Month: August 2018

Categories
мэдээ соёл-урлаг

Авьяаслаг монголчууд шоуны шүүгчид тодорлоо

Хамгийн олон үзэгчтэй “Авьяаслаг монголчууд” телевизийн шоу нэвтрүүлэг тун удахгүй дахин үзэгчдийн хүртээл болох гэж байна.“Монгол ТВ” телевизийн уран бүтээлчид дэлхийн 60 гаруй оронд хийгдсэн, 100 гаруй oрны үзэгчдийн хүртээл болсон Авьяастан тодруулдаг тус нэвтрүүлгийг эх орондоо хийхээр албан ёсны эрхийг нь авсан билээ.

Авьяаслаг Монголчууд шоуны шүүгчээр өмнө нь хөгжмийн зохиолч, продюсер, харанга хамтлагийн ахлагч Ц.Чулуунбат, хөтлөгч нэвтрүүлэгч С.Чимгээ, реппер Rokitbay, хийлч Дээгий нар байсан. Харин энэ удаа тэд цоо шинэ бүрэлдэхүүнээр дахин Авьяаслаг Монголчууд шоуг хийх гэж байна. Тус шоуны шүүгчээр ажиллахаар Чингис хаан одонт, Дуурийн дуучин Г. Ариунбаатар, Реппер Рокит Бэй, Жүжигчин Г. Ундармаа, Хөтлөгч П.Анужин нар тодроод байгаа юм.

Categories
мэдээ спорт

Эльбрусийн оргилд авирсан Ч.Мөнгөндалай эх орондоо ирлээ

Хэл яриа сонсголын бэрхшээлтэй ч өөрийн хүсэл мөрөөдлөөрөө Эльбрусийн оргилд эх орныхоо далбааг мандуулсан уулчин Ч.Мөнгөндалай өнөөдөр буюу наймдугаар сарын 21-ны өдөр эх орондоо ирж Сүхбаатарын талбайд хэвлэлийнхэнд мэдээлэл өглөө.

Тэрбээр цахилгаанчин мэргэжилтэй боловч хөгжлийн бэрхшээлтэй гэдэг шалтгаанаар байгууллагууд ажилд авдаггүй. Тиймээс өөрийн халамжийн тэтгэмжээ цуглуулан мөрөөдөлдөө хүрэхээр шаргуу хөдөлмөрлөсний дүнд Эльбрусийн ноён оргилд Монгол Улсынхаа далбааг мандуулжээ.

Эльбрусийн оргилд авирсан монголын анхны хөгжлийн бэрхшээлтэй уулын спортын тамирчин боллоо.

Тэрээр “Цаг агаарын байдал маш хүнд шуургатай байсан учраас шөнө амралтгүй 4 удаагийн оролдлого хийж амжилттай авирсан. Нийт найман хүний бүрэлдэхүүнтэй олон улсын уулын спортын тамирчидтай авиралт хийлээ. Анх Эльбрусийн тухай мэдээллийг цахим орчноос авсан. Цаашдаа мөрөөдлөө зогсоохгүй өөрийгөө хөгжүүлэн 6000-7000 мянган метр илүү өндөрт гарах зорилго тавин бэлтгэл хийх төлөвлөгөөтэй байгаа” гэв.

Тэрбээр уулын спортоос гадна дугуйн спортоор хичээллэдэг бөгөөд дугуйгаар эх орныхоо дөрвөн зүг найман зовхисоор аялж, мөн Отгонтэнгэр хайрхан болон Алтай таван богдод авирч байсан юм.
Categories
мэдээ нийгэм

Сурагчийн цүнх нь хүүхдийнхээ биеийн жингийн 10 хувиас хэтрэхгүй жинтэй байх ёстой

Манай орны нөхцөлд анги танхимд сурах бичиг, нэмэлт гарын авлага, ном хичээлийн хэрэгслээ үлдээж хадгалах сав, байхгүйн улмаас өдөр бүр цүнхэндээ үүрч явж байна. Энэ нь тэдний бие махбод, эрүүл мэндэд аюул учруулж болзошгүй байгааг I-V ангийн сурагчдын цүнхний жингийн талаар хийсэн судалгаа харуулж байна. Судалгааны үр дүнгээс үзвэл сурагч дунджаар I ангид 3,145 кг, II ангид 3,074 кг, III ангид 3,212 кг, IV ангид 3,127 кг, V ангид 3,765 кг ачаа (Өмсөж буй хувцасны жинг тооцоогүй болно)-г үүрдэг.

