Month: August 2018

Автотээврийн үндэсний төв ТӨҮГ, НМХГ-ын Агаарын хэлтэс хамтран “Тээврийн хэрэгслээс үүдэлтэй агаарын бохирдол” сэдэвт сургалтыг автотээврийн хяналтын байцаагч, инженер техникийн ажилтнууд болон нийтийн тээвэрт үйлчилдэг аж ахуйн нэгж байгууллагын ажилтан албан хаагчдаас бүрдсэн 60 гаруй төлөөллийг хамруулан зохион байгуулжээ.Төрийн хяналт-Иргэн таны төлөө сарын аяны хүрээнд зохион байгуулагдаж буй тус сургалт нь автотээврийн салбарт хяналт тавьж ажиллах мэргэжлийн боловсон хүчнийг чадавхижуулах, агаарын бохирдлыг бууруулахад байцаагчдын оролцоог нэмэгдүүлэх зорилготой юм байна.

Сургалтаар автотээврийн хэрэгслээс үүдэлтэй агаарын бохирдол, түүнийг бууруулахад авч хэрэгжүүлэх арга хэмжээ, автотээврээс үүдэлтэй агаарын бохирдлыг бууруулах арга зам, евро стандартын тухай ойлголт, олон улсын тээвэрт тавих хяналт зэрэг сэдвүүдээр мэргэжил арга зүйн зөвлөгөө, мэдээлэл өглөө.

Нийтийн зорчигч тээврийн үйлчилгээний хөлс төлөлтийн байдалд тавих хяналтыг сайжруулах, холбогдох хууль, дүрэм журмыг олон нийтэд таниулах, мэдээлэл сурталчилгаа хийх, зөвлөмж материал тараах, үйлчилгээний соёлыг дээшлүүлэх, илэрсэн зөрчлийг арилгуулах зорилгоор “Нийтийн зорчигч тээврийн үйлчилгээний хөлс төлөлтийн байдалд хяналт тавих хамтарсан шалгалтын удирдамж”-тай ажлыг энэ сарын 20-31-ний өдрийн хооронд хоёр үе шаттайгаар Нийслэлийн Тээврийн газрын Автотээврийн хяналтын улсын байцаагч, Улаанбаатар смарт карт ХХК, Зорчигч тээврийн нэгтгэл ОНӨААТҮГ, Ситибаз консалтинг ХХК-ийн шалгагч нар хуваарийн дагуу хийж байна.

Нэгдүгээр үе шат наймдугаар сарын 20-ны өдрөөс наймдугаар сарын 26-ны өдрийг дуустал хугацаанд мэдээлэл хүргэх ажил хийгдэж байна. Харин хоёрдугаар үе шат наймдугаар сарын 27-31-ний өдрийг дуустал хугацаанд хяналт шалгалтын ажил хийгдэнэ.

Хөвсгөл аймгийн Их-Уул сумын нутагт долдугаар сарын 19-ний өдөр орсон аадар бороо орсны улмаас үер бууж, 181 айл, өрх усанд автаж, 169 хашаа нурсан байна. Гамшгийн хор уршгийг арилгах, хойшлуулшгүй сэргээн босгох ажиллагааны хүрээнд нийтийн эзэмшлийн 15,5 га талбай, 1,2 км үерийн даланг засварлах, 1,4 км үерийн суваг шуудуу ухах ажлыг хийж гүйцэтгэсэн бөгөөд нийт 10 гаруй сая төгрөгийг аймгийн Онцгой комиссоос зарцуулжээ.

Цаашид үерт өртсөн айл өрх болон нийтийн эзэмшлийн 32,8 га талбайд ариутгал халдваргүйтэл хийх, лаг шаврыг цэвэрлэх, үерийн далан сэргээн засварлах ажлуудыг зохион байгуулахад 31,1 сая төгрөгийн хөрөнгө шаардлагатай байгаа аж. Тиймээс Улсын Онцгой комиссоос 20 сая төгрөгийг шийдвэрлэхээр болсон.

