Month: August 2018

Нийслэлийн Тээврийн газраас 2018-2019 оны хичээлийн шинэ жил эхэлж байгаатай холбогдуулан нийтийн тээврийн үйлчилгээ болон замын түгжрэлийг хэрхэн зохицуулах талаар мэдээлэл хийв.

Иргэдийн хөдөлгөөн эрс нэмэгдэж байгаатай холбогдуулан нийтийн тээврийн үйлчилгээний хүртээмжийг энэ сарын 25-наас 10 хувиар нэмэгдүүлэх аж. Ингэснээр ажлын өдөрт үйлчлэх нийтийн тээврийн хэрэгслийн 88 чиглэлд 959 автобус, троллейбус нэмэгдэх юм. Мөн шөнийн тээвэр болон зуслангийн үйлчилгээний тус бүр гурван чиглэлд 5-10 нийтийн тээврийн хэрэгсэл нэмэхээр болжээ.

Үүнээс гадна Шархад, Хужирбулан, Тахилт, Улаанхуаран, Их тойруу, Гачуурт, Дэнжийн 1000, Зайсан, Улиастайн суурьшлын цэгт үйлчлэх 12 нийтийн тээврийн шугаманд цагийн хуваарийн өөрчлөлт оруулж, уртасгасан цагаар хуваарийн дагуу ажиллуулах юм.

Энэ талаар Нийслэлийн Тээврийн газрын орлогч дарга Х.Булгаа “Автобуснуудын тоог нэмэгдүүлж зохицуулалт хийснээр автобус хоорондын хугацаа богиносож, хот доторх автобусны хүлээлтийн хугацаа ойролцоогоор 7-8 минут болно. Мөн тээврийн хэрэгслийн стандартын хэрэгжилтэд хяналт тавьж, тээврийн хэрэгслийн өнгө үзэмж, цэвэрлэгээ, техникийн бүрэн бүтэн байдал, үйлчилгээний соёлыг дээшлүүлэх зорилгоор ажиллаж байна. Илэрсэн зөрчлийг арилгуулах зорилгоор Нийслэлийн тээврийн газрын автотээврийн хяналтын улсын байцаагч нар хуваарийн дагуу ажиллаа” хэмээв.

Мөн ЕБС, цэцэрлэгийн хүүхдийн автобусанд хамтарсан шалгалт хийсэн байна. Шалгалтад нийслэлийн долоон дүүргийн 54 сургууль, хоёр цэцэрлэгийн нийт 124 автобус хамрагдах ёстой байжээ. Гэвч 36 сургуулийн 46 автобусанд үзлэг шалгалтын ажлыг хийсэн байна. Үүнийг өмнөх оныхтой харьцуулахад
шалгалтад хамрагдсан хүүхдийн автобусны тоо 43.9 хувиар буурсан байгаа аж. Шалгалтанд хамрагдсан 46 автобус насжилтаар 100 хувь, 27 автобус шаардлагын дагуу шар өнгөтэй байсан. Харин ердөө 13 автобус техникийн бүрэн бүтэн байдлын шаардлагыг хангасан тул үйл ажиллагаагаа үргэлжлүүлэх “Хүүхдийн автобус”-ны зөвшөөрлөө авчээ.

З.МӨНХСУВД

Дэлхийн хүмүүс өдөрт дунджаар 2 цагийг сошиал медиад өнгөрүүлдэг байна. Сошиал ертөнцийг байлдан дагуулж буй сувгуудын тухай тоон мэдээллийг хүргэе. Энэ их тоон дунд таныг алмайруулан гайхшруулах, өөртөө дүгнэлт хийхүйц, ажил хэрэгтээ ашиглаж болох зүйлс ч цөөнгүй бий.