Цүнхний жин нэмэгдэхэд нэмэлт гарын авлага, дасгал ажлын ном (500-1100 г), номын тавиур том, жижиг (300-500 г), хөгжмийн хичээлд бишгүүр ууттай 300 г, зургийн болон бусад хэрэглэгдэхүүн (100-160 г), үдийн цайны хэрэгсэл (100-120 г), ундаа, савтай ус гэх мэт зүйлс мэдэгдэхүйц нөлөө үзүүлж байна.

Гадаадын зарим улс оронд дараах байдлаар цүнхний жингийн жишгийг тогтоосон байна. Үүнд:

Дэлхийн улс орнуудын хүүхдийн цүнхний жин нь тухайн хүүхдийн биеийн жингийн 10-15 хувиас хэтрэхгүй байх нь зохимжтой гэж үздэг байна.

Манай улсад одоогоор сурагчийн цүнхний жингийн хувьд мөрдөх стан­дарт, хуульчилсан нарийн зохицуулалт байхгүй байна. Иймээс сургуулийн удирдлага, багш, эцэг, эх асран хамгаалагч та бүхэнд дараах зөвлөмжийг хүргүүлж байна.

Зөвлөмж:

  1. Сурагчийн цүнхний жинг Монгол хүүхдийн биеийн дундаж жингийн 10 хувиас ихгүй байхаар тооцох

2. Гадаадын зарим улс орнуудад хэрэглэж буй цүнхний хэмжээнд дараах нийтлэг шаардлага буйг анхаарч хүүхдийнхээ цүнхийг сонгох



  1. Ерөнхий боловсролын сургуулиудын удирдлага, багш нарт
  1. Сурагчийн биеийн жинг хэмжиж, сурагч цүнхний нийт жин нь хүүхдийнхээ биеийн жингийн 10 хувиас хэтрэхгүй байхад хяналт тавих;
  2. Сурагчдын өөрсдийн жинд тохируулан цүнхний жингийн норм хэмжээг анги бүр гарган мөрдөх ажлыг зохион байгуулах;
  3. Тухайн өдөр орох хичээлийн хуваарийн дагуу сурах бичиг, дэвтэр, гарын авлага гэх мэт зүйлсийг ялгаж буйд хяналт тавих ажлыг зохион байгуулах;
  4. Сурагчдад боломжтой бол аль болох нимгэн дэвтэр ашиглахыг дэмжих;
  5. Хичээлд ач холбогдол багатай нэмэлт хэрэгслээр сурагчдын цүнхний жинг нэмэгдүүлэхгүй байх;
  6. Эцэг эх, асран хамгаалагчдад
  7. Сурагчийн цүнхийг авахдаа элдэв тоноглолгүйг сонгох;
  8. Хүүхдэдээ цүнх болон бичгийн хэрэглэлийг хөнгөн жин, эдэлгээ сайтай, эрүүл мэндэд сөрөг нөлөөгүй байхыг анхаарах;
  9. Хүүхдэдээ хичээлд шаардлагагүй зүйлс /тоглоом, үлгэрийн ном г.м/ өгч явуулахгүй байх;
  10. Хичээлийн хуваарийн дагуу сурах бичиг, дэвтэр, гарын авлага хичээлийн хэрэгслээ ялгахад туслах;
  11. Биеийн жинг хэмжиж, цүнхний нийт жин нь хүүхдийнхээ биеийн жингийн 10 хувиас хэтрүүлэхгүй байхад анхаарах;
  12. Сурагчийн үүрч буй цүнхийг нуруунд жигд ачаалал өгөхүйц хоёр мөрөндөө үүрч дадуулахад анхаарах;
Categories
онцлох-нийтлэл туслах-ангилал