Харин Энэтхэг улсаас Монгол Улсад суугаа Онц бөгөөд бүрэн эрхт Элчин сайд Суреш Бабу, Их-Уул сумын засаг дарга Н.Амараатай уулзан, Энэтхэгийн Засгийн газраас 20 сая төгрөгийн тусламж үзүүлэхээр болж, талууд ойлголцлын гэрээнд гарын үсэг зурсан байна гэж Онцгой байдлын ерөнхий газраас мэдээллээ.

“Улаанбаатар зам засвар, арчлалтын газар” ОНӨААТҮГ нь авто замын нөхөөс, ан цав хагарлыг засварлах ажлын хүрээнд Чингисийн өргөн чөлөө, Энхтайваны өргөн чөлөөний 17000 м2 ан цав, заадсыг гэрээт хугацаандаа бүрэн засварлажээ. Тус газар нь авто замын ан цавыг мастикаар хоёр дахь жилдээ засварлаж байгаа юм.

Өмнөх жилүүдэд заадас засварлах ажилд битум хэрэглэдэг байсан юм. Битумын дэгдэмхий элментүүд засварын ажил гүйцэтгэсний дараа агаарт их хэмжээгээр дэгдэж ууршин агаарын бохирдол үүсгэдэг байсан. Мөн агаарын температур нэмэгдэн хэт халалт үүсэхэд битум уярч, тээврийн хэрэгслийн дугуйнд наалдан засварын ажлыг үр дүнгүй болгох, зорчих хэсгийг бохирдуулах, замын хэвтээ тэмдэглэгээг хар болгох зэрэг дутагдалтай талууд их байсан. Нөгөөтэйгүүр ан цавд битум цутгасны дараа эрдэс нунтгийн хольцтой элсэн хучилт хийх шаардлагатай байдаг бөгөөд хотын авто замын хөдөлгөөний ачааллаас шалтгаалж, тээврийн хэрэгслийн хөдөлгөөнийг нээсний дараа дугуйны эргэлтийн цохилтын нөлөөллөөр гудамж замаар элс тарж, орчныг бохирдуулдаг байсан. Битум нь суналтын бат бэх чанар муу учир өвлийн улиралд тасарч, эвдэрдэг зэрэг олон дутагдал байсан учир шинэлэг, үр ашигтай технологиудыг судласны дүнд 2017 оноос эхлэн мастикыг туршиж, үйл ажиллагаандаа ашиглаж байна.

Мастик нь газрын тосны битум, резин, бусад химийн нэмэлт элментүүдийн нэгдэл бөгөөд халуун хүйтэнд буюу температурын нөлөөлөлд сайн ажилладаг суналт, агшилт сайтай төдийгүй -10-40 градусын хүйтэнг тэсвэрлэх чадвартай сүүлийн үеийн шинэ технологийн бүтээгдэхүүн юм. Энэ онд авто замын ан цав, хагарлыг мастикаар гүйцэтгэхдээ механикжсан төхөөрөмж ашиглаж байгаа нь олон талын давуу талыг агуулж байна. GF-100L төхөөрөмж иж бүрдэл нь замын заадас, хагарал хөрөөдөх хөрөө болон нөхөх мастик цутгах тоног төхөөрөмжөөс бүрдэнэ. Тоног төхөөрөмж нь мастикийг халаах болон температурыг технологийн зохист хэмжээнд барих, температурын алдагдал үүсгэлгүй авто замын ан цавд мастикийн цутгадаг. Зориулалтын төхөөрөмж ашиглан ажил гүйцэтгэснээр +180С хүртэл халсан халуун мастиктай ажиллаж байгаа ажилтнуудын аюулгүй байдлыг бүрэн хангахаас гадна хөдөлмөрийн бүтээмжийг нэмэгдүүлж байгаа юм гэж “Улаанбаатар зам засвар, арчлалтын газар” ОНӨААТҮГ-аас мэдээллээ.