ЗГХЭГ-аас томилогдсон ажлын хэсэг 13 яам, 12 агентлаг, НЗДТГ-т “Сахилга хариуцлага, дэг журмыг чангатгах тухай Засгийн газрын албан даалгаврын биелэлтийг өнгөрсөн долоо хоногт шалгав. Мөн Төрийн Тусгай хамгаалалтын газраас тусгай хамгаалалттай төрийн захиргааны 18 байранд согтууруулах ундаа, тэсэрч дэлбэрэх бодис, хүйтэн зэвсэг зэрэг хууль бус эд зүйлс хадгалж байгаа эсэхэд үзлэг хийв. Эдгээр шалгалтын дүнг нэгтгэж өнөөдөр ЗГХЭГ-ын дарга Г.Занданшатар яамдын дэд сайд, төрийн нарийн бичгийн дарга нарт танилцуулж, холбогдох үүрэг даалгавар өглөө.

Хөдөлмөр, нийгмийн хамгааллын сайдын тушаалаар “Залуучуудын хөгжлийн сар” аяныг наймдугаар сарын 24-нөөс есдүгээр сарын 25-ны хооронд зохион байгуулахаар баталсан.

Энэхүү сарын хугацаанд Хөдөлмөр, нийгмийн хамгааллын яам, Засгийн газрын хэрэгжүүлэгч агентлаг Гэр бүл, хүүхэд, залуучуудын хөгжлийн газар, нийслэлийн Засаг даргын хэрэгжүүлэгч агентлаг Залуучуудын хөгжлийн газар, 21 аймгийн Гэр бүл, хүүхэд, залуучуудын хөгжлийн газар болон олон улсын байгууллага, иргэний нийгмийн төлөөлөл байгууллагууд нийт 24 үйл ажиллагааг хамтран зохион байгуулахаар боллоо.

Тус аяны зорилго нь залуучуудын хөгжлийг дэмжих тухай хуулийн талаар залуучууд, иргэд, олон нийтэд сурталчлан таниулах, хуулийн хэрэгжилтийг хангахаар аймаг, нийслэл, сум, дүүрэгт байгуулагдсан “Залуучуудын хөгжлийн төв”-ийн үйл ажиллагааг танилцуулан, эрчимжүүлэх, төр, олон улсын байгууллага, иргэний нийгмийн байгууллагууд хамтран ажиллан, асуудлыг оновчтой шийдвэрлэж болдог сайн туршлагыг үлгэрлэхэд оршиж байна.

Нийслэлийн Залуучуудын хөгжлийн газрын дарга С.Сүх-Очир: “Залуучуудын хөгжлийн сар” аяны хүрээнд залуучуудын санаачилга, идэвх оролцоо, нийгэмд оруулж буй хувь нэмрийг олон нийтэд таниулан сурталчлах, нийгэмд тулгамдаж буй асуудлыг залуучуудын хүч, идэвх оролцоо, санал санаачилгаар хэрхэн шийдвэрлэх талаар хамтдаа хэлэлцэн, нэгдсэн шийдвэрт хүрэх ач холбогдолтой олон талт үйл ажиллагааг зохион байгуулна.

Монгол Улсын Ерөнхий сайд У.Хүрэлсүх санаачлан захирамж гарган Газрын шинэтгэлийн Үндэсний хороог байгуулан даргалж байна. Энэхүү хороо нь Монгол Улсын нутаг дэвсгэрийн хэмжээнд газрын шинэтгэлийн чиглэлээр УИХ, ЗГ-аас баталсан хууль, тогтоомж бодлогын баримт бичиг, үйл ажиллагааны төлөвлөгөө болон ОУ-ын гэрээний хэрэгжилтийг хангуулж, нэгдсэн удирдлагаар удирдан зохион байгуулахтай холбогдсон үйл ажиллагааг зохицуулах үүрэгтэй юм. Тус хороо нь өнөөдөр/2018.08.20/ анх удаа хуралдаж, хуралдааны дэгийг баталж, Газрын шинэтгэлийн Үндэсний хорооны үйл ажиллагааны төлөвлөгөө, Улсын газар зохион байгуулалтын ерөнхий төлөвлөгөөний төслийн хэлэлцүүлэг явуулав. Газрын шинэтгэлийн Үндэсний хороонд яамдын сайд нар болон чиглэлийн агентлаг, газрын удирдлагууд багтаж байгаа юм.