Гол, усны ослоос урьдчилан сэргийлэхийг анхааруулж байна

Гол, мөрөн, нуур, тогтоол усны түвшин их, багаас үл шалтгаалан бага насны хүүхэд, иргэд усанд осолдох тохиолдол гарсаар байна. Он гарсаар улсын хэмжээнд 17 аймгийн 42 сум, нийслэлийн таван дүүрэгт нийт 63 удаагийн усны осол тохиолдож, 74 хүн амь насаа алдсан байна. Үүнээс 55 нь насанд хүрэгсэд, 19 нь хүүхэд байгаа юм.

Тухайлбал, Дорнод аймгийн Хэрлэн голд иргэн Д /13 настай, эрэгтэй/ ороод живсэн тухай дуудлагаар аймгийн Онцгой байдлын газрын Эрэн хайх, аврах ангийн алба хаагчид тус сумын “Найрамдал” цэцэрлэгт хүрээлэнгээс Баянтүмэн сумын “Улаан-Эрэг” хүртэл нийт 32 км-т “Хэрлэн” голын эрэг дагуу эрэн хайх ажиллагааг зохион байгуулж байна.

Мөн цаг уурын байгууллагаас ирүүлсэн мэдээллээр наймдугаар сарын 21-нд төв болон говийн аймгуудын нутгийн зарим газраар, 22-нд баруун аймгуудын нутгийн баруун хэсэг, говь, зүүн аймгуудын нутгийн зарим газраар, 23-нд баруун аймгуудын нутаг, төвийн аймгуудын нутгийн баруун хэсгээр, 24-нд баруун,төв,говийн аймгуудын нутгийн зарим газраар бороо орно.

Иймд иргэд, аж ахуйн нэгж, байгууллагууд амралт, чөлөөт цагаа өнгөрүүлэхдээ гол, усны ойролцоо амарч зугаалахгүй байх, нэгдсэн зохион байгуулалттай явах, бага насны хүүхдэд тавих хараа, хяналтаа сайжруулах, голын эрэг дагуу хүүхдийг явуулахгүй, тоглуулахгүй байх, аян замд явахдаа гол мөрний усанд орохгүй байх, тээврийн хэрэгслийн жолооч нар баталгаатай зам, гүүрээр зорчиж гол усанд унах, осолдох эрсдэлээс урьдчилан сэргийлэхийг Онцгой байдлын ерөнхий газраас анхааруулж байна.


Categories
мэдээ спорт

Б.Гэрэлмаа эхний хоёр тойрогтоо ялалт байгууллаа

Индонез Улсын Жакарта, Палембан хотод үргэлжилж буй 18 дахь удаагийн Азийн наадмын гурав дахь өдрөө үргэлжилж байна.

Дөнгөж сая туялзуур сэлэмний тамирчин Б.Гэрэлмаа эхний тойрогт олимп, ДАШТ-ий мөнгө, Азийн АШТ-ий хоёр алт, гурван мөнгөн медальтай, БНСУ-ын тамирчин Ч.Ижёныг 5:3-аар ялж, элэг нэгт түмнээ баярлууллаа.

Мөн удаах тойрогт Флиппиний тамирчинг 5:1-ээр хожсон юм.Улсын дөрвөн удаагийн аварга тэрбээр Инчоны Азийн наадамд шилдэг наймд шалгарч байсан юм.

