлж дуусгахаар төлөвлөөд байгаа аж. Гэрээт ажлын хүрээнд газар өмчлөх, эзэмших, ашиглах эрх зүйн харилцааны зөрчлийн судалгаа хийх, зөрчилтэй нэгж талбарт хэмжилт кадастрын зураглал хийх, нэгж талбар тус бүрээр цаасан хуулийн хэрэг үүсгэх, нэгж талбарын хувийн хэргийн тоон архив үүсгэх, газрын кадастрын мэдээллийн сангийн програм хангамжийг хөгжүүлэх, газрын кадастрын мэдээллийн сангийн зурган болон улсын бүртгэлийн мэдээллийг засварлах, үүсгэх, тоног төхөөрөмж нийлүүлэх, улсын хэмжээний нэгдсэн газрын кадастрын мэдээллийн системтэй холбох, хэрэглээнд нэвтрүүлэх ажлыг хийж гүйцэтгэх юм.

Алхам №1

Амттанд дурлах: Хүний биед уураг дутагдах үед хүн амттай зүйлд дурлах нь элбэг байдаг байна.

Алхам №2

Анхаарал төвлөрөхгүй, мартамхай болно: Уургийн дутагдал тархинд хамгийн хүчтэй нөлөө үзүүлдэг. Хэрвээ та мартамхай бас таны анхаарал байнга сарниж, төвлөрөхгүй бол уураг дутагдсаны шинж тэмдэг.

Алхам №3

Үс унах, хумс хэврэг болох: Үс тань шалтгаангүйгээр ихээр унах, ямар ч сайн гоо сайхны бүтээгдэхүүн хэрэглэсэн ч хумс тань бэхжиж өгөхгүй бол уурагны дутагдалд орсон гэсэн үг.

Алхам №4

Булчин сулрах: Уураг булчингийн эдэд нэн чухал үүрэг гүйцэтгэдэг.

Алхам №5

Өвдөх, дархлаа сулрах: Хэрвээ та хангалттай уургаа авч чадахгүй бол таны дархлаа суларч, улмаар таны бие сульдаж, байнга өвчлөх аюултай.