Монгол Улсын Ерөнхиий сайд, Газрын шинэтгэлийн Үндэсний хорооны дарга У.Хүрэлсүх хэлэхдээ, Улсын хэмжээнд газрын хэрэглээ, эзэмшил, өмчлөлтөй холбоотой шинэ тутам үүсч байгаа харилцааг зохицуулах, түүнийг дагасан бусад нийгмийн харилцаануудыг зохицуулах нэгдсэн зохион байгуулалт хийх шаардлага тулгамдаад байна. Газар бол Улсын тусгаар тогтнон орших үндэс. Сүүлийн жилүүдэд газар олголт эмх замбараагүй явагдснаас үүдэн дагалдах олон хүндрэл гарч байгааг зайлшгүй цэгцлэх цаг болсон. Газраас үүдэн хот хөдөөгүй иргэд хоорондын маргаан гарч цаашлаад хүний амь нас эрүүл мэнд ч хохирч болзошгүй байна. Үүнийг бид тал талаас нь авч хэлэлцэн уялдаа холбоотой нэгдсэн бодлого явуулж, богино хугацаанд зохицуулах хэрэгтэй байна. Тухайлбал энэ жил Засгийн газраас газар тариалангийн бүс нутгийг тогтоосон. Хүн амыг тариа будаа, хүнсний ногоогоор хангаж, малын тэжээл үйлдвэрлэж буй энэ салбараа хөгжүүлэх ёстой. Малчид олон нийттэй ойлголцох шаардлагатай. Энэ бол хорооны хийх ажлын нэг хэсэг. Үүн шиг эхлээд Монгол Улсынхаа нийт газар нутгийг газар ашиглалтын зориулалтаар нь тооллого явуулж, бүртгэх, нэгдсэн мэдээллийн санг шинэчлэн байгуулах хэрэгтэй байна гэв.

Мөн иргэдийн газрын тухай багц хуулийн талаарх мэдлэг мэдээллийг нэмэгдүүлэх шаардлагатай. Хууль зөрчсөн иргэд, аж ахуй нэгжид хариуцлага тооцож, зөвшөөрөгдөөгүй газар эзэмшиж өмчилсөн тохиолдолд хурааж авах зэрэг арга хэмжээг явуулах нь зүйтэй гэж хорооны гишүүд үзлээ. Жишээлбэл Хөвсгөл аймагт 137 аж ахуйн нэгжид хуулийн дагуу 160 гаруй мянган га газар өмчлөх, эзэмших байдлаар олгосон байтал тэд нийт 600 мянган га газрыг хашаалж авсан байна. Энэ нь иргэд хуулиа зөрчиж байгаагийн нэг илрэл. Ийм тохиолдол цөөнгүй байгаа учир иргэдийн илүү хашаалж авсан газрыг улс буцаан хурааж, газар авах хүсэлтэй бусад иргэддээ тэгш боломж олгох ёстой гэв.

Хуралд оролцогчид Газрын шинэтгэл Үндэсний хорооны 2018 оны үйл ажилалгааны төлөвлөгөөнд Монгол улсын газар нутгийг газар ашиглалтын зориулалтаар нь тооллого явуулах, мэдээллийн санд бүртгэх, газар зүйн нэрийн үндэсний зөвлөл байгуулах, засаг захиргаа, нутаг дэвсгэрийн нэгжийн хилийн цэс тогтоосон байдлыг нягтлах, гудамж, зам талбай, үл хөдлөх эд хөрөнгийн хаягийг иргэний болон хуулийн этгээдийн хаягтай уялдуулах, мэдээллээ саадгүй солилцох “Хаягийн мэдээллийн нэгдсэн систем”-ийг байгуулах, төрөөс газрын харилцааны талаар баримтлах бодлогын төслийг хэлэлцэх, геодези, зураг зүйн талаар төрөөс баримтлах бодлогын төслийг хэлэлцэх, газрын талаарх хууль эрх зүйн орчинг боловсронгуй болгох, газар, үл хөдлөх хөрөнгийн дундын нэгдсэн мэдээллийн сан байгуулах, газрын үнэлгээ, татвар, төлбөрийн оновчтой тогтолцоог бий болгох зэрэг асуудлыг тусган батлав гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Монголын нүүдэлчин ахуй соёл, ёс заншил, өнө эртнээс уламжилсан өв уламжлал, түүхийг элсний спортын арга хэмжээтэй хослуулсан шинэ эвентийг бий болгож дотоод, гадаадын жуулчдад сурталчлах замаар, аялал жуулчлалыг хөгжүүлэхээр элсний фистиваль арга хэмжээг Говь-Алтай аймаг дөрөв дахь жилдээ зохион байгуулж байна.