Categories
мэдээ нийгэм

Байгалийн гамшгийн үед идэвх зүтгэлтэй ажилласан эрүүл мэндийн ажилтнуудыг шагналаа

Дорноговь аймгийн Айраг суманд 2018 оны наймдугаар сарын 11-ний өдөр хүчтэй усархаг аадар бороо орсны улмаас байгалийн гамшиг, үер усны аюулт үзэгдэл болсон. Улмаар, Дорноговь аймгийн Цомог-Айраг өртөөний хоорондын замын 747 дугаар километрийн есдүгээр зуутад төмөр замын суурь бүтэц эвдэрч суудлын галт тэрэг замаасаа гарсан осол болсон билээ.

Уг ослын үед мэргэжлийн өндөр ур чадвар гарган, идэвх зүтгэлтэй ажилласан эрүүл мэндийн ажилтнуудыг Эрүүл мэндийн яамны “Хүндэт тэмдэг, “Эрүүлийг хамгаалахын тэргүүний ажилтан” тэмдэг, Эрүүл мэндийн яамны “Жуух бичиг”-ээр шагнаж урамшуулжээ.

Эрүүл мэндийн яамны “Хүндэт тэмдэг”-ээр:

1.Ц.Янжмаа, Говьсүмбэр аймгийн нэгдсэн эмнэлгийн мэдээгүйжүүлэг, эрчимт эмчилгээний эмч

2.С.Уранцэцэг, Говьсүмбэр аймгийн нэгдсэн эмнэлгийн мэдрэлийн эмч

3.М.Мариймаа, Говьсүмбэр аймгийн нэгдсэн эмнэлгийн мэдээгүйжүүлэг, эрчимт эмчилгээний сувилагч

4.Б.Цэцэгмаа, Говьсүмбэр аймгийн нэгдсэн эмнэлгийн эмчилгээ эрхэлсэн орлогч дарга

5.А.Оюунцэцэг, Говьсүмбэр аймгийн нэгдсэн эмнэлгийн дүрс оношилгооны эмч

6.Ч.Долгордулам, Говьсүмбэр аймгийн нэгдсэн эмнэлгийн мэс заслын сувилагч

7.Э.Гэрэлцэцэг, Дорноговь аймгийн Сайншанд татах хэсгийн үйлдвэрийн эмч

8.Х.Эрдэнэбулаг, Дорноговь аймгийн нэгдсэн эмнэлгийн гэмтлийн эмч

9.Л.Баярмаа, Дорноговь аймгийн нэгдсэн эмнэлгийн эмчилгээ эрхэлсэн орлогч дарга

10.Б.Одгэрэл, Дорноговь аймгийн Айраг сумын эрүүл мэндийн төвийн сувилагч

11.Б.Алдармаа, Дорноговь аймгийн Айраг сумын эрүүл мэндийн төвийн эх баригч

12.О.Батцэнгэл, Дорноговь аймгийн Даланжаргалан сумын эрүүл мэндийн төвийн жолооч

“Эрүүлийг хамгаалахын тэргүүний ажилтан” тэмдгээр:

1.Ж.Болдбаатар, Говьсүмбэр аймгийн нэгдсэн эмнэлгийн эх барих, эмэгтэйчүүдийн эмч

2.Г.Солонготуяа, Говьсүмбэр аймгийн нэгдсэн эмнэлгийн чих, хамар, хоолойн эмч

3.Б.Одцэцэг, Говьсүмбэр аймгийн нэгдсэн эмнэлгийн хүүхдийн эмч

4.Г.Ганхуяг, Говьсүмбэр аймгийн нэгдсэн эмнэлгийн яаралтай тусламжийн сувилагч

5.Х.Баярсайхан, Говьсүмбэр аймгийн нэгдсэн эмнэлгийн үйлчлэгч

6.Д.Гантулга, Дорноговь аймгийн нэгдсэн эмнэлгийн гэмтлийн эмч

7.Н.Мөнхгэрэл, Дорноговь аймгийн Айраг сумын эрүүл мэндийн төвийн эмч

8.Э.Оюунсүрэн, Дорноговь аймгийн Айраг сумын эрүүл мэндийн төвийн бага эмч

9.Д.Цэндсүрэн, Дорноговь аймгийн шүүхийн шинжилгээний туслах ажилтан

10.Б.Буянбат, Дорноговь аймгийн Айраг сумын эрүүл мэндийн төвийн үйлчлэгч

ЭМЯ-ны “Жуух бичиг”-ээр:

1.Ө.Бямбажав, Дорноговь аймгийн Даланжаргалан сумын эрүүл мэндийн төвийн дарга

2.Б.Гэрэлцэцэг, Дорноговь аймгийн Айраг сумын эрүүл мэндийн төвийн багийн эмч

3.Б.Балбурам, Дорноговь аймгийн нэгдсэн эмнэлгийн унтуулгын сувилагч

4.Ж.Үнэнцэцэг, Дорноговь аймгийн Сайншанд татах хэсгийн бага эмч

5.Т.Ганхуяг, Дорноговь аймгийн нэгдсэн эмнэлгийн жолооч

6.Х.Түмэндэлгэр, Дорноговь аймгийн Даланжаргалан сумын эрүүл мэндийн тогооч

7.Н.Эрдэнэчимэг, Дорноговь аймгийн Даланжаргалан сумын эрүүл мэндийн төвийн бага эмч

8.Д.Зол-Ундрах, Дорноговь аймгийн Даланжаргалан сумын эрүүл мэндийн төвийн эмч

9.С.Дэлгэрцэцэг, Дорноговь аймгийн Айраг сумын эрүүл мэндийн төвийн үйлчлэгч

10.Ж.Идэрбаатар, Дорноговь аймгийн Айраг сумын эрүүл мэндийн төвийн сувилагч

11.Б.Оюун-Эрдэнэ, Дорноговь аймгийн Айраг сумын эрүүл мэндийн төвийн сувилагч

12.Э.Анхбаяр, Дорноговь аймгийн шүүхийн шинжилгээний шинжээч эмч

13.Б.Оюун-Эрдэнэ, Говьсүмбэр аймгийн нэгдсэн эмнэлгийн яаралтай тусламжийн эмч

14.Б.Цэцэгчимэг, Говьсүмбэр аймгийн Энхтусдэм өрхийн эрүүл мэндийн төвийн эмч

15.Б.Долгорханд, Говьсүмбэр аймгийн нэгдсэн эмнэлгийн яаралтай тусламжийн эмч

16.Б.Байгальмаа, Говьсүмбэр аймгийн нэгдсэн эмнэлгийн дотрын тасгийн сувилагч

17.Ж.Эрдэнэтогтох, Говьсүмбэр аймгийн нэгдсэн эмнэлгийн яаралтай тусламжийн жолооч

Categories
мэдээ соёл-урлаг

Алкохолгүй амьд хөгжмийн тоглолт хоёр дахь удаагаа боллоо

Нийслэлийн Засаг даргын хэрэгжүүлэгч агентлаг Залуучуудын хөгжлийн газар, “Цацрах эгшиг” ТББ-тай хамтран “Бодитоор мэдэрье, эерэгээр харъя” уриатай алкохолгүй амьд хөгжмийн хоёр дахь удаагийн тоглолтыг энэ сарын 19-ний өдөр “Дээврийн хөндий” бүжгийн клубт зохион байгууллаа.

Тус тоглолтыг мэдээллийн технологийн “Yesuimind” ХХК, “REDD” бэлэн хувцасны дэлгүүр, “MUSIC WORLD” амьд хөгжмийн дэлгүүр, “Анхны алхам” гэрэл зургийн студи дэмжин хамтран ажилласан юм.