Арга хэмжээ Говь-Алтай аймгийн Жаргалан сумын байгалийн үзэсгэлэнт цогцолбор газар болох Монголын их элсний үргэлжлэл Эрээн нуурын хөвөөнөө зохиогдлоо. Үүний зэрэгцээ үндэсний сурын харвааг орон нутагт хөгжүүлэх, өв соёлоороо бахархах, олон нийтэд түгээн дэлгэрүүлэх зорилгоор Алтайн 1000 харваач зэвт харвааны наадам зохиогдлоо.

Цаст Алтай нутгаас төрөн гарсан анхны эрэгтэй мэргэн Говь-Алтай аймгийн Бугат сумын харьяат Монгол Улсын мэргэн “Засагт Хан” клубын ерөнхий дасгалжуулагч Б.Дашзэвэгт хүндэтгэл үзүүлэх цуваа харваа зохион байгуулагдлаа.

Төрийн их баяр наадмаар үндэсний сурын харваанд 40 сумнаас 37 онож, Алтай нутгаас төрөн гарсан анхны эрэгтэй Монгол Улсын мэргэн цол хүртсэн Б.Дашзэвэгт хүндэтгэл үзүүлж, УИХ-ын гишүүн, хууль зүйн байнгын хорооны дарга Ш.Раднаасэд хоёр өрөө байрны эрхийн бичиг гардуулж, аймаг орон нутгийн удирдлагууд Говь-Алтай аймгийн хүндэт иргэнээр тодорсон тул өргөмжлөл мөнгөн шагналыг гардуулж өглөө.

Монголдоо анх удаа гэж хэлж болохуйц 60 гаруй мянган хүн амын 1000 хүн нэгэн зэрэг харвана гэдэг ховор тохиол юм. Цаашлаад энэхүү арга хэмжээг дэлхийн өв буюу геннист бүртгүүлэх хүсэлтээ Алтайчууд гаргаад байгаа юм. Уг арга хэмжээнд Говь-Алтай аймгийн 1000 харваачаас гадна мэргэжлийн 300 гаруй харваач оролцож, цэц мэргэнээ сорилоо.

Энэ үеэр дотоод, гадаадын жуулчид, элсний спорт, урлаг судлаач эрдэмтэд, уран бүтээлчид, сонирхогчид, зочид төлөөлөгч, харваачид, иргэд өргөнөөр оролцлоо. Цаашлаад уг арга хэмжээг олон улсын хэмжээнд зохион байгуулахаар болж байгаа нь онцлог байлаа.

Алтайн 1000 харваач сурын харвааны тэмцээнд сум тус бүрээс 50 харваачийг тусгайлан бэлтгэн оролцуулж нийтдээ 1000 харваач нэгэн дор чуулсан сэтгэл бахдам томоохон арга хэмжээнд нийслэл хот төдийгүй, хөрш зэргэлдээх аймаг орон нутгийн 300 гаруй мэргэжлийн мэргэн харваачид ирж оролцлоо.

Байт сурын харвааны төрөлд Говь-Алтай аймгийн Халиун сумын баг тамирчид тэргүүлж, Баян-Уул сумын баг тамирчид хоёр, Есөнбулаг сумын баг тамирчид гурав, Шарга сумын баг тамирчид дөрөв, Эрдэнэ сумын баг тамирчид тавдугаар байрт шалгарлаа.