Нийслэлийн Засаг дарга бөгөөд Улаанбаатар хотын Захирагчийн 2016-2020 оны үйл ажиллагааны хөтөлбөрийн хүрээнд “Нийслэлийн Залуучууд” дэд хөтөлбөрийг Нийслэлийн иргэдийн Төлөөлөгчдийн Хурлын Тэргүүлэгчдийн 2017 оны 158 дугаар тогтоолоор батлуулсан бөгөөд тус хөтөлбөрийн 2.2.4-т “Залуучуудын амралт, чөлөөт цаг өнгөрүүлэх орчин нөхцөл, үйлчилгээний хүртээмжийг нэмэгдүүлэх” зорилтын хүрээнд соёл, урлагийн шинэ хамтлаг, дуучин залуучуудыг дэмжих, тэдний уран бүтээлийг олон нийтэд сурталчлан таниулах, чөлөөт цагаа зөв боловсон, эрүүл орчинд өнгөрөөх нөхцөлийг бүрдүүлэх зорилгоор энэхүү тоглолтыг зохион байгуулсан юм.

Хорт зуршлаас татгалзахад уриалж буй тус тоглолтод поп, метал, альтернатив, панк болон рок урсгалын шинэ залуу 6 хамтлаг өөрсдийн санаачилгаар оролцов. Тоглолтыг нийт 100 орчим залуус үзэж, сонирхсон бөгөөд зорилтот бүлгийн залуучуудад энэхүү тоглолтыг үнэ төлбөргүй үзүүлсэн юм гэж нийслэлийн Залуучуудын хөгжлийн газраас мэдээллээ.

Categories
мэдээ нийгэм

Энэ хичээлийн жилд Мэргэжил сургалт үйлдвэрлэлийн төвийн элсэгчдийн тоог нэмэгдүүлнэ

Мэргэжлийн боловсрол сургалтын салбарын хувьд эн тэргүүнд анхаарах асуудал нь 2018-2019 оны хичээлийн жилийн элсэлт. Элсэлтийг зохион байгуулахдаа сургалтын байгууллагууд бүс орон нутгийн хөгжлийн бодлого, төлөвлөлт, хөдөлмөрийн зах зээлийн эрэлтээр баримжаалан төрөлжүүлэн хөгжүүлэх чиглэлийг түлхүү барьж ажиллах, МБС-ын салбарын үнэ цэнэ үнэлэмжийг өсгөх, нийгэмд эерэг ойлголт хандлагыг бий болгох, элсэгчдийг татах, нэмэлт элсэлтийг зохион байгуулах чиглэлээр тусгай төлөвлөгөө гаргаж ажиллах нэг үгээр боломж бүрийг бодит ажил болгох шаардлагатай гэлээ.

МСҮТ болон Политехник коллежийн захирлуудад цаг үеийн асуудлаар өвөлжилтийн бэлтгэлийг бүрэн хангах, анги танхим, сургалтын хэрэглэгдэхүүн, орчин нөхцлийн засвар үйлчилгээг төсвийн болон дотоодын нөөц бололцоогоор гүйцэтгэж, халаалтын системийн бүрэн бүтэн, доголдолгүй ажиллах нөхцөл бүрдүүлэх, сургалт явуулж буй мэргэжлийн чиглэл тус бүрээр сургалтын агуулгын залгамж, уялдааг хангаж, чанарын баталгаатай, үндэсний хэмжээнд хүлээн зөвшөөрөгдсөн, харилцан нийцтэй сургалтын стандарт, чадамжид суурилсан сургалтын хөтөлбөрүүдийг бий болгож мөрдүүлэх, үнэлгээний шинэчилсэн орчин, шинэ арга зүйг нэвтрүүлж ажиллах зэрэг үүргийг өгч төгсөгчдийг аймаг, орон нутагт тогтвор суурьшилтай ажлын байраар хангасан аж ахуйн нэгж байгууллага, ажил олгогчийг дэмжих, тэдний нийгмийн хариуцлагыг дээшлүүлэхэд чиглэсэн ажлыг орон нутгийн захиргааны байгууллагатай хамтран хэрэгжүүлэхэд анхаарч ажиллахыг даалгалаа.