Нийслэлийн Хүүхэд, гэр бүл хөгжлийн газар, Залуучууд хөгжлийн газар Кристина Ноблийн хүүхдийн сантай хамтран ажилласаар ирсэн юм. Тус сангаас “Боловсролын Тэтгэлэг Олгох Хөтөлбөр”-өөрөө дамжуулан 17 дахь жилдээ нийслэлийн есөн дүүрэг, Булган, Орхон аймгийн манлайлагч хүүхэд, залуучуудад дээд боловсрол эзэмших боломжийг олгож байна.

2001 оноос хойш зохион байгуулагдсан энэхүү хөтөлбөрт нийт 659 оюутан залуус хамрагдаад байгаа аж. Тус сангаас эдгээр оюутан залууст нийт 600 орчим сая төгрөгийн тэтгэлэг олгожээ. Тэтгэлэгт хамрагдсан залуус дээд сургууль, коллеж, мэргэжил сургалт үйлдвэрлэлийн төвүүдийг амжилттай дүүргэж, 100 хувь мэргэжил эзэмшсэн байна. Харин 2018-2019 оны хичээлийн жилд нийт 46 хүүхэд залуучуудад 50-100% тэтгэлэг гардууллаа. Эдгээр 46 хүүхдийг сурах эрмэлзэл, идэвхи санаачлага, ар гэрийн боломжийг харгалзан үзэж, хоёр үе шаттайгаар шалгаруулан, сонгосон байна гэж нийслэлийн Хүүхэд, гэр бүл хөгжлийн газраас мэдээлэв.

Дархан-Уул аймагт таван настай охин ор сураггүй алга болсон. Тодруулбал, энэ сарын 19-ний өдөр Дархан-Уул аймгийн Дархан сумын 3 дугаар багийн “Ширээ нурууны нутаг” гэдэг газар буюу сумын төвөөс баруун хойд зүгт 5 км-т тус сумын харьяат Э гэгч 5 настай охин гэрээсээ гараад сураггүй болжээ. Алга болсон охиныг “Хараа” голын усанд живсэн байж болзошгүй тухай дуудлага орон нутгийн Онцгой байдлын албанд ирсэн байна.

Дуудлагын дагуу тус аймгийн Онцгой байдлын газрын Эрэн хайх, аврах ангийн 6 алба хаагч, Цагдаагийн байгууллагын 82 алба хаагч, орон нутгийн 24 иргэн, нийт 112 хүн, 11 техник хэрэгсэлтэйгээр тус багийн “Ширээ нурууны нутаг”, Орхон сумын “Бүрэн толгой”, Сэлэнгэ аймгийн Хушаат сумын “Хараа” голын гүүр хүртэл 52 км-т эрэн хайх ажиллагааг зохион байгуулжээ.

Гэтэл охиныг нэгэн иргэн хулгайлсан байжээ. Уг этгээдийг цагдаагийн байгууллагаас илрүүлэн шалгалтын ажиллагаа үргэлжилж байгаа гэв.

Үндсэн хуулийн цэцийн дунд суудлын хуралдаанаар УИХ-ын тогтоол Үндсэн хууль зөрчсөн эсэх асуудлыг хэлэлцэж байна.

Нэр бүхий иргэд Үндсэн хуулийн цэцэд хандаж “Монгол Улсын Их Хурлын сонгуулийн 42 дугаар тойрогт нөхөн сонгууль товлон зарлах, санал авах өдрийг тогтоох тухай” УИХ-ын 62 дугаар тогтоол нь Үндсэн хуулийн хэд хэдэн заалтад нийцээгүй байна гэсэн өргөдөл гаргасан. Гомдол гаргасан тогтоолд УИХ-ын сонгуулийн 42 дугаар тойрогт нөхөн сонгууль товлон зарлах, санал авах өдрийг тогтоохдоо иргэний тэгш байдлын зарчмыг алдагдуулж, зарим иргэдийн сонгогдох эрхийг зөрчсөн хэмээн тэд үзэж, гомдол гаргаад байгаа юм.
Цэцийн хуралдаанд гомдол гаргасан иргэд болон УИХ-ыг төлөөлж, УИХ-ын гишүүн Д.Лүндээжанцан оролцож байна.