Categories
мэдээ нийгэм

Д.Сумъяабазар сайд Өмнөд Монголд айлчиллаа

УУХҮ-ийн сайд Д.Сумъяабазар БНХАУ-ын Өвөр Монголын Өөртөө Засах Орны Хөгжил шинэтгэлийн хороо, Гаалийн байгууллагын удирдлагуудтай уулзлаа.

УУХҮ-ийн сайд Д.Сумъяабазар Монгол Улсын Засгийн газраас уул уурхайн салбарт баримталж буй бодлого, чиг хандлага болон Тавантолгойн нүүрсний ордын эдийн засгийн үр өгөөжийг нэмэгдүүлэх, Тавантолгойн дэд бүтцийн бүтээн байгуулалттай холбогдуулан БНХАУ-ын Өвөр Монголын Өөртөө Засаг оронд ажлын айлчлал хийсэн юм.

Энэ үеэр УИХ-аас баталсан “Тавантолгойн нүүрсний ордын үйл ажиллагааг эрчимжүүлэх талаар авах зарим арга хэмжээний тухай” 73 дугаар тогтоол, Засгийн газрын шийдвэрийн талаар танилцуулж, эдгээр тогтоол шийдвэрийг хэрэгжүүлэх ажил эхэлсэн байгааг дурдан харилцан санал солилцлоо. Хөгжил шинэтгэлийн хорооны зүгээс эдгээр шийдвэрийг дэмжин ажиллах, мөн Ханги-Мандал төмөр замын улсын хил нэвтрэх цэгийн асуудлыг Монголын талаас санал тавьж тохиролцоонд хүрэхээр ажиллаж байгааг уулзалтын үеэр илэрхийлсэн.

Талууд боомтын нэвтрүүлэх чадавхийг нэмэгдүүлэх, Ганцмод-Гашуунсухайт боомтоор тээвэрлэх нүүрсний хэмжээг 30 сая тоннд хүргэхэд хоёр талын идэвхитэй хамтын ажиллагаа болон эдгээр бүтээн байгуулалтыг “Нэг бүс нэг зам” санаачилга, “Хөгжлийн зам” үндэсний хөтөлбөрийн хүрээнд уялдуулан авч хэрэгжүүлэх шаардлагатай талаар харилцан санал солилцлоо.

Categories
мэдээ нийгэм

Авто замын хэвтээ тэмдэглэгээний ажлыг стандартын дагуу гүйцэтгэж байна

“Улаанбаатар зам засвар, арчлалтын газар” ОНӨААТҮГ-ын Үйлдвэрлэлийн алба авто замын хэвтээ тэмдэглэгээний ажлыг өнгөрсөн зургаадугаар сараас гүйцэтгэж эхэлсэн. Уг ажлын хүрээнд Энхтайваны өргөн чөлөө /Таван шарын төмөр замын гарамны уулзвараас-Ботаникийн нийтийн тээврийн эцсийн буудал хүртэл/, Чингисийн өргөн чөлөө /Төв шуудангийн уулзвараас 120-н аюулгүйн тойрог-Яармагийн гүүр/-ний авто замд нийт 12626 м2 хэвтээ тэмдэглэгээ хийж гүйцэтгэхээс одоогийн байдлаар 60 гаруй хувь буюу 7395.45 м2 хэвтээ тэмдэглэгээний ажлыг стандартын дагуу хийж гүйцэтгээд байна.

Ингэхдээ хуучин тэмдэглэгээг тусгай төхөөрөмжөөр бүрэн арилгаж, шинээр тэмдэглэгээ хийж байгаа нь ажлын явцыг удаашруулахад нөлөөлж байгаа юм. Нийт 2322.85 м2 хуучин тэмдэглэгээг арилгасан байна. Цаашид тэмдэглэгээний ажлын явцыг түргэсгэж, энэ сард багтаан дуусгах төлөвлөгөөтэй ажиллаж байна гэжУлаанбаатар зам засвар, арчлалтын газар” ОНӨААТҮГ-аас мэдээллээ.